Úrslitaeinvígi Íslandsmótsins í atskák fer fram á föstudag

Úrslitaeinvígi Íslandsmótsins í atskák fer fram föstudagskvöldið, 13. maí.  Stórmeistarinn Þröstur Þórhallsson og Hjörvar Steinn Grétarsson mætast í úrslitum.  Að þessu sinni fer einvígið ekki fram í sjónvarpi.  Kapparnir tefla í húsnæði Skáksambandsins, Faxafeni 12 og eru áhorfendur velkomnir.   Einvígið hefst kl. 19.  Einvíginu verður varpað upp á risaskjá í Billiardbarnum sem er hliðina á Skáksambandinu en verður ekki sýnt beint á netinu.

Helgi Ólafsson verður þar á staðnum og fer yfir það sem er að gerast í skákinni jafnóðum.  Ingvar Þór Jóhannesson ætlar einnig að mæta með tölvuforrit og greina frá því hvað tölvuforritin segja um gang mála jafnóðum. 

Sigurbjörn bóksali verður með bóksölu á staðnum.

Áhugamenn geta því ýmist fylgst með skákinni beint og fylgst með skýringum Helga og Ingvars.    

 

 

Sautján á skáklist - án landamæra.

Eina skákkonan í hópnum stjórnaði mótinu í Vin þar sem þátttakendur komu frá Rúmeníu, Selfossi , Bandaríkjunum og Grafarholti. Jafnvel vesturbænum líka. Skáklist án allra landamæra þar sem tékkneski sjálfboðaliðinn í Vin, hún Lenka Müllerova, bakaði djúsí köku og serveraði með ís í hálfleik.

Tefldar voru sex umferðir með sjö mínútna umhugsunartíma og allt fór þokkalega vel fram. 20 manna hópur Vinjargengis fór í morgun til Englands að chilla svo skákfólkið átti húsið.

Ingibjörg Edda stjórnaði af röggsemi og var sú eina sem náði jafntefli gegn Róberti Lagerman, Bandaríkjamanninum í hópnum. Hann sigraði semsagt á sterku skáklistarmótinu, þar sem Stefán Bergsson var annar með fimm vinninga. Ingi Tandri krækti svo í bronsið, jafn Birgi Berndsen en hærri á stigum.

Úrslit:

• 1.       Róbert Lagerman              5,5
• 2.       Stefán Bergsson                5
• 3.       Ingi Tandri Traustas         4
• 4.       Birgir Berndsen                 4
• 5.       Magnús Matthíasson       3,5
• 6.       Jón Úlfljótsson                  3,5
• 7.       Haukur Angantýsson       3,5
• 8.       Ingibjörg Edda Birgisd     3,5
• 9.       Gunnar Freyr Rúnarss     3,5
• 10.   Bjarni Hjartarson              3
• 11.   Kristján B. Þór                   3
• 12.   Arnar Valgeirsson             3
• 13.   Hrafn Jökulsson                2
• 14.   Gunnar Gestsson              2
• 15.   Csaba Daday                      2
• 16.   Grétar Sigurólason           1
• 17.   Davíð Friðbertsson           1

Myndaalbúm mótsins

Áskorendaeinvígin: Enn óvænt úrslit - Grischuk og Kramnik áfram - Aronian úr leik

Það urðu enn óvænt úrslit í áskorendaeinvígum FIDE í dag þegar Grischuk felldi Aronian úr leik eftir æsilegar at- og hraðskákir.   Kramnik vann Radjabov og þar gekk líka á ýmsu.  Klukkan bilaði í hraðskákinni í jafnteflislegri stöðu sem Kramnik þurfti nauðsynlega að vinna til að jafna einvígið og það gerði hann og hafði svo betur, aftur með því að vinna jafnteflislegt endatafl!

Undanúrslit hefjast 12. maí.  Þá mætast Kramnik-Grischuk og Kamsky-Gelfand.  

Rétt er að benda á að Henrik Danielsen er með daglegar skákskýringar á Chessdom.

Lokastaðan í 8 manna úrslitum:

Topalov (BUL) - Kamsky (USA) 1½-2½
Kramnik (RUS) - Radjabov (AZE) 6½-5½
Aronian (ARM) - Grischuk (RUS) 3½-4½
Gelfand (ISR)- Mamedyarov (AZE) 2½-1½

• Heimasíða áskorendakeppninnar
• Skákirnar í beinni
• Chessbomb (beinar skýringar með tölvuskýringum)

 

Akureyringar lögðu Ása í Vatnsdal

Síðasta laugardag sendu Skákfélag eldri borgara í Reykjavík Æsir, tíu manna sveit skákmanna  til móts við eldri borgara sveit Skákfélags Akureyrar.  Mótsstaðurinn var sá sami og á síðasta ári, veiðihúsið í Vatnsdalshólum sem er alveg frábær staður til þess að halda svona mót.

Einn Akureyringurinn Karl Steingrímsson og hans ágæta frú sáu um allar veitingar fyrir sunnanmenn, sem voru alveg frábærar, eins og á bestu hótelum.

Á milli bardaga gengu menn út í Þórdísarlund og söfnuðu orku fyrir næstu orrustu. Þetta er fallegur staður sem Húnvetningafélagið hefur ræktað og reist minnisvarða um fyrstu konuna sem fæddist í Vatnsdal. Þórdísi Ingimundardóttir "gamla"

Á laugardag var keppt í 15 mínútna skákum í tveimur riðlum, fimm menn í hvorum riðli.

Í A riðli sigruðu Akureyringar með 14½ vinningi gegn 10½ vinningum Sunnanmanna.

Bestum árangri  fyrir Æsir náði Björn Þorsteinsson 4 v af 5. Hjá Akureyringum fékk Sigurður Eiríksson flesta v eða 3 ½ af 5

Í B riðli fóru leikar nákvæmlega eins 14 ½ gegn 10 ½ fyrir Akureyringa.

Haki Jóhannesson var bestur norðan manna í B riðli fékk 4½ v af 5.  Björn V Þórðarson stóð sig best í B riðli fyrir sunnan menn fékk 3½ v af 5

Á laugardagskvöldið var svo haldið 7 mínútna hraðskákmót eftir að menn höfðu snætt dýrindis kvöldverð og sumir fengið sér smá Víking í aðra tána

Þar varð Björn Þorsteinsson efstur með 8½ v af 9. Jóhann Örn Sigurjónsson varð annar með 7½ v. Þriðja sætinu náði Þór Valtýsson fyrirliði norðan manna með 6½ v.

Svo skemmtilega fór að þegar lagðir voru saman vinningar liðanna eftir þetta hraðskákmót skildu liðin jöfn, hvort lið með 45 vinninga.

Á sunnudag kl. 11 var svo hraðskákkeppnin lið gegn liði 7 mín. umhugsunartíma, tíu í hvoru liði. Þar fóru leikar þannig að Norðanmenn sigruðu með 57 vinningum gegn 43  Jón Þ. Þór fékk flesta vinninga Norðanmanna 9 v af 10. Björn Þorsteinsson var bestur af sunnan mönnum með 8½ v.

Þetta var allt saman hin besta skemmtun, engin sár en sumir nokkuð móðir eins og gengur.

Æsismenn þakkaAkureyringum kærlega fyrir drengilega keppni og skemmtilega helgi.

Finnur Kr. Finnsson

 

EM öldungasveita: Tap gegn Belgum

Íslenska sveitin, Polar Bears Iceland, tapaði ½-3½ fyrir belgískri sveit í 7. umferð EM öldungasveita sem fram fór í morgun í Þessalóníku í Grikklandi í morgun.  Íslenska sveitin hefur 7 stig og 12 vinning og er í 21. sæti.  Gunnar Gunnarsson gerði jafntefli en aðrir töpuðu.  Í áttundu og næstsíðustu umferð sem fram fer á morgun teflir íslenska sveitin við England 2.

Rússar eru efstir með 12 stig, Ísraelar aðrir með 11 stig og Belgar og Ítalir hafa 10 stig.  

Sterkir skákmenn taka þátt í keppninni, þar á meðal 12 stórmeistarar.  Stigahæstur keppenda er Evgeni Vasjukov (2480).  

Fleiri myndir hafa bæst við í myndaalbúm mótsins frá Gunnari Finnlaugssyni.

Úrslit 7. umferðar:

Bo.	18	Belgium	Rtg	-	20	Polar Bears Iceland	Rtg	3½: ½
6.1	FM	Rooze Jan	2333	-		Einarsson Arnthor	2227	1 - 0
6.2		Van Herck Marcel	2135	-		Gunnarsson Gunnar K	2209	½ - ½
6.3		Schuermans Robert	2085	-		Finnlaugsson Gunnar	2075	1 - 0
6.4		Hajenius Willem	1983	-		Kristjansson Sigurdur	1945	1 - 0

Íslenska sveitin:

1. Arnþór Sævar Einarsson (2227) 4½ v.
2. Gunnar Gunnarsson (2209) 4½ v.
3. Gunnar Finnlaugsson (2075) 2½ v.
4. Sigurður Kristjánsson (1945) ½ v.

Sveitin er sú 20. sterkasta af 35 samkvæmt stigum.

• Heimasíða mótsins
• Myndaalbúm mótsins
• Chess-Results

Skáknámskeið í sumar hjá Skákakdemíunni

Eins og síðastliðin sumur mun Skákakademía Reykjavíkur standa fyrir skáknámskeiðum fyrir börn og unglinga. Námskeiðin hefjast 6. júní og standa til 19. ágúst. Skipt verður í flokka eftir aldri og reynslu. Kennslan mun fara fram í Skákakademíu Reykjavíkur að Tjarnargötu 10 A. Kennarar verða meðal annarra Stefán Bergsson, Róbert Lagerman, Hjörvar Steinn Grétarsson, Björn Ívar Karlsson, Bragi Þorfinnsson og Guðmundur Kjartansson.

Hver flokkur verður á 2-3 æfingum í sumar, 1.5 - 2 tíma í senn. Byrjendur verða á 2 æfingum í viku en þeir sem eru eldri og reyndari á 3 æfingum. Æfingarnar munu fara fram á bilinu 10:00-18:00.

Verð: 12.000-20.000 kr. fyrir allt sumarið.

Opnað hefur verið fyrir skráningu á www.skak.is.

Mjög mikilvægt er að netfang fylgi skráningu.

Í  byrjun júní verður stundatafla allra hópa komin á hreint. Þá fá skráðir þátttakendur tölvupóst um tímasetningu þeirra flokka.

Reynt verður eftir megni að koma til móts við óskir þátttakanda um tímasetningar, svo að allir krakkarnir komist á þær æfingar sem þeim standa til boða í hverri viku. Ef það kemur á daginn að einhver kemst ekki alla dagana í sinn flokk gæti hann þá komið einhvern daginn í annan flokk. Slíkum óskum verður sinnt að lokinni stundatöflugerð allra flokka.

Á námskeiðunum verður hvoru tveggja mikið lagt upp úr taflmennsku og þjálfun. Þegar viðrar vel mun kennslan að einhverju leyti fara fram utandyra og verður mikið líf í kringum útitaflið við Lækjargötu eins og síðasta sumar.

Skáklist án landamæra - mót í Vin í dag

Mánudaginn 9. mai verður haldið skákmót í Vin, Hverfisgötu 47.

Mótið hefst klukkan 13:00 og skráning á staðnum.

Í tilefni þess að „List án landamæra" er í fullum gangi, þar sem listamönnum á öllum aldri hefur staðið til boða að sýna verk sín í hvaða formi sem er, þá höldum við að sjálfsögðu skáklistarmót.

Þó er þetta ei s og í öðrum íþróttum, það eru stigin sem telja á endanum, ekki verða veitt fegurðaverðlaun.

Tefldar verða sjö umferðir með sjö mínútna umhugsunartíma og skákstýra er Ingibjörg Edda Birgisdóttir.

Í miðju móti verður „café a la Vin" til að bústa upp mannskapinn.

Bókaverðlaun fyrir efstu sætin auk happadrættis.

Allt skákáhugafólk þvílíkt velkomið í Vin sem er að Hverfisgötu 47 í Reykjavik,

síminn er 561-2612.

Vignir Vatnar sigraði á Vormóti Skákskólans

Vormót Skákskólans fór fram á sunnudaginn. Mót þetta markar lok framhaldsflokks Skákskólans á hverju ári og er skipað nemendum í þeim flokki. Allir nemendur framhaldsflokks eiga það sameiginlegt að hafa bætt sig töluvert í vetur enda æfingar tvisvar í viku í einn og hálfan tíma í senn. Krakkarnir eru einnig dugleg við að sækja æfingar sinna taflfélaga og nokkur þeirra sækja

 tíma Helga Ólafssonar í Kópavogsstúkunni.

 

Tefldar voru sex umferðir með 10 mínútna umhugsunartíma. Eftir þrjár umferðir mættust þeir einu keppendur söm höfðu fullt hús. Eftir harða baráttu sömdu Dawid Kolka og Vignir Vatnar um jafntefli í endatafli sem Dawid taldi vera dautt jafntefli. Vignir gat prísað sig sælan með þetta því Dawid átti vinning sem honum yfirsást. Eftir þessa skák héldu engin bönd Vigni sem varð öruggur sigurvegari með 5 vinninga af sex mögulegum. Í öðru sæti með 4.5 vinning lenti Felix Steinþórsson liðsmaður í sveit Álfhólsskóla Kópavogi og Taflfélaginu Helli. Árangur Felix kom nokkuð á óvart en undirstrikar þær framfarir sem hann og fleiri í flokknum hafa tekið í vetur. Í þriðja sæti varð svo Nansý Davíðsdóttir með 4 vinninga. 

 

Úrslit

 

Rk.	Name	Pts.	TB1
1	Vignir Vatnar Stefánsson	5	20
2	Felix Steinþórsson	4,5	20,5
3	Nansý Davíðsdóttir	4	20
4	Hilmir Freyr Heimisson	4	17,5
5	Dawid Kolka	3,5	21,5
6	Leifur Þorsteinsson	3	18
7	Elín Nhung	3	16
	Gauti Páll Jónsson	3	16
9	Kári Georgsson	3	13,5
10	Donika Kolica	2	21,5
11	Heimir Páll Ragnarsson	1	14,5
12	Eric Daniel	0	17

 

 

Skákstjórar voru Davíð Ólafsson og Stefán Bergsson.

 

Skákþáttur Morgunblaðsins: Úrslitaskákin

Þrír skákmeistarar áttu raunhæfa möguleika á Íslandsmeistaratitlinum þegar lokaumferðin hófst á Eiðum fyrir viku. Héðinn Steingrímsson var með 6 ½ vinning af átta mögulegum og hafði ½ vinnings forskot á Henrik Danielsen og Braga Þorfinnsson sem voru í 2. – 3. sæti með 6 vinninga. Lokaumferðin bauð upp á hreina úrslitaskák milli Héðins og Henrik og það var ekki víst að jafntefli dygði Héðni. Mikið var líka undir hjá Braga í skákinni við Guðmund Kjartansson.

Í úrslitaskákum á borð við þá sem Héðinn og Henrik háðu er engin þekkt uppskrift til að árangri. Þó er mælt með því að menn reyni að halda haus og grípa þau tækifæri sem gefast. Reynslan hefur kennt mönnum að miklar líkur eru á því að báðum aðilum verði á einhver mistök við spennuþrungnar aðstæður. Í öðru einvígi Karpovs og Kasparovs haustið 1985 var heimsmeistaratitillinn undir í lokaskákinni og Karpov varð að vinna til að halda titlinum. Á hárfínu augnabliki gat hann – og varð – að herða sóknina en hikaði og tapaði. Tveim árum síðar þegar 24. skákin í einvígi nr. 4 í Sevilla á Spáni, var tefld dugði Karpov jafntefli til að ná heimsmeistaratitlinum úr höndum Kasparovs, hleypti sér í mikið tímahrak, missti af rakinni jafnteflisleið og náði síðan ekki að hanga á lakari biðstöðu peði undir. Henrik Danielsen hafði svart gegn Héðni og kóngsindverska vörnin er sjaldan slæmt val undir slíkum kringumstæðum, gallinn var hinsvegar sá að hvað eftir annað stofnaði hann til uppskipta og sat eftir með óvirka stöðu þar sem vinningsmöguleikarnir voru Héðins megin. Á einum stað fékk Henrik þó tækifæri til að hrista rækilega upp í stöðunni en sat fastur í skotgröfunum og tapaði:

Skákþing Íslands 2011; 9. umferð:

Héðinn Steingrímsson – Henrik Danielsen

Kóngsindversk vörn

1. d4 Rf6 2. c4 g6 3. Rc3 Bg7 4. e4 d6 5. Rf3 O-O 6. Be2 e5 7. O-O Rc6 8. d5 Re7 9. b4 c6

Algengast 9. ... Rh5 en Henrik hefur sennilega viljað koma Héðni á óvart.

10. Bb2 a5 11. a3 Bg4 12. Rd2 axb4 13. axb4 Hxa1 14. Bxa1 Bxe2 15. Dxe2 cxd5 16. exd5 Rh5 17. Hd1 Rf4 18. Df1 Dd7 19. Rb5 Ha8 20. Bc3 Ha2 21. g3 Rh3 22. Kg2 Rf5 23. Ha1

Vitaskuld ekki 23. Kxh3 Re3+ og drottningin fellur.

23. ... Hxa1 24. Bxa1 Rg5 25. De2 h5 26. h4 Rh7 27. Bc3 Rf6 28. Re4 Rg4 29. Dd3 Rf6 30. Rxf6 Bxf6 31. c5 dxc5 32. bxc5 Re7

32. .... Rd4 stoðar lítt. Eftir 33. Bxd4! Dxd5+ 34. Df3 Dxf3 35. Kxf3 exd4 36. Ke4 á svartur erfitt endatafl fyrir höndum.

33. Rd6 Bg7 34. Bb4 f5 35. Ba3?

Hér fékk Henrik eina tækifærið í skákinni, 35. .... Da4! Þá strandar 36. Rxb7 á 36. ... e4! o.s.frv. Hvítur getur haldið velli með 36. f3 eða 36. Bc1 en vandamál svarts eru að baki og staðan má heita í jafnvægi.

35. ... Kh7? 36. Db3 e4 37. Kf1 Be5? 38. Rf7! Bf6 39. d6 Rc6 40. Rg5+

Gott var einnig 40. Bb2! t.d. 40. ... Ra5 (eða 40. .... Bxb2 41. Rg5+ o.s.frv.) 41. Rg5+ Bxg5 42. Dc3! og vinnur.

40. ... Bxg5 41. hxg5 f4 42. gxf4 Rd4 43. Dc3 Rb5 44. Db3 Rd4 45. Dc3 Rb5 46. De3 Dg4 47. Bb2 Dd1 48. Kg2 Dg4 49. Dg3 De6 50. Dh3

– og svartur gafst upp.

Með þessum sigri tryggði Héðinn sér Íslandsmeistaratitilinn í annað sinn. Hann varð síðast Íslandsmeistari árið 1990 aðeins 15 ára gamall, sá yngsti frá upphafi.

gafst upp.

Helgi Ólafsson | [e-mail] Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 1. maí 2011.

Skákþættir Morgunblaðsins

[EventDate "2011.04.15"]\par \par 1. d4 Nf6 2. c4 g6 3. Nc3 Bg7 4. e4 d6 5. Nf3 O-O 6. Be2 e5 7. O-O Nc6 8. d5 Ne7\par 9. b4 c6 10. Bb2 a5 11. a3 Bg4 12. Nd2 axb4 13. axb4 Rxa1 14. Bxa1 Bxe2 15. Qxe2\par cxd5 16. exd5 Nh5 17. Rd1 Nf4 18. Qf1 Qd7 19. Nb5 Ra8 20. Bc3 Ra2 21. g3 Nh3+\par 22. Kg2 Nf5 23. Ra1 Rxa1 24. Bxa1 Ng5 25. Qe2 h5 26. h4 Nh7 27. Bc3 Nf6 28. Ne4\par Ng4 29. Qd3 Nf6 30. Nxf6+ Bxf6 31. c5 dxc5 32. bxc5 Ne7 33. Nd6 Bg7 34. Bb4 f5\par 35. Ba3 Kh7 36. Qb3 e4 37. Kf1 Be5 38. Nf7 Bf6 39. d6 Nc6 40. Ng5+ Bxg5 41. hxg5\par f4 42. gxf4 Nd4 43. Qc3 Nb5 44. Qb3 Nd4 45. Qc3 Nb5 46. Qe3 Qg4 47. Bb2 Qd1+ 48.\par Kg2 Qg4+ 49. Qg3 Qe6 50. Qh3 1-0

Kamsky og Gelfand komnir áfram

Gata Kamsky og Boris Gelfand eru komnir áfram í undanúrslit áskorendaeinvígi FIDE.   Kamsky gerði jafntefli gegn Topalov í fjórðu skákinni í dag og vann því einvígið 2½-1½ og koma sú úrslit verulega á óvart.  Öllum skákum dagsins lauk með jafntefli og hafði því Gelfand betur gegn Mamedyarov .  Sigur Gelfandar kemur hins vegar ekki mikið á óvart.  Kamsky og Gelfand mætast í undanúrslitum.  Hin tvö einvígin enduðu hins vegar 2-2 og verða tefld til þrautar á morgun með atskák og hraðskák ef með þarf. Taflmennskan hefst kl. 11.

Rétt er að benda á að Henrik Danielsen er með daglegar skákskýringar á Chessdom.

Staðan í 8 manna úrslitum:

Topalov (BUL) - Kamsky (USA) 1½-2½
Kramnik (RUS) - Radjabov (AZE) 2-2
Aronian (ARM) - Grischuk (RUS) 2-2
Gelfand (ISR)- Mamedyarov (AZE) 2½-1½

• Heimasíða áskorendakeppninnar
• Skákirnar í beinni
• Chessbomb (beinar skýringar með tölvuskýringum)