Hraðkvöld hjá Helli í kvöld

Taflfélagið Hellir heldur hraðkvöld mánudaginn 22. október nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Einnig verður dreginn út af handahófi annar keppandi, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

"Ævintýri enn gerast" Velheppnaðar skákbúðir á Úlfljótsvatni

 

Það voru 36 börn og unglingar ásamt 7 skákkennurum, fararstjórum og aðstoðarmönnum sem tóku þátt í skákbúðum Fjölnis sem haldnar voru öðru sinni, nú að Úlfljótsvatni í skátamiðstöðinni þar. Skákakademía Reykjavíkur og Skákskóli Íslands voru í samstarfi við Fjölnismenn og lögðu til úrvalskennara þá Helga Ólafsson og Stefán Bergsson. 

 

Öllu var tjaldað til að gera skákbúðirnar sem árangursríkastar og ánægjulegastar. Aðstaðan að Úlfljótsvatni er frábær, uppáhaldsmatur krakkanna var í hvert mál, vistleg svefnherbergi og leikaðstaða utan dyra heilt ævintýraland. Loks var það veðrið sem lék við þátttakendur, haustveður eins og það gerist best og fallegast.  Nákvæmlega tímasett dagskrá skákbúðanna skiptist í kennslu og frjálsan leik, matmálstíma og kvöldvöku.

Í skákkennslunni var hópnum skipt í þrennt eftir styrkleika þátttakenda. Helgi Ólafsson kenndi úrvalshóp, skákkrökkumn með alþjóðleg skákstig. Stefán Bergsson sá um fjölmennan hóp skákkrakka sem nú þegar hafa öðlast kunnáttu og færni í skáklistinni og æfa reglulega með skákfélögum. Loks voru þær stöllur Hrund og Donika með byrjendahópinn sem var fámennastur og fékk mestu einkakennsluna. Fórst þeim það mjög vel úr hendi.

Eftir langan og ánægjulegan laugardag var haldin kvöldvaka þar sem fulltrúar skákfélaganna reyndu með sér í skák-spurningakeppni. Mjög jafnt var með liðunum og þurfti bráðabana til að skera úr um úrslit. Það voru Hellismenn sem báru sigur úr bítum.

Farið var í leiki og dreift nammipokum sem Nói -Síríus og Ásbjörn ehf lögðu til af miklu örlæti. Tvískák, fótbolti og borðspil voru síðan á dagskránni og engum gat leiðst í góðum félagsskap. Á sunnudegi hélt skákkennslan áfram og í lokin var haldið Nóa - Síríus skákmótið þar sem þátttakendum skákbúðannna var skipt í 4 riðla og sigurvegarar riðlanna tefldu úrslitaskákir. Fjölnisstrákarnir öflugu, þeir Oliver Aron og Jón Trausti mættust ósigraðir í úrslit og þar hafði Oliver Aron betur.

Tíu glæsilegir gjafapoka frá Nóa - Síríus voru í verðlaun, með sælgæti sem gæti nýst vel í kringum jólahátíðina, ef tekið er tillit til magns og gæða. Skákbúðunum lauk kl. 15:00 og höfðu þá skákkrakkarnir staðið í ströngu, þar sem þeir nýttu sér frábæra kennslu og leikaðstöðu frá fyrstu mínútu til þeirrar síðustu. Ánægjan skein úr hverju andliti barna og fullorðinna sem tóku þátt.

Skákbúðastjórar voru þau Helgi Árnason, Andrea Margrét Gunnarsdóttir og Davíð Hallsson. Rútbílstjórinn kom úr hópi skákforeldra, Magnús Þorsteinsson. Örvar staðahaldari að Úlfljótsvatni og starfsmenn hans buðu upp frábæran mat og lipurð í einu og öllu.

Skákdeild Fjölnis vill þakka Norvik fyrir að styrkja verkefnið, Nóa Síríus og Ásbirni ehf fyrir verðlaun og nammiveitingar og loks Skákakademíunni og Skákskólanum fyrir frábært samstarf. Næstu skákbúðir að ári.

Myndaalbúm (HÁ)

Myndir frá verðlaunaafhendingu Tölvuteksmótsins

Þórir Benediktsson, hirðljósmyndari TR, tók nokkrar myndir á Hraðskákmóti TR í dag sem og frá verðlaunaafhendingu Tölvuteksmótsins sem fór fram í framhaldinu.

 

 

Jón Viktor sigurvegari Tölvuteksmótsins

 

Lenka hlaut silfrið

 

Og Sævar fékk bronsið

 

Daði Ómarsson skákmeistari og hraðskákmeistari TR

 

Dagur Ragnarsson sigurvegari b-flokks

 

Dawid Kolka sigurvegari opins flokks

 

Ólafur S. Ásgrímsson yfirdómari mótsins 

 

Myndaalbúm Hraðskákmóts TR

Skákþáttur Morgunblaðsins: Friðrik Ólafsson teflir aftur fyrir TR

Bolvíkingar halda naumri forystu í efst deild eftir fyrri hluta Íslandsmóts skákfélaga sem fram fór í Rimaskóla um síðustu helgi. Til marks um breiddina í hópi má geta þess að Jóhann Hjartarson og Jón L. Árnason tefla á fimmta og sjötta borði. Fjögur lið virðast eiga raunhæfa möguleika á sigri en Bolvíkingar standa ekki aðeins best að vígi í vinningum heldur einnig að hluta til vegna þess óvenjuleg fyrirkomulags að b-lið þeirra, sem einnig teflir í efstu deild, getur og hefur skipað fram skákmönnum a-liðsins í viðureignunum við helstu keppinauta a-liðsins. Þetta er formgalli á reglugerð þessa geysivinsæla móts sem dregur til sín um 500 skákmenn hvaðanæva af landinu. Bollaleggingar um breytingar á keppninni hafa verið talsverðar að undanförnu en virðast ekki ná til þessa þáttar sem þekkist ekki í öðrum flokkakeppnum hér á landi. Staða efstu liða er þessi:

1. Bolvíkingar 22½ v. 2. Víkingaklúbburinn 22 v. 2. Taflfélag Reykjavíkur 21½ v. 4. Taflfélag Vestmannaeyja 20½ v.

Í 2. deild leiða hin sameinuðu félög Goðinn og Mátar rétt á undan TR og í 3. deild er Víkingaklúbburinn b-sveit efst og í 4. deild er Briddsfélagið í efsta sætið.

Skemmtilegur andi sveif yfir vötnunum á Íslandsmótinu um liðna helgi, hinir erlendu gestir margir komnir frá Úkraínu setja skemmtilegan svip á mótið og ýmsir meistarar sem ekki hafa teflt lengi á þessum vettvangi sáust aftur að tafli. Friðrik Ólafsson og Margeir Pétursson styrkja nú sitt 112 ára gamla félag, Taflfélag Reykjavíkur. Friðrik undirbýr sig að kappi fyrir minningarmót um Bent Larsen sem hefst í þessum mánuði. Margeir tapaði í 4. umferð vegna þess að sími hans hringdi og þar fór hugsanlega vinningur sem gæti vegið þungt á lokasprettinum. Friðrik tók viðfangsefni byrjunar skákar sinnar í 1. umferð sínum persónulegum tökum. Hinir dínamísku þættir skákstíl hans kom fram í hverjum leiknum á fætur öðrum í byrjun tafls en skákin fer hér á eftir:

Friðrik Ólafsson - Magnús Örn Úlfarsson

Bogo-indversk vörn

1. d4 Rf6 2. Rf3 e6 3. c4 Bb4+ 4. Bd2 De7 5. a3 Bxd2 6. Rfxd2!?

Afar sjaldséður leikur og sá fimmti var það raunar líka.

6.... d6 7. e3 e5 8. dxe5 dxe5 9. Rc3 0-0 10. Be2 He8 11. g4!

Skemmtilegur leikur og óvæntur. Friðrik hefur alltaf verið mikill sérfræðingur í því að fresta hrókun.

11.... c6 12. g5 Rfd7 13. Rde4 Rc5 14. Dd6 Rxe4 15. Dxe7 Hxe7

16. 0-0-0!

Loks hrókar hvítur og hótar máti í leiðinni!

16.... Bd7 17. Rxe4 Ra6 18. b4 Bf5 19. Rd6 Be6 20. Hd2 Hb8 21. Hhd1 Rc7 22. Kb2 Re8 23. Re4 b6 24. Kc3

Veikleikar í stöðu svarts eru ekki margir og yfirburðir hvíts liggja fyrst og fremst í miklu meira rými á báðum vængjum.

24.... Kf8 25. Bf3 Hc7 26. Rd6 Ke7 27. Rxe8 Hxe8 28. Be4 Hh8?

Tapleikurinn. Svartur varð að leika 28.... h6.

29. f4 exf4 30. exf4 g6

Hvítur hótaði 31. f5. Burðarþol svörtu peðastöðunnar riðlast við þá „akademísku" veikleika sem nú myndast.

31. He1! Hd8 32. f5 gxf5 33. Bxf5 Hxd2 34. Kxd2 Hc8 35. He4 Hg8 36. h4 Hh8 37. Ke3 Kd7 38. Bxe6

Uppskipti á hárréttu augnabliki.

38.... fxe6 39. Hf4 Kd6 40. Ke4 h6 41. g6 h5 42. Hf6 Hg8 43. Kf4 b5 44. cxb5 cxb5 45. Kg5 Kd5 46. Kxh5 e5 47. Kg5

- svartur réð ekki við frípeðin og gafst upp.

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 14. október 2012.

Skákþættir Morgunblaðsins

Daði Ómarsson hraðskákmeistari TR

Daði Ómarsson sigraði á Hraðskákmóti TR sem fram fór í félagsheimili TR í dag.  Þetta er annar meistaratitill Daða á nokkrum dögum en hann var efstur félagsmanna TR á Tölvuteksmótinu og ávann sér þar inn meistaratitil TR.  Daði hlaut 12 vinninga og var hálfum vinningi fyrir landsliðsmanninn Hjörvar Stein Grétarsson sem varð annar með 11,5 vinning. Segja má að þetta hafa sannarlega verið mót rauðhærðra því Mikael Jóhann Karlsson varð þriðji með 10 vinninga.

Á móti loknu fór fram verðlaunaafhending vegna Tölvuteksmóts og eru myndir frá henni væntanlegarar.

Lokastaðan:

 

1	Daði Ómarsson	12	41
2	Hjörvar Steinn Grétarsson	11,5	43
3	Mikael Jóhann Karlsson	10	44,5
4	Ögmundur Kristinsson	9,5	39
5-6	Gunnar Björnsson	8,5	44
	Dagur Ragnarsson	8,5	40,5
7-10	Eiríkur K Björnsson	8	41
	Elsa María Kristínardóttir	8	40
	Sveinbjörn Jónsson	8	37,5
	Hermann Ragnarsson	8	29
11-15	Jón Úlfljótsson	7	38,5
	Þorlákur Magnússon	7	35
	Gauti Páll Jónsson	7	33
	Gunnar Ingibergsson	7	32,5
	Gunnar Nikulásson	7	31,5
16	Atli Antonsson	6,5	44
17-18	Sigurlaug R Friðþjófsdóttir	6	30,5
	Óskar Long Einarsson	6	29
19	Andri Steinn Hilmarsson	5,5	31
20-22	Arsenij Zacharov	4	29,5
	Björgvin Kristbergsson	4	28
	Arnór Ingi Pálsson	4	26,5
23	Pétur Jóhannesson	3	27,5
24	Björn Ingi Helgason	2	28

 

 

Áskell Örn hraðskákmeistari SA

Hausthraðskákmót Skákfélags Akureyrar var háð í dag. Keppendur voru alls 13 og glímdu af lipurð og festu á hinum 64 reitum skákborðsins í tæpa 3 tíma. Gæfan reyndist meistara síðustu tveggja ára heldur hliðholl og náði hann að vinna allar skákir sínar nema eina.

Þessir stóðu sig best:

1. Áskell Örn Kárason       11,5
2. Jón Kristinn Þorgeirsson 9
3. Ólafur Kristjánsson         8,5
4. Sigurður Eiríksson           8
5. Smári Ólafsson                7,5
6. Tómas Veigar Sigurðarson og
7. Einar Garðar Hjaltason    7

Aðrir minna.

Friðrik með jafntefli í lokaumferðinni

Friðrik Ólafsson (2431) gerði jafntefli við danska FIDE-meistarann Jørn Sloth (2410) í sjöundu og síðustu umferð minningarmótsins um Bent Larsen sem lauk í dag í Álaborg.  Friðrik fékk 4,5 vinning, var taplaus á mótinu, og endaði í 6.-17. sæti.

Danski alþjóðlegi meistarinn Jens Kristiansen (2419) sigraði á mótinu en hann hlaut 6 vinninga. Þjóðverjinn Christian Hess (2260) varð annar með 5,5 vinning.

61 skákmaður tók þátt í mótinu og þar á meðal 4 stórmeistarar.  Það voru auk Friðriks; Miso Cebalo (2416), Króatíu, Oleg Chernikov (2415), Rússlandi og þýska goðsögnin Wolfgang Uhlmann (2325).

• Heimasíða mótsins 
• Beinar útsendingar (hefjast kl. 9)

Henrik sigurvegari Copenhagen Cup

Henrik Danielsen (2524) gerði jafntefli í 8. og 9. umferð Copenhagen Cup sem fram fóru í dag.  Í þeirri fyrri við Norðmanninn Aryan Tari (2280) og í þeirri síðari við danska FIDE-meistarann Jackob Carstensen (2362).  Henrik hlaut 6,5 vinning og sigraði á mótinu.

Danirnir Igor Teplyi (2386) og Carsten Høi (2370) urðu í 2.-3. sæti með 6 vinninga.  

Þrátt fyrir að sigra á mótinu lækkar Henrik um 4 stig fyrir frammistöðu sína.

Tíu skákmenn tóku þátt í mótinu og þar af voru 2 stórmeistarar.  Henrik var stigahæstur keppenda. Tefldar voru 2 umferðir alla daga nema upphafsdag mótsins.

• Heimasíða mótsins
• Beinar útsendingar
• Chess-Results

 

Hraðskákmót TR fer fram í dag

Hraðskákmót Taflfélags Reykjavíkur verður haldið í húsnæði félagsins að Faxafeni 12 sunnudaginn 21. október kl. 14:00

Tefldar verða 2x7 umferðir eftir Swiss Perfect kerfi. Umhugsunartími 5 mín á skák.

Þátttökugjald kr 500 fyrir 16 ára og eldri, en frítt fyrir 15 ára og yngri.

Þrenn verðlaun verða i boði.

Að loknu hraðskákmótinu fer fram verðlaunaafhending fyrir Tölvuteksmótið 2012 - Haustmót T.R.

Núverandi Hraðskákmeistari T.R. er Halldór Pálsson.

Hausthraðskákmót SA fer fram í dag

Hausthraðskákmótið, þar sem teflt er um titilinn "Hraðskákmeistari SA
2012" verður háð nú á sunnudaginn og hefst kl. 13. Öllum er heimil
þátttaka og eru skákunnendur nær og fjær hvattir til að mæta.  Núverandi
meistari Áskell Örn Kárason mun freista þess að verja titil sinn og
sigra þriðja árið í röð.  Þeir sem ætla að leyfa honum að komast upp með
það baráttulaust geta horft á Silfur Egils í staðinn.