Strandbergsmótið - Æskan og ellin fer fram á laugardag

Strandbergsmótið í skák  "Æskan og Ellin", verður haldið í sjöunda sinn,  laugardaginn 13. nóvember  nk. í Strandbergi, safnaðarheimili Hafnarfjarðarkirkju og hefst kl. 13.  Fyrri mót af þessu tagi, þar sem kynslóðirnar mætast, hafa vakið verðskuldaða athygli, verið vel heppnuð  og til mikillar ánægju fyrir alla þátttakendur,  jafnt yngri sem eldri.    

Að mótinu standa auk Hafnarfjarðarkirkju, RIDDARINN, skákklúbbur  eldri borgara,  í samvinnu við  Skákdeild Hauka, Hafnarfirði. Á síðasta ári var 80 árs  aldursmunur milli yngsta og elsta keppandans.

Vegleg peningaverðlaun í öllum flokkum, auk  verðlaunagripa  og  vinningahappdrættis!

100.000  kr.  verðlaunasjóður

• Aðalverðlaun :  25.000;  15.000;  10.000,
• Aldursflokkaverðlaun:  5.000; 3.000, 2.000

Þátttaka á Strandbergsmótum er ókeypis og miðast við börn og ungmenni á grunnskólaaldri, 15 ára og yngri og roskna skákmenn, 60 ára og eldri.

Sigurvegarar undanfarinna móta hafa verið þessir:

2009: Jóhann Örn Sigurjónsson; (2. Dagur Andri Friðgeirsson)

2008 og 2007 : Hjörvar Steinn Grétarsson;

2006: Jónas Þorvaldsson ( 2. Ingvar Ásbjörnsson)

2005: Gunnar Kr. Gunnarsson; 2004 Ingvar Ásumundsson

Strandbergmótið hefst kl. 13 laugardaginn 13. nóvember nk. í Hásölum Strandbergs  og stendur til  kl 17.     Tefldar verða 9 umferðir eftir svissneska kerfinu með 7 mínútna umhugsunartíma á skákina.  

Mótinu lýkur síðan  með veglegu kaffisamsæti  og verðlaunaafhendingu.

Einar S. Einarsson er formaður mótsnefndar og Páll Sigurðsson, skákstjóri.

 

Framsýnarmótið í skák

Framsýnarmótið í skák 2010 verður haldið helgina 12.-14. nóvember nk. í fundarsal stéttarfélagsins Framsýnar að Garðarsbraut 26 Húsavík.  Það er skákfélagið Goðinn í Þingeyjarsýslu og Framsýn-stéttarfélag, sem sjá um mótshaldið.

Mótið er öllum áhugasömum opið, en einungis félagar í Framsýn-stéttarfélagi, öðrum stéttarfélögum í Þingeyjarsýslu eða í skákfélaginu Goðanum geta unnið til verðlauna.  Sérstök verðlaun verða veitt fyrir efsta utanfélagskeppandann.

Dagskrá.

1. umf. föstudaginn 12 nóvember kl 20:00      Tímamörk 25 mín á mann (atskák)
2. umf. föstudaginn 12 nóvember kl 21:00      Tímamörk 25 mín á mann (atskák)
3. umf. föstudaginn 12 nóvember kl 22:00      Tímamörk 25 mín á mann (atskák)

4. umf. laugardaginn 13 nóvember kl 10:00    Tímamörk 90 mín + 30 sek á leik (kappskák)
5. umf. laugardaginn 13 nóvember kl 16:00    Tímamörk 90 mín + 30 sek á leik (kappskák)
6. umf. sunnudaginn 14 nóvember kl 10:00    Tímamörk  90 mín + 30 sek á leik (kappskák)

Verðlaunaafhending í mótslok.

Verðlaun.

Veittir verða glæsilegir eignarbikarar fyrir þrjá efstu í mótinu sem stéttarfélagið Framsýn gefur í tilefni af samvinnu Framsýnar og skákfélagsins Goðans í þingeyjarsýslu.
Einnig verða verðlaun veitt fyrir þrjá efstu í flokki 16 ára og yngri.

Mótið verður reiknað til íslenskra skákstiga og til fide skákstiga.
Ekkert þátttökugjald er í mótið.

Upplýsingar.

Allar nánari upplýsingar um framsýnarskákmótið verða aðgengilegar á heimasíðu skákfélagins Goðans, ásamt skráningu, stöðu, skákir og svo loka-úrslit, verða birt á http://www.godinn.blog.is/  og á http://www.framsyn.is/

Skráning.

Skráning í mótið er hér efst á heimasíðu Goðans á sérstöku skráningarformi. (væntanlegt). Einnig er hægt að skrái sig hjá Hermanni Aðalsteinssyni, formanni skákfélagins Goðans, í síma 4643187 og 8213187 og á [e-mail] 

Listi yfir skráða keppendur er hér:
https://spreadsheets.google.com/ccc?key=0Arg3nCphWhFydHJESWwwTlh5bTljTHFMaG5EV3llOGc&hl=en&authkey=CIS7g8oE#gid=0
Svo er hægt að skrá sig til keppni á skrifstofu Framsýnar-stéttarfélags Garðarsbraut 26 Húsavík.

Atskákmót öðlinga hefst 17. nóvember

Atskákmót öðlinga, 40 ára og eldri, hefst miðvikudaginn 17. nóvember kl. 19:30 í félagsheimili T.R. að Faxafeni 12.   Tefldar verða 9 umferðir eftir svissneska kerfinu, þrjár skákir á kvöldi með umhugsunartímanum 25 mínútum á skák.

Mótinu er svo framhaldið miðvikudagana 24. nóv og 1. des á sama tíma.

Veitt eru verðlaun fyrir þrjú efstu sætin.

Þátttökugjald er kr. 2.000 (ljúffengt kaffi innifalið).

Núverandi atskákmeistari er Þorsteinn Þorsteinsson.

Skráningarform á heimasíðu TR.

Gunnar og Jón efstir á hraðkvöldi

Gunnar Björnsson og Jón Úlfljótsson urðu efstir og jafnir á hraðkvöldi Hellis sem fram fór í kvöld.   Gunnar hafði svo betur eftir stigaútreikning.    Gunnar klikkaði strax í 2. umferð er hann missti niður jafntefli  gegn Páli Andrasyni en vann næstu skákir og hafði ½ vinnings forskot á Pál Sigurðsson fyrir lokaumferðina.  Páll lagði allt undir gegn Elsu Maríu og tapaði en á sama tíma lagði Jón Gunnar og jafnaði hann að vinningum en Gunnar hafði betur eftir tvöfaldan stigaútreikning.

Lokastaðan:

 

Place	Name	Vinn.	Buch,	Buch,
1-2	Gunnar Björnsson	5,5	23,0	32,5
	Jón Úlfljótsson	5,5	23,0	31,5
3-6	Páll Sigurðsson	5	23,5	32,0
	Páll Andrason	5	22,5	30,0
	Elsa María Kristínardóttir	5	21,0	27,0
	Brynjar Guðlaugsson	5	19,0	25,0
7-10	Vigfús Ó Vigfússon	4	19,5	27,0
	Jóhanna Björg Jóhannsdótti	4	17,5	25,0
	Örn Stefánsson	4	17,0	22,5
	Kristinn Andri Kristinsso	4	16,0	22,0
11-13	Baldur Teodor Petersson	3	19,0	26,5
	Björgvin Kristbergsson	3	14,5	19,0
	Sóley Lind Pálsdóttir	3	14,0	19,5
14-16	Finnur Kr Finnsson	2	18,0	23,5
	Andri Hrafn Haraldsson	2	15,5	21,0
	Erlingur Atli Pálmarsson	2	14,5	19,0
17-18	Fannar Páll Vilhjálmsson	0,5	14,0	19,5
	Gísli Örn Grímsson	0,5	14,0	18,5

 

 

Tal Memorial: Öllum skákum 4. umferðar lauk með jafntefli

Öllum skákum fjórðu umferðar Tal Memorial, sem fram fór í dag, lauk með jafntefli.   Aronian er því sem fyrr efstur.

Úrslit 4. umferðar:

 

Gelfand

Grischuk

½-½

Karjakin

Shirov

½-½

Mamedyarov

Aronian

½-½

Nakamura

Kramnik

½-½

Wang Hao

Eljanov

½-½

 
Staðan:

 

• 1. Aronian (2801) 3 v.
• 2.-6. Karjakin (2760), Wang Hao (2727), Mamedyarov (2763), Nakamura (2741) og Grischuk (2771) 2½ v.
• 7. Kramnik (2791) 2 v.
• 8. Gelfand (2741) 1½ v.
• 9.-10. Eljanov(2742) og Shirov (2735) ½ v.

• Heimasíða mótsins
• Beinar útsendingar

 

Skákþing Garðabæjar - TG flutt í nýtt húsnæði

Taflfélag Garðabæjar er komið í nýtt húsnæði fyrir starfsemi sína og er að flytja í gamla Betrunarhúsið sem er á 2 hæð á hinu torginu, Garðatorgi 1.

Þar mun Skákþing Garðabæjar hefjast þann 19. nóvember næstkomandi.

Dagskrá

• 1. umf. föstudaginn 19. nóv kl 19:00
• 2. umf. þriðjudaginn 23. nóv. kl. 19.30
• 3. umf. föstudaginn 3. desember. kl. 19.00
• 4. umf. miðvikudaginn 8. desember kl. 19:00
• 5. umf. föstudaginn 10. desember kl. 19.00
• 6. umf. miðvikudaginn 15. desember kl. 19.00.
• 7. umf. föstudaginn 17. desember kl. 19.00.

Hraðskákmót Garðabæjar og verðlaunaafhending fyrir Skákþingið þriðjudaginn 28. desember kl. 19.30.

Verðlaun og þátttökugjöld auglýst síðar.

Æfingar verða frá kl. 20. á fimmtudögum. (auglýst sérstaklega síðar)

Hraðkvöld hjá Helli í kvöld

Taflfélagið Hellir heldur hraðkvöld mánudaginn 8. nóvember og hefst mótið kl. 20:00. Tefldar verða 7 umferðir með sjö mínútna umhugsunartíma.  Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþáttur Morgunblaðsins: Magnús Carlsen nær sér á strik í Kína

Norska sveitin vakti ekki litla athygli þegar hún hóf þátttöku í opna flokknum á Ólympíumótinu í Khanty Manyisk. Fyrir því lágu gildar ástæður því að sveitin hafði innan sinna vébanda stigahæsta skákmann heims, Magnús Carlsen og hinn harðvítuga stórmeistara Jon Ludwig Hammer. Þjálfari og liðsstjóri var heldur ekki af verri endanum, danski stórmeistarinn Peter Heine Nielsen, sem verið hefur aðalhjálparkokkur heimsmeistarans Anands hin síðari ár.

 

En þegar upp var staðið hafnaði sveit Norðmanna í 51. sæti með 12 stig og var sú frammistaða talsvert undir væntingum. Sumir vildu skella skuldinni á Magnús Carlsen sem fékk 4 ½ v. af átta mögulegum og tapaði 15 elo-stigum. Það er hins vegar gömul saga og ný að til þess að ná árangri í flokkakeppni þurfa einstaklingarnir að ná saman sem lið. Vissulega kann það að hafa verið dálítið erfitt fyrir Magnús að tefla á þessu móti en það voru nú samt svokölluð lúxus-vandamál sem hrjáðu hann. Hann hefur verið að markaðssetja sig sem skákmann nr. 1 í heiminum og hafði skömmu fyrir mótið hleypt af stokkunum hvorki meira né minna en heilli tískulínu og er þessa dagana andlit tískunnar frá RAW á móti bandarísku leikkonunni Liv Tyler. Magnús tapaði þrem skákum í Khanty Manyisk og virtist alls ekki búinn að ná sér á strik þegar næsta verkefni hófst, fjögurra manna stórmótið í Bilbao á Spáni. Þar tapaði hann strax fyrir Anand og Kramnik en lagaði stöðuna örlítið undir lokin og endaði í þriðja sæti. Stríðsgæfan virðist gengin í lið með honum að nýju því að á stórmóti sem stendur yfir þessa dagana í Nanjing í Kína hefur hann tryggt sér sigur. Þar tefla sex skákmenn, þ.ám. heimsmeistarinn Anand sem verður væntanlega efstur á nóvemberlista FIDE. Þegar aðeins er ein umferð eftir er staðan þessi:

1. Carlsen 6 ½ v. ( af 9) 2. - 3. Bacrot og Anand 5 v. 4. Gashimov 4v. 5. Topalov 3 ½ v. 6. Wang Yue 3 v.

Margt hefur verið rætt og ritað um samstarf Magnúsar og Kasparovs en heldur virðist hafa dregið úr því undanfarið. Kasparov var allan sinn feril afar gefandi skákmaður og dró á eftir sér herskara skákmanna sem töldu að allt það besta kæmi frá honum. Skoski leikurinn er einn ávöxtur samstarfs þeirra. Magnús virtist hreinlega ekkert hafa fyrir því að sigra besta Frakkann í fyrstu umferð, Etienne Bacrot:

Nanjing - Pearl Spring 2010:

Magnús Carlsen - Etienne Bacrot

Skoskur leikur

1. e4 e5 2. Rf3 Rc6 3. d4 exd4 4. Rxd4 Bc5 5. Rb3

Kasparov var vanur að leika 5. Rxc6.

5. .. Bb6 6. Rc3 Rf6 7. De2 O-O 8. Bg5 h6 9. Bh4 a5 10. a4 Rd4 11. Dd3 Rxb3 12. cxb3 He8 13. O-O-O

Áætlun hvíts í byrjun tafls sem er furðu einföld hefur gengið upp. Leppunin á f6 veldur svarti miklum erfiðleikum.

13. ... d6 14. Dc2 Bd7 15. Bc4 Be6 16. Hhe1 De7 17. e5 dxe5 18. Hxe5 Df8 19. Bxf6 gxf6 20. He2 Dg7 21. Bxe6 Hxe6 22. Hxe6 fxe6 23. Hd3 Kh8 24. Hg3 Dh7 25. Dd2!

Hótar 25. Hh3 Kg7 27. Dd7+ o.s.frv.

25. ... Bc5 26. Re4 Be7 27. Hh3 Kg7 28. Dd7 Kf7

29. Rg5+! fxg5 30. Hf3+ Kg8 31. Dxe6 Kh8 32. Hf7 Bd6 33. Hxh7+ Kxh7 34. Df7+ Kh8 35. g3!

Jafnvel í gjörunnum stöðu þarf að hitta á bestu áætlunina. Framrás f- peðsins gerir út um taflið.

35. ... Ha6 36. Kb1 Bb4 37. f4 gxf4 38. gxf4

- og Bacrot gafst upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 31. október 2010.

Skákþættir Morgunblaðsins

Áskell sigraði á Hausthraðskákmóti SA

Hausthraðskákmót Skákfélags Akureyrar fór fram í dag. Teflt er um meistaratitil félagsins í hraðskák. Rúnar Sigurpálsson hefur oftast sigrað á mótinu eða sjö sinnum.  Ólafur Kristjánsson sigraði á mótinu í fyrra eftir að hafa teflt einvígi við Gylfa Þórhallsson, en þeir enduðu jafnir og efstir með 12½ vinning.

Tíu skákmenn mættu til leiks í dag og tefldu tvöfalda umferð, allir við alla. Áskell Örn Kárason sigraði nokkuð örugglega að þessu sinni, en hann endaði með 15 vinninga af 18 mögulegum. Eftir óvísindalega rannsókn kom í ljós að þetta er í fyrsta skipti sem Áskell sigrar á Hausthraðskákmótinu. Sigurður Arnarson var í öðru sæti með 12½ vinning og Tómas Veigar var þriðji með 11½ vinning.

Heimasíða SA

Aronian efstur á minningarmóti um Tal

Armeninn Levon Aronian (2801) er efstur á minningarmóti um Tal að lokinni þriðju umferð sem fram fór í dag.   Aronain vann Gelfand (2741) í dag.  Fimm keppendur hafa 2 vinninga sem er athyglisvert en Eljanov (2742) og Shirov (2735) eru ekki enn komnir á blað.

Úrslit 2. og 3. umferðar:

Wang Hao	- Aronian, Levon	½-½
Mamedyarov, Shakhriyar	- Karjakin, Sergey	½-½
Nakamura, Hikaru	- Eljanov, Pavel	1-0
Kramnik, Vladimir	- Grischuk, Alexander	½-½
Gelfand, Boris	- Shirov, Alexei	1-0
Aronian, Levon	- Gelfand, Boris	1-0
Karjakin, Sergey	- Nakamura, Hikaru	½-½
Grischuk, Alexander	- Wang Hao	½-½
Eljanov, Pavel	- Kramnik, Vladimir	0-1
Shirov, Alexei	- Mamedyarov, Shakhriyar	0-1

• 1. Aronian (2801) 2½ v.
• 2.-6. Karjakin (2760), Wang Hao (2727), Mamedyarov (2763), Nakamura (2741) og Grischuk (2771) 2 v.
• 7. Kramnik (2791) 1½ v.
• 8. Gelfand (2741) 1 v.
• 9.-10. Eljanov(2742) og Shirov (2735) 0 v.

• Heimasíða mótsins
• Beinar útsendingar