Henrik endaði í 2.-5. sæti í Kaupmannahöfn

Stórmeistarinn Henrik Danielsen (2545) endaði í 2.-5. sæti á Copenhagen Chess Challange sem lauk í Köben í dag.  Henrik gerði jafntefli við sænska stórmeistarann Stellan Brynell (2486) í lokaumferðinni og hlaut 6½ vinning.   Sigurvegari mótsins varð danski FIDE-meistarinn Andreas Skytte Hagen (2346) með 7 vinninga sem með árangrinum kláraði lokaáfangann að alþjóðlegum meistaratitli og krækti sér í sinn fyrsta stórmeistaraáfanga!  Þröstur Þórhallsson (2392) tapaði fyrir sænska stórmeistaranum Hans Tikkanen (2560), fékk 5½ vinning og endaði í 13.-21. sæti.

Jafnir Henrik í 2.-5. sæti urðu Brynell, Tikkanen og finnski stórmeistarinn Heikki Westerinen (2350).

Árangur Henriks samsvaraði 2492 skákstigum og árangur Þrastar samsvaraði 2344 skákstigum.  Báðir lækka þeir lítis háttar á stigum, Henrik um 1 stig og Þröstur um 3 stig.

Atli Jóhann Leósson (1673) og Óskar Long Einarsson (1560) töpuðu báðir í lokaumferðinni og enduðu með 3 vinninga. 

Alls tóku 79 skákmenn þátt í mótinu og þar af 7 stórmeistarar og 9 alþjóðlegir meistarar.  Henrik var þriðji í stigaröð keppenda en Þröstur sé fjórtándi.

• Heimasíða mótsins
• Skákirnar í beinni
• Chess-Results