Taflfélag Reykjavíkur hraðskákmeistari taflfélaga

 

Taflfélag Reykjavíkur sigraði á Hraðskákkeppni taflfélaga sem lauk í gærkveldi. TR vann Skákfélagið Huginn 38-34. Þrátt fyrir að lokatölur væru tiltölulega jafnar var sigur TR öruggur. Félagið náði forystunni strax í annarri umferð og hélt henni til loka.

 

Björn Þorfinnsson var bestur í jöfnu liði TR en hann hlaut 9 vinninga. Hannes Hlífar Stefánsson hlaut 8½ vinning og Arnar Gunnarsson 7 vinninga.

Hjörvar Steinn Grétarsson var bestur Huginsmanna með 8½ vinning, Stefán Kristjánsson hlaut 7½ vinning og Þröstur Þórhallsson 7 vinninga.

Nánari úrslit má nálgast á Chess-Results.

Þetta er í 20. skipti sem þessi keppni fer fram en Huginn hélt mótið nú og Hellir í 19 skipti þar á undan. Þetta er áttundi sigur TR en félagið hefur ekki unnið keppnina síðan fyrir hrun eða árið 2008.  Hellir vann keppnina 7 vinniningum og Bolvíkingar hafa hampað dollunni tvisvar. Skákfélag Hafnarfjarðar, Skákfélagið Hrókurinn, Víkingaklúbburinn og Goðinn-Mátar hafa unnið einu sinni hvert félag.