Gallerý Skák: Gunnar sigraði með yfirburðum

Að venju hittumst menn til tafls í Gallerýinu í gærkvöldi og gáfu ekkert eftir nema síður væri.

Það sem var óvenjulegt var að ákveðið var að helga mótið Dáfríði hinu fögru, afar sérstakri og afburðagáfaðri kisu, sem látist hafði daginn áður langt um aldur fram.  Eigandi hennar Einar Ess, sem var með í mótinu, kvað hana hafa verið mjög áhugasama um skák og hafa jafnan fylgst grannt með þegar teflt var á heimili hans og átti þá til að rugla stöðunni á skákborðinu.  Sem og haft mikið yndi af því að hreyfa taflmennina og þoka þeim út af borðinu þess á milli.  Mun þetta vera í fyrsta sinn í skáksögunni svo vitað sé, alla vega hér á landi, sem skákmót er helgað ketti.  Þó er vitað til þess að Vassili Smyslov, fyrrv. heimsmeistari, átti kött sem hann kvaðst tefla við og stúdera skák með.

Sigurvegari mótsins var Gunnar Kr. Gunnarsson, fyrrv. Íslandsmeistari á skák og knattspyrnu,  sem er að nálgast áttrætt.  Það virðist þó ekki há góðri taflmennsku hans í styttri skákum en tefldar voru 11 umferðir með 10 mín. uht.   Fléttumeistarinn Gunnar hlaut 9.5 vinning, en næstur kom nafni hans Skarphéðinsson með 7.5 og síðan þeir Kristinn Bjarnason og  Kristján Stefánsson, stórmeistarabani,  gamlir reynsluboltar með skitna 7 vinninga, sem hinum síðasttalda fannst vonum minna miðað ágæti sitt, en hann var sá eini sem lagði Gunnar Gunnarsson að velli  þetta kvöldið. 

Nánar skv. mótstöflu og á www.galleryskak.net.