Elsa efst eftir sigur á Veroniku - Pörun sjöttu umferðar

Elsa María Kristínardóttir (1698) vann Veroniku Steinunni Magnúsdóttur (1597) í frestaðri skák úr fimmtu umferð Íslandsmót kvenna í kvöld.  Elsa er ein efst með fullt hús.  Jóhanna Björg Jóhannsdóttir (1831) er önnur með 4 vinninga.  Pörun sjöttu og næstsíðustu umferðar, sem fram fer annað kvöld og hefst kl. 19, liggur fyrir.  Þá mætast m.a.: Hrund - Elsa, Jóhanna - Tinna og Hallgerður - Ingibjörg.   Pörunina má finna í heild sinni á Chess-Results.

Allar skákir mótsins eru sýndar beint á vefnum.  Teflt er í félagsheimili SÍ, Faxafeni 12.

• Heimasíða SÍ 
• Chess-Results
• Myndaalbúm (GB með hjálp nokkurra keppenda)

 

Heimsmeistaraeinvígi kvenna: Jafntefli í fyrstu einvígisskák

Heimsmeistaraeinvígi kvenna hófst í dag í Tirina í Albeníu.  Til úrslita tefla til kínverska stúlkan Hou Yifan (2578) og indverska skákkonan Humpy Konaru (2600).   Fyrstu skákinni lauk með jafntefli eftir 80 leiki.  Önnur skák einvígisins verður tefld á morgun.

• Heimasíða einvígisins
• Beinar útsendingar (hefjast kl. 14) 
• Chessbomb

Skákumfjöllun á Rás 1

Skákumfjöllun var í Morgunútvarpinu á Rás 1.  Sigurður Arnarson, skákfrömuður að Norðan, var í fínu viðtali í Morgunútvarpinu. 

Morgunútvarp Rásar 1 (skákumfjöllun hefst ca. 44.45)

Friðrik með jafntefli í fyrstu umferð í Amsterdam

Stórmeistarinn Friðrik Ólafsson (2428) gerði jafntefli við hollenska stórmeistarann Paul Van Der Sterren (2514) í fyrstu umferð minningarmóts um Euwe sem hófst í dag í Amsterdam.   Í 2. umferð, sem fram fer á morgun, teflir Friðrik sænsku skákdrottninguna Pia Cramling (2495).  Umferðin hefst kl. 12.

Mótið er haldið í tilefni þess að nú séu 30 ár síðan Euwe lést.   Þátt taka átta skákmenn, bæði konur og karlar á ýmsum aldri.  Taka 4 skákmenn þátt í hvorum flokki og tefld er tvöföld umferð, alls 6 skákir.  Í flokki Friðriks tefla auk hans: Paul Van Der Sterren (2514), Pia Cramling (2495) og Zhaogin Peng (2379).

 

• Heimasíða mótsins
• Beinar útsendingar

 

Friðrik Ólafsson teflir á alþjóðlegu skákmóti til minningar um Euwe - sem hefst í dag - beinar útsendingar

Stórmeistarinn Friðrik Ólafsson (2428) tekur þátt á alþjóðlegu skákmóti til minningar um Max Euwe sem hefst í dag í Amsterdam í Hollandi.   Mótið er haldið í tilefni þess að nú séu 30 ár síðan Euwe lést.   Þátt taka átta skákmenn, bæði konur og karlar á hinum ýmsa aldri.

Taka 4 skákmenn þátt í hvorum flokki og tefld er tvöföld umferð, alls 6 skákir.  Í flokki Friðriks tefla auk hans: Paul Van Der Sterren (2514), Pia Cramling (2495) og Zhaogin Peng (2379).

Mótið er að hefjast rétt í þessu. Friðrik mætir stórmeistaranum Van Der Sterren í fyrstu umferð.

• Heimasíða mótsins
• Beinar útsendingar

 

Elsa og Jóhanna efstar á Íslandsmóti kvenna

Elsa María Kristínardóttir (1698) og Jóhanna Björg Jóhannsdóttir (1831) eru efstar og jafnir með 4 vinninga að lokinni 5. umferð sem fram fór í gærkveldi.   Elsa á reyndar frestaða skák gegn Veronika Steinunni Magnúsdóttur (1366) til góða.  Jóhanna vann Sigurlaugu R. Friðþjófsdóttir (1740).   Hallgerður Helga Þorsteinsdóttir (2023) og Tinna Kristín Finnbogadóttir (1868) eru í 3.-4. sæti með 3½ vinning eftir jafntefli í innbyrðis viðureign.

Frestuð skák Elsu og Tinnu fer fram í kvöld.  Strax að henni lokinni verður gefin út pörun fyrir sjöttu og næstsíðustu umferð sem fram fer annað kvöld kl. 19.  Allar skákir mótsins eru sýndar beint á vefnum.  Teflt er í félagsheimili SÍ, Faxafeni 12.

• Heimasíða SÍ 
• Chess-Results
• Myndaalbúm (GB með hjálp nokkurra keppenda)

 

Jón Trausti drengjameistari - Nansý stúlkameistari

Jón Trausti Harðarson er drengjameistari Íslands (15 ára og yngri) í skák.  Hann og Dagur Ragnarsson komu jafnir í mark á Drengja- og telpnameistaramóti Íslands sem fram fór 5.-6. nóvember sl.   Jón Trausti vann Dag í einvígi um titilinn 2-1 eftir bráðabanaskák.

Nansý Davíðsdóttir er stúlknameistari (13 ára og yngri) eftir sigur á Sóleyju Lind Pálsdóttur 2-0.

• Frétt um aðalmótið

Leynigestur á Vinaskákmótinu í dag!

Vinafélagið og Skákakademía Reykjavíkur standa fyrir skákmóti í Vin, Hverfisgötu 47, mánudaginn 14. nóvember klukkan 13. Tefldar verða 6 umferðir með sjö mínútna umhugsunartíma. Vegleg verðlaun eru í boði frá velunnurum Vinjar.

Mjög blómlegt skáklíf er í Vin, athvarfi Rauða krossins. Þar eru æfingar alla mánudaga og reglulega er slegið upp stórmótum. Skákfélag Vinjar er eitt hið kraftmesta á landinu og teflir meðal annars fram tveimur sveitum á Íslandsmóti skákfélaga.

Vinafélagið, sem stofnað var 13. október sl., stendur að Vinaskákmótinu í samvinnu við Skákakademíu Reykjavíkur. Bakhjarlar mótsins eru m.a. Forlagið, Henson og Sögur útgáfa. Þá gefur Bakarameistarinn góðgæti með kaffinu.

Að undanförnu hefur ríkt óvissa um framtíð Vinjar, sem er griðastaður fólks með geðraskanir, en allt bendir nú til þess að rekstur athvarfsins verði tryggður með samstilltu átaki.

 

Þá munu leynigestir mæta á svæðið með óvæntan glaðning!
 

Atskákmót Reykjavíkur og Hellis fer fram í kvöld

Atskákmót Reykjavíkur sem jafnframt er atskákmót Hellis fer fram mánudaginn 14. nóvember.  Mótið fer fram í félagsheimili Hellis, Álfabakka 14a í Mjódd. Tefldar verða 6 umferðir með Svissnesku-kerfi og hefur hvor keppandi 15 mínútur á skák. Mótið hefst kl. 19:30.

Verði tveir jafnir í baráttunni um annanhvorn titilinn verður teflt tveggja skáka hraðskákeinvígi. Verði jafnt að því loknu verður tefldur hraðskákbráðabani. Verði fleiri en tveir jafnir verður tefld einföld umferð, hraðskák. Verði enn jafnt, þá bráðabani.

Núverandi atskákmeistari Reykjavíkur og atskákmeistari Hellis er Hjörvar Steinn Grétarsson.

Verðlaun:

1. 15.000

2. 7.500
3. 4.000

 Þátttökugjöld:

16 ára og eldri: 1000 kr

15 ára og yngri: 500

Lokapistill frá EM landsliða

Stórsigur á Skotum

Hjörvar fékk tvöfaldan stórmeistaraáfanga

Helgi fékk silfurverðlaun

Efstir Norðurlandanna

Lokaumferðin

Það gekk allt upp hjá íslenska liðinu í níundu og síðustu umferð EM landsliða sem fram fór í Porto Carras í Grikklandi í fyrradag.  Ísland vann stórsigur á Skotum, 4-0, og var sá sigur afar sannfærandi.    

Hjörvar vann átakalítinn sigur á Graham Morrison með svörtu.  Einhverjar pælingar voru í gangi að hvíla Henrik og láta Hjörvar tefla á fyrsta borði.  Þá fengi hann hvítt gegn Alan Tate sem hefur verið  í uppsveiflu.  Það var þó fljótt slegið af borðinu.  Það var mat manna að Morrison með svörtu væri mun betri valkostur en Tate með hvítu.  Morrison er þó alls ekki gefinn bráð.  Hann náði sínum þriðja áfanga að alþjóðlegum meistaratitli nú á EM en vantar stigin.

Og sú ákvörðun var kórrétt.  Hjörvar vann auðveldan sigur á Morrison sem teflt hvasst.  Fórnaði t.d. skiptamun sem Hjörvar þáði  ekki og var kominn með yfirburðartafl skömmu síðar.  Átakalaus sigur. Og sá mikilvægasti í skáksögu Hjörvars.  Tryggði tvöfaldan stórmeistaraáfanga og yngsti Íslendingurinn sem hefur nokkurn tíma náð stórmeistaraáfanga.   Viðtal við Hjörvar má nálgast hér: http://skak.blog.is/blog/skak/entry/1204415/

Henrik vann góðan sigur á Alan Tate á fyrsta.  Tate tefldi hvasst en sigur fyrir hann hefði þýtt stórmeistaraáfanga.  Henrik tefldi ákveðið og yfirvegað og vann góðan sigur.  Helgi vann einnig góðan sigur á fjórða borði og Björn vann svo Muir á þriðja borði.

Mikilvægir sigrar fyrir alla.  Björn vann sína fyrstu skák og Henrik lagaði skorið sitt.  Með sigrinum var ljóst að Helgi væri besta skor allara á mótinu prósentulega séð, fékk 4,5 vinning af 5 mögulegum. 

Árangur íslenska liðsins

Íslenska liðið varð í 26. sæti af 38 liðum.  Mjög góður árangur í ljósi þess að liðinu var raðað fyrirfram í 32. sæti.    Og auk þess urðu mikil forföll á síðustu metrunum þegar 3 stórmeistarar drógu sig út úr liðinu af persónulegum ástæðum og endanleg mynd komst ekki á íslenska liðið fyrr en tveimur dögum fyrir brottför.  Helgi ætlaði upphaflega að einbeita sér að liðsstjórn en vegna þessara aðstæðna varð það niðurstaðan að hann yrði teflandi liðsstjóri og varamaður.   Ekki slæmur varamaður á ferðinni sem fær 4,5 vinning í 5 skákum!

Íslenska liðið varð jafnframt efst Norðurlandanna en fyrirfram var liðinu raðað neðst þeirra.  Ísland er því óformlegur „Norðurlandameistari" en öll Norðurlöndin leggja mikla áherslu á þessa „keppni".   Manni var það alveg ljóst að hinar þjóðirnar spáðu mikið í þessu og Danirnir óskuðu okkur sérstaklega til hamingju eftir mót með „titilinn". 

Frábært afrek í ljósi allra þeirra forfalla sem urðu á íslenska liðinu síðustu vikur og daga á íslenska liðinu.  Svíar voru efstir fyrir umferðina, voru bæði 2 stigum og 2,5 vinningi fyrir ofan okkur.  Ég og bræðurnir gátum varla falið gleði okkur þegar Pontus Carlsen samdi jafntefli gegn Georgíumönnum og þar með ljóst að Svíar fengu aðeins 1 vinning og þar með að „titilinn" væri okkar.

Íslenska liðið náði frábærlega saman á mótinu.  Góð liðsheild og mikil barátta voru aðalsmerkin. Liðið gerði aðeins eitt stutt jafntefli.  Það gerði Hjörvar með svörtu gegn Svartfellingum þegar ljóst var að ekkert væri í stöðunni.  Helgi hefur oft líka sagt að íslenska liðinu gangi best þegar teflt sé í botn og er örugglega mikið til í því.

Við tefldum við 2 lakari sveitir.  Unnum þær báðar örugglega.  Tefldum við tvær sveitir sem voru lítilsháttar sterkari en við.  Unnum þeir einnig báðar.  Tefldum við 5 sveitir sem teljast mun sterkari.  Töpuðum þeim öllum en aldrei þannig að við værum burstaðir.  Töpuðum þeim ýmist 2,5-1,5 eða 3-1.  Í nánast öllum tilfellum áttum við möguleika á að halda 2-2 lengi vel. 

Menn liðsins voru að sjálfsögðu Hjörvar og Helgi.

Skákmennirnir

Hjörvar fékk 5 vinninga í 9 skákum.  Var sá eini sem tefldi allar skákir mótsins.    Eftir á að hyggja átti Hjörvar stórmeistaraáfangaskák einnig í  7. skák.  Við gerðum okkar enga grein fyrir því og kannski sem betur fer.  Því ekki veit ég hvernig málin þróast og engan veginn ljóst að þessi tvöfaldi áfangi hefði náðst.  Að fá 5 vinninga gegn svo sterkum andstæðingum er auðvitað frábært.  Þess má geta að aðeins fjórir annað borðs menn voru stigalægri en Hjörvar á öllu mótinu.  Árangur Hjörvars samsvaraði 2606 skákstigum og hann hækkar um 18 stig og er nú kominn með 2470 skákstig.  Hann þarf aðeins einn áfanga til viðbótar. 

Helgi fékk 4,5 vinning í 5 skákum.  Helgi tefldi minnst liðsmanna.   Helgi kom aðeins inn í liðið með vikufyrirfara þegar Héðinn forfallaðist.  Að hafa Helga „á bekknum" var frábært.   Maður skynjaði strax að það gaf liðinu aukin kraft og sjálfstraust hinna liðsmanna að vita af Helga á fjórða borðinu.   Árangur Helga var sá tíundi besti allra skákmanna stigalega séð en árangurinn samsvaraði 2786 skákstigum.   Helgi hækkar um 15 stig fyrir frammistöðuna og er nú kominn upp fyrir Hannes og Henrik á stigum.  Í næstum sætum á eftir Helga komu Topalov og Morozevich.   Efstur var hins vegar Mamedyarov.    Undirbúningur hans á kvöldin voru fyrir skákirnar var það helst að hanga á spilavítinu þar sem hann lagði undir háar upphæðir að mér nánast skilst nánast á hverju kvöldi og oft langt fram á nótt! 

En semsagt árangur Helga var sá næstbesti fyrir varamenn.  Franski stórmeistarinn Christian Bauer, sem fékk 6,5 vinning í 8 í skákum, var hæstur með 2797.  Ísraelski stórmeistarinn Evgeny Postny var svo þriðji með árangur upp á 2762 skákstig. 

Bragi Þorfinnsson átti einnig fínt mót.  3,5 vinningur í 8 skákum.  Árangur uppá 2476 skákstig og hækkar um 5 stig og var frekar óheppinn en hitt og Helgi var ánægður heilt yfir með taflmennsku hans.  Nánast allar skákir frá Braga voru langar.  Bragi virðist sífellt vera að ná meiri stöðugleika í sinni taflmennsku.

Henrik byrjaði illa en átti góðan endasprett.  Mjög mikilvægur gegn Makedóníu eftir 3 töp.  Henrik fékk 2,5 vinning í sjö skákum á fyrsta borði, en átti upphaflega að vera á þriðja borði.   Árangur Henriks samsvaraði 2478 og lækkar hann um 6 stig. 

Björn Þorfinnsson náði sér ekki fullkomlega strik á mótinu.  Björn fékk 2,5 í 7 skákum.  Björn kom auðvitað inn í liðið með aðeins 2ja daga fyrirvara við forföll Stefáns Kristjánssonar sem hafði komist í liðið í forföllum Hannesar Hlífars.  Mikilvægt fyrir Björn að enda mótið með sigri en Björn hafði áður sagt: „Ég vinn alltaf í síðustu umferð í landskeppnum".   Og hefur haft rétt fyrir sér hingað til.  Frammistaða Björns samsvaraði 2361 skákstigi og lækkar hann um 4 stig fyrir frammistöðu sína.

Halldór Grétar Einarsson hefur tekið saman stigalista afreksmanna á heimasíðu SÍ.   Búið er að uppfæra listann eftir EM landsliða.  Halldór hefur bætt við dálki þar sem fram kemur fjöldi tefldra skáka síðustu 24 mánuði.  Sjá listann:  http://skaksamband.is/?c=webpage&id=441. 

Bræðurnir voru ekki búnir að fá nóg af skák eftir mótið.  Þegar við lentum á Heathrow í London voru menn þar sem náðu í bræðurna og ætluðu að keyra þá til Birmningham þar sem tefla í Bresku deildakeppninni.  Ljóst var að þeir kæmu aðeins á skákstað um hálftíma fyrir umferð.  Þeir stóðu sig þar vel og fengu báðir 1,5 vinning í tveimur skákum.   

Toppbaráttan

Toppbaráttan var gífurlega hörð og ótrúlega spennandi allan tímann.  Þjóðverjar urðu Evrópumeistarar og er óhætt að segja að það hafi komið verulega á óvart en þeim var aðeins raðað í 10. sæti fyrir mót.   Bestu skákmenn Þýskalands áttu í deilum við Þýska skáksambandið fyrir Ólympíuskákmótið 2010 sem varð til þess að flestir bestu skákmenn Þýskalands sátu þá heima.  Þeir mættu hins vegar til leiks nú með þessum frábæra árangri. 

Aserar urðu aðrir og Ungverjar náðu þriðja sætinu með ótrúlegum 4-0 sigri á Búlgörum í lokaumferðinni sem eru meðal þeirri óvæntari úrslita sem maður hefur séð.

Fyrir umferðina var ljóst að 2,5 vinningur myndu duga bæði Þjóðverjum og Armenum.  2-2 myndi duga Armenum ef Aserar ynnu ekki 3-1.  Það gerðu einmitt Aserar.   Staðan var orðin 2-1 fyrir Þjóðverjum.  Meier vann Movsesian.   Sargassian sem var að reyna Gustafsson stóð frammi fyrir því ef hann myndi vinna myndu Aserar verða Evrópumeistarar en mikið hatur ríkir á milli þessara þjóða.  Til dæmis tefla ekki skákmenn þessara þjóða í skákmótum hjá hinni þjóðinni.  Þetta nær að mér skilst þó ekki til þessara skákmanna sem láta deilur ekki trufla persónuleg samskipti og eru vinir.    Gustafsson hélt jafntefli. 

Mótslok sá maður að Armenar tóku þessu létt.  Örugglega þótt það miklu skárra að sjá Þjóðverjanna hampa dollunni en Aserana.     

Rússar urðu öruggir Evrópumeistarar kvenna.

Skákstjórinn

Að þessu var ég ekki bara fararstjóri og sjá um að koma fréttum til Íslands heldur var ég einnig skákstjóri.   Það var fróðlegt að vera skákstjóri á slíku móti.  Það kom ekkert upp hjá mér sem skipti máli.   Ef fleiri Íslendingar vilja taka að sér skákstjórn gæti verið mögulegt að komast að á Ólympíuskákmótinu í Istanbul 2012.  Og íslenskum skákdómurum er sérstaklega boðið til leiks í Tromsö 2014.  Áhugasamir varðandi Istanbul vil ég biðja um að hafa samband við mig.

Sjálfum hentar mér betur að vera á ferð og flugi en að sitja í slíkri borðadómgæslu.  Ég saknaði þess óneitanlega að geta hvorki komist í tölvu né síma á meðan umferðum stóð til að koma boðum heim. Ég var hins vegar ávallt mjög nálægt íslenska liðinu nema í fyrstu umferðinni og grunar mig að Grikkirnir hafa gert það fyrir mig af einskærri góðmennsku.  Það þýddi að ég átti auðvelt með að taka myndir og fylgjast með skákunum.  Á Ólympíuskákmótum er væntanlega slíkt ekki í boði og á ég síður von á því að ég taki á skákstjórn á slíkum mótum í framtíðinni.

Á mótinu fékk ég hins vegar athyglisvert boð um skákstjórn eftir áramót sem ég ætla að velta fyrir mér.

Grikkirnir

Grikkir eru að mörgu leyti einstakir.  Ákaflega vinalegir, afslappaðir og þægilegir í allri umgengi.  Skipulagning mótsins var að öllu leyti til mikillar fyrirmyndar. 

Aðstæður á skákstað og í hótelinu einnig að öllu leyti til fyrirmyndar.   Ekki síðra en á EM 2007 í Krít þar sem aðstæður voru einnig frábærar.

Grikkirnir sem héldu mótið kunnu að skemmta sér.  Þeir höfðu sérherbergi á skákstað þar sem var bjór o.þ.h.  Margir þeirra skemmtu sér langt fram á nótt og sváfu langt fram eftir.

Þeir höfðu mikinn áhuga á Íslandi og okkur aðstæðum í gegnum tíðina.  Sérstaklega áhugasamir um það hversu fljótir við höfum við verið að ná okkur upp úr kreppunni.

Einn Grikki sagði mér að við sæjum aðeins gerviveröld á skákstað og á hótelinu.  Ástandið á Grikklandi væri grafalvarlegt. 

Að lokum

Einhvern tíma kom fram í stuttum pistli að ég hefði haft tíma fyrir pistlaskrif þar sem ég hafi verið upptekinn á „mikilvægum fundi".   Það upplýsist hér með að þann morguninn spiluðum við Helgi 18 holu hring á virkilega góðum golfvelli í Porto Carras.  Þann daginn vannst góður sigur á Makedóníu!

Ég ræddi nokkuð við Goran Urosevic, sem sér um Chessdom og hefur þar verið að gera frábæra hluti.  Ég vona að hann mæti á Reykjavíkurskákmótið og hjálpi okkur við að kynna mótið á erlendri grundu. 

Ég hefði mjög gaman að fylgjast með erlendu skákmeisturum og háttum sumra þeirra.  Ég vil sérstaklega nefna Korchnoi.  Það var gaman að fylgjast með svissneska liðsstjóranum sem nánast nálgaðist gamla manninn eins og guð.  Okkur skákstjórunum var einnig sagt að meðhöndla karlinn af sérstakri virðingu og gera ekki athugasemdir þótt hann t.d. stæli stólnum okkar eða talaði hátt. 

Við fengum miklar og góðar kveðjur út eftir hinum ýmsum dreifileiðum.  Ekki síst í gegnum Facebook.   Eftir mótið fengum við sérstaklega góðar kveðjur frá Jóhanni Hjartarsyni og Jóni L. Árnasyni sem féllu í góðan jarðveg.  Það er gott að sjá að menn fylgjast vel með þótt þeir séu hættir atvinnumennsku. 

Eftir mót var fagnað eins og vera ber.  SÍ bauð upp á rauðvín með matnum nokkur glös eftir mat.  Menn gerðu  sér góðan dag.  Hins vegar fór rútan af stað kl. 3 um nótt.  Menn mættu því illa hvíldir niður í rútu og sumir jafnvel svefnlausir, þar sem diskótekið var tekið fram yfir svefn.  Sextán tíma ferðalag fyrir mig, Helga og Hjörvar, sem innihélt þrjú flug.  En það voru sáttir menn en þreyttir sem komu heim í gær!

Ég fékk ýmsa aðstoð að heiman á meðan mótinu stóð.  Vil ég þar sérstaklega þakka Halldóri Grétari sem bæði aðstoðaði mig við að koma á fréttum af EM á Skák.is og sá t.d. um að koma skákum mótsins á Skák.is

Baldur A. Kristinsson, vefstjóri blog.is, var mér svo einkar hjálplegur við að koma hinum ýmsum fréttum á Skák.is þar sem vefkerfið virkaði ekki úti vegna öryggiskrafna blog.is.   Ekki náðum við þó að möndla myndir að neinu ráði og ég sendi heim u.þ.b. eina mynd úr umferð.  Allar myndirnar mínar eru hins vegar komnar á Skák.is og flestar einnig á Facebook.  Þar er þó fyrst og fremst að finna myndir frá íslenska liðinu.  Ég vil svo vekja athygli á mörgum skemmtilegum myndum teknum af Anastasiya Karlovich á Chessbase:  http://www.chessbase.com/newsdetail.asp?newsid=7670.

Ég vil þakka Baldri og Halldóri sérstaklega fyrir þeirra hjálp.  Án hennar hefði fréttaflutningur orðið heldur máttlaus!

Takk fyrir mig og íslenska liðið!

Gunnar Björnsson,
forseti Skáksambands Íslands