Skákdeild Fjölnis fékk að gjöf skákminjasafn Sturlu Péturssonar

Við setningu á Atskákmóti Íslands 2012 í Rimaskóla nú um helgina tók Helgi Árnason formaður skákdeildar Fjölnis við merkilegri gjöf til skákdeildarinnar, alla skákmuni sem tengjast löngum keppnisferli Sturlu Péturssonar skákmanns sem lést árið 1999. Sturla var þekktur og vinsæll skákmaður sem í frístundum sínum kenndi fjölmörgum krökkum um land allt að tefla.

Það voru þeir feðgar Pétur Rúnar Sturluson og Sturla Pétursson framkvæmdarstjóri Gúmmívinnustofunnar í Skipholti sem afhentu Fjölnismönnum skákgripina sem geyma merkilega sögu tengda íslensku skákstarfi. Í safni Sturlu Péturssonar er m.a. að finna áritaðar skákbækur allt frá 1937, verðlaunagripi sem Sturlu áskotnuðust, m.a. á fjölmörgum helgarskákmótum og eintök af Tímaritinu Skák.

Þeir feðgar Pétur Rúnar og Sturla hafa fylgst með árangursríku barna-og unglingastarfi Skákdeildar Fjölnis og fullyrða að starfsemin þar á bæ sé í anda föður þeirra og afa Sturlu Péturssonar. Þess má geta að Gúmmívinnustofan sem Sturla yngri rekur er aðalstyrktaraðili Atskákmóts Íslands en þar tefla til undanúrslita í dag sunnudag þeir Stefán Kristjánsson stórmeistari, Davíð Kjartansson, Einar Hjalti Jónsson og Arnar Gunnarsson.

Jón Kristinn og Andri efstir Haustmóti yngri flokka

Alls mættu 13 keppendur til leiks á Sprett-inn mótinu, Haustmóti yngri flokka hjá Skákfélagi Akureyrar og tefldu um titla í þremur aldursflokkum.  Flokkarnir eru 11 ára og yngri, 13 ára og yngri og 15 ára og yngri.

Heildarúrslit urðu þessi:

	f.ár	vinn	stig
Jón Kristinn Þorgeirsson	1999	6,5	23,5
Andri Freyr Björgvinsson	1997	6,5	23
Aðalsteinn Leifsson	1998	5
Oliver Ísak Ólason	2002	4	24,5
Tinna Ósk Rúnarsdóttir	2000	4	24
Tumi Einarsson	2002	4	19,5
Guðbjartur Daníelsson	2002	3,5
Benedikt Stefánsson	1999	3	25
Hafdís Haukdal Níelsdóttir	2001	3	22
Kjartan Arnar Guðmundsson	2001	3	19
Ísak Svavarsson	2004	3	17,5
Kári Þór Barry	2003	2
Gabríel Máni Arason	2004	1,5

Úrslit í einstökum flokkum eru þau að í flokki 11 ára og yngri sigraði Oliver Ísak, annar varð Tumi og Guðbjartur í þriðja sæti. Í flokki 13 ára og yngri sigraði Jón Kristinn; næstu honum kom Oliver og Tinna varð í þriðja sæti. Í flokki 15 ára og yngri urðu þeir Jón Kristinn og Andri efstir og Aðalsteinn í þriðja sæti. Þeir munu tefla einvígi um tiltilinn og sigurinn í mótinu.

Góður rómur var gerður að pizzunum frá Sprett-inn sem keppendur og aðstoðamenn þeirra gæddu sér á fyrir síðustu umferð. Allir fóru saddir heim.

Verðlaunafhending og úrslitaeinvígi verða auglýst síðar.

Vignir Vatnar tapaði í gær

Vignir Vatnar Stefánsson (1595) tapaði fyrir Frakkanum Albert Tomasi (1759) í 10. og næstsíðustu umferð HM ungmenna sem fram fór í Maribor í Slóveníu í gær. Vignir hefur 5 vinninga og er í 84.-112. sæti.

Í lokaumferðinni, sem þegar er hafin, teflir Vignir við Slóvenann Peter Krzan. Í fyrsta skipti síðan í fyrstu umferðinni að hann teflir niður fyrir sig sem gefur til kynna við hversu sterkt prógramm Vignir hefur teflt við.

Alls taka 192 skákmenn þátt í flokki Vignis og er Vignir nr. 91 í stigaröð keppenda. Honum til aðstoðar er Helgi Ólafsson. Tefldar eru 11 umferðir.

• Heimasíða mótsins
• Beinar útsendingar (10 efstu borðin)
• Chess-Results

Atskákmót Íslands 2012 - forkeppni lokið

Stefán Kristjánsson og Davíð Kjartansson urðu efstir með 5,5 vinning 

Mótið var æsispennandi og þurfti stigaútreikning til að útkljá hvaða tveir skákmenn myndu fylgja þeim félögum í undanúrslitin. Það voru þeir Einar Hjalti Jensson og Arnar Gunnarsson báðir með 5 vinninga sem urðu hærri á stigum en Bragi Þorfinnsson.

 Sjá má öll úrslit og stöðu í undankeppninni á chess-results.com

 

 Undanúrslit Atskákmóts Íslands fara fram á morgun í Rimaskóla og hefjast stundvíslega klukkan 15:00. Þar tefla saman Stefán Kristjánsson – Arnar Gunnarsson annarsvegar og Davíð Kjartansson – Einar Hjalti Jensson hinsvegar. Tefldar verða tvær 25 mínútna skákir með sitthvorum litnum.

Úrslit í öðrum flokkum urðu eftirfarandi:

 

• Unglingaverðlaun: Dagur Ragnarsson
• Kvennaverðlaun: Hrund Hauksdóttir
• Öldungaverðlaun: Hermann Ragnarsson

 

Áhorfendur eru velkomnir og er veitingasala á staðnum.

Það er Skákdeild Fjölnis sem heldur mótið sem fram fer í Rimaskóla.

Sjá má myndir frá mótinu á myndasíðum skak.is 

Nýtt fréttaskeyti Skákakademíunnar

Nýtt fréttaskeyti Skákakademíunnar kom út í gær. Meðal efnis er:

• Vignir Vatnar að brillera
• Skákbókasala Sigurbjörns
• Hvar er hægt að tefla?
• Einkatímar í boði
• Hvað er framundan?
• Þraut vikunnar
• Fróðleiksmolinn

Fréttaskeytið má nálgast sem PDF-viðhengi.

Skrár tengdar þessari bloggfærslu:

• Fréttaskeytti Skákakademíunnar nr. 4

Gallerý skák: Benedikt Jónasson sigraði

Hinu vikulegu geðprýðismót í Gallerýinu vekja vaxandi athygli og uppsláttum á heimasíðu þess fjölgar að sama skapi.   Fjölmargir vináttuslandsleikir í fótamennt sem fram fóru víða um lönd sl. fimmtudag þjóna sama markmiði og vináttuskákkvöldin þar.  Það að efla menn sig til dáða fyrir meiri átök og stærri mót.  Að engu öðru er stefnt en því að bæta leikaðferðir, prófa ný kerfi, byrjanir og brellur í bland, æfa föst leikatriði.  Þetta snýst allt um að ná persónulegum árangri og frammistöðu inn á vellinum sem og á skákborðinu.  Fegurðin og leikgleðin skipta þó ávallt miklu máli. Bakfallsspyrna  Zlatans fyrir Svíþjóð af 30 metra færi gladdi augað en vítaspyrna Neymars hins brasilíska síður enda fór hún með himinskautum, vakti þó hressilegan hlátur sem er öllum hollur.

Góðir gestir skreyttu mótið og gladdi forstöðumenn og aðra.  Nú voru að þeir Benedikt Jónasson (TR) og Vigfús Ó. Vigfússon, formaður Hellis, sem brugðu undir sig betri fætinum í heimsókn.  Sá fyrrnefndi gamalreyndi garpur tefldi af mikilli yfirvegun og öryggi, leiddi  mótið frá byrjun og landaði flottum sigri, hlaut 10 vinninga af 11 mögulegum.  Gerði aðeins tvö jafntefli við Kristinn Johnson og Gunnar Gunnarsson, sem varð annar og gerði þrjú. Jón Þ. Þór,  varð þriðji með 9 vinninga.

Segja má að þessir þrír „harðskeyttu höbbingjar" hafi verið í sérflokki eins og sést á meðf. mótstöflu. 

 

 

Aðrir skutu stundum hátt yfir, sáu ekki mát í einum, sem flugfarþegar hefðu séð úr 30.000 feta hæð.  Þetta vill henda þegar tímapressan og „fyrirvinningsspennan" fer að segja til sín. Þar gildir það sama  og um vítaspyrnur, sem geta ráðið úrslitum.  

Næsta fimmtudagskvöld heldur svo Kappteflið um Patagóníusteininn áfram þegar „Ungstirnið undraverða", Vignir Vatnar, sem leiðir mótaröðina er heimkominn úr sinni miklu þolraun á HM 10 ára og yngri. Tvo mót af sex eru eftir, en allir geta verið með óháð þeirri baráttu.

www. galleryskak.net /ESE 17.11.12

Sex skákmenn efstir á Íslandsmótinu í atskák

Sex skákmenn eru efstir og jafnir með 2,5 vinning að loknum þremur umferðum á Íslandsmótinu í atskák. Það eru stórmeistarinn Stefán Kristjánsson  (2473), alþjóðlegu meistararnir Arnar Gunnarsson (2441) og Bragi Þorfinnsson (2480), FIDE-meistarinn Einar Hjalti Jensson (2312) og Vigfús Ó. Vigfússon (1985) og Daði Ómarsson (2206).

Mótinu í dag verður framhaldið með umferðum 4-7.  Taflmennskan hefst kl. 13. Fjórir efstu skákmennirnir tefla svo áfram á morgun með útsláttarfyrirkomulagi.

Það er Skákdeild Fjölnis sem heldur mótið sem fram fer í Rimaskóla.

• Heimasíða Fjölnis
• Chess-Results

Einar Hjalti efstur með fullt hús á Skákþingi Garðabæjar

Einar Hjalti Jensson (2312) er efstur með fullt hús á Skákþingi Garðbæjar en fjórða umferð fór fram sl. fimmtudag. Einar vann Bjarnstein Þórsson (1335). Kjartan Maack (2079) er annar með 3 vinninga eftir sigur á Páli Sigurðssyni (1983). Bjarnsteinn er þriðji með 2,5 vinning. Sem fyrr er nokkuð um óvænt úrslit en Ingvar Egill Vignisson (1528) gerði jafntefli við Omar Salama (2277).

Úrslit 4. umferðar í a-flokki, má finna hér. Stöðu mótsins má finna hér. Pörun 5. umferðar, sem fram fer á fimmtudagskvöld má finna hér.

Óskar Víkingur Davíðsson (1000) er efstur í b-flokki með fullt hús.  B-flokkinn má nálgast á Chess-Results.

 

 

 

 

 

 

Vignir Vatnar tapaði fyrir Rússa í gær - mætir ekki Rússa í dag

Vignir Vatnar Stefánsson (1595) tapaði fyrir Rússanum Nikita Samsonov (1849) í níundu umferð HM ungmenna sem fram fóri í Maribor í Slóveníu gær. Vignir hefur 5 vinninga og er í 54.-85. sæti.

Í dag ber það til tíðinda að Vignir mætir ekki Rússa en hann teflir við Frakkann Albert Tomasi (1759) í 10. og næstsíðustu umferð.

Alls taka 192 skákmenn þátt í flokki Vignis og er Vignir nr. 91 í stigaröð keppenda. Honum til aðstoðar er Helgi Ólafsson. Tefldar eru 11 umferðir.

• Heimasíða mótsins
• Beinar útsendingar (10 efstu borðin)
• Chess-Results

 

 

Sprett-inn mótið í dag

Í dag, laugardag, verður haustmót yngri flokka SA háð í Skákheimilinu. Þangað eru allir fæddir 1997 og síðar boðnir velkomnir. Teflt verður í um meistaratitil skákfélagsins í unglingaflokki. Nánar sundurgreint eru að auki 3 titlar í boði:

Í flokki 11 ára og yngri (fædd 2001 og síðar)

Í flokki 12-13 ára (fædd 1999 og 2000)

í flokki 14-15 ára (fædd 1997 og 1998)

Að líkindum verða tefldar 7 umferðir með 15 mín. umhugsunartíma. Mótshaldari áskilur sé þó rétt til að breyta fjölda umferða og umhugsunartíma lítillega ef það hentar betur þegar fjöldi keppenda liggur fyrir.

Hitt er þó víst að áður en síðasta umferð hefst verða bornar á borð pizzur í boði Spretts-inn, sem löngum hefur verið okkur skákmönnum innan handar í pizzumálum. Svaladrykkur býðst með pizzunum og herma heimildir okkar að þær verði óvenju ljúffengar að þessu sinni.

Þátttaka er með öllu ókeypis og hefst mótið kl. 13 laugadaginn 17. nóvember