Skákmót í Vin á mánudaginn til heiðurs Finni Kr. Finnssyni

Hraðskákmót verður haldið í Vin, Hverfisgötu 47, á mánudaginn kl. 13 til heiðurs Finni Kr. Finnssyni félagsmálafrömuði með meiru. Mótið er jafnframt Haustmót Skiákfélags Vinjar og markar upphafið að kraftmiklu vetrarstarfi.

Skákmótin í Vin njóta mikilla vinsælda meðal skákmanna, enda ríkir þar einstaklega góður andi. Haustmótið er tileinkað Finni Kr. sem um árabil hefur unnið mikið og óeigingjarnt starf við uppbyggingu skáklífs, og er nú einn burðarása í Skákfélaginu Æsir, sem er Skákfélag eldri borgara.

Veitt verða ýmis verðlaun á mótinu á mánudaginn. Tefldar verða 6 umferðir með 7 mínútna umhugsunartíma. Í hléi verður boðið upp á kaffi og meðlæti, og eru allir hjartanlega velkomnir!