Baldur Teódór efstur unglinga fæddra 2001

Baldur Teódór Petersson varð efstur á Grand Prix Stokkhólms sem fram fór í höfuðborg Svíþjóðar um helgina.  Þetta er annað árið í röð sem Baldur sigrar í þessari keppni.  Hann hlaut 8 vinning í 9 skákum í úrslitakeppninni en á þessu móti fer fram sérkeppni í hverjum árgangi.

Nánari úrslit á heimasíðu mótsins.

Skákþáttur Morgunblaðsins: Magnús Carlsen er langefstur á heimslistanum

Á minningarmótinu um Mikhael Tal sem lauk í Moskvu um síðustu helgi gafst ágætt tækifæri til að rifja upp feril meistara sem líklega ávann sér meiri hylli en nokkur annar heimsmeistari. Þó að halla tæki undan fæti eftir tapið í seinna einvíginu við Botvinnik árið 1961 báru aðdáendur hans ávallt þá von í brjósti að þeir dagar kæmu aftur þegar Tal lagði skákheiminn að fótum sér. Leiftrandi snilld hans hafði fært honum heimsmeistaratitilinn verðskuldað aðeins 23 ára gömlum en næstu ár voru honum erfið, ekki síst í heilsufarslegu tilliti. Íslendingar fengu margoft að njóta snilldar Tal, fyrst á stúdentamótinu 1957, á Reykjavíkurmótunum 1964 og 1986, IBM-mótinu 1987 og á heimsbikarmótinu 1988.

Á minningarmótinu var jafnteflisprósentan býsna há eða um 77%. Heimsmeistarinn Anand gerði jafntefli í öllum skákum sínum. Enn og aftur sannaði Magnús Carlsen hæfni sína og er kirfilega efstur á stigalista FIDE með 2.829 stig. Magnús náði nýlega samkomulagi við FIDE um tilhögun heimsmeistarakeppninnar og mun hann vera meðal þátttakenda í næstu hrinu hennar. Lokaniðurstaðan á Tal-mótinu:

1.-2.Carlsen og Aronjan 5½ v.3.-5. Ivantsjúk, Karjakin og Nepomniachtchi 5 v. 6.-7. Svidler og Anand 4½ v. 8.-9. Kramnik og Gelfand 3½ v. 10. Nakamura 3 v.

Skömmu fyrir mótið barst sú fregn að Kasparov væri tekinn við sem þjálfari Nakamura. Ekki er vitað til þess að viðskilnaður Kasparovs við Magnús Carlsen hafi kostað mikil átök en þekki maður Kasparov má reikna má með að hann hafi gefið hinum nýja skjólstæðingi sínum góð ráð fyrir viðureignina í lokaumferðinni. Kom fyrir ekki; Magnús náði snemma frumkvæðinu og vann sannfærandi sigur:

Hiakru Nakamura - Magnús Carlsen

Drottningar-indversk vörn

1. d4 Rf6 2. c4 e6 3. Rf3 b6 4. g3 Ba6 5. Dc2 Bb4 6. Bd2 Be7 7. Bg2 c6 8. 0-0 d5 9. Re5 Rfd7 10. cxd5 cxd5 11. Bf4

Afundinn eftir slæmt gengi í mótinu sniðgengur Nakamura skarpari möguleika. 11. e4!? er ekki eins vitlaus leikur og virðist í fyrstu, t.d. 11...Rxe5 12. exd5 Bxf1 13. Kxf1 með ýmsum möguleikum.

11....Rxe5 12. dxe5 0-0 13. Hd1 Bb7 14. Rd2 Rc6 15. Rf3 g5!

Með þessari óvæntu framrás sem beinist gegn e5-peðinu hrifsar Magnús til sín frumkvæðið. Hvítur geldur þess að hafa teflt byrjunina alltof linkulega.

16. Be3 g4 17. Rd4 Rxe5 18. Bh6 He8 19. e4 Bc5! 20. Rb3 Hc8 21. Rxc5 Hxc5 22. Da4

Eðlilegra var 22. De2 en kannski hefur Nakamura óttast 22..... d4.

22....Bc6 23. Dd4 Df6 24. Bf4 dxe4 25. Bxe4 Rf3+!

Með uppskiptum kemst svartur út í endatafl peði yfir. Það gefur bestu vinningsmöguleikana.

26. Bxf3 Dxd4 27. Hxd4 Bxf3 28. Hd7 Hd5! 29. Hxd5 exd5 30. Be3 He4 31. He1 d4 32. Bd2 Hxe1 33. Bxe1

Sjá stöðumynd.

33....Be2!

Með þessum snjalla leik lokar Magnús hvíta kónginn af og það kostar peð að losa um hann.

34. f4 gxf3 35. Bf2 d3 36. Be1 Kg7 37. Kf2 Kf6 38. Ke3 Kf5 39. h3 h5 40. Bd2 Bf1 41. Be1 Bxh3 42. Kxd3 Bf1 43. Ke3 Kg4 44. Kf2 Bb5 45. Bc3 Bc6 46. Be5 b5 47. Bb8 a6 48. Bc7 f5 49. b3 Bd5 50. Bd6 f4 51. gxf4 h4 52. f5 Kxf5 53. Ke3 Kg4 54. Kf2 h3 55. Ke3 Be4 56. Kf2 Bb1 57. a3 Ba2 58. b4 Bf7

- og hvítur gafst upp, biskupinn er á leið til h5 og g4 og kóngurinn til d5. Eftir það er a3-peðið dæmt til að falla.

Helgi Ólafsson [e-mail]

-------------------------------------------

Skákþættur Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 4. desember 2011.

Skákþættir Morgunblaðsins

[Event "Tal Memorial"] [Site "Moscow RUS"] [Date "2011.11.25"] [EventDate "2011.11.16"] [Round "9"] [Result "0-1"] [White "Hikaru Nakamura"] [Black "Magnus Carlsen"] [ECO "E15"] [WhiteElo "2758"] [BlackElo "2826"] [PlyCount "116"] 1. d4 Nf6 2. c4 e6 3. Nf3 b6 4. g3 Ba6 5. Qc2 Bb4+ 6. Bd2 Be7 7. Bg2 c6 8. O-O d5 9. Ne5 Nfd7 10. cxd5 cxd5 11. Bf4 Nxe5 12. dxe5 O-O 13. Rd1 Bb7 14. Nd2 Nc6 15. Nf3 g5 16. Be3 g4 17. Nd4 Nxe5 18. Bh6 Re8 19. e4 Bc5 20. Nb3 Rc8 21. Nxc5 Rxc5 22. Qa4 Bc6 23. Qd4 Qf6 24. Bf4 dxe4 25. Bxe4 Nf3+ 26. Bxf3 Qxd4 27. Rxd4 Bxf3 28. Rd7 Rd5 29. Rxd5 exd5 30. Be3 Re4 31. Re1 d4 32. Bd2 Rxe1+ 33. Bxe1 Be2 34. f4 gxf3 35. Bf2 d3 36. Be1 Kg7 37. Kf2 Kf6 38. Ke3 Kf5 39. h3 h5 40. Bd2 Bf1 41. Be1 Bxh3 42. Kxd3 Bf1+ 43. Ke3 Kg4 44. Kf2 Bb5 45. Bc3 Bc6 46. Be5 b5 47. Bb8 a6 48. Bc7 f5 49. b3 Bd5 50. Bd6 f4 51. gxf4 h4 52. f5 Kxf5 53. Ke3 Kg4 54. Kf2 h3 55. Ke3 Be4 56. Kf2 Bb1 57. a3 Ba2 58. b4 Bf7 0-1

Héðinn í beinni gegn Shirov í dag

Íslandsmeistarinn í skák, Héðinn Steingrímsson (2562), teflir við engan annan en spænska ofurstórmeistarann Alex Shirov (2713) í sjöundu umferð þýsku deildakeppnarinnar sem fer nú í morgunsárið.  Héðinn teflir á fyrsta borði fyrir Dortmund en Shirov fyrir Baden Baden.  Skákin hefst nú kl. 9.

• Heimasíða mótsins
• Beinar útsendingar (tölvuskýringar)
  

 

Jólaskákæfing T.R. - tónlist og fjölskylduskákmót!

Í gær var jólaskákæfing í T.R. sem jafnframt var síðasta skákæfingin fyrir börn og unglinga í T.R. á þessu ári. Laugardagsæfingarnar svokölluðu hafa verið vel sóttar í vetur. Tveir flokkar hafa verið í gangi og hafa Daði Ómarsson og Eiríkur Kolbeinn Björnsson séð um þjálfun unglingaflokksins og Torfi Leósson séð um þjálfun barnaflokksins.

Jólaskákæfingin í dag var sameiginleg fyrir báða flokkana og var hún fjölmenn og með nýstárlegu sniði. Jólasveinahúfur settu skemmtilegan svip á æfinguna. Tónlistaratriði og fjölskylduskákmót var þema dagsins! Alls voru þátttakendur 48, þar af 37 börn og unglingar og 9 fullorðnir! En byrjum á byrjuninni.

Fyrst á dagskrá voru þrjú tónlistaratriði sem skákkrakkar úr T.R. stóðu fyrir. Páll Ísak Ægisson spilaði jólalagið Jingle Bells á básúnu og Ólafur Örn Olafsson spilaði Musette á hljómborð. Að lokum spilaði Símon Þórhallsson á rafmagnsgítarinn sinn Led Zeppelin lagið fræga Stairway to heaven. Þetta voru snilldarflott atriði og hlutu tónlistarmennirnir mikið lófaklapp fyrir!

Næst á dagskrá var tveggja manna liðakeppni. Krökkunum hafði verið boðið upp á að taka einhvern fjölskyldumeðlim með sér á jólaskákæfinguna og mynda lið. Það voru heilmargir sem komu með pabba, afa, systkini eða frænku eða frænda með sér. Aðrir voru í liði með vinum eða félögum af laugardagsæfingunum. Liðanöfnin voru frumleg og skemmtileg!

Tefldar voru 6 umferðir með 5 mín. umhugsunartíma. Í tveimur fyrstu sætunum urðu bræðurnir Arnaldur Loftsson og Hrafn Loftsson sem tefldu í sitt hvoru liðinu með sonum sínum! Eftir stigaútreikning hlutu Arnaldur og sonur hans Bjarki 1. sætið og Hrafn og Hilmir sonur hans 2. sætið. Í 3. sæti urðu síðan vinirnir úr unglingaflokki T.R. þeir Jóhannes Kári Sólmundarson og Rafnar Friðriksson. Þessi þrjú lið fengu Hátíðarpoka Freyju í verðlaun. En úrslit urðu annars sem hér segir:

• 1.   Biskupaparið: Bjarki Arnaldarson/Arnaldur Loftsson 10v af 12, 32,5 stig
• 2.    Hvítu riddararnir: Hilmir Hrafnsson/Hrafn Loftsson 10v 31, 5 stig
• 3.   Tveir jólasveinar og trefill: Rafnar Friðriksson/Jóhannes Kári Sólmundarson 8v 32,5 stig
• 4.   Chess Master: Guðmundur Agnar Bragason/Bragi Þór Thoroddsen 8v 28 stig
• 5.   Svörtu hrókarnir: Bárður Örn Birkisson/Björn Hólm Birkisson 8v 26,5 stig
• 6.   Meðan peðin sofa liggja hrókarnir andvaka: Ellert Kristján Georgsson/Georg Lúðvíksson 7,5v
• 7.   Brose before Hose: Huginn Orri Arnórsson/Daníel Örn Auðunsson 7,5v
• 8.   Arsenal United: Jakob Alexander Petersen/Símon Þórhallsson 7v
• 9.   Kolli og Kalli: Kolbeinn Ólafsson/Karl Andersson 7v
• 10. Axel og Co: Axel Bergsson/Birkir Bárðarson 7v
• 11. Svart-hvítir: Þorsteinn Muni Jakobsson/Guðmundur Karl Úlfarsson 7v.
• 12. Jólarnir: Aron Ingi Woodard/Ignas Mykolaitis 6,5v
• 13. Riddararnir: Erik Daníel Jóhannesson/Bjarni Þór Guðmundsson 6,5v
• 14. A-liðið: Anton Oddur Jónasson/Aldís Birta 5v
• 15. M og H: Hubert Jakubek/Pétur Jakubek 5v
• 16. Hrókar alls fagnaðar: Svava Þorsteinsdóttir/Leifur Þorsteinsson, 5v
• 17. Tvibbarnir: Sólrún Elín Freygarðsdóttir/Halldóra Freygarðsdóttir, 5v
• 18. Jólasveinar: Alexandra Kinder/Mateusz Jakubek 5v
• 19. Kóngarnir: Páll Ísak Ægisson/Sveinn Valgeirsson 5v
• 20. Eldhrókarnir: Ólafur Örn Olafsson/Þröstur Olaf Sigurjónsson 4v
• 21. Jólakötturinn: Jóhann Bjarkar Þórsson/Gylfi Harðarson 4v
• 22. Aðalskákfélag: Bjartur Guðmundsson/Orri Guðmundsson 3v
• 23. Jólaliðið: Sana Salahkarim/Mir Salahkarim 3v
• 24. Boginn: Bóas Orri Hannibalsson/Hannibal Hauksson 2v

Að þessari skemmtilegu liðakeppni lokinni fór fram verðlaunaafhending. Fyrst voru veitt verðlaun (medalíur) fyrir mætingu og árangur á laugardagsæfingunum á þessari önn (nánar í pistli um jólaskákæfinguna á heimasíðu T.R., taflfelag.is).

Því næst fór fram verðlaunaafhendingin fyrir Fjölskylduskákmótið og að lokum voru dregnir út fjórir bíómiðar í happdrætti. Tvö lið voru dregin út og þeir heppnu voru Eldhrókarnir, feðgarnir Ólafur Örn og Þröstur Olaf, svo og Jólakötturinn en það voru Jóhannes og Gylfi sem eru nýbyrjaðir að koma á laugardagsæfingarnar.

Þá var bara jólahressingin eftir, sem að þessu sinni var höfð sem lokapunktur á jólaskákæfingunni. Malt og appelsín, piparkökur og kanelsnúðar, allt átti þetta vel við á vel heppnaðri jólaæfingu. Skákmömmurnar Elfa Björt Gylfadóttir, mamma Gauta Páls, og Áróra Hrönn Skúladóttir, mamma Hilmis Freys, bökuðu vöfflur og helltu upp á kaffi frammi í eldhúsi og allt féll þetta vel í kramið!

Skákstjórar voru Sigurlaug Regína Friðþjófsdóttir og Jóhann H. Ragnarsson sem einnig tók myndir.

Laugardagsæfingar T.R. hefjast aftur 7. janúar 2012!

Pistill: SRF.

Myndaalbúm (JHR)

Who Keres og Heiðursmenn efstir á afar spennandi Atskákmóti Icelandair

Fyrstu níu umferðirnar á Atskákmóti Icelandair fóru fram í magnþrungnu andrúmslofti í Hótel Natura (Loftleiðum) í dag.  Keppnin er afar jöfn og spennandi og aðeins munar 5,5 vinningi á efstu sveitinni og sveitinni í 11. sæti.   Sveitirnar Who Keres og Heiðursmenn leiða með 25 vinning af 36 mögulegum.  Three Burritos & One Pink Taco er í 3. sæti með 24,5 vinning.

Stöðuna má finna á Chess-Results.

Sé skoðað hverjir eru standa sig best á hverju borði er staðan þannig:

• 1. borð: Guðmundur Kjartansson, Bragi Þorfinnsson 8 v. Omar Salama 7,5 v.
• 2. borð: Jón Viktor Gunnarsson 8 v., Þröstur Þórhallsson 7,5 v.
• 3. borð: Daði Ómarsson 8 v., Þorsteinn Þorsteinsson 7,5 v.
• 4. borð: Gunnar I. Birgisson 8 v., Magnús Sigurjónsson 7,5 v.

Taflmennskan hefst kl. 13 á morgun og þá eru tefldar áttu síðustu umferðirnar.  

Chess-Results

 

Hrund og Gauti Páll efst á Jólagleðimóti við Hverafold

Tuttugu áhugasamir skákkrakkar tóku þátt i velheppnuðu skákmóti Fjölnis og NETTÓ við Hverafold í Grafarvogi. Þau Hrund Hauksdóttir Rimaskóla og Gauti Páll Jónsson Grandaskóla urðu efst á hnífjöfnu móti með 5 vinninga af 6 mögulegum. Mótið var haldið í tilefni af Jólagleði í Hverafold, verslunarmiðstöðinni Torginu Grafarvogi.

Í næstu sætum komu Norðurlandameistararnir úr Rimaskóla Svandís Rós Ríkharðsdóttir sem gerði sér lítið fyrir og vann Hrund skólasystur sína í fyrsta sinn og Kristófer Jóel Jóhannesson með 4,5 vinninga. Felix Steinþórsson Álfhólsskóla og Axel Hreinn Hilmisson Rimaskóla fengu 4 vinninga og Ásdís Birna Þórarinsdóttir sem er enn ein skákdrottningin í Rimaskóla hlaut 3,5 vinninga.

Skákmótið fór fram í glæsilegum sal Sjálfstæðismanna í Grafarvogi. Í skákhléi fengu allir þátttakendur veitingar frá NETTÓ í Grafarvogi en verslunin gaf einnig öll verðlaun mótsins. Allir þátttakendur fengu vinninga frá Nettó og þeir 10 efstu bækur og nammipoka.

Það voru þeir frændur Helgi Árnason og Gunnlaugur Egilsson stjórnarmenn í Skákdeild Fjölnis sem sáu um framkvæmd mótsins og hrósuðu þeir óspart þátttakendum fyrir góða frammistöðu og hegðun. 

Myndaalbúm (HÁ)

 

Guðmundur og Birkir Karl unnu í dag - Björn í beinni á morgun

Guðmundur Gíslason (2318) og Birkir Karl Sigurðsson (1649) unnu báðir í áttundu og næstsíðustu umferð b-flokks London Chess Club sem fram fór í dag.  Björn Þorfinnsson tapaði fyrir indverska alþjóðlega meistaranum Sahaj Grover (2515) og Bjarni Jens Kristnsson (2045) tapaði einnig.  Björn og Guðmundur mæta enskum landsliðsmönnum á morgun.  Björn teflir við Gawain Jones (2635) en Guðmundur teflir við Nicholas Pert (2563).  Skák Björns verður sýnd beint á vefsíðu mótsins. 

Björn hefur 6 vinninga og er í 6.-16. sæti, Guðmundur hefur 5,5 vinning og er í 17.-36. sæti og Bjarni Jens og Birkir Karl hafa 3,5 vinning og eru í 129.-163. sæti.

Indverski stórmeistarinn Abhjeet Gupta (2640) er efstur með 7 vinninga.  Í 2.-5. sæti með 6,5 vinning eru Grover og Englendingarnir;  Peter Wells (2492), Keith Arkell (2418), Jovanka Houska (2415) og Jones.

231 skákmaður tekur þátt í b-flokknum og þar á meðal 11 stórmeistarar og 22 alþjóðlegir meistarar.  Björn er nr. 22 í styrkleikaröð keppenda, Guðmundur nr. 35, Bjarni Jens nr. 120 og Birkir Karl nr. 220.

• Heimasíða mótsins
• Beinar útsendingar - Sex efstu borðin - hefjast kl. 14:30

Carlsen, McShane og Kramnik efstir í London

Þremur skákum af fjórum lauk með hreinum úrslitum í sjöundu umferð sem fram fór í dag.   Sigurvegar dagsins, Carlsen, McShane og Kramnik eru efstir með 12 stig en þeir lögðu allir hver sinn Englendinginn.   Nakamura er fjórði með 11 stig.  

Staðan:

• 1.-3. Carlsen (2826), Kramnik (2800) og McShane (2671) 12 stig
• 4. Nakamura (2758) 11 stig
• 5.-6. Aronian (2802) og Anand (2811) 7 stig
• 7. Short (2698) 4 stig
• 8.-9. Howell (2633), Adams (2734) 3 stig

Adams og Howell hafa teflt 7 skákir en aðrir hafa teflt 6 skákir.  

Í 8. og næstsíðustu umferð sem fram fer á morgun mætast m.a: Anand-Carlsen og McShane-Kramnik.

• Heimasíða mótsins (margskonar útsendingar)
• Beinar útsendingar (hefjast kl. 14 nema lokaumferðin kl. 12)
• Chessbomb (skák- og tölvuskýringar)

 

Héðinn með jafntefli í dag - gæti mætt Shirov í fyrramálið

Íslandsmeistarinn í skák, Héðinn Steingrímsson (2562) gerði jafntefli við rúmenska stórmeistarann Constantin Lupulescu (2655) í 6. umferð þýsku deildakeppninnar (Bundesliga) sem fram fór í dag.  Héðinn tefldi á fyrsta borði fyrir Hansa Dortmund.  Á morgun teflir Dortmund við Baden Baden en þar tefldi enginn annar en Alexei Shirov (2713) á fyrsta borði í dag og er því líklegt að þeir tefli saman.  

Umferðin á morgun hefst kl. 9.  Skák Héðins verður sýnd beint á vefsíðu mótsins. 

 

Héðinn í beinni í dag

Íslandsmeistarinn í skák, Héðinn Steingrímsson (2562), verður í beinni í dag frá þýsku deildakeppninni (Bundesligan).  Hann teflir á fyrsta borði fyrir Hansa Dortmund og mætir rúmenska stórmeistaranum Constantin Lupulescu (2655).

Skákin verður sýnd beint á vefsíðu mótsins og hefst kl. 13.