Björn Hólm sigraði á Skákmóti Árnamessu 2014. Rúmlega sjötíu börn og unglingar tefldu á skákmótum í Stykkishólmi

 

 

Skákdeild Fjölnis stóð fyrir tveimur öflugum skákmótum í Stykkishólmi fyrir börn og unglinga helgina 29. - 30. mars. Skákmót Árnamessu var haldið í 5. sinn í grunnskólanum  og að þessu sinni var haldið annað tveggja daga boðsmót í Lionshúsinu fyrir 10 bestu skákdrengi og skákstúlkur landsins, 20 ára og yngri.

Gunnar Svanlaugsson skólastjóri í Stykkishólmi var heiðursgestur mótsins og ávarpaði hann þátttakendur í upphafi móts. Gunnar fagnaði því frumkvæði mótshaldara að efna til svo glæsilegs viðburðar í Hólminum og minntist Árna Helgasonar bindindisfrömuðar sem mótið er kennt við. Skólastjórinn lék 1. leik mótsins fyrir Valgerði Jóhannesdóttur Rimaskóla en hún og skólasystur hennar eru Íslandsmeistarar grunnskóla í stúlknaflokki.

 

 

Tefldar voru sjö umferðir og varð Björn Hólm Birkisson í TR sigurvegari mótsins með 6,5 vinninga af 7 mögulegum. Hann reyndist taplaus á þessu spennandi og hnífjafna móti, vann sex skákir og gerði aðeins jafntefli við Nansý Davíðsdóttur Fjölni, í lokaumferðinni. Nansý tapaði ekki heldur skák, vann 5 skákir og gerði tvö jafntefli. Hún sigraði stúlknaflokkinn.

 

 

Í yngri flokk sigraði Mykhaylo Kravchuk TR með sex vinninga og efstur Snæfellinga varð Hólmarinn Benjamín Ómar Kristjánsson. Aðrir í efstu sætum voru þau Bárður Örn Birkisson TR, Sæmundur Árnason Fjölni, Óskar Víkingur Davíðsson GM Helli, Joshua Davíðsson Fjölni, Sóley Lind Pálsdóttir TG, Mikael Maron Torfason Fjölni, Jón Hreiðar Rúnarsson Víkingaklúbbnum og Balthasar Máni Wedholm TM Helli, öll með 5 vinninga eða meira.

 

 

Í spurningakeppni skákfélaga sem haldin var í skákhléi var það lið TR sem hafði öruggan sigur og voru þar gáfnaljósin Þorsteinn Magnússon, Bárður Örn Birkisson og Mykhaylo Kravchuk sem skipuðu spurningaliðið.

Eins og áður segir var mikið fjölmenni á Árnamessuskákmóti og kom fullsetin 67 manna rúta með keppendur og foreldra úr Reykjavík. Í lok mótsins var mikil verðlaunahátíð og fengu 40 þátttakendur verðlaun fyrir góða frammistöðu. Flestir þátttakendur komu frá Fjölni alls 19 skákkrakkar. Helgi Ólafsson stórmeistari hafði dvalið tvo daga á undan í Hólminum og kennt krökkunum í grunnskólanum skák. Í framhaldinu skráðu 15 Hólmarar sig til leiks. Um tugur skákkrakka komu svo frá Taflfélagi Reykjavíkur.

Helgi Árnason formaður Skákdeildar Fjölnis í Grafarvogi stjórnaði skákmótinu og hafði Pál Sigurðsson formann Taflfélags Garðabæjar sér til halds og trausts við framkvæmdina sem þótti takast einstaklega vel. Sannkölluðu skákævintýri lauk eins og það byrjaði með mikilli gleði og áhuga.

Sjá úrslit á Chess-Results.