Jólamót í Vin á mánudaginn

Skákfélag Vinjar og Hrókurinn halda jólamót í Vin, Hverfisgötu 47 næsta mánudag, 6.des.

Mótið hefst klukkan 13:15 og gott að skrá sig aðeins tímanlega. Verður það með hátíðlegum blæ, boðið er upp á piparkökur, vöfflur og allskyns djúsí! 

Borgarstjóri Reykvíkinga, Jón Gnarr, setur mótið og mun svo leika fyrsta leikinn.

Tefldar verða 6 umferðir með 7 mínútna umhugsunartíma.  

Efstu keppendur fá glænýjar, volgar og ilmandi jólabækur frá bókaútgáfunni SÖGUR að launum auk þess sem þrír heppnir þátttakendur fá bók í happadrætti.

Skákstjórn tekur að sér flugþreyttur og nýlentur - frá Harkany í Ungverjalandi, - varaforseti Hróksins, Róbert Lagerman.

Allir algjörlega velkomnir.

Jón og Unnar efstir á fimmtudagsmóti

 Jón Úlfljótsson og Unnar Þór Bachmann urðu efstir og jafnir á fimmtudagsmóti TR, með 6 vinninga af 7 mögulegum en Jón var hærri á stigum og er því sigurvegari mótsins. Í 3. -4. sæti voru Vignir Vatnar Stefánsson, sem er aðeins 7 ára og Eiríkur Örn Brynjarsson, með 5 vinninga. Vignir Vatnar var einn efstur eftir 4. umferðir og var þá m.a. búinn að leggja Jón Úlfljótsson, en eftir kaffihléið tapaði hann tveimur skákum og missti þar með af að vinna mótið, en það verður gaman að fylgjast með honum í framtíðinni.

Lokastaðan:

 

•  1. Jón Úlfljótsson      6 v.
•  2. Unnar Þór Bachmann    6 v.
•  3.-4. Vignir Vatnar Stefánsson   5 v.
•  3.-4. Eiríkur Örn Brynjarsson     5 v.
•  5.-8. Birkir Karl Sigurðsson        4 v.
•  5.-8. Kristján Sverrisson             4 v.
•  5.-8. Gauti Páll Jónsson              4 v.
•  5.-8. Björgvin Kristbergsson       4 v.
•  9.-10. Kristinn Andri Kristinsson  3,5 v.
•  9.-10. Finnur Kr. Finnsson           3,5 v.
•  11.-14. Stefán Már Pétursson       3 v.
•  11.-14. Óskar Long Einarsson      3 v.
•  11.-14. Eyþór Trausti Jóhannsson 3 v.
•  11.-14. Veronika Steinunn             3 v.
•  15.-16. Ingvar Vignisson               2 v.
•  15.-16. Stefán Gauti                      2 v.
•  17.-18. Eysteinn Högnason            1 v.
•  17.-18. Pétur Jóhannesson             1 v.

Jólaskákmót TR og ÍTR fara fram á sunnudag og mánudag

Jólaskákmót TR og ÍTR í sveitakeppni fer fram 5. og 6. desember nk.   Yngri flokkurinn fer fram sunnudaginn 5. desember og sá eldri 6. desember.  

Keppnisstaður:  Taflfélag Reykjavíkur, Faxafeni 12.

Yngri flokkur (1. - 7. bekkur).

Keppt verður í stúlkna og drengja flokkum. Heimilt er að senda A, B, C o.s.frv. stúlknasveitir og A, B, C o.s.frv. drengjasveitir.  Í hverri sveit eru 4 keppendur og 0-2 til vara.

Keppni í yngri flokki verður sunnudaginn  5. desember kl. 14:00.

Tefldar verða 6 umferðir (hraðmót) eftir Monrad kerfi.

Umhugsunartími: 15 mín. á skák. Þátttökurétt hafa börn úr grunnskólum Reykjavíkur í 1.-7. bekk.  Verðlaunaafhending verður að lokinni keppni.

Keppnisstaður:  Taflfélag Reykjavíkur, Faxafeni 12.

Eldri flokkur (8. - 10. bekkur).

Keppt verður í stúlkna og drengja flokkum. Heimilt er að senda A, B, C o.sfrv. stúlknasveitir og A, B, C o.s.frv. drengjasveitir.  Í hverri sveit eru 4 keppendur og 0-2 til vara.

Keppni í eldri flokki verður mánudaginn 6. desember kl. 17:00.

Tefldar verða 6 umferðir (hraðmót) eftir Monrad kerfi.

Umhugsunartími: 15. mín. á skák. Þátttökurétt hafa unglingar úr grunnskólum Reykjavíkur í 8.-10. bekk. Verðlaunaafhending verður að lokinni keppni.

Þátttaka tilkynnist til skrifstofu Íþrótta- og tómstundasviðs Reykjavíkur eigi síðar en föstudaginn 3. desember.

Skráning sendist á netfang: [e-mail].

 

Snorri vann í lokaumferðinni

FIDE-meistarinn Snorri G. Bergsson (2304) vann Serbann Slavisa Pantelic (2153) í níundu og síðustu umferð Belgrade Trophy sem fram fór ídag.   Jón Árni Halldórsson (2196) gerði jafntefli en Sigurður Ingason (1887) tapaði.

Snorri hlaut 6 vinninga og endaði í 21.-37. sæti, Jón Árni hlaut 5 vinninga og endaði í 56.-90. sæti en Sigurður hlaut 3½ vinning og endaði í  148.-166. sæti. 

Árangur Snorra samsvaraði 2405 skákstigum og hækkar hann um heil 19 stig.  Árangur Sigurðar samsvaraði 2055 skákstigum og hækkar hann um 25 stig.   Árangur Jóns Árna samsvaraði 2177 skákstigum og lækkar hann um 3 stig.  

Sigurvegari mótsins varð stórmeistarinn Dragisa Blagojevic (2482) frá Svartfjallalandi en hann hlaut 7½ vinning.   

285 skákmenn taka þátt í mótinu og þar af 20 stórmeistarar.   Snorri er nr. 45 í stigaröð keppenda, Jón nr. 71 og Sigurður nr. 154.

• Heimasíða mótsins
• Chess-Results

Róbert með jafntefli í næstsíðustu umferð

Róbert Lagerman (2271) gerði jafntefli við austurríkismanninn Bruno Steiner (2230) í áttundu og næstsíðustu umferð Tenkes-mótsins, sem fram fór í dag í Harkany í Ungverjalandi.  Róbert hefur 4½ vinning og er í 17.-27. sæti. 

Í lokaumferðinni, sem fram fer á morgun, teflir Róbert við ungverska FIDE-meistarann Adam Feher Jr. (2348).

Rússneski stórmeistarinn Konstantin Chernyshov (2579) er efstur með 7 vinninga. 

63 skákmenn taka þátt í mótinu og þar af 7 stórmeistarar.  Róbert er nr. 23 í stigaröð keppenda.   Róbert hefur sett myndir frá mótinu og má þær finna í myndaalbúmi.   Fleiri myndir væntanlegar frá Róberti.

• Heimasíða mótsins
• Swiss Master
• Myndaalbúm mótsins

 

 

Tómas Björnsson sigraði í Mosfellsbæ

Skákfélag Vinjar hélt jólamót í samstarfi við Kjósarsýsludeild Rauða kross Íslands í höfuðstöðvum deildarinnar, Þverholti 7 í Mosfellsbæ í dag. Ellefu þátttakendur voru skráðir til leiks og kaffi, vínarbrauð, kakó og piparkökur runnu ofan í liðið sem var í jólafíling.  Tefldar voru sex umferðir með sjö mínútna umhugsunartíma og skákstjórn var í umsjón þátttakenda sem gerði þetta líflegt og skemmtilegt!

Tómas Björnsson, Goðapiltur tók þetta og aðeins Þormar Jónsson náði jafntefli við kappann.   Þrjú efstu fengu glæsilegar og glænýjar jólabækur frá bókaútgáfunni SÖGUR en að Vinjarsið var happadrætti þar sem Ómar Örn Björnsson fær að bjóða með sér út að borða á veitingastaðnum Silfur á Hótel Borg auk þess sem Þormar og Baldur Bragason kræktu sér í jólanammi.  

1. Tómas Björnsson             5,5 af 6

2. Kjartan Guðmundsson      5

3. Elsa María Kristínard.       4

4. Jón Gauti Magnússon        4

5. Þormar Jónsson               3,5    

Inga Birgisdóttir, Hjalti Reynisson og Arnar Valgeirsson voru með þrjá og þeir Jón S. Ólafsson, Ómar Örn, Baldur Bragason og Skotta komu í humátt á eftir.

Námskeið fyrir efnilega skákmenn á landsbyggðinni

Skákskóli Íslands hyggst bjóða efnilegum skákmönnum á landsbyggðinni (utan stór-Reykjavíkursvæðisins), 18 ára og yngri, til námskeiðs í húsnæði skólans dagana 27. - 30. desember n.k.  Kennt verður frá kl.

14 þann 27. desember og til hádegis 30. desember.  Kl. 10-12 og 13-16 aðra daga.

Nemendur greiða allan ferða-og uppihaldskostnað en skólinn greiðir kostnað við mat og veitingar á kennslutíma svo og alla kennslu og námsgögn.

Sækja verður um þátttöku eigi síðar en 15. desember n.k.  Hámarksfjöldi nemenda verður 15.  Skákskólinn áskilur sér rétt til að aflýsa námskeiðinu ef ekki fæst lágmarksþátttaka, 10 nemendur.  Jafnframt áskilur Skákskólinn sér rétt til að velja úr umsóknum miðað við skákstyrkleika ef fjöldi umsækjenda verður óviðráðanlegur.

Umsóknum ber að skila til skrifstofu Skáksambands/Skákskóla í síma 568 9141 (kl. 10-13 virka daga), fax [phone],

netfang:  [e-mail]

Fimmtudagsmót hjá TR í kvöld

Fimmtudagsmót T.R. fer að venju fram í kvöld og hefst kl. 19.30.  Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12, og opnar húsið kl. 19.10.  Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

• Fimmtudagsmótin

Jólamót í Mosfellsbæ fer fram í dag

Skákfélag Vinjar heldur Jólaskákmót í Mosfellsbæ í samstarfi við Kjósarsýsludeild Rauða kross Íslands á fimmtudaginn, 2. des. klukkan 13:30.

Mótið fer fram í höfuðstöðvum þeirra í Þverholti 7.

Tefldar verða 6 umferðir með 7 mínútna umhugsunartíma og mun Hrannar Jónsson, fyrirliði Vinjarliðsins, stýra harðri hendi.

Það verður þvílík jólastemning og boðið upp á kakó og piparkökur, svona meðal annars. Glæsilegir bókavinningar fyrir efstu þátttakendur og happadrætti.

Allir velkomnir og algjörlega frítt.

Íslandsmótið í Víkingaskák fer fram í kvöld

Minningarmótið um Magnús Ólafsson - Íslandsmótið í Víkingaskák 2010 fer fram í húsnæði Vinjar, Hverfisgötu 47 í Reykjavík fimmtudaginn 2 desember kl. 19.00. Tefldar verða 7 umferðir með 15 mínútna umhugsunartíma. Mótið eru öllum opið og það kostar ekkert að vera með. Boðið verður upp á kaffi ásamt léttum veitingum án endurgjalds. Nauðsynlegt er að skrá sig til leiks til að tryggja þátttöku. Þátttakendur eru hvattir til að skrá sig í tölvupósti á netfangið Víkingaklubburinn(hjá)gmail.com eða í síma 8629744 (Gunnar) eða 8629712 (Halldór). Nauðsynlegt er að skrá sig til að tryggja þátttökurétt.

Verðlaun eru sem hér segir:

• 1) Vegleg veðlaun fyrir þrjú efstu sætin
• 2) Þrír efstu unglingarnir (20, ára og yngri).
• 3) Þrjár efstu konurnar.
• 4) Öðlingaverðlaun 40. ára og eldri.
• 5) Öðlingaverðlaun 50. ára og eldri.