Pistill Guðmundar Kjartanssonar

Guðmundur Kjartansson hefur birt pistil á heimasíðu TR um skáksumarið 2009 þar sem hann segir frá mótinu í Búdapest þar sem hann náði sínum lokaáfanga að alþjóðlegum meistaratitli.

Heimasíða TR

Skákhátíð í Árneshreppi hefst í dag

Skákhátíð í Árneshreppi hefst í dag og eru veðurguðir í sólskinsskapi af því tilefni. Von er á mörgum góðum gestum á öllum aldri, stórmeisturum sem byrjendum, sem munu etja kappi við vaska sveit heimamanna.

Hátíðin verður sett í gömlu síldarverksmiðjunni í Djúpavík klukkan 20 í kvöld, föstudag. Teflt verður í glæsilegum og óvenjulegum skáksal, sem forðum var mjölgeymsla í stærstu verksmiðju á Íslandi. Eftir setningarathöfn verður slegið upp tvískákmóti, þar sem tveir eru saman í liði.

Á morgun, laugardag klukkan 12, hefst Minningarmót Guðmundar Jónssonar frá Stóru-Ávík. Guðmundur, sem lést í apríl, var mikill skákáhugamaður og lét sig aldrei vanta á skákþingum. Meðal keppenda á mótinu verða fjórir stórmeistarar, þeir Jóhann Hjartarson, Helgi Ólafsson, Henrik Danielsen og Þröstur Þórhallsson.

Mótið er öllum opið og þátttaka er ókeypis. Tefldar verða 9 umferðir með 10 mínútna umhugsunartíma.

Til mikils er að vinna og verðlaun glæsileg. Sigurvegarinn hlýtur 50 þúsund krónur og skúlptúr eftir Guðjón Kristinsson frá Dröngum. Meðal annarra vinninga er listaverk úr rekaviði eftir Valgeir Benediktsson í Árnesi, margskonar handverk og hannyrðir eftir íbúa í Árneshreppi, sigling á Hornstrandir, gisting í Hótel Djúpavík og gistiheimilum Árneshrepps og lambalæri frá Melum.

Þá eru vinningar frá Forlaginu, Henson, Skugga, 66° Norður, Kaupfélagi Steingrímsfjarðar, Ungmennafélaginu Leifi heppna og Jóhanna Travel, sem leggur til arabískar slæður og sjöl. Sérstök verðlaun eru fyrir bestan árangur barna, heimamanna og stigalausra. Síðast en ekki síst verða best klæddu keppendurnir verðlaunaðir, auk þess sem veitt eru sérstök háttvísisverðlaun.

Á sunnudaginn klukkan 13 verður svo hraðskákmót í Kaffi Norðurfirði. Tefldar verða 6 umferðir með 5 mínútna umhugsunartíma.

Þetta er annað árið í röð sem skákhátíð er haldin í Árneshreppi.

Allir eru hjartanlega velkomnir!

Nánari upplýsingar á www.skakhatid.blog.is.

Bókagjöf til TV

Nýlega færði Ólafur Hermannsson, fyrrum formaður TV (1979-82), Taflfélaginu skákbókasafn sitt að gjöf. Safnið inniheldur 57 skákbækur og 25 árganga af Tímaritinu Skák.  Formaður félagsins, Karl Gauti Hjaltason, tók við gjöfinni, og tók undir óskir Ólafs um að bækurnar yrðu notaðar við kennslu og störf félagsins.

Ólafur safnaði að eigin sögn þessum bókum á sl. 30 árum. Meðal annars pantaði hann flestar þeirra frá útgáfufélaginu Bastford í gegnum Mál og Menningu og sagði hann okkur að stundum hafi þær verið marga mánuði á leiðinni í póstkröfu. Í safninu má m.a. finna bestu skákir Fischers (The Games of Robert J. Fischer) frá 1972,  bestu skákir Tals (Complete Games of Michael Tal 1936-1959), allnokkrar bækur um skákbyrjanir, allar skákbækur sem þýddar voru á íslensku, átta árganga af Informator og fleira og fleira.

Fjórir stórmeistar á Minningarmóti Guðmundar í Djúpavík

Fjórir stórmeistarar hafa boðað komu sína á Minningarmót Guðmundar Jónssonar, sem haldið verður í Djúpavík í Árneshreppi á laugardaginn, 20. júní. Þetta eru Helgi Ólafsson, Jóhann Hjartarson, Þröstur Þórhallsson og Henrik Danielsen. Mótið er öllum opið og þátttaka ókeypis, og eru margir skráðir til leiks.
 
Skákhátíð í Árneshreppi er haldin frá föstudegi til sunnudags, 19. til 21. júní, og er allar upplýsingar að finna á www.skakhatid.blog.is.
 
Af öðrum keppendum má nefna Guðfríði Lilju Grétarsdóttur, Gylfa Þórhallsson, Björn Þorfinnsson, Gunnar Björnsson, Árna Ármann Árnason, Elvar Guðmundsson, Braga Halldórsson, Arngrím Gunnhallsson, Magnús Gíslason, Pétur Atla Lárusson, Gísla Gunnlaugsson, Jorge Foseca, Vigfús Vigfússon, Daða Guðmundsson, Jóhann Ó. Bjarnason, Sverri Unnarsson Gunnar Nikulásson, Andra og Atla Thorstensen, Sögu Kjartansdóttur og fleiri félaga úr kvennaklúbbnum ÓSK, og fleiri.
 
Þá verður heimavarnarlið Strandamanna vel skipað. Björn Torfason á Melum á tvo titla að verja frá síðasta ári, þegar hann varð efstur heimamanna og stigalausra skákmanna. Ingólfur Benediktsson í Árnesi hreppti silfrið í báðum flokkum. Þeim verður veitt hörð keppni, meðal annars af Gunnari í Bæ, Guðmundi á Finnbogastöðum og fleiri harðsnúnum Strandamönnum.
Börn og unglingar eru sérstaklega boðin velkomin á mótið og má búast við að unga kynslóðin setji skemmtilegan svip á mótið.
 
Keppendur eru beðnir að skrá sig sem allra fyrst, hjá Róbert ([e-mail]) eða Hrafni ([e-mail]), sem einnig hjálpa við að finna gistingu fyrir gesti.

Fyrir þá sem ekki hafa komið í Árneshrepp er rétt að taka fram að vegurinn norður er greiðfær öllum tegundum bifreiða. Síðasta spölinn er ekið eftir Strandavegi (nr. 643) sem er sallafínn malarvegur.
 
Skákhátíðin í Árneshreppi hefst í Djúpavík á föstudagskvöldið klukkan 20 og í kjölfarið verður slegið upp tvískákarmóti með tilheyrandi fjöri.
 
Minningarmót Guðmundar Jónssonar hefst svo á slaginu klukkan 12 á laugardaginn og lýkur um klukkan 17 með glæsilegri verðlaunaafhendingu.
 
Á sunnudaginn klukkan 13 verður svo slegið upp hraðskákmóti í Kaffi Norðurfirði.
Það stefnir í skemmtilega helgi á Ströndum!

Vigfús nýr formaður Hellis

Vigfús Ó. Vigfússon var kjörinn formaður Taflfélagsins Hellis á aðalfundi félagsins í gær.  Gunnar Björnsson sem hefur verið formaður síðan 2005 lét af störfum.  

Á fundinum var einnig kjörin ný stjórn.  Hana skipa auk Vigfúsar þau Andri Áss Grétarsson, Davíð Ólafsson, Edda Sveinsdóttir, Omar Salama, Paul Frigge, Rúnar Berg, Sigurbjörn Björnsson og Þorsteinn Hilmarsson.

Ævisaga Sverris Norðfjörð - sýning í dag í Grófinni

Þann 17. júní næstkomandi heldur Óttar M. Norðfjörð sýningu á klippilistaverkum sem hann vann fyrir bók sína, Arkitektinn með alpahúfuna. Um er að ræða ævisögu Sverris Norðfjörð, föður Óttars, sem lést 17. júní í fyrra, 67 ára að aldri.

Ævisagan er unnin upp úr dánarbúi Sverris, svo sem ljósmyndum, bréfum og teikningum, auk ýmislegs annars. Hver opna í bókinni er sjálfstætt klippilistaverk sem sýnir brot úr lífi Sverris, en á sýningunni verða nokkrar vel valdar opnur úr bókinni til sýnis, ásamt bókinni sjálfri, en aðeins 18 eintök voru prentuð af henni.

Sýningin er haldin í Grófinni 1 í miðbæ Reykjavíkur (beint á móti Borgarbókasafninu) og stendur frá klukkan 15-18 aðeins þennan eina dag. Það er rithöfundaforlagið Nýhil sem gefur ævisöguna út. Hún er 285 síður á lengd og verður ekki til sölu.

Í fréttinni má sjá bókakápuna og eina opnu úr bókinni. Þeir sem hafa aðgang að Facebook geta nálgast fleiri opnur á eftirfarandi slóð:

http://www.facebook.com/profile.php?cropsuccess&id=687241185#/album.php?aid=102057&id=687241185

Guðmundur náði lokaáfanganum að alþjóðlegum meistaratitli!

FIDE-meistarinn Guðmundur Kjartansson sigraði austurríska skákmanninn Florian Potz (2231) í tíundu umferð AM-flokks First Saturday-mótsins, sem fram fór í dag.  Guðmundur hlaut 7½ vinning í 10 skákum og er kominn með 3 áfanga að alþjóðlegum meistaratitli.  Nú vantar Guðmundi aðeins það að ná 2400 skákstigum til að verða útnefndur.  Guðmundur hækkar um 12 fyrir frammistöðu sína mótinu.  

Ritstjóri óskar Guðmundi til hamingju með árangurinn!

Í AM-flokknum, sem Guðmundur tefldi í, tóku 6 skákmenn þátt og tefld var  tvöföld umferð.   Meðalstig voru 2281 skákstig og til að ná áfanga þurfti 7,5 vinning í 10 skákum.

Heimasíða mótsins

Aðalfundur Hellis fer fram í kvöld

Aðalfundur Hellis fer fram þriðjudaginn 16. júní nk. og hefst kl. 18.  Fyrir liggur að Gunnar Björnsson, formaður félagsins, 1991-95 og frá 2004 mun láta af formennsku. 

Félagið hvetur félagsmenn til að fjölmenna.

Guðmundur gerði jafntefli í níundu umferð

FIDE-meistarinn Guðmundur Kjartansson (2388) gerði jafntefli við ungverska alþjóðlega meistarann Pal Petran (2361) í níundu og næstsíðustu umferð AM-flokks First Saturday-mótsins sem fram fór í kvöld í Búdapest.  Guðmundur hefur 6½ vinning og þarf sigur í lokaumferðinni, sem fram fer á morgun, til að tryggja sér lokaáfangann að alþjóðlegum meistaratitli en þá teflir hann við austurríska skákmanninn Florian Potz (2231).

Í AM-flokknum, sem Guðmundur teflir í, taka 6 skákmenn þátt og tefld er tvöföld umferð.   Meðalstig eru 2281 skákstig og til að ná áfanga þarf 7,5 vinning í 10 skákum.

Heimasíða mótsins

Ódýrt gistipláss, góð veðurspá og best klæddu keppendurnir...

Búið er að panta mest allt gistirými í Árneshreppi um helgina, svo gestir skákhátíðarinnar ættu að bregðast við skjótt, eigi þeir eftir að tryggja sér gistingu.
 
Tvö herbergi eru enn laus á Hótel Djúpavík (sími 4514037) en nóg pláss er í svefnpokagistingu í húsi Ferðafélags Íslands í Norðurfirði.
 
Gestir á skákhátíð þurfa aðeins að greiða 2500 krónur fyrir nóttina í Norðurfirði. Aðstaðan er mjög góð, umhverfið fagurt og örstutt í verslun og kaffihús. Hafið samband við Laugu í Norðurfirði í síma 4514017 -- sem fyrst!
Skráningum á mótið fjölgar stöðugt og má búast við a.m.k. 40-50 keppendum í afskekktustu (og fegurstu) sveit landsins.
Veðurspáin er góð.
Keppendur á Minningarmóti Guðmundar Jónssonar á laugardaginn ættu að hafa í huga að dómnefnd velur best klæddu keppendurna, karl og konu (eða strák og stelpu), sem fá sérstök verðlaun. Bryddað var upp á þessari skemmtilegu nýbreytni á síðasta ári.
 
Þá var Guðfríður Lilja Grétarsdóttir valin best klæddi keppandinn, enda í þjóðlegum og fallegum fatnaði, sem hentaði vel til taflmennsku í gömlu síldarverksmiðjunni.
Skráning og upplýsingar hjá Róbert Lagerman (sími 6969658, [e-mail]) og Hrafni Jökulssyni (4514026 og [e-mail]).