Skák.is

Bloggfærslur mánaðarins, ágúst 2010

2.8.2010 | 17:57

Henrik gerði jafntefli við Eljanov - Guðmundur vann - báðir með 3½ vinning

Stórmeistarinn, Henrik Danielsen (2512), gerði jafntefli við áttunda stigahæsta skákmann heims, úkraínska stórmeistarann Pavel Eljanov (2755) í skemmtilegri skák í fjórðu umferð Politiken Cup sem fram fór í dag. Guðmundur Gíslason (2351) sigraði pólsku skákkonuna Dorota Czarnota (2214). Báðir hafa þeir 3½ vinning og eru í 10.-24. sæti.

Skákir beggja í fimmtu umferð verða sýndir beint á vef mótsins á morgun. Umferðin hefst kl. 11. Henrik mætir þá danska skákmanninum Jackie Andersen (2276) en Guðmundur mætir danska skákmanninum Sune Berg Hansen (2595).

Umfjöllun um skák Henriks má finna á Skákhorninu.

Bragi Halldórsson (2253) og Bjarni Jens Kristinsson (2044) töpuðu báðir. Bjarni hefur 2 vinninga en Bragi hefur 1½ vinning.

Skákir íslensku skákmannanna úr 1.-3. umferð fylgja með.

Alls taka 292 skákmenn þátt í Politiken Cup. sem fram fer í Helsingör nærri Kaupmannahöfn. Þar af er 21 stórmeistari og 4 alþjóðlegir meistarar. Henrik er nr. 18 í stigaröð keppenda, Guðmundur nr. 29, Bragi nr. 45 og Bjarni Jens nr. 113. Stigahæstur keppenda er úkraínski stórmeistarinn Pavel Eljanov (2755).

Heimasíða mótsins
Beinar útsendingar (4.-9. umf. kl. 11 og 10. umf. kl. 8)

Spil og leikir | Breytt 3.8.2010 kl. 11:47 | Slóð | Facebook | Athugasemdir (0)

1.8.2010 | 21:44

Emil og Eiríkur Örn sigruðu á Unglingalandsmótinu í skák

Emil Sigurðarson, HSK, og Eiríkur Örn Brynjarsson, sigruðu á Unglingalandsmótinu í skák sem fram fór í Borgarnesi í dag. Emil í flokki, 11-14 ára, og Eiríkur í flokki 15-18 ára.

Röð efstu manna í yngri flokki:

1. Emil Sigurðarson, HSK; 7 v. af 7 mögulegum
2. Arnþór Ingi Ingvason, UMFN, 6 v.
3. Sóley Lind Pálsdóttir, UMSK, 5 v. (24,5 stig)
4. Kristinn Andri Kristinsson, 5 v. (22,0)
5.-6. Mikael Máni Freysson, UÍA, og Snorri Hallgrímsson, HSÞ, 4½ v.
7.-12. Atli Geir Sverrisson, UÍA, Hulda Rún Finnbogadóttir, UMSB, Magni Marelsson, ÍFH, Óskar Már Óskarsson, HSK, Sindri Magnússon, UMSK, og Sæþór Atli Harðarson 4 v.

Alls tóku 22 skákmenn þátt.

Röð efstu manna í eldri flokki:

1. Eiríkur Örn Brynjarsson 9 v. af 9 mögulegum
2. Jóhann Óli Eiðsson, UMSB, 8 v.
3. Páll Andrason, 7 v.
4. Nökkvi Jarl Óskarsson, UÍA, 6 v.
5. Auður Eiðsdóttir, UMSB, 5 v.

Alls tóku 10 skákmenn þátt.

Heildarúrslit

Spil og leikir | Slóð | Facebook | Athugasemdir (0)

1.8.2010 | 21:06

Skákþáttur Morgunblaðsins: Fyrrverandi heimsmeistarar að tafli í Dortmund

Sigur Vladimirs Kramniks yfir Kasparov í heimsmeistaraeinvígi PCA, samtaka atvinnuskákmanna, í London árið 2000 má hiklaust telja eitt óvæntasta afrek skáksögunnar. Fram að þeim tíma hafði Kasparov unnið hvert afrekið á fætur öðru, var langstigahæstur skákmanna auk þess sem verðleikar Kramniks sem áskoranda voru umdeilanlegir, hann hafði tapað fyrir Shirov í einvígi um áskorunarréttinn en atburðarásin tók óvænta stefnu sem ekki verður rakin hér og Kramnik settist andspænis heimsmeistaranum. Þeir tefldu 15 skákir, Kramnik vann tvær og jafnteflin urðu 13. Þetta var mesta þurrkatíð á ferli Kasparovs frá því hann háði sitt fyrsta einvígi við Karpov í Moskvu 1984-1985. Þar vann hann fyrst 32. skák einvígisins. Sú hernaðartækni Kramniks að skipta upp á drottningum við öll möguleg tækifæri og draga þannig vígtennurnar úr Kasparov heppnaðist fullkomlega, Berlínarvörnin lék þar stórt hlutverk.

En Kramnik átti erfitt uppdráttar næstu árin, m.a. vegna veikinda og í hugum flestra tók Kasparov sitt fyrra sæti sem hinn raunverulegi heimsmeistari; þeir grínkóngar sem FIDE krýndi heimsmeistara breyttu þar engu.

Sem betur fer gekk langt og strangt sameiningarferli skákarinnar vel fyrir sig. Þó að Kramnik hafi tapað heimsmeistaraeinvíginu fyrir Anand í Bonn haustið 2008 verður hann að teljast líklegur til afreka í áskorendakeppni FIDE sem fram fer fyrri part næsta árs. Því má ekki gleyma að eftir að hafa slegið í gegn á Ólympíumótinu í Manila 1992 vann hann hvert skákmótið á fætur öðru og var talinn líklegastur arftaki Kasparovs. Hann situr nú að tafli á hinu árlega stórmóti í Dortmund en þar hefur hann sigrað eigi sjaldnar en átta sinnum. Sex skákmenn tefla tvöfalda umferð og vekur mikla athygli 19 ára gamall Víetnami Liem Le Quang sem boðið var til mótsins eftir sigur á Aeroflot-mótinu í febrúar sl. Staðan að loknum sjö umferðum:

1. Ponomariov 4 v. (af 6) 2. Le Quang 3 ½ v. 3. - 4. Kramnik og Mamedyarov 3 v. 5. Naiditsch 2 ½ v. 6. Leko 2 v.

Ruslan Ponomariov sem varð heimsmeistari FIDE árið 2002 lætur ekki hlut sinn fyrir neinum þó hann hafi um stundarsakir a.m.k. gefið sviðið eftir yngri mönnum á borð við Norðmanninn Magnús Carlsen. Hann lagði Kramnik að velli með tilþrifum í 2. umferð. Sá sigur er kannski tímanna tákn; fyrir minnstu mistök í byrjun tafls er refsað grimmilega:

Dortmund 2010;

Ponomariov - Kramnik

Katalónsk byrjun

1. d4 Rf6 2. c4 e6 3. g3 Bb4+ 4. Bd2 Be7 5. Bg2 d5 6. Rf3 O-O 7. O-O c6 8. Dc2 b6 9. Hd1 Ba6 10. Re5 Dc8 11. Rc3 Rbd7 12. Hac1 Rxe5 13. dxe5 Rd7 14. cxd5 cxd5 15. Bf4

Hvítur hefur í hyggju að leika 16. e4 og Kramnik telur sig þurfa að bregðast hart við.

15. ... g5!? 16. Bxd5!

Sókn á væng skal svarað með árás á miðborði!

16. ... exd5 17. Rxd5 Dd8

Besta vörnin var 17. ... Bd8.

18. Rc7! Hc8

18. ... gxf4 er svarað með 19. Df5! o.s.frv.

19. e6! fxe6 20. Dc6! De8 21. Dxe6+ Df7 22. Dxf7+ Kxf7 23. Rxa6 gxf4 24. Hxc8 Hxc8 25. Hxd7 Hc2 26. Rb4! Hxb2 27. Rc6 Hxe2 28. Hxa7 f3 29. h4 h5

Hvítur leikur og vinnur.

30. Hxe7+ Hxe7+ 31. Rxe7 Kxe7 32. g4! hxg4 33. Kh2 Ke6 34. Kg3 Kf5 35. a4!

Leikþröng.

35. ... Ke4 36. Kxg4

- og Kramnik gafst upp. kjkjklj

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Á morgun verður greinin Íslenska skáksprengingin, eftir Kristján Jónsson, sem birtist í sunnudagsmogganum, 25. júlí sl. birt hér á Skák.is. Næstu daga þar á eftir verða viðtöl, sem tengjast greininni, við Helga Ólafsson, Jóhann Hjartarson, Jón L. Árnason og Margeir Pétursson birt einnig.

Grein þessi birtist í sunnudagsmogganum, 25. júlí 2010.

Skákþættir Morgunblaðsins

Spil og leikir | Breytt s.d. kl. 21:12 | Slóð | Facebook | Athugasemdir (0)

1.8.2010 | 20:06

Henrik, Guðmundur og Bjarni Jens unnu í þriðju umferð - Henrik mætir Eljanov

Stórmeistarinn Henrik Danielsen (2512), Guðmundur Gíslason (2351) og Bjarni Jens Kristinsson (2044) unnu allir í þriðju umferð Politiken Cup sem fram fór í dag. Bragi Halldórsson (2253) tapaði hins vegar. Henrik hefur fullt hús, Guðmundur 2½ vinning, Bjarni Jens 2 vinninga og Bragi 1½ vinning.

Fjórða umferð fer fram á morgun og hefst kl. 12. Henrik mætir þá langstigahæsta keppenda mótsins, úkraínska stórmeistaranum Pavel Eljanov (2755) sem jafnframt er áttundi stigahæsti skákmaður heims. Skákin verður sýnd beint á vefsíðu mótsins.

Skákir íslensku skákmannanna úr 1.-2. umferð fylgja með.

Heimasíða mótsins
Beinar útsendingar (4.-9. umf. kl. 12 og 10. umf. kl. 8)

Spil og leikir | Breytt s.d. kl. 21:16 | Slóð | Facebook | Athugasemdir (0)

1.8.2010 | 13:16

Henrik og Guðmundur unnu í 2. umferð

Stórmeistarinn Henrik Danielsen (2512) og Guðmundur Gíslason (2351) unnu báðir í 2. umferð Politiken Cup sem fram fór í morgun. Bragi Halldórsson (2253) gerði jafntefli en Bjarni Jens Kristinsson (2044) tapaði. Henrik hefur 2 vinninga, Guðmundur og Bragi hafa 1,5 vinning en Bjarni Jens hefur 1 vinning.

Þriðja umferð fer fram síðar í dag og hefst kl. 14. Skák Henrik gegn Dananum Sigfred Haubro (2152) verður sýnd beint á vefsíðu mótsins.

Skákir íslensku skákmannanna úr fyrstu umferð fylgja með fréttinni.

Heimasíða mótsins
Beinar útsendingar (3. umf. kl. 14, 4.-9. umf. kl. 12 og 10. umf. kl. 8)

Spil og leikir | Breytt s.d. kl. 13:22 | Slóð | Facebook | Athugasemdir (0)

1.8.2010 | 11:40

Hraðskákkeppni taflfélaga

Hraðskákkeppni taflfélaga, hefst fljótlega eftir verslunarmannahelgi. Þetta er í sextánda sinn sem keppnin fer fram en Taflfélag Bolungarvíkur er núverandi meistari. Í fyrra var metþátttaka en þá tóku 15 lið þátt og er stefnt að því að bæta það met í ár. Skráningarfrestur er til 5. ágúst.

Eftirfarandi félög hafa skráð sig til leiks (liðsstjóri í sviga):

Bolungarvík (Guðmundur)
Haukar (Ingi Tandri)
Hellir (Vigfús)
KR (Einar S)
TG (Páll)
SA (Stefán)
Selfoss (Magnús)
SFÍ (Kristján Örn)
TR (Ríkharður)
TV (Einar K)
Vin (Arnar)
Víkingaklúbburinn (Gunnar Freyr)

Dagskrá mótsins er sem hér segir

1. umferð (16 liða úrslit): Skuli vera lokið 15. ágúst
2. umferð (8 liða úrslit): Skuli vera lokið 25. ágúst
3. umferð (undanúrslit): Skuli vera lokið 5. september
4. umferð (úrslit): Skuli vera lokið 15. september (líklegt að keppnin verði sett á helgina 10.-12. september)

Skráning til þátttöku rennur út 5. ágúst nk. Forráðamenn taflfélaga eru vinsamlegast beðnir um að skrá sig í netfangið gunnibj@simnet.is eða í síma 820 6533.
Tilkynna þarf eftirfarandi:

Lið
Liðsstjóri
Símanúmer liðsstjóra
Netfang liðsstjóra

Reglur keppninnar:

1. Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.
2. Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar.
3. Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.
4. Ætlast er til þess að þeir sem tefli séu fullgildir meðlimir síns félags, þ.e. séu rétt skráðir í keppendaskrá SÍ). Aðeins má tefla með einu taflfélagi í keppninni.
5. Liðsstjórar koma sér saman um hvenær er teflt og innan tímaáætlunar. Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.
6. Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.
7. Heimalið bjóði upp á léttar veitingar, t.d. kaffi, gos, kökur eða kex.
8. Viðureignirnar skulu fara fram innan 100 km. radíus (max 1-1,5 klst. ferðalag) frá Reykjavík nema að félög komi sér saman um annað.
9. Úrslitum skal koma til umsjónarmann eins fljótt og auðið er í netfangið gunnibj@simnet.is og eigi síðar en 12 klukkustundum eftir að keppni lýkur.
10. Úrslit keppninnar verða ávallt aðgengileg á heimasíðu Hellis, www.hellir.blog.is , sem er heimasíða keppninnar, og á www.skak.is.
11. Mótshaldið er í höndum Taflfélagsins Hellis sem sér um framkvæmd mótsins.

Spil og leikir | Slóð | Facebook | Athugasemdir (0)

1.8.2010 | 10:35

Skák á Unglingalandsmóti fer fram í dag

Unglingalandsmótið er í fullum gangi í Borgarnesi. Í dag fer fram skákkeppnin. Teflt verður í Menntaskóla Borgarfjarðar sunnudaginn 1. ágúst frá kl. 15:00 til kl.18:00.

Keppnisreglur: 11 - 14 ára og 15 - 18 ára strákar og stelpur í sama flokki.

Unglingalandsmótið

Spil og leikir | Slóð | Facebook | Athugasemdir (0)

« Fyrri síða