Páll efstur á Skákþingi Garðabæjar

Önnur umferð Skákþings Garðabæjar fór fram í fyrrakvöld og voru 8 skákir tefldar. Páll Sigurðsson vann Jón Eggert Hallsson örugglega og færðist við það einn í efsta sæti, en Ingvar Egill Vignisson heldur áfram að gera góða hluti og gerði nú jafntefli við Birki Karl Sigurðsson. Baldur Möller gerði engin mistök þegar hann rúllaði yfir Alec Sigurðarson.

Jón Magnússon fékk miklu betri stöðu upp úr byrjuninni en gerði svo sitt besta til að tapa stöðunni, en Þorsteinn Magnússon gerði síðustu misstökin og sigur lenti því hjá Jóni. Jón Þór Lemery vann Sigurð Frey Jónatansson örugglega. Birgir Ísak Jóhannsson vann Bjarnstein Þórsson en þessir ungu menn eru orðnir gríðarlega sterkir.

Loftur Baldvinsson vann nokkuð örugglega eftir að Bjarki Freyr Bjarnason tefldi vel framan af.
Stefán Daníel Jónsson vann svo seiglusigur gegn Hjálmari Sigurvaldasyni eftir að Hjálmar missti af vænlegri vinningsleið.

Alls tefla 6 TG-ingar í mótinu, Baldur, Páll, Jón Magg, Bjarnsteinn, Bjarki Freyr og Stefán Daníel. Fjórir vinningar komu í hús í 1 umferð annarsvegar og svo í annarri umferð hinsvegar. 

Allar skákir á pdf formi auk allra úrslita og stöðu má finna á Chess-Results.

Þetta er í 35. sinn sem mótið er haldið og við reynum að hafa skákir í beinni útsendingu úr hverri umferð. 1 skák var send út beint í fyrstu umferð en 2 í þeirri annarri.

Í 3. umferð keppa meðal annars saman þeir Baldur og Páll.