Unglingameistaramót Hellis fer fram 24. og 25. október

Unglingameistaramót Hellis 2011 hefst mánudaginn 24. október n.k. kl. 16.³⁰ þ.e. nokkru fyrr heldur en venjulegar mánudagsæfingar. Mótinu verður svo fram haldið þriðjudaginn 25. október n.k. kl. 16.^30.  Tefldar verða 7 umferðir eftir Monrad kerfi. Fyrri keppnisdaginn verða fjórar skákir og þrjár þann seinni. Umhugsunartími á hverja skák er 20 mínútur. Mótið er opið öllum 15 ára og yngri í grunnskóla en titilinn sjálfan getur aðeins félagsmaður í Helli unnið.

Á meðan á mótinu stendur falla venjulegar barna- og unglingaæfingar niður. Næsta barna- og unglingaæfing verður mánudaginn 31. október n.k.  Keppnisstaður er Álfabakki 14a (inngangur milli Fröken Júlíu og Subway) og er salur félagsins á þriðju hæð. Engin þátttökugjöld.

Umferðatafla:

1.-4. umferð:                Mánudaginn 24. október kl. 16.³⁰

5.-7. umferð:                Þriðjudaginn 25. október kl. 16.³⁰

Verðlaun:  

• 1. Unglingameistari Hellis fær farandbikar til varðveislu í eitt ár.
• 2. Þrír efstu fá verðlaunagripi til eignar.
• 3. Allir keppendur fá skákbók.
• 4. Þrír efstu 12 ára og yngri fá verðlaunapening.
• 5. Stúlknameistari Hellis fær verlaunagrip til eignar

Rétt er að minna keppendur á að slökkva á farsímum sínum meðan á mótinu stendur því í þessu móti verður umhugsunartíminn minnkaður um helming ef síminn hringir hjá keppanda meðan á skák stendur.

Fimmtudagsmót hjá TR í kvöld

Fimmtudagsmót er hjá TR í kvöld og hefst kl. 19.30.  Tefldar verða 7 umferðir með 7 mínútna umhugsunartíma.  Mótin fara fram í félagsheimili T.R., skákhöllinni að Faxafeni 12 og opnar húsið kl. 19.10.  Glæsilegur verðlaunapeningur er í boði fyrir sigurvegara hvers móts ásamt því sem aukaverðlaun verða í boði af og til í vetur.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

Guðmundur sigurvegari Haustmóts TR

Guðmundur Kjartansson (2314) sigraði á Haustmóti TR sem lauk í kvöld.  Guðmundur gerði jafntefli við Sverri Örn Björnsson (2158) í lokaumferðinni og hlaut 7,5 vinning í 9 skákum.  Davíð Kjartansson (2291), sem vann Jóhann H. Ragnarsson (2068) varð annar með 7 vinninga og Stefán Bergsson (2135), sem vann Þór Valtýsson (2041) varð þriðji með 5,5 vinning.   Mikael Jóhann Karlsson (1855) sigraði í b-flokki, Oliver Aron Jóhannesson (1645) í c-flokki og Vignir Vatnar Stefánsson (1444) í d-flokki.  

A-flokkur:

Úrslit 9. umferðar:

 

1	Valtysson Thor	0 - 1	Bergsson Stefan
2	Jonsson Bjorn	½ - ½	Olafsson Thorvardur
3	Ragnarsson Johann	0 - 1	Kjartansson David
4	Bjornsson Tomas	½ - ½	Baldursson Haraldur
5	Bjornsson Sverrir Orn	½ - ½	Kjartansson Gudmundur

 
Lokastaðan:

 

Rk.		Name	RtgI	Club/City	Pts.	Rp	rtg+/-
1	IM	Kjartansson Gudmundur	2314	TR	7,5	2393	8,1
2	FM	Kjartansson David	2291	Víkingar	7	2343	8,6
3		Bergsson Stefan	2135	SA	5,5	2220	15,8
4		Bjornsson Sverrir Orn	2158	Haukar	5	2181	3,9
5		Ragnarsson Johann	2068	TG	5	2191	21,3
6	FM	Bjornsson Tomas	2162	Goðinn	4	2094	-12,1
7		Olafsson Thorvardur	2174	Haukar	4	2093	-14,3
8		Jonsson Bjorn	2045	TR	3	2025	-4,3
9		Valtysson Thor	2041	SA	2	1931	-18,3
10		Baldursson Haraldur	2010	Víkingar	2	1934	-12,6

 

Aðrir flokkar:

Mikael Jóhann Karlsson (1855) sigraði í b-flokki en hann hlaut 6,5 vinning.  Mikael ávinnur sér þar með keppnisrétt í a-flokki að ári. Dagur Ragnarsson (1761) varð annar með 6 vinninga og Stephan Jablon (1965) þriðji með 5,5 vinning.  Sjá nánar hér.

Oliver Aron Jóhannesson (1645) sigraði í c-flokki en hann hlaut 7 vinninga.  Oliver ávinnur sér þar með keppnisrétt í b-flokki að ári.  Birkir Karl Sigurðsson (1597) varð annar með 6,5 vinning.  Jón Trausti Harðarson (1660) og Friðgeir Hólm (1667) urðu í 3.-4. sæti með 6 vinninga.  Sjá nánar hér.

Vignir Vatnar Stefánsson (1444) sigraði í d-flokki (opnum flokki) en hann hlaut 7,5 vinning.   Vignir þar með ávinnur sér keppnisrétt í c-flokki að ári.   Jóhann Arnar Finnsson (1199) varð annar með 7 vinninga.  Sóley Lind Pálsdóttir (1345), Rafnar Friðriksson (1407) og Hilmir Freyr Heimisson (1322) urðu í 3.-5. sæti með 6 vinninga.  Sjá nánar hér.

• Heimasíða mótsins
• Chess-Results
• Myndaalbúm (GB)

Ingvar Örn efstur á Atskákmeistaramóti SSON

Það voru 12 keppendur sem skráð höfðu sig til leiks sem mættu fullir barátturþreks og þónokkuð vongóðir um glæsta sigra, tveir þeirra eiga nú sérstakan heiður skilinn en þeir öðlingspiltar frá Keflavík Sigurður H. Jónsson og Einar S. Guðmundsson gerðu sér lítið fyrir og ákváðu að vera með og láta ekki akstur uppá næstum 200 kílómetra standa í veginum.

En að mótinu, Úlfhéðinn gat ekki mætt í kvöld vegna kornskurðar og því var skákum hans frestað, Ingimundur bróðir hans, sem á titil að verja, byrjaði mótið með 2 sigurskákum gegn skákmeistara SSON, Ingu Birgisdóttur og gegn Erlingi Atla.

Ingvar Örn leiðir reyndar mótið en hann vann allar 3 skákir sínar í kvöld, nokkuð örugglega.

Næsta miðvikudag fara fram 4.-7.umferð.

Úrslit kvöldsins má nálgast á heimasíðu SSON.

Staðan eftir 3 umf.

Rank	Name	Pts
1	Birgisson Ingvar Örn	3
2	Matthíasson Magnús	2½
3	Sigurmundsson Ingimundur	2
4	Birgisdóttir Inga	2
5	Jónsson Siguður H.	2
6	Grigoranas Grantas	1
7	Pálmarsson Erlingur Atli	1
	Jensson Erlingur	1
9	Guðmundsson  Einar	½
10	Gunnarsson Magnús	0
	Siggason Þorvaldur	0
	Sigurmundsson Úlfhéðinn	0

 

Heimasíða SSON

Alþjóðlegt unglingamót TG fer fram 30. október - 2. nóvember

Taflfélag Garðabæjar heldur í samráði við Taflfélag Reykjavíkur, Skákdeild Fjölnis og Taflfélagið Helli alþjóðlegt barna og unglingaskákmót dagana 30. október til 2. nóvember næstkomandi.  Mótið er boðsmót og er reiknað til bæði íslenskra og alþjóðlegra skákstiga.

Hvert félag hefur 7 sæti sem það getur boðið börnum og unglingum á þess vegum, en auk þess koma 6-7 útlendingar á mótið á fædd 1997 til 2002. Hvert félag rukkar sína keppendur um þátttökugjöld.

Þeir koma flestir gegnum 4 Springere klúbbinn í Svíþjóð.

Umhugsunartími er 60 mínútur og 30 sek á leik.

Mótsstaður er í skákhöllinni Faxafeni 12.

Skákstjóri er Páll Sigurðsson s. 860 3120

Dagskrá:

Sunnudagur 30. október

9.00                                                      1. umferð

11.30 til 12.30.                                  Hádegismatur

12:30                                                    2. umferð

15:30-16:00                                        Kaffi

16:00                                                    3. Umferð

 

Mánudagur 31. október

16:00                                                    4. Umferð

18:30 til 19:30                                    Kvöldmatur

19:30                                                    5. Umferð.

 

Miðvikudagur 2. nóvember.

16:00                                                    6. Umferð

18:30 til 19:30                                    Kvöldmatur

19:30                                                    7. Umferð.

Að lokinni umferð (21:30)           Verðlaunaafhending.

Morgunblaðið: Vill ná enn lengra og hærra

„Þetta hefur hangið yfir mér og því var það mikill léttir að ná þessu," segir Stefán Kristjánsson, sem tryggði sér stórmeistaratign í skák um nýliðna helgi. Á stigalista Alþjóðaskáksambandsins, FIDE, eru 1.335 skráðir stórmeistarar og bætist Stefán formlega í hópinn í byrjun næsta árs.

„Ég var kominn ansi nálægt þessu 2006, hefði þá getað klárað þetta í einni skák," segir Stefán og vísar í næstsíðustu skák sína á Ólympíuskákmótinu á Ítalíu fyrir um fimm árum. „Ef ég hefði unnið skákina hefði ég fengið síðasta áfangann og náð stigunum en ég tapaði henni."

Aukið spennustig

Stefán náði þessum langþráða áfanga með sigri á móti Kristjáni Guðmundssyni, fyrrverandi liðsstjóra landsliðsins, í fyrri hluta Íslandsmóts skákfélaga. Fyrir skákina sagði dómarinn honum að með sigri næði hann stórmeistaratitli. „Vitneskjan jók aðeins spennustigið," segir skákmaðurinn, sem verður 29 ára á árinu. Hann bætir við að hann hafi verið með hvítu mennina, fljótlega náð góðu tímaforskoti og eftir langa viðureign hafi mótherjinn gefist upp í endatafli. „Ég bara brosti," segir Stefán um viðbrögð sín, þegar stórmeistaratignin var í höfn. „Ég var ánægður, en þetta er ekki eins og þegar maður skorar í fótboltanum. Ég fór ekkert fagnandi um skáksalinn."

Fyrsta stórmeistaraáfanganum náði Stefán á alþjóðamóti í Noregi 2004, þeim næsta í Ungverjalandi og þeim þriðja í Austurríki 2006. Hins vegar vantaði nauðsynlegan stigafjölda þar til nú. Hann segir að á menntaskólaárunum hafi hann sett stefnuna á að verða stórmeistari, en undanfarin fimm ár hafi skákin vikið fyrir öðru áhugamáli, pókerspili á netinu sem hafi gefið vel í aðra hönd. Hins vegar gerir hann ráð fyrir að skákin verði aftur í fyrirrúmi hjá sér þegar hann verði kominn á ríkislaun sem stórmeistari, þó að sér skiljist að þau séu ekki há, en þau miðast við laun háskólalektora.

Stefán byrjaði að tefla í Melaskólanum, þegar hann var 11 ára, segir að sér hafi fljótlega gengið vel og áhuginn aukist samfara því. Það að vera stórmeistari kalli á ný markmið. Ná lengra og hærra með auknum sigrum á alþjóðamótum.

STEFÁN KRISTJÁNSSON SKÁKMAÐUR

Tólfti íslenski stórmeistarinn

Stefán Kristjánsson er 12. íslenski skákmaðurinn sem náð hefur þremur stórmeistaraáföngum og tilskildum 2.500 skákstigum. Hinir eru Friðrik Ólafsson (1958), Guðmundur Sigurjónsson (1975), Helgi Ólafsson (1985), Jóhann Hjartarson (1985), Jón L. Árnason (1986), Margeir Pétursson (1986), Hannes Hlífar Stefánsson (1993), Helgi Áss Grétarsson (1994), Þröstur Þórhallsson (1996), Henrik Danielsen (2006) og Héðinn Steingrímsson (2007). Lenka Ptácníková er íslenskur ríkisborgari og stórmeistari kvenna í skák (2004). Bobby Fischer, fyrrverandi heimsmeistari í skák og stórmeistari, var íslenskur ríkisborgari síðustu æviár sín og bjó þá hérlendis en tefldi aldrei sem Íslendingur.

------------------------------

Greinin er eftir Steinþór Guðbjartsson og birtist á baksíðu Morgunblaðsins, 12. október sl.  Skák.is þakkar Morgunblaðinu og Steinþóri fyrir að leyfa birtingu á Skák.is.  Mynd: Ómar Óskarsson

Áskrift að Tímaritinu Skák

Stjórn Skáksambands Íslands hefur til athugunar þann möguleika að endurvekja Tímaritið Skák. Hugmyndin er að gefa út árstímarit í mars þar sem farið væri yfir liðið ár og fjallað um helstu viðburði eins og Reykjavíkurskákmótið, Ólympíuskákmótið, Skákþing Íslands, Íslandsmót skákfélaga, unglingastarf o.s.frv. Vandað yrði til verka í alla staði þar sem andi gamla blaðsins svifi yfir vötnum. Gengið er út frá því að blaðið verði 90-100 bls. í fallegu broti.

Slík útgáfa er mjög dýr og því ljóst að grundvöllur hennar næst eingöngu ef áhugi meðal skákmanna fyrir því að kaupa blaðið er umtalsverður. Áætlað er að blaðið muni kosta um kr. 2.000. Til að kanna útgáfugrundvöll fyrir slíku ársriti stendur Skáksambandið fyrir könnun meðal skákmanna á því hvort þeir muni kaupa slíkt rit.

Þeir sem eru tilbúnir að styðja málefnið og kaupa Tímaritið Skák árlega á 2.000 kr. eru vinsamlegast beðnir að skrá sig hér.

Haustmót TR: Lokaumferðin í beinni

Skákir 8. og næstsíðustu umferðar í a-flokki Haustmóts TR auk einnar skákar í b-flokki, sem hefst kl. 19:30, má nálgast í beinni útsendingu.  

Bein útsending frá Haustmóti TR (tengill verður virkur rétt fyrir upphaf umferðar)

Íslandsmót kvenna hefst 4. nóvember (breytt dagskrá)

Íslandsmót kvenna 2011 fer fram dagana 4. - 18. nóvember nk. í húsnæði Skáksambands Íslands, Faxafeni 12, Reykjavík.  Að þessu sinni verður teflt í einum flokki, þ.e. opið öllum konum/stúlkum. 

Tímamörk:   90 mín. + 30 sek. á leik.

Dagskrá:        

• Föstud., 4. nóv. kl. 19, 1. umferð
• Sunnud. 6. nóv., kl. 18, 2. umferð
• Þriðjud., 8. nóv., kl. 19, 3. umferð
• Föstud., 11. nóv., kl. 19, 4. umferð
• Sunnud., 13. nóv., kl. 11, 5. umferð
• Þriðjud., 15. nóv., kl. 19, 6. umferð
• Föstud., 18. nóv., kl. 19, 7. umferð

Verðlaun:

• 1. 40.000.-
• 2. 25.000.-
• 3. 15.000.-

Tilkynna skal þátttöku til Skáksambands Íslands í síma 568 9141 eða email: [e-mail] fyrir 1. nóvember nk. Dregið verður um töfluröð fimmtudagsmorguninn 3.nóv.

Skákæfingar fyrir börn og unglinga hefjast í KR í dag

Skákakademía Reykjavíkur og Skákdeild KR standa í vetur að skákæfingum fyrir börn og unglinga. Skákæfingarnar fara fram í félagsheimili KR að Frostaskjóli.

Æfingarnar standa frá 17:30 - 18:45 á miðvikudögum. Umsjón með æfingunum hefur Stefán Bergsson en meðal kennara verða Björn Ívar Karlsson, Björn Þorfinnsson og Jóhannes Urbanic.

Fyrsta skákæfingin er í dag miðvikudag klukkan 17:30.