NM stúlkna: 3. og 4. umferð

Þriðja og fjórða umferð Norðurlandamóts stúlkna í Noregi fóru fram í dag. Í B-flokki gerðu Nansý Davíðsdóttir og Svava Þorsteinsdóttir báðar jafntefli í fyrri umferð dagsins. Nansý gerði jafntefli við helsta keppinaut sinn í flokknum, Ingrid Greibrokk frá Noregi. Svava gerði jafntefli gegn Elisabeth Johansson frá Svíþjóð. Í C-flokki vann Freyja Birkisdóttir góðan baráttusigur gegn Elisabet Hollmerus frá Finnlandi. Batel Goitom Haile tapaði gegn Mikala Hoyerup frá Dannmörku.

4. umferðin fór fram seinni partinn. Nansý vann glæsilegan sigur gegn áðurnefndri Elisabeth Johansson. Skákin vakti athygli skákskýrenda á staðnum og þeir fengu undirritaðan til þess að skýra hana í beinni útsendingu. Svava lenti snemma í vandræðum gegn Sara Næss, frá Noregi, og tapaði. Í C-flokki töpuðu bæði Freyja og Batel í erfiðum skákum.

Lokaumferðin hefst kl. 8:30 (6:30 að íslenskum tíma) á morgun, sunnudag. Nansý og Svava mætast innbyrðis. Nansý er í 2. sæti fyrir umferðina og þarf að vinna til að eiga möguleika á sigri í flokknum. Batel hefur hvítt gegn finnskri stúlku, Aurora Lappi, og Freyja hefur hvítt gegn hinni sænsku Agnesi Ng.

Að lokinni umferð á morgun er skemmtileg dagskrá sem Norðmennirnir bjóða upp á. Mér skilst að við séum á leiðinni í einhvers konar ferðalag á vélsleðum með viðkomu í tjaldi, þar sem bjóða á upp á þjóðarrétt svæðisins.

Bestu kveðjur frá Alta.

- Björn Ívar Karlsson