Við erum ein fjölskylda: Mætum í Ráðhúsið!

Íslensk börn skora á íslensku þjóðina í skák í Ráðhúsi Reykjavíkur um helgina. Tilgangurinn er að safna fé fyrir Rauða krossinn, sem berst nú upp á líf og dauða við hungursneyðina í Sómalíu.

Donika Kolica, 15 ára talsmaður skákkrakkanna, segir að nú séu 350 þúsund börn í bráðri lífshættu vegna hungurs. „Það eru fleiri en íslenska þjóðin," sagði Donika í kvöldfréttatíma Sjónvarps á föstudagskvöld.

Donika mun tefla vígsluskák maraþonsins við Jón Gnarr, borgarstjóra í Reykjavík.

Donika segist vona að sem allra flestir komi í Ráðhúsið, taki skák og láti gott af sér leiða. „Margt smátt gerir eitt stórt," sagði Donika, sem ættuð er frá Kosovo, talar sex tungumál og kvíðir ekki skákinni við borgarstjórann.

Mörg af efnilegustu ungmennum Íslands, á aldrinum 6-18 ára, tefla við gesti og gangandi.

Fyrir skákina má greiða upphæð að eigin vali. Allir peningar sem safnast fara í  að kaupa vítamínbætt hnetusmjör, til að hjúkra hungruðum börn.

Þórir Guðmundsson hjá Rauða krossinn sagði í viðtali á föstudag að hörmungarnar í Sómalíu væru ólýsanlegar. Hann sagði vítamínbætta hnetusmjörið sannkallað kraftaverkalyf, og fyrir litla upphæð mætti hjúkra barni til lífs.

Stefán Bergsson framkvæmdastjóri Skákakademíu Reykjavíkur minnti í Sjónvarpsfréttum á að kjörorð alþjóða skákhreyfingarinnar væri: Við erum ein fjölskylda. „Þeim orðum eigum við að fylgja í verki," sagði Stefán."Við getum ekki staðið hjá meðan börn deyja."

Allir eru velkomnir í Ráðhúsið, og ef einhver treystir sér engan veginn til að tefla við krakkana, getur viðkomandi valið um undirstöðukennslu í skák, eða fengið skákmeistara til að tefla fyrir sig. Þannig geta allir verið með.

Án efa munu margir vilja spreyta sig gegn íslensku krökkunum, sem eru engin lömb að leika sér við á taflborðinu. Meðal væntanlegra gesta má nefna Össur Skarphéðinsson, Egil Ólafsson, Ísgerði Elfu Gunnarsdóttur, Jóhönnu Kristjónsdóttur og Boga Ágústsson.

Gunnar Björnsson forseti Skáksambands Íslands mun ásamt mörgum sjálfboðaliðum aðstoða krakkana við framkvæmd maraþonsins. Hann mun ásamt Helga Árnasyni skólastjóra Rimaskóla manna posann, fyrir þá sem vilja greiða með korti.

Forseti Skáksambandsins hvatti fólk til að mæta í Ráðhúsið. „Ég er sammála þeim sem sagði, að maðurinn rísi aldrei hærra en þegar hann beygir sig niður til að bjarga barni."

Við erum ein fjölskylda: Umfjöllun í fjölmiðlum

Töluvert hefur verið um skákmaraþonið í fjölmiðlum.  Hér eru nokkur skemmtileg dæmi:

• Fréttir RÚV í gær (þorfa að skrolla ca. 80% áfram (ca. undir H í "Hjálp"))
• Frétt DV í gær 
• Pisill Illuga á Eyjunni í morgun

Borgarstjórinn með fyrstu skákina!

Borgarstjórinn með fyrstu skákina! Það styttist óðum í fyrstu skákina í Skákmaraþoninu um helgina: Við erum ein fjölskylda.Skákin sú verður tefld millum Jóns Gnarr og Doniku Kolica, skákprinsessunar frá Kosovo. Donika hefur sýnt góða takta á skákborðinu að undanförnu en minna er vitað um skákgetu borgarstjórans. Þó hefur hann oft á tíðum efast um byrjanaval sterkra skákmanna þegar hann leikur fyrsta leikinn hjá þeim. Því var brugðið á það ráð að fá hæstvirtan utanríkisráðherra Jóni til halds og trausts, en Össur Skarphéðinsson er þekktur skákáhugamaður og tíður gestur á stórmótum skákhreyfingarinnar í gegnum tíðina. 

Að lokinni fyrstu skákinni hefst svo ballið þegar helstu skákstúlkur landsins tefla við góða gesti eins og Þorgrím Þráinsson, Þorstein Guðmundsson, Gunnleif Gunnleifsson, Ingibjörgu Reynis og fleiri. 

Alls skipta um fimmtán skákbörn vaktinni milli sín um helgina. Það er þeirra einlæga von að sem flestir komi og tefli við þau og láti fé af hendi rakna í söfnunina handa sómölskum börnum. 

Gens Una Sumus. 

 

Politiken Cup: Henrik með jafntefli við Fridman

Henrik Danielsen (2535) gerði jafntefli við þýska stórmeistarann Daniel Fridman (2659) í áttundu umferð Politiken Cup sem fram fór í dag.  Henrik hefur 6 vinninga og er í 12.-26. sæti.  Í níundu og næstsíðustu umferð, sem fram fer á morgun, teflir Henrik við úkraínska stórmeistarann Oleg Romanishin (2526).   Umferðin hefst kl. 11 og verður skák Henriks sýnd beint. Gunnar Finnlaugsson (2079) vann, hefur 4,5 vinning, og er í 89.-133. sæti.

Stórmeistararnir Igor Kurnosov (2633), Rússlandi, Jon Ludvig Hammer (2610) eru efstir með 7 vinninga.  

Skákir Henriks á mótinu má nálgast hér. 

311 skákmenn taka þátt í þessu móti, sem fram fer í 30. júlí - 7. ágúst, og þar af eru 26 stórmeistarar.  Henrik er nr. 19 í styrkleikaröð keppenda en Gunnar er nr. 126.  Tefldar eru 10 umferðir.

• Heimasíða mótsins
• Beinar útsendingar (hefjast kl. 11 nema síðasta umferðin kl. 8)

Við erum ein fjölskylda: Fjöldi þjóðkunnra Íslendinga tekur áskorun skákbarna sem safna fyrir börnin í Sómalíu

Margir þjóðkunnir Íslendingar ætla að taka áskorun skákbarnanna, sem um helgina munu tefla maraþon við gesti og gangandi í Ráðhúsinu og safna þannig sem notað verður til að bjarga sveltandi börnum í Sómalíu.

Kristjón K. Guðjónsson, sem hefur umsjón með gestalistanum í Ráðhúsinu, segir undirtektir frábærar. ,,Það vilja allir leggja sitt af mörkum, alveg burtséð frá skákkunnáttu. Yfirskrift söfnunarinnar er eitthvað sem allir Íslendingar geta skrifað undir: Við erum ein fjölskylda."

Meðal þeirra sem ætla að spreyta sig á móti krökkunum í Ráðhúsinu um helgina eru  Jón Gnarr borgarstjóri,  Össur Skarphéðinsson utanríkisráðherra, Ísgerður Elfa Gunnarsdóttir leikkona, Bogi Ágústsson fréttamaður, Illugi Jökulsson blaðamaður, Þorgrímur Þráinsson rithöfundur, Bjarni Guðjónsson fyrirliði KR, Egill Ólafsson leikari og söngvari, Þorsteinn Guðmundsson leikari, Adolf Ingi Erlingsson fréttamaður, Gunnleifur Gunnleifsson markvörður, Ingibjörg Reynisdóttir leikkona, Hjörtur Hjartarson fréttamaður og liðsmaður ÍA, Andri Steinn útvarpsmaður, Geir Ólafsson söngvari, Snorri Ásmundsson listamaður, Friðrik Þór Friðriksson kvikmyndaleikstjóri og Siggi stormur.

Mótherjar krakkanna borga upphæð að eigin vali, sem rennur beint í söfnun Rauða kross Íslands vegna hinnar hræðilegu hungursneyðar í Sómalíu.

Samkvæmt upplýsingum frá Rauða krossinum notað verður allt framlag söfnunarinnar notað til að kaupa vítamínbætt hnetusmjör, sem er notað til að hjúkra alvarlega vannærðum börnum til heilbrigðis í Sómalíu.

Taflmaraþonið í Ráðhúsinu hefst klukkan 10 laugardaginn 6. ágúst og stendur til klukkan 18. Það heldur áfram á sunnudag, á sama tíma, og er það einlæg von íslensku skákkrakkanna að sem allra flestir leggi leið sína á maraþonið.

Skákakademía Reykjavíkur og Skáksamband standa að maraþoninu, en kjörorð Skákhreyfingarinnar er „Við erum ein fjölskylda" og með maraþoninu í Ráðhúsinu vilja ungir liðsmenn skákgyðjunnar á Íslandi sýna börnum í Sómalíu stuðning í verki.

Politiken Cup: Henrik með jafntefli við Hess í sjöundu umferð

Henrik Danielsen (2535) gerði jafntefli við bandaríska stórmeistarann Robert Hess (2609) í sjöundu umferð Politiken Cup sem fram fór í dag.  Henrik hefur 5,5 vinning og er í 7.-26. sæti.  Stórmeistararnir Igor Kurnosov (2633), Rússlandi, og Julian Radulski (2556) eru efstir og jafnir með 6,5 vinning.  Í áttundu umferð, sem fram fer á morgun, teflir Henrik við þýska stórmeistarann, og fjórða stigahæsta keppenda mótsins, Daniel Fridman (2569).  Umferðin hefst kl. 11 og verður skák Henriks sýnd beint.  Gunnar Finnlaugsson (2072) gerði jafntefli og hefur 3,5 vinning.

Skákir Henriks á mótinu má nálgast hér. 

311 skákmenn taka þátt í þessu móti, sem fram fer í 30. júlí - 7. ágúst, og þar af eru 26 stórmeistarar.  Henrik er nr. 19 í styrkleikaröð keppenda en Gunnar er nr. 126.  Tefldar eru 10 umferðir.

• Heimasíða mótsins
• Beinar útsendingar (hefjast kl. 11 nema síðasta umferðin kl. 8)

Við erum ein fjölskylda: RKÍ í heimsókn

Eins og alla morgna í sumar var kátt á hjalla í Skákakademíunni þennan morguninn. Björn Ívar fór yfir fræðin af mikilli festu og fengu svo krakkarnir góða heimsókn um miðjan tímann. Var þar kominn Þórir Guðmundsson frá Rauða Krossi Íslands. Þórir, sem starfar sem yfirmaður alþjóðasviðs Rauða Krossins kynnti starfssemina fyrir krökkunum. Fór hann vítt og breitt yfir starfssemi Rauða Krossins út um allan heim. Líkti hann Rauða Krossinum við her taflmanna, þar sem hver og einn taflmaður væri nauðsynlegur og sinnti mismunandi hlutverki.

Þórir fór yfir hið hræðilega ástand í Sómalíu. Þar geysa hungursneyð, þurrkar og stríð. Erfitt getur reynst að koma hjálpargögnum til landsins enda landinu að miklu leyti stjórnað af uppreisnarher. Fagnaði Þórir framlagi krakkanna um komandi helgi og gerði þeim grein fyrir hversu mikilvæg söfnun þeirra væri fyrir sómölsk börn. Öll framlög sem berast í söfnunina fara til kaupa á vítamínbættu hnetusmjöri sem er það fyrsta sem vannærð börn láta inn fyrir sínar varir. Eftir 2-4 vikur á því fæði geta börnin farið að borða nokkuð venjulega.

Eftir kynninguna tefldi Þórir við skákprinsessuna Doniku Kolica sem hefur sýnt miklar framfarir í skákinni að undanförnu. Donika er talsmaður krakkanna sem taka þátt í söfnuninni Við erum ein fjölskylda. Þórir hefur nokkuð komið að skák: stjórnaði sjónvarpsútsendingum frá einvíginu Jóhann - Kortsnoj, St. John 1988 og mætti nokkrum sinnum sem ungur drengur á heimsmeistaraeinvígið1972.

Skákin var hin athyglisverðasta og Þórir kunni sitthvað fyrir sér en þurfti að lokum að játa sig sigraðaðan gegn skákprinsessunni frá Kosovo.

Sem fyrr er skorað á skákmenn að mæta í Ráðhúsið um helgina - þitt framlag bjargar.

Myndaalbúm

Politiken Cup: Henrik vann í sjöttu umferð og er í 5.-18. sæti

Henrik Danielsen (2535) vann ítalska alþjóðlega meistarann  Emiliano Aranovitch (2328) í sjöttu umferð Politiken Cup sem fram fór í dag.  Henrik hefur 5 vinninga og er í 5.-18. sæti.  Sænski stórmeistarinn Jonny Hector (2568) er einn efstur með fullt hús.  Í sjöundu umferð, sem fram fer á morgun, teflir Henrik við bandaríska stórmeistarann Robert Hess (2609).   Umferðin hefst kl. 11 og verður skák Henriks sýnd beint. Gunnar Finnlaugsson (2079) tapaði, hefur 3 vinninga, og er í 122.-189. sæti.  

Skákir Henriks á mótinu má nálgast hér. 

311 skákmenn taka þátt í þessu móti, sem fram fer í 30. júlí - 7. ágúst, og þar af eru 26 stórmeistarar.  Henrik er nr. 19 í styrkleikaröð keppenda en Gunnar er nr. 126.  Tefldar eru 10 umferðir.

• Heimasíða mótsins
• Beinar útsendingar (hefjast kl. 11 nema síðasta umferðin kl. 8)

Áskorun til skákmanna!

Næstu helgi standa Skákakademía Reykjavíkur og Skáksamband Íslands fyrir maraþonskák í Ráðhúsi Reykjavíkur. Þar munu mörg efnilegustu börn og unglingar landsins tefla við gesti og gangandi. Mótherjar krakkanna borga upphæð að eigin vali, sem rennur beint í söfnun Rauða kross Íslands vegna hinnar hræðilegu hungursneyðar í Sómalíu. 

Kjörorð Skákhreyfingarinnar er „Við erum ein fjölskylda" og með skákmaraþoninu í Ráðhúsinu vilja ungir liðsmenn skákgyðjunnar á Íslandi sýna börnum í Sómalíu stuðning í verki.
 
Skáksambandið og Skákakademían skora á skákmenn að mæta og taka eina skák við ungviðinn og leggja um leið sitt af mörkum svo bjarga megi lífum sómalskra barna. Framlag hvers og eins þarf ekki að vera stórt - margt smátt gerir eitt stórt. Skákhreyfingin hefur nú tækifæri til að blása lífi í hin göfugu einkunnarorð GENS UNA SUMUS: Við erum ein fjölskylda.
 
Skorum á þig ágæti skák(áhuga)maður að vera með og bjarga mannslífum.
 
10:00-18:00 laugardag og sunnudag í Ráðhúsinu.

Skákakademía Reykjavíkur og Skáksambands Íslands

Henrik og Gunnar unnu í fjórðu umferð

Henrik Danielsen (2535) og Gunnar Finnlaugsson (2072) unnu báðir í 5. umferð Politiken Cup sem fram fór í dag.  Henrik vann Finnann Kari Rauramaa (2217) og er 14.-37. sæti með 4 vinninga.  Gunnar hefur 3 vinninga og er í 73.-124. sæti.  Sænski stórmeistarinn Jonny Hector (2568) er einn efstur með fullt hús.  Í sjöttu umferð, sem fram fer á morgun, teflir Henrik við ítalska alþjóðlega meistarann  Emiliano Aranovitch (2328).  Umferðin hefst kl.11 og verður skák Henriks sýnd beint.

311 skákmenn taka þátt í þessu móti, sem fram fer í 30. júlí - 7. ágúst, og þar af eru 26 stórmeistarar.  Henrik er nr. 19 í styrkleikaröð keppenda en Gunnar er nr. 126.  Tefldar eru 10 umferðir.

• Heimasíða mótsins
• Beinar útsendingar (hefjast kl. 11 nema síðasta umferðin kl. 8)