Vignir Vatnar vann Rússa í fimmtu umferð

Vignir Vatnar Stefánsson (1595) hefur gengið vel að eiga við rússneska skákmenn á HM ungmenn sem nú fer fram í Maribor í Slóveníu. Í fimmtu umferð, sem fram fór fyrr í dag, vann hann Ivan Kharitonov (1773). Í dag verður tvöfaldur dagur og í síðari umferð dagsins mætir hann Vitaly Gurevich (1860).

Vignir hefur 3½ vinning og er í 23.-43. sæti.

Alls taka 192 skákmenn þátt í flokki Vignis og er Vignir nr. 91 í stigaröð keppenda.  Honum til aðstoðar er Helgi Ólafsson.

• Heimasíða mótsins
• Beinar útsendingar (10 efstu borðin)
• Chess-Results

 

 

Atskákmót Íslands 2012 - Minningarmót um Sturlu Pétursson verður haldið um næstu helgi

Atskákmót Íslands 2012 - Minningarmót um Sturlu Pétursson

Verður haldið daganna 16.-18. nóvember n.k

Mótið verður  í senn minningarmót um Sturlu Pétursson skákmeistara.

Staðsetning Hlaðan Gufunesbæ Gufunesvegi 112 Reykjavík (sjá á korti)

http://ja.is/kort/#q=index_id%3A1488810&x=363331&y=407608&z=9

Tímamörk eru 25 mín á skák

Þátttökugjald er 1.000 krónur fyrir 16 ára og yngri, 2.000 krónur fyrir 16 ára og eldri

Fyrirkomulag verður með sama sniði og í fyrra. Fyrst verða tefldar 7 umferðir. Fjórir efstu tefla síðan í undanúrslitum tvær skákir með sitthvorn litinn.

Verðlaun

1.      100.000

2.      50.000

3.      25.000

4.      25.000

Einnig verða veittir bikarar fyrir bestan árangur unglinga, kvenna og öldunga. 

Aðalstyrkaraðli mótsins er Gúmmívinnustofan Skipholti

Sigurvegari mótsins hlýtur nafnbótina Atskákmeistari Íslands.

 

Dagskrá mótsins

Föstudag 16.11

19:30 - 22:30 1-3 umferð

Laugardagur 17.11

13:00 -16:30 4-7 umferð

Sunnudagur 18.11

13:00 - 15:00 Undanúrslit

Stefnt er að því að úrslitaeinvígið fari fram í beinni útsendingu á RÚV

Skráning fer fram hér á Skák.is.

Hægt er að sjá skráða keppendur hérna

https://docs.google.com/spreadsheet/ccc?key=0AiyZI3bNVvoCdHJyRG4zZXdmdWxZa0ZJMTJuSU5zaUE#gid=0

Gallerý Skák: Skákgeggjarar - Sigfúsar Jónssonar minnst

Eins og svo oft og endranær lagði hópur skuggalegra skákþyrsta garpa leið sína í Gallerý Skák á sl. fimmtudagskvöld til að berjast þar drengilega á banaspjótum á hvítum reitum og svörtum. Samt á tiltölulega vinalegum nótum að þessu sinni í tilefni af alþjóðlega eineltisdeginum, þegar allir eiga að vera góðir við alla en ekki öfugt eins og nafnið gæti bent til.  Allir sem einn eru þessir „skákgeggjarar"  með snert eða illa haldnir af skákdellu sem svo var kölluð í gamla daga en flokkast nú undir „skákástríðupersónuleikastreituröskun" eða enn lengri orðaleppa innan geðlæknisfræðinnar.  

Að þessu sinni var gert hlé á mótaröðinni sem verið hefur í gangi um Patagóníusteininn. Nú var fyrst og fremst teflt um það hver væri einna snjallastur eða í bestu dagsformi og alveg sértaklega fyrir fegurðina til minningar um fallinn félaga, Sigfús Jónsson, sem mótið var helgað.

Áður en sest var að tafli kvaddi formaður sér hljóðs og minnist hins látna heiðurmanns, sem lagður hafði verið til hinstu hvíldar þá fyrr um daginn.  SIGFÚS JÓNSSON (68) var hörkugóður skákmaður,  lögfræðingur að mennt og áður innkaupastjóri Reykjavíkurborgar. Hann var ötull og öflugur skákmaður allt frá unga aldri og naut þess að vel tefla í góðra vina hópi, einkum að tjaldabaki, eins og svo ótal margir aðrir liðtækir iðkendur skáklistarinnar.  Sigfús og jafnaldri hans Harvey Georgsson hófu að tefla saman hjá TR niður í Grófinni 1 áður en það ágæta félag fékk inni í Breiðfirðingabúð á 6. áratug liðinnar aldar.  Í lagadeild Háskóla Íslands var líka mikið teflt á bakvið tjöldin að sögn Kristjáns Stefánssonar, hrl.,  sem var Sigfúsi samskóla. Meira segja okkar ágæti Guðmundur Sigurjónsson, síðar stórmeistari, fékk stundum að kenna á því líka að Sigfús var slyngur skákmaður. Sú saga er höfð eftir Guðjóni Magnússyni, lögfræðingi,  að einhverju sinni hafi þeir hist Guðmundur og Sigfús og ákveðið að taka 4 léttar og Sigfús unnið þær allar. Þetta þóttu nokkur tíðindi til næsta bæjar, þó leynt færi.   Sigfús, Kristján, Harvey, Andrés Fjeldsted, Guðmundur Markússon, Guðmundur Þórðarson, Árni Einarsson, Björn Karlsson, Pétur Nagel Eiríksson og fleiri góðir menn voru saman í skákklúbbi um langt árabil og buðu heim til skiptis. Sama gilti um annan klúbb, sem senn á 50 ára afmæli sem í voru eða eru auk Harveys, Gunnar Birgisson, Gunnar Finnsson, Bragi Halldórsson, Jóhannes Lúðvíksson, Jón G. Briem og fleiri sterkir skákmenn.  Þá tefldi Sigús á sínum tíma í Stofnanakeppninni fyrir hönd SVR.  Eftir að Sigfús varð að hægja ferðina vegna heilsubrests fyrir nokkrum árum hvatti Kristján hann til að sækja KR-klúbbinn, síðan lá leið Sigfúsar í Riddarann og svo í Æsi og Gallerýið þar sem hann var jafnan aufúsugestur.   Sigfús Jónson naut virðingar í allri viðkynningu fyrir sína ljúfu lund enda afar geðþekkur og eftirminnilegur maður, sem af er mikill sjónarsviptir.   Viðstaddir vottuðu hinum látna virðingu sína með stuttri þögn.  Stillt var  á gamla skákklukku og hún látin tifa og ganga út á meðan á mótinu stóð til táknrænnar minningar um góðan dreng genginn.   

Síðan hófst taflið. Enda þótt ekki væri keppt um grjótið langtaðkomna mættu menn engu að síður grjótharðir til leiks og gáfu ekkert eftir fyrr en í fulla hnefanna þó ætlast væri til annars. Stundum getur það  verið kvalræði að tefla skák, einkum ef illa gengur eða stöður gerast flóknar, þá er eins gott að halda stillingu sinni og jafnaðargeði og forðast að láta  sálræn-skákkvíðapersónuleikastreituhliðrunarhugröskunareinkenni eða aðrar sálfræðilegar flækjur og  geðraskanir ná tökum á sér.   Skákíþróttin er ekki heiglum hent nema síður sé.

Úrslit kvöldsins má sjá á meðfl. mótstöflu, sem klippt hefur verið neðan af gustugaskyni við þá sem minnst báru úr bítum í þetta sinnið en nutu þess samt í botn að vera með þrátt fyrir mislukkaða snilldartakta. Ýtt verður á klukkurnar að nýju þegar degi hallar að viku liðinni.      

ESE - 11.11.12

 

 

Hraðkvöld hjá Helli í kvöld

Taflfélagið Hellir heldur hraðkvöld mánudaginn 12. nóvember nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Sigurður A sigraði á stundarfjórðungsmóti

Í dag fór fram skákmót í húsakynnum Skákfélags Akureyrar Umhugsunartími á hverja skák var 15 mínútur á mann. 9 keppendur voru skráðir til leiks og var keppnin bæði jöfn og spennandi. Lokastaðan varð sú að Sigurður Arnarson sigraði með 7 vinninga af 8 mögulegum. Hann tapaði aðeins fyrir Sigurði Eiríkssyni, sem endaði í 2. sæti með 6,5 vinning.

Jafnir í 3.-4. sæti urðu Hjörleifur Halldórsson og Haraldur Haraldsson með 5,5 vinning. Það er sérstakt ánæguefni að sjá Harald nálgast sitt gamla form og var hann t.d. með unnið tafl í höndunum gegn sigurvegara mótsins og hefði eflaust unnið þá skák ef hann væri í betri æfingu.

Í næstu sætum urðu Einar Garðar Hjaltason, Sveinbjörn O. Sigurðsson, Haki Jóhannesson, Ari Friðfinnsson og Einar Guðmundsson.

Dagur með tvö jafntefli í dag við stórmeistara

Alþjóðlegi meistarinn Dagur Arngrímsson (2368) gerði jafntefli í báðum skákum dagsins í First Saturday-mótinu við ungverska stórmeistara.

Þetta voru þeir Zoltan Varga (2456) og Krisztian Szabo (2541). Í gær gerði hann jafntefli við indverska stórmeistarann Tejas Bakre (2481).

Dagur hefur 4 vinninga eftir 10 skákir og er í 5. sæti. Szabo er efstur með 6,5 vinning.

Sjö skákmenn taka þátt í SM-flokki og eru meðalstigin 2426 skákstig.  Dagur er nr. 5 í stigaröð keppenda.  Tefld er tvöföld umferð, alls 12 skákir.

• Heimasíða mótsins
• Chess-Results

Vignir Vatnar vann í fjórðu umferð

Vignir Vatnar Stefánsson vann rússneska skákmanninn Anton Sidorov (1843) í 4. umferð HM ungmenna sem fram fór í dag. Í 5. umferð, sem fram fer á morgun, teflir hann við annan Rússa, Ivan Kharitonov (1773). Vignir hefur 2,5 vinning og er í 44.-74. sæti.

Tvær umferðir eru tefldar á morgun.

Alls taka 192 skákmenn þátt í flokki Vignis og er Vignir nr. 91 í stigaröð keppenda.  Honum til aðstoðar er Helgi Ólafsson.

• Heimasíða mótsins
• Beinar útsendingar (10 efstu borðin)
• Chess-Results

 

 

Skákþáttur Morgunblaðsins: Lenka Íslandsmeistari kvenna 2012

Lenka Ptacnikova er Íslandsmeistari kvenna 2012 eftir spennandi Íslandsþing sem lauk á miðvikudaginn. Hún er fremst íslenskra skákkvenna en þær sem næstar koma eru sífellt að bæta sig. Helsti keppinautur hennar að þessu sinni, Tinna Kristín Finnbogadóttir, var nálægt því að landa sínum fyrsta Íslandsmeistaratitli en hún hafði hálfs vinnings forskot á Lenku þegar tvær umferðir voru eftir af mótinu, náði ekki að leggja Hallgerði Helgu Þorsteinsdóttur í lykilviðureign sjöttu umferðar og í lokaumferðinni varð jafntefli:

Sjá stöðumynd 1.

Hrund Hauksdóttir - Tinna Kristín Finnbogadóttir

Tinna ákvað að valda b7-peðið. Rétti leikurinn er hins vegar 35.... Bf3! Þar sem 36. gxf3 er svarað 36.... h3 og h-peðið verður að drottningu. Hrund varðist vel í framhaldinu og náði jöfnu eftir 58 leiki.

Ólympíuliðið raðaði sér í efstu sætin af 12 keppendum:1. Lenka Ptacnikova 6 v. (af 7). 2. Tinna Kristín Finnbogadóttir 5½ v. 3. Hallgerður Helga Þorsteinsdóttir 5 v.

Besta skákforritið - Houdini

Fyrir nokkrum misserum hitti greinarhöfundur á förnum vegi kunnan áhugamann um hugbúnað skákarinnar, Höskuld Dungal, sem tjáði mér að nú væri hægt að hala niður ókeypis af netinu nýju skákforriti sem slægi öllum öðrum við - Houdini. Ég bar þetta undir Einar Karlsson, helsta sérfræðing minn á þessu sviði, sem hafði uppi ýmsa fyrirvara um þessar upplýsingar. En nokkrum dögum síðar hringdi Einar í mig og taldi þá að eitthvað væri til í þessu hjá Höskuldi. Houdini 3 er í dag sterkasta skákforrit sem fáanlegt er. Nýlega kynnti þýsk vefsíða til leiks hinn belgíska forritara Houdinis, Robert Houdart, allsterkan skákmann sem starfar sem verkfræðingur við hönnun jarðskjálftaþolinna pípulagna í kjarnorkuverum. Meðfram og án formlegrar menntunar á þessu sviði „skrifaði" hann alls kyns forrit þar til einn góðan veðurdag - á meðan hann beið eftir gleri í stjörnukíkinn sinn - að hann hóf vinnu við skákforrit. Útkoman var „Houdini" sem kom fram árið 2009. Við forritun kvaðst Houdart hafa „þrengt" að valkostum við ákvarðanatöku, þ.e. forritið skoðar ekki alla valkosti af sömu dýpt. Houdart kvaðst hafa sótt á netið alls kyns upplýsingar og þannig stytt sér leið að nýjum lausnum. Keppinautnum „Rybku" var á síðasta ári „rutt úr vegi" en í einni skák einvígis þessara forrita fórnaði 1,5-útgáfan þremur peðum í byrjun tafls og þó voru drottningarnar ekki lengur á borðinu. Viðureignin þykir af ýmsum tölufræðingum marka tímamót:

„Rybka 4.0" - „Houdini 1.5 a"

Sikileyjarvörn

1. e4 c5 2. c3 Rf6 3. e5 Rd5 4. Rf3 Rc6 5. Bc4 Rb6 6. Bb3 c4 7. Bc2 Dc7 8. De2 g5 9. e6 dxe6 10. Rxg5 De5 11. d4 Dxe2+ 12. Kxe3 e5!?13. Dxe5 Rxe5 14. Rxh7 Bg7 15. Rg5 Bd7 16. Ra3 Rd3! 17. Bxd3 cxd3+ 18. Kxd3 Ra4 19. f3 a5 20. Re4 f5 21. Rf2 b5 22. Rc2 b4 23. cxb4

Sjá stöðumynd 2.

23.... Kf7! 24. bxa5 Hxa4 25. Kd2 Hd8 26. Rb4 He5 27. Rfd3 Bb5 28. He1 Rc5 29. Hxe5 Bxe5 30. f4 Bf6 31. Ke1 Rxd3+ 32. Rxd3 Bxd3 33. a4 Hc8 34. a5 Hc2 35. Bd2 Hxb2 36. a6 Be4 37. Ha3 Bxg2 38. a7 Hb1+ 39. Ke2 Ba8 40. Be1 Bd4 41. Ha2 Hb3 42. Bg3 Ke6 43. Kf1 Bc5 44. Ke2 Kd7 45. Kf1 Hb4 46. Ke2 Bd6 47. Kf2 Bxf4 48. H4 Bh6 49. Kf1 Hb1+ 50. Be1 e5 51. H5 f4 52. Hd2+ Kc7 53. Hc2+ Kb6

- „og Rybka gafst upp."

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 2. nóvember 2012.

Skákþættir Morgunblaðsins

Oliver og Jón Kristinn Íslandsmeistarar

 

Oliver Aron Jóhannesson varð í dag Íslandsmeistari drengja og telpna, það er 15 ára og yngri.  Oliver hlaut 8 vinninga og varð vinningi fyrir ofan næstu menn, Jón Kristin Þorgeirsson og Hilmi Frey Heimisson.  Þeir félagar urðu efstir og jafnir flokki pilta og stúlkna og þurftu því að há einvígi um þann titil.  Þar fór svo að Jón Kristinn hafði þar betur 1,5-0,5 í hörkueinvígi.

 

Símon Þórhallson varð þriðji í flokki pilta og stúlkna. Símon var mjög nærri Íslandsmeistaratitlinum, hafði lagt Jón Kristin og var með unnið á Hilmi Frey í lokaumferðinni en lék af sér drottningunni með unnið tafl.  

Vel gert af Norðanmönnum að taka alls 3 verðlaunasæti af 6 mögulegum.

Alls tóku 50 keppendur þátt í þessu skemmtilega og vel sótta móti.  Skákstjórar voru Omar Salama, Páll Sigurðsson, Stefán Bergsson og Gunnar Björnsson.

Röð efstu manna:

 

Rank	Name	Club	Pts
1	Oliver Aron Jóhannesson	Fjölnir	8
2	Jón Kristinn Þorgeirsson	SA	7
3	Hilmir Freyr Heimisson	Hellir	7
4	Símon Þórhallsson	SA	6½
5	Gauti Páll Jónsson	TR	6½
6	Nansý Davíðsdóttir	Fjölnir	6½
7	Felix Steinþórsson	Hellir	6
8	Hildur B Jóhannsdóttir	Hellir	6
9	Sóley Lind Pálsdóttir	TG	6
10	Mykhaylo Kravchuk	TR	6
11	Bárður Örn Birkisson	TR	6
12	Björn Hólm Birkisson	TR	6
13	Jakob Alexander Petersen	TR	5½
14	Bergmann Óli Aðalsteinsson		5
15	Heimir Páll Ragnarsson	Hellir	5
16	Svandís Rós Ríkharðsdóttir	Fjölnir	5
17	Donika Kolica	TR	5
18	Bjarni Þór Guðmundsson	Haukar	5
19	Guðmundur Agnar Bragason	TR	5
20	Kormákur Máni Kolbeins		5
21	Óskar Víkingur Davíðsson	Hellir	5
22	Axel Óli Sigurjónsson	Hellir	5

• Chess-Results
• Myndaalbúm (PS, ÁHS og OS)

Teflt til heiðurs Birgi Sigurðsyni

Á næsta þriðjudag tefla Ásar í anda Birgis og honum til heiðurs. Birgir er búinn að starfa í áratugi fyrir skákhreyfinguna, hann varð ungur meistaraflokksmaður í skák og tefldi á mótum m.a. á Skákþingi Norðurlanda með góðum árangri.

Síðan prentaði hann og gaf út skáktíamarit um árabil ásamt Jóhanni Þóri Jónssyni heitnum.

Síðustu tólf ár hefur Birgir verið formaður skákfélags  F E B í Reikjavík.

Birgir er mikill öðlingur og hefur stjórnað skákmótum með sinni alkunnu hógværð og kurteisi.

Mótið á þriðjudaginn heitir Birgismótið.

Mótstaðður er Stangarhylur 4

Tefldar verða níu umferðir með 10 mín. umhugsunartíma

Mótið byrjar kl 13.00

Allir skákmenn 60 ára og eldri velkomnir.