Úrslitin í Evrópukeppni landsliða í bréfskák hafin

Úrslitakeppni Evrópumóts landsliða í bréfskák er nýhafin, en þar er íslenska liðið meðal keppenda eftir góðan árangur í undanúrslitunum. Þrettán lið tefla um titilinn, átta skákmenn í hverju liði. Hver skákmaður mun því tefla 12 skákir. Eftirtalin lönd taka þátt: Austurríki, England, Holland, Ísland, Ísrael, Ítalía, Litháen, Rússland, Slóvakía, Slóvenía, Svíþjóð, Úkraína og Þýskaland.

Íslenska landliðið er þétt skipað og til gamans má nefna að þetta er sterkasta bréfskáklandslið sem Ísland hefur stillt upp með frá upphafi enda til mikils að vinna:

1. Daði Örn Jónsson                           2531
2. Jón Árni Halldórsson                      2482
3. Jón Adólf Pálsson                           2459
4. Árni H. Kristjánsson                       2451
5. Þorsteinn Þorsteinsson                  2438
6. Eggert Ísólfsson                             2416
7. Áskell Örn Kárason                        2410
8. Jónas Jónasson                               2401

Þýska liðið er sterkast á pappírnum og eru meðalstig þeirra 2588, þar á eftir koma Ítalir með 2574 meðalstig og Rússar með 2526 meðalstig. Íslenska liðið er með 2448 meðalstig.

Að jafnaði lækka meðalstig innan við 25 stig á milli borða í mótinu. Það hefur í för með sér að hægt er að ná stórmeistaraáfanga á öllum borðum. Þá má geta þess að hvorki fleiri né færri en fimm heimsmeistarar taka þátt í úrslitakeppninni.

Hægt er að fylgjast með gangi mála á slóðinni:  http://www.iccf-webchess.com/event?id=44123