Friðrik með jafntefli í fimmtu umferð í Álaborg

Friðrik Ólafsson (2431) gerði jafntefli við norska FIDE-meistarann Erling Kristiansen (2205) í 5. umferð minningarmóts um Bent Larsen sem fram fór í Álaborg í dag. Friðrik hefur 3½ vinning og er í 5.-15. sæti.

Danski alþjóðlegi meistarinn Jens Kristiansen (2419) er efstur með 4½ vinning.

Í sjöttu og næstsíðustu umferð, sem fram fer í fyrramálið, teflir Friðrik við Danann Svend Pedersen (2210). 

61 skákmaður tekur þátt í mótinu og þar á meðal 4 stórmeistarar.  Það eru auk Friðriks; Miso Cebalo (2416), Króatíu, Oleg Chernikov (2415), Rússlandi og þýska goðsögnin Wolfgang Uhlmann (2325). Tefldar eru 7 umferðir.

• Heimasíða mótsins 
• Beinar útsendingar (hefjast kl. 9)

Tveir sigrar hjá Henrik í dag

Henrik Danielsen (2524) vann báðar skákir dagsins á Copenhagen Cup í 4. og 5. umferð Copenhagen Cup.  Henrik er efstur með 4 vinninga.

Á morgun teflir Henrik við danska FIDE-meistarann Igor Teplyi (2386) og norska FIDE-meistarann Kristian Stuvik Holm (2316).

Tíu skákmenn taka þátt í mótinu og þar af eru 2 stórmeistarar.  Henrik er stigahæstur keppenda. Tefldar eru 2 umferðir alla daga nema upphafsdag mótsins og hefjast þær kl. 8 og 13:30.

• Heimasíða mótsins
• Beinar útsendingar
• Chess-Results

 

NM kvenna haldið í Reykjavík á næsta ári

Skáksamband Norðurlanda hefur ákveðið hvar helstu Norðurlandamótin verða haldin á næsta ári. Upphaflega áttu öll mótin að fara fram í Karlstad í Svíþjóð í janúar 2013 en mótshaldarar þar þurftu svo síðar að draga sig út úr mótshaldinu.

Sjálft Norðurlandamótið í skák (opinn flokkur) fer fram í Köge í Danmörk, sennilega 11.-20. október 2013.  NM öldunga for fram í Borgundarhólmi í september 2013.  Norðurlandamót kvenna fer hins vegar fram í Reykjavík í apríl/maí eða september/október 2013. Síðari dagsetningin er líklegri.

Sjá nánar meðfylgjandi viðhengi.

Skrár tengdar þessari bloggfærslu:

• 20121019_press_resease_nordic_chess_ch_2013_2_2.pdf

Skákakademían: Stefán Kristjánsson stórmeistari með fjöltefli í öllum grunnskólum Reykjavíkur!

Stefán Kristjánsson stórmeistari í skák skorar börn og ungmenni í Reykjavík á hólm í fjölteflum í öllum grunnskólum Reykjavíkur.

Skákakademían stendur fyrir fjölteflunum, sem byrja í Ártúnsskóla á fimmtudag í næstu viku. Skákakademían stendur nú fyrir skákkennslu í flestum skólum borgarinnar og er áhugi hvarvetna mikill og vaxandi.

Með fjölteflunum vill Skákakademían stuðla að enn frekari skákvakningu meðal barna og ungmenna í höfuðborginni. Vegleg verðlaun eru boði ef einhverjum tekst að leggja stórmeistarann að velli.

Hérna má lesa sér til um Stefán, sem hefur verið í fremstu röð um árabil þrátt fyrir ungan aldur.

Fréttir af fjölteflum Stefáns verða sagðar jafnóðum, en dagskrá fyrstu fjölteflanna er þessi:

Fimmtudagur 25. október: Ártúnsskóli.

Föstudagur 26 október: Klébergsskóli.

Mánudagur 29. október: Rimaskóli.

Íslandsmót kvenna hefst í kvöld kl. 19

Íslandsmót kvenna hefst í kvöld föstudaginn 19. október í húsnæði Skáksambands Íslands, Faxafeni 12, Reykjavík.  Teflt verður í einum flokki, þ.e. mótið opið öllum konum/stúlkum.

Nú eru 12 skákkonur skráðar til leiks, þar á meðal allir fulltrúar Íslands á Ólympíuskákmótinu 2012, en nálgast má keppendalistann á Chess-Results.

Beinar útsendingar verða frá öllum skákum mótsins.

Tímamörk:   90 mín. + 30 sek. á leik.

Dagskrá:         

• Föstud., 19. okt., kl. 19, 1. umferð
• Mánud., 22. okt., kl. 19, 2. umferð
• Miðvikud., 24. okt., kl. 19, 3. umferð
• Föstud., 26. okt., kl. 19, 4. umferð
• Sunnud., 28. okt., kl. 13, 5. umferð
• Mánud., 29. okt., kl. 19, 6. umferð
• Miðvikud., 31. okt., kl. 19, 7. umferð

Verðlaun:       

• 1. 40.000.-
• 2. 25.000.-
• 3. 15.000.-

Skráning fer fram hér á Skák.is.  

• Heimasíða mótsins
• Chess-Results

Skákbúðir að Úlfljótsvatni - síðasti skráningardagur - verðið lækkar í 6.000 kr.

Ennþá er hægt að skrá sig í skákbúðinar sem Skákdeild Fjölnis, Skákakademía Reykjavíkur og Skákskóli Íslands standa fyri að Úlfljótsvatni nk. laugardag og sunnudag, 20. - 21. október. Rúmlega 30 grunnskólakrakkar eru nú þegar skráðir.

Ánægjulegar fréttir. Norvik styrkir skákbúðirnar og lækkar verðið um 2.000 kr á hvern þátttakenda.
Það kostar því bara 6.000 kr dvölin að Úlfljótsvatni með öllu.

Innifalið: gisting, fæði, kennsla, verðlaun og öll aðstaða.

Nói -Síríus og Ásbjörn ehf gleðja alla þátttakendur með nammi á nammidegi og í verðlaun á skákmóti.
Rútan fer á laugardagsmogni frá BSÍ kl. 10:00 og N1 í Ártúnsbrekku kl. 10:15. Bílstjóri er Magnús Þorsteinsson skákpabbi frá skákdeild Fjölnis.

Unglingastarfsemi Víkingaklúbbsins

Knattspyrnufélagið Víkingur og Víkingaklúbburinn heldu fyrstu barna og unglingaskákæfingu sína í Víkinni miðvikudaginn 3. október. Krakkar úr frístundaheimilum og skólum í hverfinu mættu og komu um 15 krakkar á fyrstu æfinguna.  Krakkarnir voru bæði úr Breiðagerðisskóla og Fossvogskóla og heppnaðist æfingin mjög vel.

 Leiðbeinendur á æfingunni voru reynluboltarnir Svavar Viktorsson og Haraldur Baldursson, en Gunnar Fr. Rúnarsson rifjaði upp gamla takta, en hann hafði ekki kennt skák síðan hann var skákkennari við Ártúnskóla árið 1993.

Fleiri myndir má finna á vefsíðu Víkingaklúbbsins.

Sigur og tap hjá Henrik í dag

Henrik Danielsen (2524) fékk einnig úr tveimur skákum dagsins á Copenhagen Cup.  Í 2. umferð tapaði hann fyrir danska stórmeistaranum Carsten Høi (2370) en í þeirri síðari vann hans danska FIDE-meistaranum Bjørn Møller Ochsner (2322). Henrik hefur 2 vinninga og er í 2.-5. sæti.  Høi er efstur með 2½ vinning.

Á morgun teflir Henrik við Danina Nikolaj Palm (2307) og Christian A. Eriksson (2098). 

Tíu skákmenn taka þátt í mótinu og þar af eru 2 stórmeistarar.  Henrik er stigahæstur keppenda. Tefldar eru 2 umferðir alla daga nema upphafsdag mótsins og hefjast þær kl. 8 og 13:30.

• Heimasíða mótsins
• Beinar útsendingar
• Chess-Results

 

Friðrik með sigur í 4. umferð

Friðrik Ólafsson (2431) vann Danann John N Hansen (2087) með laglegri endataflstækni í 4. umferð minningarmóts um Bent Larsen sem tefld var í dag í Álaborg.  Eftir rólega byrjun hefur Friðrik unnið tvær skákir í röð og er í skiptu fjórða sæti.

Í fimmtu umferð, sem fram fer á morgun, teflir Friðrik við norska FIDE-meistarann Erling Kristiansen (2205).

Þrír Danir eru efstir og jafnir með 3½ vinning.  Það eru alþjóðlegi meistarinn Jens Kristiansen (2419), FIDE-meistarinn Per Andreasen (2296) og Jens Kølbæk (2251).

61 skákmaður tekur þátt í mótinu og þar á meðal 4 stórmeistarar.  Það eru auk Friðriks; Miso Cebalo (2416), Króatíu, Oleg Chernikov (2415), Rússlandi og þýska goðsögnin Wolfgang Uhlmann (2325). Tefldar eru 7 umferðir.

• Heimasíða mótsins 
• Beinar útsendingar (hefjast kl. 9)

Skákæfingar í KR fyrir börn og unglinga

Skákæfingar í KR fyrir börn og unglinga hófust um miðjan september. Eins og síðustu árin eru æfingarnar samstarfsverkefni Skákakademíunnar og Skákdeildar KR. Æfingarnar fara fram á miðvikudögum frá 17:30 – 18:30. Stefán Bergsson og Veronika Steinunn Magnúsdóttir skákkona úr TR og nemandi í Hagaskólasjá um æfingarnar.

Skák er kennd í öllum skólum Vesturbæjar og hafa því krakkarnir sem koma á KR-æfingar nokkurn grunn til að byggja á. Mætingin á þessu hausti hefur verið með ágætum og um 15 krakkar mætt á hverja æfingu.

Á æfingunni í gær voru ýmis verkefni sem krakkarnir fengu; tefldu sín á milli, leystu þrautir og horfðu á skákmyndbönd eftir Björn Ívar Karlsson sem finna má hér.

Æfingarnar fara fram á 1. hæð í sjálfu félagsheimili KR. Er þar hin ágætasta aðstaða fyrir skákæfingar og skemmir ekki fyrir að bikarar og myndir af helstu hetjum KR í gegnum tíðina umlykja alla veggi.

Myndaalbúm (HJ)