SSON gerði góða ferð í 101 Reykjavík

Fyrri hluti einvígis vinafélaganna Skákfélags Vinjar og Skákfélags Selfoss og nágrennis fór fram í gærkvöldi á heimavelli Vinjargengis.

Teflt var á tíu borðum, allir við alla og sjö mínútur á mann. Einhverja vantaði í bæði lið og nokkuð stór voru skörðin sem höggvin voru í lið Vinjar svo formaður austmanna, Magnús Matthíasson, bauð skákstjóranum Róbert Lagerman að keppa fyrir vini sína í Vin. Rafn Jónsson TR ingurinn knái var einnig með borgarbúum en Víkingurinn Óskar Haraldsson tefldi fyrir Ölfyssinga.

Austmenn náðu vinningsforskoti eftir fyrstu umferð og svo hart var barist að engin umferð endaði með meiri mun en 6-4. Í hálfleik var staðan 24-26 fyrir aðkomusveitina.

Í hálfleik var þambað kaffi og orkurík óhollusta rann ofan í trekkta íþróttamennina sem börðust fyrir lífi sinna kalla fram á síðustu sekúndu. Að loknum hundrað tefldum skákum stóðu leikar 51 ½ móti 48 ½ Ölfyssingum í hag.

Bestum árangri Vinjarliðs náðu Róbert með 9,5 v. Jorge Fonseca með 8,5 og Hörður Garðarsson með 8. Hjá Austmönnum voru þeir Ingimundur Sigurmundsson með 8 og Ingvar Örn Birgis með 7,5 en vinningar röðuðust nokkuð jafnt á sveitina.

Liðsmenn Skákfélags Vinjar hafa heitið því að mæta austur yfir heiðina með einvígisbikar fyrir tímabilið 2011-2012 og ætla helst að knúsa hann á leiðinni heim aftur þegar seinni umferð fer fram í byrjun nýja ársins. En það á allt eftir að koma í ljós.

Ölfyssingum er hér með opinberlega þakkað fyrir heimsóknina og skemmtilega og drengilega keppni. Þá er forsetanum, G. Björns og aðstoðarmanni , Rúnari Berg, þökkuð óopinber heimsókn en þeir voru á ferð milli skákviðburða.

Skákfélag Vinjar: Róbert Lagerman, Haukur Angantýsson, Jorge Fonseca, Hörður Garðarsson, Eymundur Eymundsson, Jón Birgir Einarsson, Rafn Jónsson, Sigurjón Friðþjófsson (Haukur Halldórs í seinni hálfleik), Hjálmar Sigurvaldason og Embla Dís Ásgeirsdóttir (Arnar Valgeirsson í seinni hálfleik).

SSON: Ingimundur Sigurmundsson, Magnús Matthíasson, Ingvar Örn Birgisson, Inga Birgisdóttir, Erlingur Jensson, Erlingur Atli, Grantas Grigoranas, Óskar Haraldsson, Þorvaldur Siggason og Arnar Kjörís.

Myndaalbúm (AV og GB)

Carlen efstur ásamt Nepo og Ivanchuk eftir glæsisigur á Gelfand

Magnus Carlsen (2826) vann glæsilegan sigur á Gelfand (2746) í 2. umferð Tal Memorial sem fram fór í dag.   Skákin var afar flókin og virtist halla á Carlsen en Norðmaðurinn réð miklu betur við flækjurnar en Ísraelsmaðurinn og vann sigur í afar skemmtilegri og flókinni skák.   Öðrum skákum lauk með jafntefli.  Magnus er því efstur ásamt Nepo (2730) og Ivanchuk (2775).  Þriðja umferð fer fram á morgun og hefst kl. 11.

Þá mætast m.a.: Kramnik-Carlsen, Ivanchuk-Aronian og Anand-Nepo. 

Staðan:

• 1.-3. Nepo (2730), Ivanchuk (2775) og Carlsen (2826) 4 stig
• 4.-7. Aronian (2802), Karjakin (2763), Nakamura (2753) og Anand (2817) 2 stig
• 8.-10. Kramnik (2800), Gelfand (2746) og Svidler (2755) 1 stig

Meðalstigin er 2776 skákstig og telst það sterkasta skákmót ársins.  Veitt eru 3 stig fyrir sigur og 1 fyrir jafntefli.

• Heimasíða mótsins
• Beinar útsendingar - innheldur einnig útsendingu frá skákstað (hefjast kl. 11)
• Vefútsending - frábær myndgæði
• ChessBomb (skákskýringar/tölvuskýringar)

Hou Yifan tekur forystuna

Kínverska stúlkan Hou Yifan (2578) vann þriðju einvígisskák hennar og indversku skákkonunnar Humpy Koneru (2600).  Hou Yifan leiðir nú í einvíginu 2-1.  Fjórða skákin verður tefld á morgun.   

Alls tefla þær 10 skákir.  Verði jafnt tefla þær til þrautar með skemmri umhugsunartíma.

• Heimasíða einvígisins
• Beinar útsendingar (hefjast kl. 14) 
• Chessbomb

Friðrik gerði jafntefli við Piu Cramling

Stórmeistarinn Friðrik Ólafsson (2428) gerði í dag jafntefli við sænsku skákdrottninguna Piu Cramling (2495) í frestaðri skák úr 2. umferð.  Friðrik hefur 1 vinning.  Á morgun teflir Friðrik við hollenska stórmeistarann Robert Van Der Sterren (2514).  Skákin verður sýnd beint og hefst útsending kl. 12.

Mótið er haldið til minningar um Euwe en í ár eru 30 ár síðan Euwe lést.   Þátt taka átta skákmenn, bæði konur og karlar á ýmsum aldri.  Taka 4 skákmenn þátt í hvorum flokki og tefld er tvöföld umferð, alls 6 skákir.  Í flokki Friðriks tefla auk hans: Paul Van Der Sterren (2514), Pia Cramling (2495) og Zhaogin Peng (2379).

 

• Heimasíða mótsins
• Beinar útsendingar

 

Fimmtudagsmót hjá TR í kvöld

Fimmtudagsmót er hjá TR í kvöld og hefst kl. 19.30.  Tefldar verða 7 umferðir með 7 mínútna umhugsunartíma.  Mótin fara fram í félagsheimili T.R., skákhöllinni að Faxafeni 12 og opnar húsið kl. 19.10.  Glæsilegur verðlaunapeningur er í boði fyrir sigurvegara hvers móts ásamt því sem aukaverðlaun verða í boði af og til í vetur.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

Halldór Grétar, Kristján og Benedikt efstir öðlinga

Halldór Grétar Einarsson (2236), Kristján Guðmundsson (2277) og Benedikt Jónasson (2237) eru efstir og jafnir með fullt hús að lokinni þriðju umferð Vetrarmóts öðlinga sem fram fór í kvöld.  Nokkuð er um frestaðar skákir og pörun 4. umferðar verður ekki tilbúin fyrr en á föstudagskvöld.

Úrslit og stöðu má nálgast á Chess-Results

• Heimasíða mótsins
• Chess-Results
• Myndaalbúm (GB)

Ivanchuk og Nepomniachtchi unnu í fyrstu umferð

Í dag hófst sterkasta skákmót ársins í Moskvu.  Um er að ræða minningarmót um Mikhail Tal.  Í fyrstu umferð vann Rússinn með langa nafnið, Nepomniachtchi (2730), sem er oft kallaður Nepo, landa sinn Vladimir Kramnik (2800).  Ivanchuk (2775) vann svo Svidler (2755).  Carlsen (2823) var svo heppinn að sleppa með jafntefli gegn Aronian (2802).  Önnur umferð fer fram í fyrramálið og hefst kl. 11.

Þá mætast m.a.: Carlsen-Gelfand, Nepo-Ivanchuk og Aronian-Kramnik.   

Meðalstigin er 2776 skákstig og telst það sterkasta skákmót ársins.

• Heimasíða mótsins
• Beinar útsendingar - innheldur einnig útsendingu frá skákstað (hefjast kl. 11)
• Vefútsending - frábær myndgæði
• ChessBomb (skákskýringar/tölvuskýringar)

Friðrik tapaði í dag

Stórmeistarinn Friðrik Ólafsson (2428) tapaði í dag fyrir hollensku skákkonunni  Zhaogin Peng (2379) í 3. umferð minningarmóts um Max Euwe sem þessa dagana fer fram í Amsterdam.  Á morgun teflir við Friðrik við sænsku skákdrottninguna Piu Cramling (2495) frestaða skák úr 2. umferð. 

Mótið er haldið til minningar um Euwe en í ár eru 30 ár síðan Euwe lést.   Þátt taka átta skákmenn, bæði konur og karlar á ýmsum aldri.  Taka 4 skákmenn þátt í hvorum flokki og tefld er tvöföld umferð, alls 6 skákir.  Í flokki Friðriks tefla auk hans: Paul Van Der Sterren (2514), Pia Cramling (2495) og Zhaogin Peng (2379).

 

• Heimasíða mótsins
• Beinar útsendingar

 

Allsherjarhátíð í Vin

Það var mikið um dýrðir í Vin, athvarfi Rauða krossins við Hverfisgötu 47, á mánudaginn. Þá stóðu Vinafélagið og Skákakademía Reykjavíkur fyrir Vinaskákmótinu. Fulltrúar Actavis komu færandi hendi, Björk Vilhelmsdóttir formaður velferðarsviðs Reykjavíkurborgar hét stuðningi við áframhaldandi rekstur í Vin og gestir gæddu sér á dýrlegum veitingum frá Bakarameistaranum.

Í upphafi móts afhenti Benedikt Sigurðsson, sviðsstjóri samskiptasviðs Actavis, Magnúsi Matthíassyni formanni Vinafélagsins eina milljón króna, til að styðja við rekstur Vinjar. Magnús lét þessa höfðinglegu gjöf ganga umsvifalaust til Kristjáns Sturlusonar, framkvæmdastjóra Rauða kross Íslands.

Björk Vilhelmsdóttir setti svo Vinaskákmótið formlega og hét stuðningi Reykjavíkurborgar við áframhaldandi rekstur Rauða krossins í Vin. Hún sagði að málið yrði tekið fyrir hjá velferðarsviði á fimmtudag, og að óskað yrði eftir viðræðum við Rauða krossinn og Vinafélagið.

Björk lagði áherslu á sérstöðu Vinjar og bar lof á kraftmikið starf Vinafélagsins, sem stofnað var fyrir réttum mánuði og telur nú um 600 félaga.

Björk léki síðan fyrsta leikinn í skák Hauks Angantýssonar og Hrannars Jónssonar. Riddaranum var vippað til f3 og Vinaskákmótið var hafið. Keppnin um efsta sætið var æsispennandi.

Tefldar voru sex umferðir og í hálfleik voru þeir Sveinbjörn Jónsson og Davíð Kjartansson efstir með fullt hús.

Í hléinu gæddu skákmenn og gestir sér á gómsætum veitingum frá Bakarameistaranum. Þar var stórfengleg kaka í aðalhlutverki, listilega skreytt með kjöorði Vinafélagsins: Allir saman!

Eftir kaffihlé færði Skákakademía Reykjavíkur Arnari Valgeirssyni, formanni Skákfélags Vinjar, taflsett að gjöf, auk þess sem Arnar fékk skákspennubókina Lygarann eftir Óttar Norðfjörð. Skákfélagið í Vin er eitt hið kraftmesta á landinu og hefur starfað af miklum þrótti síðan 2003.

Þrír urðu efstir og jafnir: Davíð Kjartansson, Jón Torfason og Ólafur B. Þórsson en Davíð var úrskurðaður sigurvegari eftir stigaútreikning. Sjö keppendur til viðbótar hrepptu vinninga í happdrætti, en verðlaunin komu frá Forlaginu, Sögum útgáfu og Henson.

1.-3. sæti: Davíð Kjartansson, Jón Torfason, Ólafur B. Þórsson 5 vinninga. 4.-6. sæti: Sveinbjörn Jónsson, Sæbjörn Guðfinnsson, Hörður Garðarsson 4 vinninga. 7.-8. Sæti: Haukur Angantýsson og Gunnar Nikulásson 3½ vinning. 9.-13. sæti: Stefán Bergsson/Hrafn Jökulsson, Hjálmar Sigurvaldason, Haukur Halldórsson, Inga Birgisdóttir 3 vinninga. 14.-16. sæti: Hrannar Jónsson, Ásgeir Sigurðsson, Hinik Páll Friðriksson 2½ vinning. 17.-19. sæti: Finnur Kr. Finnsson, Arnar Valgeirsson, Úlfur Orri Pétursson 2 vinninga. 20. Sæti: Michael Beuffre 1½ vinning. 21. sæti: Árni Jóhann Árnason.

 

Myndaalbúm (HJ)

Friðrik í beinni frá Amsterdam

Skák Frirðik Ólafssonar gegn hollensku skákkonunni Zhaogin Peng (2379) á minningarmótinu um Max Euwe er nú sýnd beint á vefsíðu mótsins.

• Heimasíða mótsins
• Beinar útsendingar (kl. 12)