Glæsileg verðlaun á Ströndum: 100 þúsund króna verðlaunapottur, lambalæri og silki frá Samarkand!

Vegleg og fjölbreytt verðlaun eru í boði á atskákmóti Hróksins í Djúpavík, laugardaginn 18. júní nk. Í verðlaunapottinum eru 100 þúsund krónur, en að auki er fjöldi spennandi verðlauna. Allir keppendur eiga möguleika á vinningi, því dregið verður í happdrætti þar sem margt skemmtilegt er á boðstólum.
 
Verðlaunafé skiptist svo:

1. verðlaun 25.000
2. verðlaun 15.000
3. verðlaun 10.000
 
Þá eru veitt 10 þúsund króna verðlaun fyrir bestan árangur í eftirtöldum flokkum:
 
Bestur árangur stigalausra.
Bestur árangur skákmanna með minna en 2100 stig.
Bestur árangur kvenna.
Bestur árangur 16 ára og yngri.
Bestur árangur heimamanna.
 
Þá verður best klæddi keppandinn verðlaunaður að vanda, sem og kurteisasti keppandinn. Þá munu öll börn sem taka þátt í mótinu fá glaðning.
 
Af öðrum vinningum má nefna brakandi ferskar bækur, handgerða muni eftir heimamenn, gómsæt lambalæri, og síðast en ekki síst gersimar úr fórum Jóhönnu Kristjónsdóttur. Þar má nefna handunnið teppi frá Eþíópíu, tösku frá Turkmenistan og silki frá Samarkand í Úsbekistan.
 
Það verður semsagt alþjóðlegur blær yfir Skákhátíðinni á Ströndum 2011. Keppendum fjölgar óðum og eru áhugasamir beðnir að skrá sig sem fyrst, hjá Hrafni í [e-mail] eða Róbert í [e-mail].

Pistill ritstjóra um mótið 2010