NM í skólaskák: Noregspistill nr. 1

Klukkan er 19.13 á staðartíma og undirritaður situr í setustofunni á farfuglaheimilinu Haraldsheim. Á meðan liggur hinn fararstjórinn, Stefán Bergsson, afvelta í kojunni sinni með svefngrímu yfir augunum og tappa í eyrunum.  Ætla ég á engan hátt að vega að brothættri karlmennsku hans með því að grínast með þá staðreynd að miðaldra flugfreyja hefði verið fullsæmd af aðförunum hans við að undirbúa þennan stutta blund.

Ferðalagið til Noregs gekk vel og einhvern veginn rötuðum við á gististaðinn þökk sé góðum leiðbeiningum frá mótshöldurum.  Farfuglaheimilið Haraldsheim er eins þægilegt og farfuglaheimili getur orðið.  Um er að ræða fjögurra til sex manna herbergi  þar sem gist er í kojum og deila menn hreinlætisaðstöðu með allri hæðinni.  Það sem bjargar hinsvegar öllu er að á hverri hæð eru þægilegar stofur þar sem hröð nettenging er í boði, poolborð, spil og sjónvarp.

Aðeins er yfir einu að kvarta  en það er sú staðreynd að það tekur 30 mín. að ferðast á skákstað. Fyrst 10 mín. strætóferð og svo 20 mín. ganga - í tveimur áföngum. Það er ansi mikill munur frá tæplega 1-2 mín. rölti frá hóteli á skákstað sem boðið var uppá í Svíþjóð í fyrra. Það lítur því allt út fyrir það að dagarnir verði ansi langir hér í Osló því krakkarnir tefla tvær skákir á dag og við munum væntanlega ekki hafa tíma til að koma upp á farfuglaheimilið milli umferða.

Helstu áföll dagsins tengjast verðlagi í Noregi. Tónninn var settur strax í byrjun þegar Stefán Már, faðir Vignis, keypti sér Pepsi -flösku á 600 kr. og skömmu síðar fjárfesti Stefán fararstjóri í 200 kr. banana! Tilraun til ráns ferðarinnar átti sér hinsvegar stað þegar hópurinn fór út að borða um miðjan daginn. Við fundum flottan veitingarstað sem bauð upp á pizzahlaðborð fyrir 2.000 kr. á mann sem var ansi vel sloppið. Reyndar heimtuðu sumir að fara á McDonalds við misjafnan fögnuð annarra, förum ekki nánar út það. Þegar  að menn ætluðu að kaupa sér kókglas með matnum þá kostaði það 1.000 kr! Varð þá skyndilega kúvending úr kókpöntunum yfir í vatnspantanir sem var svo sem ágætt frá manneldislegum sjónarmiðum.  Menn töldu sig þarna hafa fundið hvað fáránlegasta verðlagið en botninn sló úr þegar Siggi Emilspabbi tékkaði á ræktinni, langaði að rífa aðeins í lóð og negla sér á brettið, en menn þurfa víst að snara 4000 kr. fram til að leyfa sér smá sprikl!

Nú er fundi með öllum hópnum nýlokið og klukkan farin að ganga tíu. Á þessum fundi var farið yfir morgundaginn en 1. umferð hefst 11:00 að norskum tíma og leggur hópurinn af stað frá Haraldsheim 09:15 undir handleiðslu hinnar leyndardómsfullu Irisar Brecker en menn bíða í ofvæni eftir þeim kynnum. Menn eru núna margir hverjir farnir að náttbuxna sig í gang og taka til skrínukosts síns. Það var nefnilega ákveðið eftir ferðina á veitingastaðinn um miðjan daginn að hver myndi bjarga sér um kvöldið hvað varðar næringu. Menn keyptu hinn ýmsa skrínukost; flestir ávöxtuðu sig í gang, sumir tóku vel til sykursins en sérstaklega var tekið eftir skrínukosti Björns fararstjóra. Björn er í heilsuátaki miklu og samanstóð skrínukostur hans af bláberjasojamjólk, blóðappelsínum, vatni og melónum! Hitaeiningasnautt það.

Framundan er langur og strangur dagur með tveimur umferðum. Mikil spenna er í keppendum og sérstaklega þeim yngstu í E-flokknum sem hafa verið til mikils sóma og eru nú lagstir til hvíldar. Allir keppendur hafa reyndar verið til sóma sem og hagað sér vel sem er langt frá því sjálfsagt þegar um ræðir svo stóran hóp.  Eins og áður segir hefur ferðin gengið vel og er það ekki síst að þakka þeim foreldrum og ömmu sem eru með í för sem hjálpa til við að hafa stjórn á hlutunum og sínum krökkum.

Það er hugur í mönnum  og spenna fyrir morgundaginn. Meira síðar.

Stefán og Björn

Fulltrúar Íslands eru (stigaröð keppenda í sviga - 12 keppendur í hverjum flokki):

A-flokkur (18-20 ára):

• 1. Hjörvar Steinn Grétarsson (2460)
• 2. Sverrir Þorgeirsson (2330)

B-flokkur (16-17 ára):

• 9. Örn Leó Jóhannsson (1940)
• 10. Nökkvi Sverisson (1805)  

C-flokkur (14-15 ára):

• 9. Emil Sigurðarson (1720)
• 11. Dagur Kjartansson (1660)

D-flokkur (12-13 ára):

• 8. Jón Kristinn Þorgeirsson (1645)
• 9. Oliver Aron Jóhannesson (1545)

E-flokkur (11 ára og yngri):

• 7. Vignir Vatnar Stefánsson (1225)
• 8. Heimir Páll Ragnarsson (1200)

Heimasíða mótsins

Vinverjar lögðu Selfyssinga

Skákfélag Vinjar lagði Skákfélag Selfoss og nágrennis í viðureign félaganna sem fram fór í Vin í gær.  44-37.  Hinn hógværi formaður SSON bendir þó í það í afar skemmtilegri grein sinni á heimasíðu SSON að sigurinn sé Flóamanna, 73-72, samtals en Selfyssingar lögð Vinverja í viðureign félaganna í Selfossi fyrr í vetur.

Bestum árangri Skákfélags Vinjar náðu þeir Hrannar Jónsson og Hrafn Jökulsson með 7,5 vinninga og Björn Sölvi var síðan með 6 vinninga.

Bestum árangri gestanna náðu þeir Úlfhéðinn Sigurmundsson og Magnús Matthíasson með 7,5 vinninga, Ingimundur, bróðir Úlfhéðins, var síðan með 5,5 vinninga.

Bent er aftur á heimasíðu SSON þar sem m.a. má finna myndaalbúm frá mótinu.

Skákþing Íslands 2011 - Áskorendaflokkur

Stjórn Skáksambands Íslands hefur ákveðið að keppni í áskorendaflokki 2011 fari fram dagana 15.  - 24. apríl  n.k. . Mótið mun fara fram í Faxafeni 12, Reykjavík.   Efstu tvö sætin gefa föst sæti í Landsliðsflokki 2012.

Dagskrá:

• Föstudagur, 15. apríl, kl. 18.00, 1. umferð
• Laugardagur, 16. apríl, kl. 14.00, 2. umferð
• Sunnudagur, Frídagur
• Mánudagur, 18. apríl, kl. 18.00, 3. umferð
• Þriðjudagur, 19. apríl, kl. 18.00, 4. umferð
• Miðvikudagur, 20. apríl, kl. 18.00, 5. umferð
• Fimmtudagur, 21. apríl, Frídagur
• Föstudagur, 22. apríl, kl. 11.00, 6. umferð
• Föstudagur, 22. apríl, kl. 17.00, 7. umferð
• Laugardagur, 23. apríl, kl. 14.00, 8. umferð
• Sunnudagur, 24. apríl, kl. 14.00, 9. umferð

Umhugsunartími:

90 mín. + 30 sek. til að ljúka.

Verðlaun:  

• 1. 40.000.-
• 2. 25.000.-
• 3. 15.000.-

Aukaverðlaun:

• U-2000 stigum           8.000.-
• U-1600 stigum           8.000.-
• U-16 ára                    8.000.-
• Kvennaverðlaun         8.000.-
• Fl. stigalausra            8.000.-

Aukaverðlaun eru háð því að a.m.k. 5 keppendur séu í hverjum flokki og eingöngu er hægt að vinna til einna aukaverðlauna.  Reiknuð verða stig séu fleiri en einn í efsta sæti.  Stigaverðlaunin miðast við íslensk skákstig.

Þátttökugjöld:

• 18 ára og eldri            3.000.-
• 17 ára og yngri           2.000.-

Skráning:

Skráningu skal senda í tölvupósti á [e-mail] eða tilkynna í síma 568 9141 virka daga kl. 10-13 í síðasta lagi 11. apríl 2011.  Hægt verður að skrá sig beint á Skák.is þegar nær dregur móti.         

Fimmtudagsmót hjá TR í kvöld

Fimmtudagsmót T.R. fer að venju fram í kvöld og hefst kl. 19.30.  Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12, og opnar húsið kl. 19.10.  Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

• Fimmtudagsmótin

Metþátttaka á MP Reykjavíkurskákmóti

Það stefnir í algjöra metþátttöku á MP Reykjavíkurskákmótinu, minningarmóti um Inga R. Jóhannsson, en nú þegar 3 vikur eru til móts eru 170 skákmenn skráðir til leiks.  Og fleiri met verða slegin, aldursmet, mesti fjöldi erlendra skákmanna og stórmeistara.  Og margir áhugaverðir keppendur eru með.  Yngsti stórmeistari heims, náfrændi eins þekktasta fótboltamanns heims, nokkrar af sterkustu skákkonum heims, og blindur skákmaður eru meðal keppenda.  Mótið er jafnframt Norðurlandamót í skák bæði í opnum flokki og kvennaflokki og á kvenkynið óvenju marga fulltrúa að þessu sinni.   

Stigahæstur keppenda er Úkraínumaðurinn Evgenij Miroshnichenko (2670).  Næstur í stigaröðinni er Luke McShane (2664), sem fékk flesta vinninga á London Chess Classic ásamt heimsmeistaranum Anand og stigahæsta skákmanni heims, Magnúsi Carlseni.  Þriðji í stigaröðinni er Ivan Sokolov (2657), sem var einn sigurvegara síðasta MP Reykjavíkurmóts. 

Meðal Norðurlandabúa má nefna, jafnaldra og félaga besta skákmanns heims, Magnúsar Carlsen, Jon Ludvig Hammer (2647)  Og að sjálfsögðu mætir heimavarnarliðið með stórmeistarana Hannes Hlífar Stefánsson, Héðin Steingrímsson og Henrik Danielsen fremsta í flokki.     

Stigahæsti skákmaður Afríku Ahmed Adly (2640) er einnig með.   Og ekki vantar goðsagnir en meðal keppenda er Lettinn Evgeny Sveshnikov (2521), sem kemur hingað ásamt syni sínum.

Sem fyrr má finna marga af yngstu og efnilegustu skákmönnum heims.   Yngsti stórmeistari heims í dag, Illya Nyzhnik (2530) mætir.   Það gerir einnig búlgarski alþjóðlegi meistarinn Kiprian Berbatov (2437) sem þykir mikið efni en hann tefldi með hinu sterka búlgarska Ólympíuliði í Síberíu síðasta haust.   

Og ekki má gleyma skákkonunum.  Ein stigahæsta skákkona heims, Harika Dronavalli (2520)  auðvitað kemur til leiks en meðal kvenna má nefna samlanda hennar Tania Sachdev (2391), frönsku skákkonuna Sophie Millet (2375) og sterkustu skákkonu Hvíta-Rússlands, Anna Sharevich (2332).  Sjá nýlegt viðtal við Önnu á ChessBase.

Og blindir eiga sinn fulltrúa í fyrsta skipti á Reykjavíkurskákmóti, því pólski alþjóðlega meistarinn Piotr Dukaczewski (2312) tekur þátt en hann er einn sterkasti blindi skákmaður heims.   

Af 170 skráðum keppendum koma 108 erlendis frá og eru samtals frá 31 landi!   Flestir koma frá Þýskalandi eða 19 en næstir koma Norðmenn (15) og Indverjar (10). Sumir keppendanna koma langt frá en þar má nefna keppenda frá Hondúras og Brasilíu.

Allar upplýsingar um mótið má finna á heimasíðu mótsins, Chess.is, og keppendalistann má nálgast á Chess-Results. 

Undrabörn í Kastljósi og á Eyjunni

MP Reykjavíkurskákmótið nálgast og þar verða nokkur met slegin.  Tvö þeirra eru vís, þátttökumet og aldursmet en meðal keppenda má nefna þau Vigni Vatnar Stefánsson, 7 ára, og Nansý Davíðsdóttur, 8 ára en þau eru langyngstu keppendurnir sem tekið hafa þátt í í tæplega hálfrar aldar sögu mótsins. 

Umfjöllun um þau og þátttöku þeirra var að finna í Kastljósinu í kvöld og í frétt Eyjunnar í gær.

Vigfús sigraði á hraðkvöldi

Vigfús Ó. Vigfússon sigraði með 7,5v af 9 mögulegum á hraðkvöldi Hellis sem fram fór 7. febrúar sl. Önnur varð Elsa María Kristínardóttir með 7v og þriðji varð Eiríkur Örn Brynjarsson með 6,5v. Eins og á síðast hraðkvöldi dró sigurvegarinn þann sem varð í öðru sæti út í happdrættinu.

Lokastaðan á hraðkvöldinu:

• 1.    Vigfús Ó. Vigfússon             7,5v
• 2.    Elsa María Kristínardóttir     7v
• 3.    Eiríkur Örn Brynjarsson       6,5v
• 4.    Jón Úlfljótsson                     6v
• 5.    Egill Steinar Ásgeirsson       5v
• 6.    Dagur Kjartansson              4,5v
• 7.    Kristinn Andri Kristinsson     4,5v
• 8.    Björgvin Kristbergsson         2v
• 9.    Pétur Jóhannesson              1v

Harkan sex í Vesturbænum

MánudagsMót KR eru ein þau hörðustu í bænum. Þar á bæ láta menn sig ekki muna um að tefla 13 umferða hraðskákmót á mánudagskvöldum allan ársins hring.  7 mínútna skákir. Taflið hefst kl. 19.30 og lýkur um 11 leytið.  Að jafnaði er vel mætt í KR-heimilinu í Frostaskjóli, 20 keppendur eða fleiri og öllum þátttakendum vel fagnað.   

Sigurður A. Herlufsen hefur borið sigur úr bítum á tveimur síðustu mótum, en  Birgir Berndsen, Gunnar Kr. Gunnarsson og Dr. Ingimar Jónsson fylgt fast á hæla hans og hafa skipst á um að vinna mótin þar á undan á árinu, að undanteknu því fyrsta  sem Kristján Stefánsson,  formaður, gerði sér lítið fyrir og vann á góðum degi.  

 Í gærkvöldi urðu úrslit sem hér segir:

Bandaríski stórmeistarinn Robert Hess til liðs við KR

Hinn ungi stórmeistari Robert  Hess , nýjasti GM Bandaríkjanna,  mætir til leiks og teflir með KR-A á fyrsta borðii í síðustu 3 umferðum Íslandsmóts skákfélaga.    Hann var með 2602 stig í lok 2010 og verður án vafa mikill liðstyrkur fyrir skáksveit KR, sem berst fyrir veru sinni í 1. deildinni.  Robert  Hess er 19 ára, varð stórmeistari aðeins 17 ára gamall. Hann var valinn í Ólympíusveit Bandaríkjanna í Síberíu í fyrrahaust með litlum fyrirvara og komst því ekki til að tefla með KR í fyrri hluta keppninnar. Hann teflir nú í  A-flokki í hinu sterka Aeroflot móti í Moskvu.

 Hess á það sammerkt með GunnaGunn, fyrrum Íslandsmeistara í skák 1966 og knattspyrnu með Val 1956,  að hafa orðið meistari í tveimur greinum, skák og bandrískum ruðningi með skólaliði sínu

Haraldur Axel og Sigfús efstir á skákdegi Ása

Haraldur Axel Sveinbjörnsson varð efstur ásamt Sigfúsi Jónssyni í skákdegi Ása Stangarhylnum í dag þeir fengu báðir 7 vinninga af 10 mögulegum.   Þrír voru jafnir  í 3-5 sæti með 6.5 v.

Heildarúrslit:

• 1-2            Haraldur Axel Sveinbjörnsson               7 vinninga    46.5 stig
•                  Sigfús Jónsson                                    7      -          44.5
• 3-5            Gísli Sigurhansson                               6.5   -          46.5
•                  Ásgeir Sigurðsson                                6.5   -          42.5
•                  Jón Víglundsson                                   6.5   -          42.5
• 6-7            Birgir Sigurðsson                                  6      -        
•                  Halldór Sigurðsson                               6      -         
• 8-10          Birgir Ólafsson                                     5.5   -         
•                  Valdimar Ásmundsson                          5.5   -         
•                  Hermann Hjartarson                             5.5   -         
• 11-15        Egill Sigurðsson                                    5      -
•                 Eiður Á Gunnarsson                               5      -
•                 Jónas Ástráðsson                                   5      -
•                 Bragi G Bjarnarson                                5       -
•                 Óli Árni Vilhjálmsson                               5       -
• 16            Viðar Arthúrsson                                   4.5     -
• 17            Finnur Kr Finnsson                                 4       -
• 18            Sæmundur Kjartansson                          3.5    -
• 19            Hrafnkell Guðjónsson                              1      -