Skák.is

Bloggfærslur mánaðarins, ágúst 2010

5.8.2010 | 22:09

„Mórallinn í hópnum stendur upp úr“

Ég man að ég upplifði þetta sem alheimsviðburð. „PR"-gildi viðburðarins fyrir Ísland var náttúrlega ótrúlegt. Við erum að tala um viðburð sem var á forsíðu heimsblaðanna dag eftir dag og viku eftir viku, enda hefur einvígið verið sett í það samhengi síðar að það hafi verið einn stærsti keppnisviðburður á síðustu öld. Ég var 15 ára gamall og var skákmeistari Vestmannaeyja en hafði þó ekki teflt mjög lengi. Mér fannst það ekki ýkja merkilegt í ljósi þess að Fischer hafði orðið stórmeistari 15 ára. Ég sá fimm skákir og þetta var algert ævintýri," sagði Helgi þegar Morgunblaðið bað hann að rifja einvígi Fischers og Spasskís upp.

Að mati Helga er árangur Íslands í Dubai og Manila nokkuð svipaður. „Ég held að þetta sé að sumu leyti svipað en við vorum kannski þroskaðri skákmenn í Manila og veraldarvanari. Það liðu náttúrlega sex ár þarna á milli. Það má segja að svipaðar áherslur hafi gert það að verkum að liðið náði vel saman í báðum tilfellum. Við létum ekki einhverja atburði utan taflborðsins vera breytu í atburðarásinni. Við pössuðum upp á að undirbúningur fyrir mótin og fyrir skákirnar væri í lagi. Þessi hópur hafði þvælst mikið saman og þekkst árum saman. Þegar ég horfi til baka þá minnist ég þess að það var alltaf góður mórall. Mér finnst það standa svolítið upp úr hvað það var gaman að þessum hóp. Það þýðir þó ekki að menn hafi alltaf verið sammála um alla hluti, heldur var mórallinn almennt góður. Það var glaðværð yfir mönnum og það tóku margir eftir því. Í öðrum liðum var alltaf mikil samkeppni en það var einhvern veginn ekkert atriði hjá okkur. Í fyrstu vakti mikla athygli hvað við vorum með sterka sveit en síðan urðum við bara þekkt stærð og það var alltaf vitað að það yrði erfitt að tefla við okkur," sagði Helgi.

Viðtalið við Helga Ólafsson er eftir Kristján Jónsson, blaðamann Morgunblaðsins, og birtist í sunnudagsmogganum, 25. júlí sl. Viðtalið við Helga er hluti af greininni Íslenska skáksprengjan. Á morgun lýkur umfjöllun hér á Skák.is með viðtali við Margeir Pétursson.

Skákþættir Morgunblaðsins

Spil og leikir | Breytt s.d. kl. 22:12 | Slóð | Facebook | Athugasemdir (0)

5.8.2010 | 22:00

Lenka og Smári unnu í fyrstu umferð í Olomouc

Lenka Ptácníková (2262) og Smári Rafn Teitsson (2089) unnu bæði í fyrstu umferð c-flokks opin flokks skákhátíðinnar í Olomouc sem fram fór í dag. Bæði tefldu þau við umtalsvert stigalægri andstæðinga.

Alls taka 192 skákmenn þátt í opna flokknum og þar á meðal eru einn stórmeistari kvenna (Lenka) og 11 alþjóðlegir meistarar. Lenka er nr. 23 í stigaröð keppenda en Smári er nr. 63.

Spil og leikir | Slóð | Facebook | Athugasemdir (0)

5.8.2010 | 16:22

Guðmundur, Bjarni Jens og Bragi unnu - Henrik með jafntefli við Macieja (uppfært)

Guðmundur Gíslason sigurvegari Stigamótsins

Guðmundur Gíslason (2351), Bjarni Jens Kristinsson (2044) og Bragi Halldórsson (2253) unnu allir í sjöundu umferð Politiken Cup sem fram fór í dag. Henrik Danielsen (2512) gerði jafntefli við pólska stórmeistarann Bartlomiej Macieja (2639). Henrik og Guðmundur eru hálfum vinningi á eftir efstu mönnum.

Röng úrslit hjá Bjarna Jens voru birt á heimasíðu mótsins í dag og þ.a.l. á Skák.is einnig en hafa nú verið leiðrétt.

Henrik og Guðmundur hafa 5½ vinning og eru í 9.-20. sæti, Bjarni Jens hefur 5 vinninga og er í 21.-45. sæti og er efstur í sínum stigaflokki og Bragi hefur 4 vinninga og er í 72.-126. sæti.

Umfjöllun um umferðina má finna á Skákhorninu.

Átta skákmenn eru efstir og jafnir með 6 vinninga. Það eru stórmeistararnir Maxim Rodshtein (2609) og Evgeny Postny (2577), Ísrael, Konstantin Landa (2598), Rússlandi, Georg Meier (2648), Þýskalandi, Allan Stig Rasmussen (2510), Danmörku, Pavel Eljanov (2755), Úkraínu,Jonny Hector (2584), Svíþjóð, og Surya Shekhar Ganguly (2655), Indlandi.

Skákir Henriks og Guðmundar á morgun verða sýndar báðar beint á vefsíðu mótsins. Henrik mætir danska FIDE-meistaranum Jackob Aabling-Thomsen (2314), Guðmundur ungversku goðsögninni Lajos Portisch (2539). Bjarni Jens verður ekki í beinni en mætir pólska stórmeistaranum Michal Krasenkov (2628). Umferðin hefst kl. 11.

Skákir íslensku skákmannanna úr 1.-7. umferð fylgja með fréttinni.

Alls taka 292 skákmenn þátt í Politiken Cup. sem fram fer í Helsingör nærri Kaupmannahöfn. Þar af er 21 stórmeistari og 4 alþjóðlegir meistarar. Henrik er nr. 18 í stigaröð keppenda, Guðmundur nr. 29, Bragi nr. 45 og Bjarni Jens nr. 113. Stigahæstur keppenda er úkraínski stórmeistarinn Pavel Eljanov (2755).

Heimasíða mótsins
Beinar útsendingar (4.-9. umf. kl. 11 og 10. umf. kl. 8)

Veljið skák (28 alls):

Spil og leikir | Breytt s.d. kl. 21:51 | Slóð | Facebook | Athugasemdir (1)

5.8.2010 | 08:07

Ný íslensk skákstig

Ný íslensk skákstig eru komin út (1. júní). Hannes Hlífar Stefánsson er stigahæstur með 2645 skákstig. Jóhann Hjartarson og Margeir Pétursson koma næstir. Hjörvar Steinn Grétarsson er stigahæstur skákmanna 21 árs og yngri, Oliver Aron Jóhannesson hækkaði mest frá síðasta stigalista (180 stig). Svavar Viktorsson er stigahæstur nýliðea (1765 stig). Jóhann Hjartarson hefur flest atskákstig.

20 stighæstu skákmenn landsins:

Nr.	Nafn	Félag	Stig
1	Hannes H Stefánsson	Hellir	2645
2	Jóhann Hjartarson	Bol	2620
3	Margeir Pétursson	TR	2600
4	Héðinn Steingrímsson	Fjölni	2545
5	Helgi Ólafsson	TV	2540
6	Henrik Danielsen	Haukar	2525
7	Friðrik Ólafsson	TR	2510
8	Jón Loftur Árnason	Bolung	2505
9	Helgi Áss Grétarsson	TR	2500
10	Karl Þorsteins	Hellir	2485
11	Stefán Kristjánsson	Bol	2485
12	Jón Viktor Gunnarsson	Bolung	2460
13	Bragi Þorfinnsson	Bolung	2445
14	Guðmundur Sigurjónsson	TR	2445
15	Björn Þorfinnsson	Hellir	2435
16	Hjörvar Grétarsson	Hellir	2435
17	Þröstur Þórhallsson	Bol	2410
18	Arnar Gunnarsson	TR	2410
19	Magnús Örn Úlfarsson	Hellir	2380
20	Guðmundur Stefán Gíslason	Bol	2380

10 stigahæstu ungmenni landsins (fædd 1989 og síðar):

Nr.	Nafn	Stig
1	Hjörvar Grétarsson	2435
2	Sverrir Þorgeirsson	2280
3	Daði Ómarsson	2185
4	Atli Freyr Kristjánsson	2170
5	Bjarni Jens Kristinsson	2070
6	Helgi Brynjarsson	2010
7	Ingvar Ásbjörnsson	1985
8	Hallgerður H Þorsteinsdóttir	1975
9	Patrekur Maron Magnússon	1955
10	Örn Leó Jóhannsson	1945

Nýliðar:

Nr.	Nafn	Stig
1	Svavar Viktorsson	1765
2	Benedikt Einarsson	1740
3	Árni Guðbjörnsson	1650
4	Helgi Harðarson	1600
5	Jón Víglundsson	1555
6	Birgir Aðalsteinsson	1360
7	Halldór Víkingsson	1340
8	Valur Heiðar Einarsson	1170
9	Heimir Páll Ragnarsson	1125
10	Sigurður Kjartansson	1070

Mestu hækkanir frá 1. mars:

Nr.	Nafn	01.jún	01.mar	Br.
1	Oliver Aron Jóhannesson	1490	1310	180
2	Emil Sigurðarson	1790	1615	175
3	Örn Leó Jóhannsson	1945	1775	170
4	Jon Olav Fivelstad	1875	1715	160
5	Magnús Kristinsson	1575	1415	160
6	Birgir R Þráinsson	1780	1665	115
7	Jóhanna Björg Jóhannsdóttir	1785	1675	110
8	Atli Jóhann Leósson	1465	1360	105
9	Jón Kristinn Þorgeirsson	1600	1505	95
10	Halldór Pálsson	1970	1880	90

Virkustu skákmennirnir:

Nr.	Nafn	Stig	Br.	Skákir
1	Emil Sigurðarson	1790	175	28
2	Örn Leó Jóhannsson	1945	170	28
3	Bjarni Hjartarson	2000	-10	27
4	Mikael Jóhann Karlsson	1785	80	26
5	Þorvarður F Ólafsson	2200	10	26
6	Sverrir Þorgeirsson	2280	70	23
7	Svanberg Már Pálsson	1785	25	23
8	Björn Þorfinnsson	2435	50	22
9	Guðmundur Stefán Gíslason	2380	35	22
10	Ingvar Jóhannesson	2340	-15	22
11	Þröstur Þórhallsson	2410	-30	22
12	Róbert Lagerman	2315	-60	22

Reiknuð mót:

Skákþing Goðans 2010 (4.-7. umferð)
Skákþing Akureyrar
MP Reykjavík Open
Íslandsmót skákfélaga (1.-4. deild)

Topp 10 í atskákstigum:

Nr.	Nafn	Félag	Atstig
1	Jóhann Hjartarson	Bol	2605
2	Helgi Ólafsson	TV	2595
3	Hannes H Stefánsson	Hellir	2575
4	Margeir Pétursson	TR	2570
5	Helgi Áss Grétarsson	TR	2540
6	Henrik Danielsen	Haukar	2525
7	Friðrik Ólafsson	TR	2480
8	Arnar Gunnarsson	TR	2465
9	Jón Loftur Árnason	Bolung	2465
10	Jón Viktor Gunnarsson	Bolung	2445

Með fréttinni er tengill á skákstigin, skákmenn með 2000 stig eða meira, stigahæstu unglinga landsins og atskákstig.

Skrár tengdar þessari bloggfærslu:

Spil og leikir | Breytt s.d. kl. 13:01 | Slóð | Facebook | Athugasemdir (0)

5.8.2010 | 00:23

„Árangurinn vakti gríðarlega athygli“

„Já, ég held að það sé rétt ályktað að þessi kynslóð sé afsprengi heimsmeistaraeinvígisins 1972. Ég hafði mikinn áhuga á skák en einvígið ýtti mjög undir þann áhuga. Ég var náttúrlega ekki nema níu ára gamall en man þó mjög vel eftir þessum viðburði enda fylgdist ég vel með. Ég mætti á eina skákina með föður mínum og það var eftirminnilegt." sagði Jóhann Hjartarson þegar Morgunblaðið sló á þráðinn til hans. Hann neitar því ekki að skákin hafi fengið mikla athygli hérlendis á níunda áratug síðustu aldar.

„Skákin naut meiri athygli á þessum árum en dregið hefur úr því á síðustu árum. Það má segja að þessi skákáhugi þjóðarinnar hafi sprungið út árið 1984 og fljótlega náðum við fjórir stórmeistaratitlum. Einnig vakti árangur okkar á HM ungmenna árið 1983 mikla athygli en þá enduðum við í 2.-3. sæti. Árangur okkar á ólympíuskákmótunum vakti gríðarlega athygli. Okkur gekk oftast vel og það byggist upp spenna jafnt og þétt þegar vel gengur. Við settum einnig markið hátt og markmiðið var ávallt að vera á meðal tíu efstu. Við vorum ungir og metnaðargjarnir. Líklega vorum við lágir á stigum miðað við getu en liðsheildin var mjög góð hjá okkur. Það er nokkuð misjafnt hvernig gengur að ná upp góðri liðsheild á ólympíumótum. Við undirbjuggum okkur mjög vel og brydduðum einnig upp á nýjungum. Má þar nefna að við fengum Gunnar Eyjólfsson til liðs við okkur fyrir mótið í Manila. Það er engin spurning að hann hafði mikil áhrif. Við vorum hjá honum í öndunaræfingum og slíku í marga mánuði í aðdraganda mótsins og þegar út var komið var unnið eftir ákveðinni áætlun sem gekk meðal annars út á að losa um spennu. Andlegi þátturinn skiptir heilmiklu máli eins og sást hjá handboltalandsliðinu í Peking þegar það vann til silfurverðlauna. Það er gaman að skoða hversu vel okkur gekk þegar Gunnar var með í för. Hann komst ekki með okkur til Moskvu og þá gátum við ekki neitt!" sagði Jóhann og er ekki í vafa um besta árangur Íslands. „Árangur okkar í Manila stendur upp úr. Það er klárlega okkar besti árangur á alla mælikvarða. Sovétríkin höfðu liðast í sundur og fyrir vikið voru mun fleiri sterkar þjóðir mættar til leiks."

Viðtalið við Jóhann Hjartarson er eftir Kristján Jónsson, blaðamann Morgunblaðsins, og birtist í sunnudagsmogganum, 25. júlí sl. Viðtalið við Jóhann var hluti af greininni Íslenska skáksprengingin. Næstu daga verða viðtöl við Helga Ólafsson og Margeir Pétursson, sem einnig fylgdu greininni, birt hér á Skák.is

Skákþættir Morgunblaðsins

Spil og leikir | Breytt s.d. kl. 00:27 | Slóð | Facebook | Athugasemdir (0)

4.8.2010 | 16:29

Henrik, Guðmundur og Bjarni Jens unnu í sjöttu umferð

Henrik Danielsen (2512), Guðmundur Gíslason (2351) og Bjarni Jens Kristinsson (2044) unnu allir í sjöttu umferð Politiken Cup sem fram fór í dag. Bragi Halldórsson (2253) gerði jafntefli. Henrik er hálfum vinningi á eftir efstu mönnum.

Henrik hefur 5 vinninga og er í 5.-17. sæti, Guðmundur hefur 4½ vinning og er í 18.-35. sæti, Bjarni Jens hefur 4 vinninga og er í 36.-78. sæti og Bragi hefur 3 vinninga og er í 111.-182. sæti

Stórmeistararnir Georg Meier (2648), Þýskalandi, Konstantin Landa (2598), Rússlandi, Pavel Eljanov (2755), Úkraínu, og Maxim Rodshtein, Ísrael, eru efstir með 5½ vinning.

Skákir Henriks og Guðmundar verða báðir sýndar beint í sjöundu umferð, sem fram fer á morgun. Henrik teflir við pólska stórmeistarann Bartlomiej Macieja (2639) og Guðmundur mætir Svíanum Joel Eklund (2192). Umferðin hefst kl. 11.

Skákir íslensku skákmannanna úr 1.-6. umferð fylgja með.

Heimasíða mótsins
Beinar útsendingar (4.-9. umf. kl. 11 og 10. umf. kl. 8)

Veljið skák (24 alls):

Spil og leikir | Breytt 5.8.2010 kl. 00:18 | Slóð | Facebook | Athugasemdir (0)

3.8.2010 | 23:19

„Náðum betri árangri sem lið en einstaklingar“

Jón L. Árnason var 11 ára gamall þegar Fischer og Spasskí tefldu í Reykjavík. „Einvígi þeirra hafði úrslitaáhrif á að ég fór að tefla af fullum krafti. Það er einfalt að svara því. Ég fór að tefla fyrir alvöru á þessum tíma. Þjóðin fór á hliðina í skákæði og ég fylgdist vel með. Ég fór og horfði á fyrstu skákina. Hún var tíðindalítil framan af en svo fór kliður um salinn þegar Fischer drap á H2 eins og frægt varð," sagði Jón þegar Morgunblaðið bað hann að rifja upp upplifun sína af einvíginu. Að loknu ólympíumótinu í Dubai árið 1986 skrifaði Jón um mótið í bókinni Skákstríð við Persaflóa. „Árangurinn í Dubai er eftirminnilegastur í mínum huga. Við höfnuðum í 5. sæti og það var langbesti árangur Íslands á ólympíuskákmóti og vakti mikla athygli. Menn hafa leitt að því líkur að árangurinn í Manila hafi jafnvel verið betri svona stigalega séð enda höfðu Sovétríkin liðast í sundur. Nokkrar þjóðir spruttu upp úr því og því var um sterkara mót að ræða en í Dubai. Líklega hefur árangur okkar í Manila því verið betri en í endurminningunni var hann betri í Dubai," sagði Jón og hló við. Hann bendir á að íslenska liðið hafi oft á tíðum náð betri árangri í ólympíumótunum heldur en Elo-stig liðsmanna hafi gefið tilefni til. „Við náðum betri árangri sem lið heldur en einstaklingar. Við þekktumst mjög vel og náðum upp ákveðinni liðsheild. Við höfðum það umfram margar aðrar þjóðir."

Spurður um aðkomu Gunnars Eyjólfssonar að landsliðinu í Manila sagði Jón mikinn feng hafa verið í Gunnari. „Hann var ekki eiginlegur liðsstjóri heldur meira eins og andlegur leiðtogi. Engar sérstakar sögur fóru af honum hvað skákstyrkleika snerti og þetta vakti því nokkra athygli á sínum tíma. Það var mjög gott að hafa hann með. Hann býr yfir mikilli reynslu en ýmislegt er hægt að heimfæra frá leikhúsinu og yfir á skákina varðandi einbeitingu og ýmislegt þess háttar. Hann átti þátt í því að búa til liðsheild og ná upp krafti hjá keppendum." Jón getur ekki neitað því að árangur Íslendinga á þessum árum hafi vakið mikla athygli í hinum alþjóðlega skákheimi. „Íslendingar voru og eru nokkuð þekktir sem skákþjóð en það þótti merkilegt að svo fámenn þjóð skyldi eignast fjóra stórmeistara á svo skömmum tíma. Við komum mörgum mjög á óvart í Dubai en komum kannski minna á óvart eftir það, því þá var litið á okkur sem alvörulið," sagði Jón ennfremur.

Viðtalið við Jón L. Árnason er eftir Kristján Jónsson, blaðamann Morgunblaðsins, og birtist í sunnudagsmogganum, 25. júlí sl. Viðtalið við Jón var hluti af greininni Íslenska skáksprengingunni. Næstu daga verða viðtöl við Helga Ólafsson, Jóhann Hjartarson og Margeir Pétursson, sem einnig fylgdu greininni, birt hér á Skák.is

Skákþættir Morgunblaðsins

Spil og leikir | Slóð | Facebook | Athugasemdir (0)

3.8.2010 | 19:01

Bjarni Jens og Bragi unnu í fimmtu umferð Politiken Cup - Henrik með jafntefli

Bjarni Jens Kristinsson (2044) og Bragi Halldórsson (2253) unnu báðir sínar skákir í fimmtu umferð Politiken Cup sem fram fór í dag. Henrik Danielsen (2512) gerði jafntefli við Danann Jackie Andersen (2276) en Guðmundur Gíslason Gíslason (2351) tapaði fyrir danska stórmeistaranum Sune Berg Hansen (2595).

Henrik hefur 4 vinninga og er í 10.-33. sæti, Guðmundur hefur 3½ vinning og er í 34.-64. sæti, Bjarni Jens hefur 3 vinninga og er í 65.-124. sæti og Bragi hefur 2½ vinning og er í 125.-170. sæti.

Stórmeistararnir Maxim Rodshtein (2609), Ísrael, Jonny Hector (2584), Svíþjóð og Konstantin Landa (2598), Rússlandi, eru efstir með fullt hús.

Skák Henriks gegn danska FIDE-meistaranum Jacob Carstensen (2295) í sjöttu umferð, sem fram fer á morgun, verður sýnd beint á vefsíðu mótsins. Umferðin hefst kl. 11.

Skákir íslensku skákmannanna úr 1.-4. umferð fylgja með.

Heimasíða mótsins
Beinar útsendingar (4.-9. umf. kl. 11 og 10. umf. kl. 8)

Veljið skák (16 alls):

Spil og leikir | Breytt s.d. kl. 19:06 | Slóð | Facebook | Athugasemdir (0)

2.8.2010 | 20:19

Grein úr Morgunblaðinu: Íslenska skáksprengingin

Um miðjan níunda áratuginn eignaðist Ísland gullaldarlið í skák og fjóra stórmeistara á skömmum tíma. Þjóðarsálin tók við sér með tilheyrandi látum og landsliðsmennirnir voru meðal annars kjörnir menn ársins hjá DV árið 1986.

Eftir Kristján Jónsson (kris@mbl.is).

Seint á síðustu öld náði skákáhugi íslensku þjóðarinnar nýjum hæðum þegar íslenskir skákmenn komust í fremstu röð í heiminum í þeirri göfugu hugarleikfimi. Smám saman hafði orðið til vísir að sterkasta skáklandsliði sem Ísland hefur alið af sér, og í hönd fór tímabil sem varla verður kallað annað en íslenska skáksprengingin. Ungir kappar létu þá verulega að sér kveða og urðu fjórir þeirra stórmeistarar á tveggja ára tímabili. Fengu þeir síðar viðurnefnið fjórmenningaklíkan í jákvæðri merkingu þess orðs. Hér er átt við þá Helga Ólafsson, Jóhann Hjartarson, Jón L. Árnason og Margeir Pétursson. Liðlega aldarfjórðungi síðar þykir Morgunblaðinu full ástæða til þess að rifja upp þá tíma þegar litla Ísland stríddi stórveldunum hvað eftir annað á ólympíuskákmótum og fékk til þess aðstoð frá Braga Kristjánssyni, skákskýranda Morgunblaðsins til margra ára.

Skákheiminum hlýtur að hafa orðið fremur bilt við þegar smáríkið Ísland eignaðist skyndilega fjóra stórmeistara nánast á einu bretti um miðjan níunda áratug síðustu aldar. Fram að því höfðu einungis tveir Íslendingar orðið stórmeistarar í skák, en það voru þeir Friðrik Ólafsson og Guðmundur Sigurjónsson en sá síðarnefndi tefldi með fjórmenningaklíkunni á ólympíuskákmótunum 1984 og 1986. Áður hafði Ísland þó komist rækilega á skáklandakortið, ekki síst fyrir tilstilli Friðriks, sem komst í fremstu röð og varð síðar forseti Alþjóða skáksambandsins. Ekki er óvarlegt að áætla að staða Friðriks í skákheiminum hafi átt stóran þátt í því að einvígið um heimsmeistaratitilinn í skák var haldið hér á landi árið 1972. Íslendingum var þó ekki treyst fyrir þessum stórviðburði alveg út í bláinn, því þegar höfðu Íslendingar verið gestgjafar stórra alþjóðlegra skákmóta. Einvígi Bobby Fischers og Borisar Spasskís hefur verið kallað „Einvígi aldarinnar" og er líklega magnaðasta heimsmeistaraeinvígi sögunnar, þó slíkar fullyrðingar séu ávallt umdeilanlegar. Skákáhugi þjóðarinnar jókst til mikilla muna við að fá þennan stórviðburð til landsins og var hann þó talsverður fyrir. Færa má fyrir því rök að skáksprengingin á Íslandi, sé afsprengi einvígis Fischers og Spasskís þó í því felist nokkur einföldun. Fleira kemur til eins og útgáfustarfsemi sem Jóhann Þórir Jónsson bar hitann og þungann af, en hans þáttur í framvindunni var ekki lítill.

Ungu mennirnir láta að sér kveða

Í ársbyrjun árið 1984 hélt Búnaðarbankinn alþjóðlegt skákmót þar sem starfsmenn bankans, Jóhann og Margeir, urðu í tveimur efstu sætunum. Til glöggvunar má nefna að Lev Alburt hafnaði í 10. sæti í mótinu en hann varð bandarískur meistari 1984 og '85. Reykjavíkurskákmótið var haldið í kjölfarið og þar sigraði Jóhann aftur en deildi sigrinum með Helga og Samuel Reshevsky. Íslensku skákmennirnir fóru því með gott veganesti til Þessalóníku í Grikklandi þar sem ólympíuskákmótið var haldið árið 1984. Uppskeran varð 31,5 vinningar og hafnaði Ísland í 15. sæti af 88 þjóðum. Guðmundur, fjórmenningarnir og Karl Þorsteins skipuðu sveitina. Jón L. fékk 8 vinninga í 11 skákum og var með besta vinningshlutfall Íslendinganna.

Skákstríð við Persaflóa

Vegna árangursins í Þessalóníku var ekki að undra að sama liði skyldi teflt fram á

Heiðraðir Gullaldarliðið fékk jafnan góðar móttökur þegar það snéri heim úr siglingum sínum og var þá sómi sýndur.

ólympíuskákmótinu tveimur árum síðar. Haldið var á framandi slóðir í Dubai í Sameinuðu arabísku furstadæmunum og náðist þar árangur sem seint verður toppaður. Íslenska sveitin hafnaði í 5. sæti af 108 þjóðum og hlaut 34 vinninga. Í mótinu gerði Ísland til dæmis jafntefli, 2:2, við Sovétríkin með þá Garry Kasparov og Anatoli Karpov innanborðs. Báðir hafa þeir náð betri tökum á skáklistinni en almennt þekkist í mannkynssögunni. Helgi tapaði fyrir Kasparov þar sem heimsmeistarinn þurfti að hafa mikið fyrir sigrinum og á öðru borði gerðu þeir Jóhann og Karpov jafntefli. Ljóst má vera að úrslitin gegn Sovétríkjunum, 2:2 jafntefli með Kasparov og Karpov innanborðs, voru stórkostleg. Til að gefa einhverja mynd af því er líklega best að tína til árangur Kasparovs og Karpovs á ólympíuskákmótum: Kasparov tefldi 82 skákir á 8 ólympíumótum og tapaði 3 þeirra! Karpov tefldi 68 skákir á 6 ólympíumótum og tapaði 2 þeirra!

Sexmenningarnir skiluðu allir góðum árangri í mótinu. Helgi fékk 6,5 v í 12 skákum, Jóhann 8 v af 12, Jón L. 8 v af 13, Margeir 7,5 v af 12, Guðmundur 2 v af 4 og Karl 2 v af 3. Jón L. og Margeir fengu stórmeistaratign að mótinu loknu. Jón skrifaði bók um ævintýrið í Dubai ásamt dr. Kristjáni Guðmundssyni liðsstjóra sveitarinnar og heitir bókin „Skákstríð við Persaflóa". Þar kemur meðal annars fram að útgerðarmaðurinn Soffanías Cecilsson frá Grundafirði hét liðinu peningaverðlaunum ef því tækist að verða á meðal tíu efstu þjóðanna í Dubai en 11. sæti í Havana 1966 var besti árangur Íslands á ólympíuskákmóti fram að þessu. Niðurstaðan skilaði sveitinni 1 milljón íslenskra króna á þávirði frá Soffaníasi. Kristján og Jón draga ekki dul á það í bókinni að áheit Soffaníusar hvatti skákmennina til dáða.

Kasparov sakaði Íslendinga um svindl

Setið að tafli gegn Rússlandi í Manila 1992. Jóhann glímir við sjálfan Garry Kasparov á 1. borði.

Jón L. lýsir þeim Kasparov og Karpov afar skemmtilega í fyrrnefndri bók: „Það er einkennileg líðan að tefla andspænis sveit, þar sem Karpov og Kasparov sitja hlið við hlið. Þeir eru ólíkir í háttum. Kasparov iðar í sætinu og er óstyrkur að sjá eins og fyrr er vikið að en Karpov er aftur á móti sallarólegur, nánast hreyfingarlaus við borðið. Hann hreyfði höfuðið lítilsháttar til og frá meðan hann var að hugsa, svona eins og til að örva blóðstreymi til heilans og svo gaut hann augunum rannsakandi til Jóhanns - þetta fræga (ískalda) Karpov-augnaráð. Karpov sat meira við borðið en Kasparov en er hann stóð upp til að teygja úr sér, leit hann á stöður liðsmanna sinna. Og K-in tvö tóku oftar en einu sinni tal (með litlu t-i!) saman og virtust ræða stöðurnar á hinum borðunum. Raunar er óleyfilegt að keppendur ræði saman meðan á skákum stendur, en skákstjóri fann þó enga þörf hjá sér til þess að þagga niður í þessum snillingum! Þrátt fyrir allt umtal um að grunnt sé á því góða milli þessara tveggja heimsmeistara, var það ekki að merkja á þeim, þar sem þeir stungu saman nefjum."

Síðar í mótinu tapaði Ísland 1:3 gegn Bandaríkjunum og missti þar með af toppbaráttunni. Snillingurinn Kasparov átti erfitt með að skilja þau úrslit og sparaði síst stóru orðin. „Kasparov trylltist við þessi úrslit og gekk svo langt að ásaka íslensku sveitina um að hafa gert sér það að leik, að tapa fyrir Bandaríkjamönnum. Við litum á þetta sem hrós frá heimsmeistaranum. Auðvitað gat svona sterk sveit, eins og sú íslenska, ekki tapað svo stórt án þess að brögð væru í tafli!"

Besti árangurinn í Manila?

Fjórmenningaklíkan myndaði hryggjarsúluna í landsliðinu á ólympíuskákmótum í tæpan áratug til viðbótar og sýndi að árangurinn í Dubai var engin tilviljun því liðið sýndi mikinn stöðugleika. Árið 1988 fór mótið aftur fram í Þessalóníku og varð Ísland í 15. sæti með 32 vinninga. Margeir fékk 7,5 v af 12 mögulegum. Guðmundur hætti eftir mótið í Dubai og Karl eftir mótið í Þessalóníku. Tveimur árum síðar, í Novi Sad í Júgóslavíu, var Ísland aftur í toppbaráttunni og hafnaði í 8. sæti með 32,5 vinninga. Jóhann fékk 8,5 v í 13 skákum.

Árið 1992 fór keppnin fram í Manila á Filippseyjum og enn einu sinni voru Íslendingarnir í stuði. Fengu 33,5 vinninga og 6. sætið varð staðreynd af 102 þjóðum. Færa má fyrir því rök að árangurinn í Manila sé sá besti í sögunni hjá Íslendingum. Þá var járntjaldið í Austur-Evrópu fallið með þeim afleiðingum að mun fleiri sterkar skákþjóðir urðu til, enda voru Sovétríkin helsta stórveldið í skákinni. Eina Vesturlandaþjóðin sem hafnaði ofar en Ísland var Bandaríkin, sem endaði í 4. sæti, og þau voru með 3 fyrrum Sovétmenn innanborðs. Hannes Hlífar Stefánsson og Þröstur Þórhallsson skipuðu liðið ásamt fjórmenningunum. Hannes var tvítugur þegar teflt var í Manila og stóð sig frábærlega en hann fékk 7 v í 9 skákum og tryggði sér stórmeistaratitil. Árangur annarra var eftirfarandi: Jóhann 6,5 v af 12, Margeir 5,5 v af 10, Helgi 5 v af 9, Jón L. 7 v af 11 og Þröstur 2,5 v af 5.

Gunnars þáttur Eyjólfssonar

Þegar keppnin fór fram í Manila bættist íslenska hópnum liðsauki úr óvæntri átt, en stórleikarinn

Stórleikarinn Gunnar Eyjólfsson reyndist landsliðinu drjúgur liðsauki og er hér ásamt Helga í Manila 1992.

Gunnar Eyjólfsson var með í för sem eins konar andlegur leiðtogi. Gunnar hefur ekki verið keppnismaður í skák en átti hins vegar að hjálpa skákmönnunum að einbeita sér að verkefninu. Auk þess blés hann þeim baráttuanda í brjóst fyrir hverja umferð með ýmsum aðferðum. Þarna var gerð áhugaverð tilraun hvað varðar andlega þáttinn sem virðist hafa heppnast fullkomlega.

Gott dæmi um aðkomu Gunnars er frásögn Margeirs frá mótinu í Manila. „Gunnar hafði mjög góð áhrif og hjálpaði mönnum að ná hámarkseinbeitingu. Þá var líka meiri agi á liðinu. Það voru allir vaktir á sama tíma og gerðu æfingar. Gunnar passaði einnig upp á að menn væru ekki að stúdera yfir sig sem gat valdið því að menn mættu þreyttir í skákirnar. Hann hélt vel utan um mannskapinn hvað þetta varðaði. Ég man eftir því þegar við tefldum við Rúmeníu þá lenti ég á móti manni sem mér hafði gengið illa á móti. Þessi einstaklingur tefldi mjög hratt í byrjun og ætlaði að taka mig á taugum. Ég verð að játa að ég varð talsvert stressaður yfir þessu og þurfti að eyða miklum tíma í að leysa málin. Gunnar skynjaði þetta einhvern veginn og sá að ég var ekki alveg rólegur. Hann mátti auðvitað ekki ræða við mig á meðan skákinni stóð en sendi mér augnaráð með þeim skilaboðum að ég þyrfti að ná mér niður og einbeita mér. Þá gerði ég nokkrar öndunaræfingar í sætinu og andaði mjög djúpt að mér eins og hann hafði kennt okkur. Þá leið mér mun betur og náði jafntefli nokkuð örugglega út úr mjög erfiðu tafli. Ég myndi því segja að þetta jafntefli hafi verið Gunnari að þakka," sagði Margeir við Morgunblaðið þegar hann var beðinn um að rifja upp þátt Gunnars Eyjólfssonar.

Fjórmenningarnir kvöddu í Moskvu

Ungir og reffilegir menn á leið á keppnisstað til þess að ganga frá andstæðingum sínum.

Árið 1994 var teflt í Moskvu og Ísland varð í 22. sæti með 32,5 vinninga og fékk Margeir fékk 7,5 v af 10. Keppnin í Moskvu var síðasta ólympíuskákmótið sem fjórmenningarklíkan tefldi á. Næsta mót var haldið í Jerevan í Armeníu árið 1996 og þá var Jón L. hættur. Ísland náði 12. sæti með 33 vinninga. Jóhann fékk 7 v af 11. Eftir mótið í Jereven hættu Jóhann og Margeir að tefla með landsliðinu. Helgi hélt áfram, einn fjórmenninganna.

Þegar frá líður er auðveldara að átta sig á því hversu sterkum sveitum Ísland tefldi fram með fjórmenningaklíkuna innanborðs. Árangurinn á því tímabili sem hér er rifjað upp er einstakur en síðan 1996 hefur Ísland ekki komist nálægt topp 10 á ólympíuskákmótum. Besti árangurinn á seinni árum er 22. sæti árið 2002 en Ísland hefur oftar en ekki verið að berjast um að vera á meðal 50 efstu. Athyglisvert er að árið 2002 var Gunnar Eyjólfsson einnig með í för sem andlegur leiðtogi og virtist það skila árangri eins og í Manila.

Grein þessi er eftir Kristján Jónsson, blaðamann Morgunblaðsins, og birtist í sunnudagsmogganum, 25. júlí sl. Næstu daga verða viðtöl, sem tengjast greininni, við Helga Ólafsson, Jóhann Hjartarson, Jón L. Árnason og Margeir Pétursson einnig birt hér á Skák.is

Skákþættir Morgunblaðsins

Spil og leikir | Slóð | Facebook | Athugasemdir (0)

2.8.2010 | 18:22

Verðlaunaafhending vegna Meistaramóts Skákskóla Íslands

Hjörvar Steinn Grétarsson fékk loks afhendan farandgripinn sem keppt er um á Meistaramóti Skákskóla Íslands fyrir árið 2010. Hjörvar vann mótið sem haldið um mánaðarmótin maí-júní sl. Þar sem sigurvegari ársins 2009, Sverrir Þorgeirsson, sat þá að tafli í Kanada og hafði skilið farandgripinn eftir heima var ekki hægt að afhenda Hjörvari verðlaunin í mótslok. Sl. föstudag hélt Skákskólinn lítið hóf fyrir sigurvegara síðustu tveggja ára, Hjörvar fékk farandgripinn góða og eignagrip.

Þeir Sverrir Þorgeirsson og Bjarni Jens Kristinsson sem urðu efstir á meistaramótinu 2009, og háðu síðar um sumarið einvígi sem Sverrir vann, fengu einnig afhend verðlaun fyrir árangurinn 2009.

Myndaalbúm (Valur Óskarsson)

Spil og leikir | Breytt s.d. kl. 20:20 | Slóð | Facebook | Athugasemdir (0)

« Fyrri síða | Næsta síða »

Síðan

Skák.is

Skák.is, skákfréttavefur Íslands. Gunnar Björnsson er ritsjóri vefsins.

RSS-straumar

Erlendar vefsíður

Helstu erlendu fréttasíðurnar

Chessdom

Augnablik - sæki gögn...

Chess24

Augnablik - sæki gögn...

FIDE

Augnablik - sæki gögn...

Nýjustu færslur

Tenglar

Mót í gangi

Mót sem eru í gangi hverju sinni

Íslandsmótið í skák - Icelandic Open Valsheimilið, 1.-9. júní
Altibox Norway Chess 27. maí - 8. júní: Carlsen og flestir sterkustu skákmenn heims

Lykilvefir

Skáksamband Íslands Heimasíða SÍ
Mótaáætlun SÍ
Vefsvæði Friðriks Ólafssonar Vefsíða tileinkuð Friðriki Ólafssyni
Skákskóli Íslands
Skáksögufélagið
F3-klúbburinn Vildarvinir skákíþróttarinnar á Íslandi
Tímaritið Skák
Fischersetur Selfoss
Skákbækur til sölu
Bobbý skáksverslun
Skákhornið Spjallþráður skákmanna
Skáklandið Stefán Bergsson bloggar
Skákmyndir

Kennsluvefir

Íslensk taflfélög

Ef þú vilt tefla á netinu!

Erlendir skákvefir

FIDE Alþjóðlega skáksambandið
ECU
The Week in Chess
ChessBase
Chess Vibes
Chessdom
Your Chess News Umsjón Jóhann H. Ragnarsson
Bergens Schakklub Besta norræna skákfréttasíðan
Færeyska skáksambandið
Bloggsíða Susan Polgar
ChessCafe Pistlar og greinar

Bloggfærslur mánaðarins, ágúst 2010

Ungu mennirnir láta að sér kveða

Skákstríð við Persaflóa

Kasparov sakaði Íslendinga um svindl

Besti árangurinn í Manila?

Gunnars þáttur Eyjólfssonar

Fjórmenningarnir kvöddu í Moskvu

RSS-straumar

Erlendar vefsíður

Tenglar

Mót í gangi

Lykilvefir

Kennsluvefir

Íslensk taflfélög

Erlendir skákvefir

Almanök

Teflt á netinu

Færsluflokkar

Heimsóknir

Flettingar

Annað

Efni

Leita í þessu bloggi

Skákmót

Mótaáætlun SA (Prufa)

Mótaskráning

Fréttabréf SÍ

Fischer-setur

Auglýsing

Myndaalbúm

Eldri færslur

2018

2017

2016

2015

2014

2013

2012

2011

2010

2009

2008

2007

Innskráning

Innskráning: