Bolvíkingar unnu bikarmeistaranna

Guðmundur Daðason skrifar:

Bolvíkingar og KR-ingar áttust við í 1. umferð hraðskákkeppni taflfélaga í gær. Enn eitt árið, þessi lið dragast merkilega oft saman. KR-ingar eru enn að fagna sigrinum á Þór og þegar við mættum í Frostaskjólið tók Bikarinn í öllu sínu veldi á móti okkur. Flottur gripur. Við landsbyggðarmenn urðum auðvitað að hefna og mættum óhræddir til leiks, engin slá til að bjarga KR í þetta skiptið. Augljóst var í upphafi að einu eða tveim ELO stigum munaði á liðunum. Við tókum strax forystuna með 4,5-1,5 sigrum í fyrstu tveim umferðunum. Þá þriðju vann KR með minnsta mun en það reyndist eina sigurumferðin þeirra. Við bættum svo í og eftir 5-1 sigur í 6. umferð var ljóst að staðan í hálfleik var 24-12. Helmingsmunur og í seinni hálfleik bættum við í. Lokatölur urðu 52-20 Íslandsmeisturunum í vil.

Stefán, Jón Viktor, Þröstur og Dagur drógu vagninn og fengu 42 vinninga samtals. Þröstur var að venju með fullt hús en það tekur varla að nefna það. Maðurinn er með rugl skor fyrir Bolvíkinga í þessari keppni og heyrir til undantekninga ef hann missir punkt. Athyglisverðasta viðureignin var á milli Stefáns og Sigurðar Herlufsen. Í fyrri skákinni fórnaði Stefán manni fyrir mjög vænlega sókn. Sigurður varðist vel og Stefán þurfti að nota mikinn tíma til að finna sigurleiðina. Það tókst að lokum en tíminn þraut og Sigurður fagnaði sigri. Í seinni skákinni vann Sigurður mann og vélaði Stefán svo hægt og örugglega niður. Dæmið snérist hins vegar við og nú var það Sigurður sem féll í kolunninni stöðu. Stefán getur þakkað æðri máttarvöldum fyrir að hafa náð 1-1 jafntefli á móti Sigurði. Eða setti hann kannski upp ósýnilega slá?

Við þökkum KR fyrir góðar móttökur og skemmtilegar skákir. Sjálfsagt mætumst við aftur að ári!

Guðmundur Daðason, liðsstjóri.

Árangur Bolvíkinga:

• Þröstur Þórhallsson 11 af 11
• Dagur Arngrímsson  11 af 12
• Jón Viktor Gunnarsson 10 af 11
• Stefán Kristjánsson  10 af 12
• Árni Ármann Árnason  5,5 af 12
• Sæbjörn Guðfinnsson  3 af 8
• Guðmundur Daðason  1,5 af 6

 

Árangur KR-inga:

• Jón G. Friðjónsson  5,5 af 12
• Sigurður Herlufsen  4,5 af 12
• Jóhann Örn Sigurjónsson  3,5 af 12
• Vilhjálmur Guðjónsson  3 af 12
• Ingimar Jónsson  2,5 af 12
• Gunnar Skarphéðinsson  1 af 12

Víkingar unnu Hauka

Vìkingaklúburinn náði að sigra Hauka 46.5 - 25.5  (26-10 eftir fyrri umferð) í 1. umferð Hraðskákkeppni taflfélaga en viðureignin taldist vera heimaleikur Haukamanna
 
Fyrri umferð:  1-5, 2-4, 1,5, 2-4, 1.5-4.5, 2.5-3.5
Seinni umferð:  3-3, 1.5-4.5, 2.5-3.5, 1.5-4.5, 3-3, 4.5-1.5
 
besti árangur Víkinga:
 
Ólafur B. Þórsson 10/12 (3.borð)
Davíð Kjartansson 9/10 (2. borð)
Magnús Örn Úlfarsson 8.5/12 (1.borð)
Gunnar Fr. Rúnarsson 6.5/10
Stefán Þór Sigurjónsson 6/12
Lárus Knútsson 5.5/10
Sigurður Ingason 1/6
 
Besti árangur Haukamanna:
 
Sverrir Þorgeirsson 8/12 (2. borð)
Ágúst Sindri karlsson 6/12 (1. borð)
Þorvarður F. Ólafsson  5.5/11 (4. borð)
Heimir Ásgeirsson 4.5/12 (3. borð)
Einar Valdimarsson  1/10
Ingi Tandri Traustason ..5/10
Auðbergur Magnússon 0/5

 

Heimasíða Hellis

Hellismenn yfirtrompuðu Bridsfjelagið - dregið í 2. umferð

Mikil stemming var í Hellisheimilinu í kvöld þegar 3 viðureignir fóru fram í  16 liða úrslitum Hraðskákkeppni taflfélaga. Hellismenn unnu öruggan sigur á Bridsfjelaginu. Hellir fékk 59,5 gegn 12,5 vinninga Bridsara.  Hjörvar Steinn Grétarsson og Björn Þorfinnsson fengu báðir fullt hús vinninga í 12 skákum.  Sigurður Páll Steindórsson og Stefán Freyr Guðmundsson voru bestir Bridsara með 4,5 vinning.

Árangur Hellisbúa:

• Hjörvar Steinn Grétarsson 12 v. af 12
• Björn Þorfinnsson 12 v. af 12
• Andri Áss Grétarsson 9 v. af 12
• Jóhanna Björg Jóhannsdóttir 9 v. af 12
• Helgi Brynjarsson 8,5 v. af 12
• Rúnar Berg 6 v. af 6
• Gunnar Björnsson 3 v. af 6

Árangur Bridsfjelaga:

• Sigurður Páll Steindórsson 4,5 v. af 12
• Stefán Freyr Guðmundsson 4,5 v. af 12
• Gunnar Björn Helgason 2 v. af 12
• Sigurður Sverrisson 1,5 v. af 12
• Gísli Hrafnkelsson og Gústaf Steingrímsson fengu færri vinninga.

Úrslit í öðrum viðureignum kvöldsins koma síðar.  Þegar liggur þó fyrir aðrir sigurvegar kvöldsins voru: Víkingaklúbburinn, Skákfélag Íslands, Taflfélag Bolungarvíkur og Skákfélag Akureyrar.  Á morgun mætast TR og Mátar í húsnæði TR.

Dregið var í 2. umferð.  Þá mætast:

• Taflfélag Bolungarvíkur - Skákfélag Reykjanesbæjar
• Skákfélag Íslands - Víkingaklúbburinn
• Skákfélag Akureyrar - Taflfélag Reykjavíkur/Taflfélagið Mátar
• Skákfélagið Goðinn - Taflfélagið Hellir

Heimaíða Hellis

Meistaramót Hellis hefst 22. ágúst - hækkuð verðlaun

Meistaramót Hellis 2010 hefst mánudaginn 22. ágúst klukkan 19:30. Mótið er 7 umferða opið kappskákmót sem lýkur 8. september.   Vegleg og fjölbreytt verðlaun eru í boði. Þar sem Hellir á 20 ára afmæli á árinu eru aðalverðlaun höfð hærri en venja hefur verið. Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra skákstiga.  Skráning er hafin á heimasíðu Hellis.  Upplýsingar um þegar skráða keppendur má nálgast hér.

Teflt er á mánudögum og miðvikudögum og svo er tekin ein þriðjudagsumferð í byrjun móts.  Umferðir hefjast kl. 19:30.  Hlé verður á mótinu þegar Norðurlandamótið grunnskólasveita fer fram í Reykjavík.

Aðalverðlaun:

1. 50.000
2. 25.000
3. 15.000

Upplýsingar um aukaverðlaun koma síðar.

Þátttökugjöld:

• Félagsmenn kr. 2.000; aðrir 3.000-
• Unglingar 15 ára og yngri: Félagsmenn: 1.500; Aðrir 2.000.
• Allir titilhafar fá frítt í mótið

Umferðartafla: 

• 1. umferð, mánudaginn, 22. ágúst, kl. 19:30
• 2. umferð, þriðjudaginn, 23. ágúst, kl. 19:30
• 3. umferð, miðvikudaginn, 24. ágúst, kl. 19:30
• 4. umferð, mánudaginn, 29. ágúst, kl. 19:30
• 5. umferð, miðvikudaginn, 31. ágúst, kl. 19:30
• 6. umferð, mánudaginn, 5. september, kl. 19:30
• 7. umferð, miðvikudaginn, 7. september, kl. 19:30

Heimasíða Hellis

Svidler skákmeistari Rússlands í sjötta sinn

Peter Svidler (2739) sigraði á 64. rússneska meistaramótinu í skák sem lauk í Moskvu í dag.  Og það þrátt fyrir tap fyrir Morozevich (2694) í lokaumferðinni.  Svidler hlaut 5 vinninga í 7 skákum og varð hálfum vinningi fyrir ofan Moro sem varð annar.  Í 3.-5. sæti, með 4 vinninga, urðu Karjakin (2788), Grischuk (2746) og Kramnik (2781), sem náði ekki að fylgja eftir afburðarárangri sínum í Dortmund.

Þetta er í sjötta skipti sem Svidler hampar titilinum en hann hefur hampaði einnig titlinum, 1994, 1995, 1997, 2003 og 2008.   Enginn hefur unnið titilinn jafn oft og hann.

• Heimasíða mótsins (á rússnesku en vel læsileg með Google translate)
• Beinar útsendingar
• Sjónvarpsútsendingar með skákskýringum

 

 

Hraðskákkeppni talfélaga: Fimm viðureignir fara fram í kvöld

Fimm viðureignir fara fram í Hraðskákkeppni taflfélaga í kvöld.  Þrjár viðureignir fara fram í Hellisheimilinu og hefjast kl. 20.  Heimamenn í Helli mæta Bridsfjelaginu, Haukar mæta Víkingum og Skákfélag Íslands mætir Skagamönnum. Skákfélag Akureyrar og Taflfélag Garðabæjar mætast svo í Skákakademíunni, kl. 19:30 og KR-ingar taka á móti Bolvíkingum í KR-heimilinu kl. 19:30

Umferðinni lýkur svo á morgun með viðureign TR og Máta sem fram fer í TR og hefst kl. 19:30. 

Strax að lokinni viðureignunum í Hellisheimilinu, um kl. 22:15 verður dregið í átta liða úrslit keppninnar.

• Heimasíða Hellis
• Myndaalbúm mótsins

Davíð Kjartansson sigraði á Stórmóti Árbæjarsafns og Taflfélags Reykjavíkur

Stórmót Taflfélags Reykjavíkur og Árbæjarsafns fór fram í blíðskaparveðri í Árbænum í dag.  Hátíðardagskráin hófst með lifandi tafli, en skákmeistararnir Guðmundur Kjartansson og Jóhann H. Ragnarsson stýrðu þar lifandi fólki til orrustu á reitunum 64.  Gaman var að sjá þátttöku allra aldurshópa í lifandi taflinu og voru margar fjölskyldur mættar til leiks íklæddar búningum peða, riddara, biskupa, hróka, drottninga og kónga. Rimmunni lauk með jafntefli, en Jóhann sá sér þann kost vænstan að þráleika eftir að sóknir höfðu gengið á báða bóga.  Það var svarta drottningin (Svanhildur Konráðsdóttir) sem þráskákaði þar til kapparnir sættust á jafntefli.

Að lifandi tafli loknu fluttu skákkappar sig í Kornhúsinu þar sem fram fór hraðskákmót. Mót þetta er fyrir löngu orðið óopinbert upphaf skákvertíðarinnar, en aðsóknarmet var slegið að þessu sinni og mættu til leiks 51 bókstaflega á öllum aldri.  Skákvígum þessum lauk með sigri Davíðs Kjartanssonar sem fór taplaus í gegnum mótið og leyfði einungis jafntefli við Tómas Björnsson. Tómas fór líka taplaus í gegnum mótið en var full sáttfús og lenti að lokum í 3. sæti. Guðmundur Kjartansson skaut sér á milli þeirra félaga, tapaði aðeins fyrir Davíð en var vægðarlaus við aðra.

Skákstjóri var Torfi Leósson.

Taflfélag Reykjavíkur vill koma þökkum til allra sem tóku þátt í þessum skemmtilega viðburði á Árbæjarsafninu í dag.

Heildarúrslit:

Stórmót TR og Árbæjarsafns 14. ágúst 2011- Heildarúrslit

•   1 Davíð Kjartansson                                    6,5 v.
•   2 Guðmundur Kjartansson              6
•   3 Tómas Björnsson                          5,5
•   4 Björn Ívar Karlsson                      5
•   5 Jóhann Hjörtur Ragnarsson          5
•   6 Róbert Lagerman                          5
•   7 Arnaldur Loftsson                                    5
•   8 Stefán Bergsson                            5
•   9 Gunnar Freyr Rúnarsson               5
•  10 Oliver Aron Jóhannesson                        5
•  11 Jón Trausti Harðarson                  4,5
•  12 Elsa María Kristínardóttir            4,5
•  13 Dagur Ragnarsson                       4,5
•  14 Birkir Karl Sigurðsson                 4,5
•  15 Halldór Pálsson                            4,5
•  16 Kristján Örn Elíasson                   4
•  17 Jóhann Helgi Sigurðsson             4
•  18 Gunnar Nikulásson                      4
•  19 Vignir Vatnar Stefánsson                        4
•  20 Hermann Ragnarsson                   4
•  21 Freygarður Þorsteinsson              4
•  22 Jóhanna Björg Jóhannsdóttir       4
•  23 Gauti Páll Jónsson                       4
•  24 Donika Kolica                              3,5
•  25 Sigurlaug Regína Friðþjófsdóttir 3,5
•  26 Örn Stefánsson                            3,5
•  27 Hildur Berglind Jóhannsdóttir     3,5
•  28 Stefán Már Pétursson                  3,5
•  29 Ásgeir Sigurðsson                                    3,5
•  30 Óskar Long Einarsson                 3,5
•  31 Andrés Karl Sigurðsson               3
•  32 Ingi Tandri Traustason                 3
•  33 Jakob Alexander Petersen                       3
•  34 Kristófer Jóel Jóhannesson          3
•  35 Rafnar Friðriksson                       3
•  36 Björgvin Kristbergsson                3         
•  37 Hilmir Hrafnsson                         3
•  38 Hilmir Freyr Heimisson               2,5
•  39 Veronika Steinunn Magnúsdóttir            2,5
•  40 Gunnar Friðrik Ingibergsson        2,5
•  41 Elín Nhung                                  2,5
•  42 Bjarki Arnaldarson                      2,5
•  43 Fannar Ingi Grétarsson                2,5
•  44 Pétur Jóhannesson                                   2
•  45 Atli Snær Andrésson                   2
•  46 Ásta Sóley Júlíusdóttir                2   
•  47 Ellert Kristján Georgsson            1,5
•  48 Þorsteinn Freygarðsson                1,5
•  49 Karl Andersson-Claesson                        1
•  50 Hörður Mar Tómasson                 0
•  51 Helga Vollertsen                          0

 

Pistill: Torfi Leósson

Myndaalbúm mótsins (Sigurlaug Regína Friðþjófsdóttir og Jóhann H. Ragnarsson)

Skákþáttur Morgunblaðsins: Armenar með besta liðið á HM í Kína

Magnús Carlsen styrkti stöðu sína á toppi alþjóðlega elo-listans þegar hann bar sigur úr býtum í efsta flokki skákhátíðarinnar sem lauk í Biel í Sviss á dögunum. Magnús hlaut 7 vinninga af 10 mögulegum eða 19 stig en á mótinu var farið eftir þriggja stiga reglunni. Alexander Morozevich kom næstur með 6½ vinning eða 17 stig. Samkvæmt hinum svonefnda „lifandi lista" FIDE er Magnús efstur með 2823 en Anand kemur næstur með 2817.

Stórmótinu í Dortmund lauk um svipað leyti með sigri Vladimirs Kramnik sem hlaut 7 vinninga af 10 mögulegum. Þessi frábæri skákmaður hlýtur að teljast meðal fimm bestu skákmanna heims.

Á meðan á þessu stóð fylgdust menn hér heima grannt með góðri frammistöðu Hannesar Hlífars Stefánssonar á opna tékkneska meistaramótinu. Hann var einn efstur fyrir lokaumferðina en tapaði þá fyrir úkraínska stórmeistaranum Dmitry Kononenko og hafnaði í 2.-5. sæti með 7 vinninga af níu mögulegum.

Austur í Ningbo í Kína þar sem heimsmeistaramóti landsliða með þátttöku tíu liða var að ljúka sýndu Armenar úr hverju þeir eru gerðir og sigruðu örugglega. Lokaniðurstaðan varð þessi:

1. Armenía 14 stig (22½ v.). 2. Kína 13 stig (22½ v.). 3. Úkraína 12 stig (19½ v.). 4. Rússland 10 stig ( 21½ v.).

Úrslitin ollu miklum vonbrigðum í Rússlandi því strax eftir mótið var landsliðsþjálfarinn Evgeny Bareev látinn taka pokann sinn. Ýmsir, þ.á m. Anatolí Karpov, hafa látið í ljós áhyggjur vegna hnignandi veldis Rússa á skáksviðinu. Armenar mæta alltaf til leiks með mikinn metnað í flokkakeppnir. Lev Aronjan var á 1. borði en aðrir í sveitinni voru Movsesian, Akopjan, Sargissian og Hovhannisjan.

Gamall vinur Íslendinga, Yasser Seirwan, átti endurkomu mótsins, hlaut 4½ v. af sjö mögulegum fyrir bandaríska liðið. Hann hefur ekki teflt opinberlega í um 10 ár og hefur sennilega velt því fyrir sér hvort eitthvað hafi breyst á meðan hann var í burtu. Skákdrottningin Judit Polgar hafði a.m.k. ekkert nýtt fram að færa þegar Ungverjar mættu Bandaríkjamönnum í 6. umferð:

Heimsmeistaramót landsliða 2011:

Yasser Seirwan -Judit Polgar

Nimzoindversk vörn

1. d4 Rf6 2. c4 e6 3. Rc3 Bb4 4. Dc2 O-O 5. a3 Bxc3 6. Dxc3 d6 7. Bg5 Rbd7 8. e3 b6 9. Re2 Ba6 10. Dc2 c5 11. dxc5 bxc5 12. Rc3 Db6 13. O-O-O

Þessi byrjun hlýtur að hafa verkað þægilega á Yasser; en svona tefldu menn oft á árunum í kringum 1990.

13. ... Bb7 14. e4 Hab8 15. Hd2 Hfc8 16. Be2 Re8 17. f4 Rf8 18. Hhd1 f6 19. Bh4 Rg6 20. g3!

Snjall leikur. Eftir 20. ... Rxh4 21. gxh4 getur hvítur sótt eftir opinni g-línu.

20. ... Hd8 21. Bg4 e5 22. Be6+ Kf8 23. f5 Re7 24. g4!

Skyndilega er svarta staðan orðin afar óvirk.

24. ... h6 25. Bf2 Rc6 26. Rd5 Da5 27. h4 Rd4 28. Bxd4 cxd4 29. g5 Bxd5 30. exd5 hxg5 31. hxg5 fxg5

(SJÁ STÖÐUMYND)

32. f6!

Leikur peði beint ofan í þrælvaldaðan reit.

32. ... Hxb2

Þessi gagnatlaga er dæmd til að mistakast en hvað var til ráða? 32. .... gxf6 er svarað með 33. Dh7! og vinnur og þá er 32. ... Rxf6 svarað með 33. Dg6 Hb7 34. Hh1! vinnur strax.

33. Kxb2 Rxf6 34. Ka2 Dc7 35. Hg2 Hc8 36. Bxc8 Dxc8 37. Hxg5 Rxd5 38. Df5 Dxf5 39. Hxf5 Rf6 40. c5 Ke7 41. c6 Rd5 42. Hg1 d3 43. Kb3 Ke6 44. Hfg5

- Ekki besti dagur Juditar sem gafst loksins upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 7. ágúst 2011.

Skákþættir Morgunblaðsins

[Event "World Chess Team Championship"] [Site "Ningbo CHN"] [Date "2011.07.23"] [EventDate "2011.07.17"] [Round "6"] [Result "1-0"] [White "Yasser Seirawan"] [Black "Judit Polgar"] [ECO "E32"] [WhiteElo "2635"] [BlackElo "2699"] [PlyCount "87"] 1. d4 Nf6 2. c4 e6 3. Nc3 Bb4 4. Qc2 O-O 5. a3 Bxc3+ 6. Qxc3 d6 7. Bg5 Nbd7 8. e3 b6 9. Ne2 Ba6 10. Qc2 c5 11. dxc5 bxc5 12. Nc3 Qb6 13. O-O-O Bb7 14. e4 Rab8 15. Rd2 Rfc8 16. Be2 Ne8 17. f4 Nf8 18. Rhd1 f6 19. Bh4 Ng6 20. g3 Rd8 21. Bg4 e5 22. Be6+ Kf8 23. f5 Ne7 24. g4 h6 25. Bf2 Nc6 26. Nd5 Qa5 27. h4 Nd4 28. Bxd4 cxd4 29. g5 Bxd5 30. exd5 hxg5 31. hxg5 fxg5 32. f6 Rxb2 33. Kxb2 Nxf6 34. Ka2 Qc7 35. Rg2 Rc8 36. Bxc8 Qxc8 37. Rxg5 Nxd5 38. Qf5+ Qxf5 39. Rxf5+ Nf6 40. c5 Ke7 41. c6 Nd5 42. Rg1 d3 43. Kb3 Ke6 44. Rfg5 1-0

Borgarskakmótið fer fram á fimmtudag

Borgarskákmótið fer fram fimmtudaginn 18. ágúst, og hefst það kl. 16:00.  Mótið fer fram venju samkvæmt í Ráðhúsi Reykjavíkur og standa Reykjavíkurfélögin, Taflfélag Reykjavíkur og Taflfélagið Hellir, að mótinu, sem og síðustu ár.  Gera má ráð fyrir að margir af sterkustu skákmönnum þjóðarinnar taka þátt í því.   Skákmenn eru hvattir til að skrá sig sem fyrst til leiks en skráning er fram hér á Skák.is.  Mótið er öllum opið og er þátttaka ókeypis.  Upplýsingar um skráða keppendur má nálgast hér.

Einnig er hægt að skrá sig í  í síma 866 0116 (Vigfús) og 862 6290 (Sigurlaug).  Tefldar verða 7 umferðir með 7 mínútna umhugsunartíma.     Þetta er í 26. sinn sem mótið fer fram og er þetta iðulega eitt best sótta skákmót hvers árs.  Í fyrra sigraði  Guðmundur Gíslason, sem þá tefldi fyrir Tapas barinn. 

Verðlaun:

1. 15.000 kr.
2. 10.000 kr.
3.   5.000 kr.

Stórmót TR og Árbæjarsafns fer fram í dag

Stórmót Árbæjarsafns og Taflfélags Reykjavíkur  fer fram sunnudaginn 14. ágúst. Teflt verður í Árbæjarsafni og hefst  taflið kl. 14. Tefldar verða 7 umferðir með umhugsunartímanum 7 mínútur á  skák.

Á undan, eða kl.13, fer fram lifandi tafl, en lifandi taflið er fyrir  löngu orðinn árviss og skemmtilegur viðburður í dagatali skákmanna.

Veitt verða verðlaun fyrir þrjú efstu sætin í Stórmótinu, 12.000 kr., 8.000 kr. og 5.000 kr.

Þátttökugjöld í Stórmótinu eru kr. 1000 fyrir 18 ára og eldri, en ókeypis  fyrir yngri en 18 ára og eru þátttökugjöld jafnframt aðgangseyrir í  safnið.  Þeir sem eiga ókeypis aðgang í safnið, t.d menningarkort, þurfa ekki að borga þátttökugjöld í mótið.

Ekkert kostar að taka þátt í Stórmótinu fyrir þá sem taka þátt í lifandi taflinu.

Enn eru laus pláss í lifandi taflinu og leika peð, riddara, biskup,  hrók, kóng eða drottningu.

Áhugasamir hafi samband við Sigurlaugu Regínu  í [e-mail].  Skráningu í lifandi taflið lýkur fimmtudaginn 11. ágúst.  Þeir sem taka þátt í lifandi taflinu þurfa að mæta á Árbæjarsafn þann 14. ágúst kl.12.30 til að fara í búninga.