Fimmtudagsmót hjá TR í kvöld

Fimmtudagsmót er hjá TR í kvöld og hefst kl. 19.30.  Tefldar verða 7 umferðir með 7 mínútna umhugsunartíma.  Mótin fara fram í félagsheimili T.R., skákhöllinni að Faxafeni 12 og opnar húsið kl. 19.10.  Glæsilegur verðlaunapeningur er í boði fyrir sigurvegara hvers móts ásamt því sem aukaverðlaun verða í boði af og til í vetur.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

EM-pistill nr. 2 – Porto Carras er það heillin – Spánverjar í fyrstu umferð

Það tók við ágætis ferðalag í morgun frá London til Þessaloníku.  Á fætur kl. 7 og við loks komnir inn á herbergi kl. 21 að grískum tíma.  Með okkur í fluginu voru Englendingar, Wales-verjar, Skotar og einstaka aðrir keppendur.  Henrik kom fyrr í dag einnig eftir langt ferðalag

Grikkirnir venju saman rólegir yfir öllu og rútan ekki mætt á flugvöllinn þegar við mættum.   Aðstæður á hóteli til fyrirmyndar.  Við gistum á fimm stjörnu hótel og hér er allt til alls, meira að segja Casino og golfvöllur. 

Liðsstjórafundur var kl. 22.  Skákstaðurinn er í um 10 mínútna göngutúr frá hótelinu sem er hressandi.    Aðstæður á skákstað er einnig til mikillar fyrirmyndar og sýndist mér að allir skákirnar væru sýndar beint. 

Á liðsstjórafundinum var farið yfir helstu reglur venju samkvæmt.   Fátt kom þar á óvart nema þó að búið er að herða mjög reglur varðandi samskipti keppenda við aðra á með keppni stendur.    Liðsstjóri verður t.d. að standa fyrir aftan eigin liðsmenn á meðan viðureign stendur, má ekki vera fyrir aftan andstæðingana.    Sérskákstjórar verða á mótinu til að fylgjast með þessu að sögn yfirskákstjórans. 

Keppendur mega ekki eiga samskipti við neina á meðan skák og eins og einn liðsstjóri spurði: „Mega keppendur ekki heilsa gömlum vinum“!  Skákstjórinn talaði auðvitað um heilbrigða skynsemi.  Ástæðan fyrir þessu er auðvitað almenn tortryggni eftir Feller-málið á síðasta Ólympíuskákmóti þar sem franska skáksambandið telur sannað að einn liðsmaður liðsins hafi svindlað með aðstoð liðsstjóra og eins stórmeistara sem sendi SMS til liðsstjórans frá heimili sínu í Frakklandi.    

Á leið á liðsstjórafundinn, sem við Helgi og Björn sóttum ræddum við Mikhail Gurevich, stórmeistara frá Tyrklandi.  Þegar Helgi spurði hann hvort hann tefldi kom um hæl: „of course not“.  Gurevich sagðist vera að fylgja sínum krökkum en meðalaldur tyrkneska liðsins er aðeins 17 ára og elsti keppandi er 21 árs.  Þeir yngstu 13 ára.  Tyrkneska liðið er reyndar eitt það lakasta samkvæmt stigum en framtíðin hlýtur að vera björt.

Á liðsstjórafundinum sátum við með sænska stórmeistaranum Stellan Brynell.    Hann er teflandi liðsstjóri rétt eins og Helgi og einnig skráður liðsstjóri.  Svíarnir senda ekki sitt sterkasta lið en m.a. vantar Berg, Agrest, Tiger og Hector.  Brynell nefndi „economical reasons“, hvað sem það svo þýðir í þessu tilfelli.   Norðmenn senda strípuð lið.  Aðeins fjórir liðsmenn í hvoru liði, engir varamenn né liðsstjórar.  Athyglisvert í ljósi þess að Ólympíuskákmótið fer fram í Tromsö 2014.  Norðmenn eru reyndar eina Norðurlandaþjóðin sem sendir kvennalið.  

Ég sjálfur kem hingað sem skákstjóri, eitthvað sem ég hef aldrei gert áður á erlendri grundu.  Ekki veit ég nákvæmlega hvaða hlutverki ég mun gegna en það kemur í ljós á morgun.  Ég vonast til að geta verið sem næst íslenska liðinu til að fylgjast með og taka myndir.  Það er ljóst að engar fréttir verða frá mér á meðan skákunum stendur en ég treysti því að Halldór Grétar, Sigurbjörn, Ingvar og fleiri sinni fréttaflutningi af skákunum á Skákhorninu af hefðbundnum sóma. 

Einhverjir neterfiðleikar eru hér á hótelinu.  Heldur pirrandi og vonandi tímabundið.   Netið er inni og úti en þó fyrst og fremst úti.  Fréttaflutningur af öðrum mótum en EM verður minni en vanalega, sérstaklega ef netmál komast ekki í betra form en mér rétt tókst að koma þessum pistli í gegn þegar netið hrökk í gang að morgni til.  Öðrum fréttum tókst mér ekki að koma að þessu sinni en úr því verður bætt. 

Á morgun mætum við sterku liði Spánverja.   Þá verður fjör.  Umferðin hefst kl. 13.  Fylgist með. 

Nóg í bili, meira á morgun.

Kveðja frá Porto Carras

Gunnar Björnsson

 

 

 

Sæbjörn sigurviss í Stangarhyl í dag

Það mættu tuttugu og sex heldri skákmenn til leiks hjá Ásum í dag. Sæbjörn Guðfinnsson var í mestu stuði og sigraði með 8½ vinning af 9.  Stefán Þormar varð í öðru sæti með 7 vinninga og Haraldur Axel í þriðja sæti með 6 ½ vinnin.  Haukur Angantýsson sækir í sig veðrið og fékk 6 vinninga í fjórða sæti.

Heildarúrslit:

1          Sæbjörn Guðfinnsson                                    8.5 vinninga

2          Stefán Þormar                                                7

3          Haraldur Axel Sveinbjörnsson                      6.5

4          Haukur Angantýsson                                     6

5-6       Þorsteinn Guðlaugsson                                  5.5

            Gísli Sigurhansson                                         5.5

7-12     Baldur Garðarsson                                         5.5

            Valdimar Ásmundsson                                  5

            Birgir Sigurðsson                                           5

            Birgir Ólafsson                                              5

            Jón Víglundson                                             5

            Jónas Ástráðsson                                           5

13-14   Magnús V. Pétursson                                    4.5

            Ásgeir Sigurðsson                                          4.5

15-18   Grímur Jónsson                                              4

            Óli Árni Vilhjálmsson                                               4

            Finnur Kr Finnsson                                        4

            Jón Bjarnason                                                4

19-22   Egill Sigurðsson                                             3.5

            Friðrik Sófusson                                            3.5

            Halldór skaftason                                          3.5

            Eiður Á Gunnarsson                                      3.5

23-25   Viðar Arthúrsson                                           3

            Hlynur Þórðarsson                                         3

            Hermann Hjartarson                                      3

            Hrafnkell Guðjónson                                     0

 

 

EM-pistill nr. 1 - Liðið í London

Það er óhætt að segja að ýmsu hafi gengið í undirbúningi EM-liðsins.  Fimm manna lið var valið í byrjun september og í það valdir af landsliðþjálfaranum, Helga Ólafssyni, stórmeistararnir Hannes Hlífar Stefánsson, Héðinn Steingrímsson og Henrik Danielsen, FIDE-meistarinn Hjörvar Steinn Grétarsson og alþjóðlegi meistarinn Bragi Þorfinnsson átti að vera varamaður.  En fljótt skipuðust veður í lofti.  

Hannes tilkynnti forföll af persónulegum ástæðum í byrjun október og sæti hans tók Stefán Kristjánsson, þá rétt nýbúinn að tryggja sér 2500 skákstig og þar með stórmeistaratitilinn en Stefán hafði fyrir löngu náð sér í tilskylda 3 stórmeistaraáfanga.   Héðinn forfallaðist einnig vegna persónulegra ástæðna tæpri viku fyrir mót og var þá ákveðið að Helgi Ólafsson kæmi inn í liðið sem keppandi einnig.  Allt var þó ekki búið enn því Stefán dró sig út á sunnudagsmorguninn, tveimur dögum fyrir brottför vegna bakmeiðsla.

Þá hófst æsilegur sunnudagur.   Fyrst þurfti að fá nýjan mann,  svo fá samþykki mótshaldara, en allir frestir fyrir liðsbreytingum voru auðvitað fyrir löngu útrunnir.   Fá þurfti samþykki landliðsnefndar og stjórnar SÍ og svo að panta nýja flugmiða, breyta hóteli o.þ.h.   Allt gekk þetta snurðulaust fyrir sig.  Björn Þorfinnsson var til í slaginn, mótshaldarar samþykktu breytingu á íslenska liðinu vegna þessara óvenjulegra aðstæðna og allt klárt á sunnudagskveldi.  

Við allar þessar breytingar lækkuðu meðalstign töluvert og í stað þess að vera í 26. sæti af 38 liðum var íslenska liðið nr. 32.   Aðeins sex lið eru með stigalægri lið en íslenska liðið.   Íslenska liðið er stigalægst norrænna liða, nokkuð sem hefur væntanlega aldrei gerst áður.  Í fyrstu umferð virðist miðað við núverandi uppstillingar að íslenska liðið mæti Spánverjum.  Vallejo Pons (2705) og Shirov (2705) á 1. og 2. borði, takk fyrir!   Aðrir líklegir andstæðingar gætu verið Tékkar og Pólverjar.   

Ekki tókst að koma liðinu á einum degi til Þessaloníku, degi fyrir mót, þar sem tengiflug var óhagkvæmt.  Þess í stað var flogið til London í dag, þriðjudag, og þaðan verður flogið til Þessaloníku á beint á morgun.    Menn lenda um kl. 17:30 og því verður nægur tími til að ná hvíld fyrir fyrstu umferð.  Henrik Danielsen kemur frá Danmörku þar sem hann var að tafli í dönsku deildakeppninni síðustu helgi.

Forsetanum fannst verðin há á uppgefnum hótelum hjá Icelandair fremur dýr og fann mun ódýrara hótel í gegnum netið.  Einhverjar ástæður voru þó fyrir því en vel ásættanlegur aðstæður miðað við taxtann.  Við Hjörvar erum saman í herbergi, bræðurnir saman í herbergi en liðsstjórinn fékk sérherbergi.  Bræðurnir fengu eitt sameignlegt mjótt hjónarúm  en í herbergi Helga  liðsstjóra eru 4 stök rúm!  Þröngt má sáttir sitja (liggja).  

Nóg í bili, meira á morgun.

Heimasíða mótsins

Chess-Results

Kveðja frá London,
Gunnar Björnsson  

KR-ingar gera það ekki endasleppt

Líf og fjör hefur verið á skákkvöldum KR-inga undanfarin mánuð. Á þriðja tug keppenda mættir til tafls að jafnaði með það að markmiði að hnésetja andstæðinginn í sem fæstum leikjum eða þá á tíma.  Október bauð reyndar upp á 5 mánudaga sem þýddi 65 skákir fyrir fastagesti klúbbsins þann mánuðinn, en tefldar eru 13 umferðir takk með 7 mín. umhugsunartíma í hverju móti.
 
Sigurvegari gærkvöldsins var Birgir Berndsen með 9.5v. /13 en Jón G. Friðjónsson var jafn honum að vinningum en örlítið lægri að stigum.  Kristján Stefánsson formaður kom svo einn í 3ja sæti með  9 vinninga sem hann taldi síður en svo of marga miðað við sýnda snilldartakta enda leiddi hann mótið framan af.  Engu að síður var hann þakklátur andstæðingum sínum fyrir þeirra hlut í vinningunum.

Aðrir sigurvegarar mánaðarins voru þessir:  24/10 Gunnar Gunnarsson 10v; 17/10 Ingimar Jónsson 10.5v; 10/10 Birgir Berndsen 11v og 3/10 Sigurður Herlufsen 11v.  Í lok september vakti sigur Guðfinns R. Kjartanssonar með 11.5v nokkra athygli sem sætir ekki lengur undrun.
 
Nánari úrslit og myndir má sjá á www.kr.is (skák)

Myndaalbúm (ESE)            

Íslandsmót kvenna hefst á föstudag

Íslandsmót kvenna 2011 fer fram dagana 4. - 18. nóvember nk. í húsnæði Skáksambands Íslands, Faxafeni 12, Reykjavík.  Að þessu sinni verður teflt í einum flokki, þ.e. opið öllum konum/stúlkum. 

Tímamörk:   90 mín. + 30 sek. á leik.

Dagskrá:        

• Föstud., 4. nóv. kl. 19, 1. umferð
• Sunnud. 6. nóv., kl. 18, 2. umferð
• Þriðjud., 8. nóv., kl. 19, 3. umferð
• Föstud., 11. nóv., kl. 19, 4. umferð
• Sunnud., 13. nóv., kl. 11, 5. umferð
• Þriðjud., 15. nóv., kl. 19, 6. umferð
• Föstud., 18. nóv., kl. 19, 7. umferð

Verðlaun:

• 1. 40.000.-
• 2. 25.000.-
• 3. 15.000.-

Tilkynna skal þátttöku til Skáksambands Íslands í síma 568 9141 eða email: [e-mail] sem fyrst.

Skáksaga og skákgleði

 

 

Í dag kom út skáldsagan Lygarinn eftir Óttar Norðfjörð.  Í tilefni þess var mikil gleði í Eymundsson í Skólavörðustíg þar eitt einvígisborðanna frá einvígi aldarinnar var notað.  Einvígð mun víst koma verulega við sögu í bókinni.

Óttar tefldi allmargar skákir við gesti og gangandi.  Landliðsmennirnir Bragi Þorfinnsson og Hjörvar Steinn Grétarsson létu sig ekki vanta.

Bókaútgáfan Sögur og Óttar gáfu svo öllum landsliðsmönnum bók að gjöf.  

Hrafn Jökulsson mætti með myndavélina og sjón er sögu ríkari! Einnig hafa bæst við myndir frá Einari S. Einarssyni

Myndaalbúm (HJ og ESE)