Hverfakeppni SA: Brekkusniglar skriðu framúr og sigruðu.

Í hinni árlegu hverfakeppni SA sem fram fór í gærkvöldi áttust við tvö lið; annarsvegar skipað þeim sem búa á Brekkunni og í Innbænum (suðurhluta bæjarins) og hinsvegar Þorpurum og Eyrarpúkum, auk nokkurra vaskra félaga sem eiga lögheimili utan þessara bæjarhluta. Liðssöfnun tókst vel og var teflt á 15 borðum. Fyrst var tefld ein 15 mínútna skák og urðu úrslit þessi (sunnanmenn taldir á undan):

• Rúnar Sigurpálsson-Ólafur Kristjánsson       1-0
• Áskell Örn Kárason-Sigurður Arnarson         1-0
• Smári Rafn Teitsson-Sigurður Eiríksson       1-0
• Jón Kristinn Þorgeirsson-Smári Ólafsson      0-1
• Sveinbjörn Sigurðsson-Hjörleifur Halldórsson 0-1
• Haki Jóhannesson-Rúnar Ísleifsson            0-1
• Atli Benediktsson-Einar Garðar Hjaltason     1-0
• Pétur Gíslason-Eymundur Eymundsson           0-1
• Karl Steingrímsson-Logi Rúnar Jónsson        1-0
• Alex Cambray Orrason-Grétar Þór Eyþórsson    1-0
• Símon Þórhallsson-Sveinn Torfi Pálsson       1-0
• Andri Freyr Björgvinsson-Jón Magnússon       1-0
• Einar Guðmundsson-Hjörtur Snær Jónsson       0-1
• Bragi Pálmason-Ari Friðfinnsson              0-1
• Aðalsteinn Leifsson-Óskar Long Einarsson     0-1

Þannig vann Brekkan nauman sigur, 8-7.

Eftir þetta var tekin bændaglíma í hraðskák og tefldi þá hver liðsmaður eina skák við alla úr hinu liðinu, alls 15 skákir. Þar tóku norðanmenn (þ.e. Þorparar & co) strax ákveðna forystu og horfði lengi óvænlega fyrir sveinum úr suðurhluta bæjarins. Þannig höfðu hinir fyrrnefndu náð 13 vinninga forystu 59-46 að loknum 7 umferðum, unnið allar umferðir nema eina og ekkert útlit fyrir að sigurgöngunni væri að linna. En skriðþungi brekkusnigla fór vaxandi þegar á leið og þeir náðu yfirhöndinni með ótrúlegum 11-4 sigri í 13. umferð og létu hana ekki af hendi eftir það. Lokaúrslit 115.5-109.5.

Nokkrir sunnanmenn reyndust afar fengsælir í hraðskákinni; Rúnar Sigurpálsson vann allar sínar skákir, 15 að tölu, Áskell Örn fékk 14.5 vinning, Smári Rafn og Jón Kristinn 14. Næstur þeim kom svo Andri Freyr með 10 vinninga. Árangur í sveit norðanmanna var mun jafnari; þar náði Sigurður Arnarson 10.5 vinningi í hús og nafni hans Eiríksson, Smári Ólafsson og Sveinn Torfi Pálsson 10 vinningum. Þótti þetta hin besta skemmtun og góð upphitun fyrir lokamót ársins sem er Jólahraðskákmótið á sunnudaginn 30. desember.