Íslandsmót barna: Vegleg verðlaun frá Bónus

Glæsileg verðlaun eru í boði á Íslandsmóti barna í Rimaskóla á laugardaginn. Sigurvegarinn vinnur sér inn ferð á Norðurlandamótið í skólaskák í Finnlandi, sem fram fer í febrúar. 

Bónus gefur þremur efstu keppendum á Íslandsmótinu inneignarkort, samtals að andvirði 50 þúsund krónur, og fjöldi skemmtilegra vinninga verður í happdrætti Íslandsmótsins, svo allir eiga möguleika á glaðningi.

Verðlaunin frá Bónus skiptast þannig að 1. sæti gefur 25 þúsund króna inneign, 2. sætið 15 þúsund og 3. sætið 10 þúsund. Ef verðlaunahafar eru jafnir að vinningum munu verðlaunin skiptast jafnt á milli þeirra.

Í happdrætti mótsins verða margir vinningar, bækur, geisladiskar, leikhúsmiðar, borðspil, sundkort og fjölskylduferð í Húsdýragarðinn, svo nokkuð sé nefnt. Eftirtalin fyrirtæki gefa vinninga: Sena, Nexus, Húsdýragarðurinn, ÍTR, Borgarleikhúsið og Sögur útgáfa.

Síðast en ekki síst verður keppt um skínandi verðlaunapeninga og bikara á Íslandsmótinu í Rimaskóla og eru veitt verðlaun fyrir bestan árangur í hverjum árgangi.

Íslandsmót barna er opið öllum börnum í 1. til 5. bekk. Það hefst klukkan 11 í Rimaskóla og eru keppendur hvattir til að skrá sig sem fyrst hér á skak.is.

Myndin er af Dawid Kolka, Íslandsmeistara barna 2011.

Guðmundur vann Hebden - í 4.-6. sæti - fær stórmeistaraáfanga með sigri á morgun

Alþjóðlegi meistarinn Guðmundur Kjartansson (2326) fer mikinn á Hastings-mótinu og vinnur nú hvern stórmeistarann á fætur öðrum!  Í dag í áttundu og næstsíðustu umferð lagði hann enska stórmeistarann Mark Hebden (2515) í hörkuskák, með svörtu, sem var síðasta skák umferðarinnar til að klárast.  Guðmundur er nú kominn í 4.-6. sæti með 6 vinninga. 

Guðmundur mætir franska stórmeistaranum Andrei Istatescu (2627), með hvítu, í lokaumferðinni sem fram fer á morgun.  Skákin sú verður sýnd beint á vefsíðu mótsins og hefst kl. 14:15.  Sigur Guðmundar í þeirri skák tryggir honum sinn annan stórmeistaraáfanga. 

Sigurskák Guðmundar gegn Howell fylgir með fréttinni.

Kínverski stórmeistarinn Wang Yue (2697) er efstur með 7 vinninga.  Indversku alþjóðlegu meistararnir Babu Lalith (2484) og Sundar Shyam (2462) eru í 2.-3. sæti með 6½ vinning.

116 skákmenn taka þátt í Hastings.  Þar á meðal eru 13 stórmeistarar.  Guðmundur er nr. 30 í stigaröð keppenda. 

• Heimasíða mótsins 
• Beinar útsendingar (kl. 14:15)
  

[Event "Hastings Masters"] [Site "?"] [Date "2012.01.03"] [Round "7.6"] [White "Howell, David W L"] [Black "Kjartansson, Gudmundur"] [Result "0-1"] [WhiteElo "2633"] [BlackElo "2326"] [Annotator "World,PC"] [PlyCount "98"] [EventDate "2012.??.??"] 1. e4 c6 2. d4 d5 3. e5 Bf5 4. h4 h5 5. c4 e6 6. Nc3 Ne7 7. Bg5 Nd7 8. cxd5 exd5 9. Bd3 f6 10. exf6 gxf6 11. Bf4 Nb6 12. Bxf5 Nxf5 13. Nge2 Qd7 14. Qd3 O-O-O 15. b3 Rg8 16. g3 Ba3 17. Kd2 Qh7 18. Rae1 Rge8 19. Kc2 Rd7 20. Kb1 Rde7 21. Bd2 Bd6 22. Kb2 a5 23. Rc1 a4 24. Rhd1 axb3 25. axb3 Kd7 26. Bf4 Bb4 27. Ra1 Qg6 28. Ra7 Kc8 29. Nc1 Qg4 30. Na4 Nxa4+ 31. Rxa4 Bd6 32. Bxd6 Nxd6 33. Rd2 Kb8 34. Rc2 Nb5 35. Rb4 Re1 36. Rxb5 cxb5 37. Qc3 Qd7 38. Qf3 Rc8 39. Rxc8+ Qxc8 40. Nd3 Re4 41. Qxh5 b4 42. Nxb4 Rxd4 43. Nc2 Rd2 44. Qg6 d4 45. Kc1 d3 46. Kxd2 Qxc2+ 47. Ke3 Qe2+ 48. Kf4 d2 49. Qg8+ Ka7 0-1

Mikil spenna í Reggio Emila - Caruana vann Ivanchuk

Það er ótrúlega fjörlega teflt á ofurskákmótinu í Reggio Emila og aðeins 7 jafntefli hafa verið gerð í 24 skákum sem einstakt á svo sterku móti.  Nakamura er efstur með 15 stig þrátt fyrir tap gegn Morozevich (2762) í áttundu umferð sem er annar með 14 stig.  Giri (2714) er þriðji með 12 stig en stigahæsti skákmaður heims undir tvítugu Caruana (2727) nálgast óðflug efstu menn, hefur nú 11 stig, en hann vann Ivanchuk (2775) í dag. 

Staðan:

• 1. Nakamura ( 2758) 15 stig
• 2. Morozevich (2762) 14 stig
• 3. Giri (2714) 12 stig
• 4. Caruana (2727) 11 stig
• 5. Ivanchuk (2775) 8 stig
• 6. Vitjugov (2729) 5 stig

Heimasíða mótsins

 

KORNAX mótið - Skákþing Reykjavíkur hefst á sunnudag - stefnir í vel sótt og sterkt mót

KORNAX mótið 2012 - Skákþing Reykjavíkur hefst sunnudaginn 8. janúar kl. 14. Tefldar verða 9 umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14.  Teflt er í húsnæði Taflfélags Reykjavíkur að Faxafeni 12.

Nú þegar eru 37 keppendur skráðir til leiks og þar á meðal 4 alþjóðlegir meistarar þeir: Bragi Þorfinnsson (2426), Jón Viktor Gunnarsson (2424),  Björn Þorfinnsson (2406) og Guðmundur Kjartansson (2326) sem er að gera góða hluti í Hastings.  Skráning í mótið fer fram á heimasíðu TR og upplýsingar um skráða keppendur má finna hér.

Verðlaun:

• 1. sæti kr. 100.000
• 2. sæti kr. 50.000
• 3. sæti kr. 25.000
• Besti árangur undir 2000 skákstigum kr. 10.000 (íslensk stig gilda)
• Besti árangur undir 1800 skákstigum kr. 10.000 (íslensk stig gilda)
• Besti árangur undir 1600 skákstigum - bókaverðlaun (íslensk stig gilda)
• Besti árangur undir stigalausra - bókaverðlaun

Sigurvegarinn hlýtur auk þess nafnbótina Skákmeistari Reykjavíkur 2012 og farandbikar til varðveislu í eitt ár.  Núverandi Skákmeistari Reykjavíkur er Björn Þorfinnsson.

Þátttökugjöld:

• kr. 4.000 fyrir 16 ára og eldri
• kr. 2.000 fyrir 15 ára og yngri

Dagskrá:

• 1. umferð sunnudag   8. janúar  kl. 14
• 2. umferð miðvikudag 11. janúar  kl. 19.30
• 3. umferð föstudag     13. janúar  kl. 19.30
• 4. umferð sunnudag   15. janúar  kl. 14
• 5. umferð miðvikudag 18. janúar  kl. 19.30
• 6. umferð föstudag      20. janúar  kl. 19.30
• 7. umferð sunnudag    22. janúar  kl. 14
• 8. umferð miðvikudag 25. janúar  kl. 19.30
• 9. umferð föstudag      27. janúar  kl. 19.30

Skákþingið er reiknað til alþjóðlegra skákstiga.

Skráning fer fram á heimasíðu Taflfélags Reykjavíkur, http://www.taflfelag.is.

Athugið að skráningu lýkur 15 mínútum fyrir auglýst upphaf móts, þ.e. kl. 13.45.

Henrik með 1½ vinning eftir 2 umferðir í Chennai

Stórmeistarinn Henrik Danielsen (2536) hefur 1½ vinning eftir 2 umferðir á alþjóðlegu skákmóti sem hófst í dag í Chennai í Indlandi.  Henrik tefldi við fremur stigalága andstæðinga í dag.  

Alls taka 297 skákmenn þátt í mótinu og þar af eru 16 stórmeistarar.   Henrik er nr. 5 í stigaröð keppenda.  

Hægt er að fylgjast með átta skákum beint í hverri umferð á Chessbomb.  Umferðirnar hefjast hins vegar flestar kl. 4 að nóttu!

• Heimasíða mótsins 
• Chessbomb

 

 

Forseti Íslands heiðursgestur á Íslandsmóti barna

Ólafur Ragnar Grímsson forseti Íslands verður heiðursgestur við setningu Íslandsmóts barna í Rimaskóla á laugardaginn klukkan 11. Forsetinn mun hitta keppendur, foreldra, áhugamenn og forystumenn í íslensku skáklífi og leika fyrsta leikinn á mótinu.

Mikill áhugi er fyrir mótinu og er búist við spennandi og skemmtilegri keppni.

Meðal keppenda verða Vignir Vatnar Stefánsson, Nansý Davíðsdóttir, Heimir Páll Ragnarsson, Mykhaylo Kravchuk, Joshúa Davíðsson, Jón Jörundur Guðmundsson, Felix Steinþórsson, Hilmir Freyr Heimisson og Ásdís Birna Þórarinsdóttir.

Öll hafa þessi börn unnið góða sigra á undanförnum misserum, enda höfum við sjaldan eða aldrei átt jafn stóran hóp af efnilegum börnum á aldrinum 6 til 11 ára.

Íslandsmótið er öllum opið og er þátttaka ókeypis. Keppendur eru hvattir til að skrá sig sem allra fyrst hér á skak.is!

Myndin er frá Bessastöðum 2003, þegar forseti Íslands sæmdi skákmeistarann Bent Larsen riddarakrossi hinnar íslensku fálkaorðu.

Hið árlega ofurhraðskákmót SSON fer fram í dag

Hið árlega Ofurhraðskákmót SSON fer fram miðvikudagskvöldið 4. janúar, tefldar verða 5 mínútna skákir í Selinu að vanda.

Áður en mót hefst mun formaður fara yfir dagskrá félagsins fram að vori.

Félagsmenn eru hvattir til að mæta

Hraðskákmeistari félagsins verður á staðnum og mun veita keppendum holl ráð á milli skáka.

Guðmundur vann Howell - mætir Hebden á morgun

 

 

Alþjóðlegi meistarinn Guðmundur Kjartansson (2326) gerði sér lítið fyrir og sigraði stórmeistarann sterka David Howell (2633) í sjöundu umferð Hastings-mótsins, sem fram fór í dag.  Guðmundur er í 7.-12. sæti með 5 vinninga.   Kínverski stórmeistarinn Wang Yue (2697) er efstur með 6 vinninga.

Í áttundu og næstsíðustu umferð, sem fram fer á morgun, teflir Guðmundur við enska stórmeistarann Mark Hebden (2515). 

116 skákmenn taka þátt í Hastings.  Þar á meðal eru 13 stórmeistarar.  Guðmundur er nr. 30 í stigaröð keppenda. 

• Heimasíða mótsins 
• Beinar útsendingar (kl. 14:15)
  

Sæbjörn sigursæll í Stangarhyl

Æsir þeir hittust í Ásgarði í dag á fyrsta skákdegi ársins og börðust eins og brjálaðir berserkir til síðasta manns, eins og þeir eru vanir.  Sæbjörn Guðfinnsson varð sigursælastur eins og hann hefur oft verið áður, hann fékk 8 vinninga af 9 mögulegum. Í öðru sæti varð Þorsteinn Guðlaugsson með 7.5 vinning.  Þriðja sætinu náði Valdimar Ásmundsson með 6.5 vinning.  Tuttugu og þrír heldri skákmenn mættu til leiks í dag.

Nánari úrslit:

• 1          Sæbjörn Guðfinnsson                         8 vinninga
• 2          Þorsteinn Guðlaugsson                       7.5
• 3          Valdimar Ásmundsson                       6.5
• 4          Haukur Ásmundsson                          6
• 5          Óli Árni Vilhjálmsson                         5.5
• 6-10     Haraldur Axel                                     5
•             Gunnar Finnsson                                 5
•             Stefán Þormar                                     5
•             Gísli Árnason                                      5
•             Kort Ásgeirsson                                  5
• 11-14   Viðar Arthúrsson                                4.5
•             Birgir Sigurðsson                                4.5
•             Gísli Sigurhansson                              4.5
•             Eiður Á Gunnarsson                           4.5
• 15-18   Einar S Einarsson                                4
•             Finnur Kr Finnsson                             4
•             Ásgeir Sigurðss0n                               4
•             Baldur Garðarsson                              4

Næstu fimm skákmenn fengu örlítið færri vinninga.

 

Reykjavíkurskákmótið í Hörpu

 

Skáksamband Íslands og Harpa hafa gert með sér samkomulag um að Alþjóðlega Reykjavíkurskákmótið verði haldið í Hörpunni árin 2012-14.  

 

Aðstæður í Hörpunni eru einstakar til skákmótahalds, ætla má að hvergi í heiminum sé boðið upp á jafnglæsilega umgjörð um opin skákmót og þar. Teflt verður í Flóanum svonefnda sem er rýmið fyrir aftan veitingastaðinn Munnhörpuna.  Skákskýringar verða í sérstöku rými þar sem innangengt er úr skáksal.  Stefnt er að því að risaskjár verði í veitingarýminu þar sem skákmenn og skákáhugamenn geta sest og skoðað skákirnar á sama tíma og þær fara fram.

Höskuldur Ásgeirsson, framkvæmdastjóri Hörpu: „Okkur er mikill fengur í að fá þennan merka skákviðburð í Hörpuna. Skákin er listgrein sem á sér sterkar rætur menningu þjóðarinnar og hún fellur því vel að okkar starfsemi."

Gunnar Björnsson, forseti Skáksambands Íslands: „Það er sannkallað fagnaðarefni að geta boðið skákmönnum og skákunnendum upp á þessar glæsilegu aðstæður, að ég tali ekki um það aðdráttarafl sem Harpan hefur gagnvart erlendum gestum."

Reykjavíkurskákmótið er eitt elsta skákmót í heimi. Vegur þess hefur aukist jafnt og þétt síðustu ár og í fyrra tóku þátt um 170 skákmenn þátt víðs vegar að úr heiminum. Stefna mótshaldara í samvinnu við styrktaraðila og Hörpuna er að stækka mótið enn á komandi árum.  Er þá sérstaklega horft til ársins 2014 en þá verður hálf öld liðin síðan fyrsta mótið var haldið og galdramaðurinn Mikhail Tal kom sá og sigraði með 12½ vinningi af 13 mögulegum. 

Ríflega 20 stórmeistarar eru þegar skráðir til leiks á Reykjavíkurmótinu 2012. Stigahæsti skráði keppandinn sem skráður er til leiks er tékkneski stórmeistarinn David Navara (2712).  Enn stigahærri og þekktari keppandi verður kynntur til sögunnar á næstu dögum.   

Heimasíða mótsins