Afmælismót Ingibjargar Eddu í Vin á mánudaginn

Mánudaginn 5. september, klukkan 13:00, heldur Skákfélag Vinjar mót til heiðurs afmælisbarni dagsins, henni Ingibjörgu Eddu Birgisdóttur, sem verður tuttugu og sjö vetra. Inga var rétt búin að taka upp fermingargjafirnar þegar hún varð Íslandsmeistari kvenna, í fyrra skiptið, en tók svo langa pásu frá skákinni. Hún hefur nú komið til baka með offorsi og teflir með Skákfélagi Selfoss og nágrennis í vetur. Auk þess var hún kjörin í stjórn Skáksambandsins nú í vor.

Inga hefur haldið utan um skákina í Vin að miklu leyti í sumar og á skilið almennilegt mót. Hinn geðþekki borgarfulltrúi og formaður hverfisráðs miðborgar, fulltrúi í menntaráði og varamaður annarra ráða, Óttarr Ó. Proppé, mun heiðra keppendur og Vinjarfólk með heimsókn í athvarfið. Óttarr mun setja mótið auk þess að leika fyrsta leikinn.

Cross fit meistarinn og framkvæmdastjóri Skákakademíunnar, Stefán S. Bergsson, ætlar að halda utan um stjórn og dómgæslu og að venju fer allt vel fram enda deilir enginn við Stefán. Ekki oftar en einu sinni. Tefldar verða sex umferðir með sjö mínútna umhugsunartíma og bókaforlagið Bjartur hefur gefið vinninga á mótið, bæði íslenskar og erlendar bækur. Fimm efstu fá vinning og auk þess verður happadrætti. Í hálfleik verður afmæliskaffi.

Vinir og velunnarar bæði Ingibjargar Eddu og Vinjar eru hvattir til að láta sjá sig. Skráning á staðnum og kostar ekkert.

Á myndunum má sjá Ingibjörgu einbeitta fylgja sporum ísbjarnar, sem hún vildi finna og klappa, við Ittoqqortoormiit á Grænlandi í vor þar sem hún hafði umsjón með skákkennslu og mótahaldi fyrir börn og unglinga á vegum Hróksins. Hún fann bangsa. Myndirnar tók Tim Vollmer.

Vin er athvarf Rauða kross Íslands fyrir fólk með geðraskanir að Hverfisgötu 47. Teflt er á mánudögum klukkan 13 og allir alltaf velkomnir.