Skák.is

Færsluflokkur: Spil og leikir

6.1.2012 | 19:57

Caruana með á Reykjavíkurskákmótinu

Ítalski stórmeistarinn, Fabiano Caruana (2736), stigahæsti skákmaður heims undir tvítugu, er meðal keppenda á Reykjavíkurskákmótinu sem fram fer 6.-13. mars nk. í Hörpu. Ítalinn ungi er sá stigahæsti sem nokkurn tíma hefur teflt á Reykjavíkurskákmóti. Caruana er þó ekki sá eini með yfir 2700 skákstig sem tekur þátt að þessu sinni því meðal annarra keppenda má nefna Tékkann sterka David Navara (2712).

Meðal annarra skráðra keppenda má nefna Úkraínumanninn Yuriy Kryvoruchko (2666), einn sigurvegara Reykjavíkurmótsins 2009, Englendinginn Gawain Jones (2653), Hollendinginn Ivan Sokolov (2641), sem hefur sigrað á mótinu margoft, Bandaríkjamanninn Robert Hess (2625), sem var að sigra á sterku alþjóðlegu móti í Groningen og Úkraínumennina Kuzubov (2616) og Baklan (2612) sem báðir voru meðal sigurvegara í fyrra. Ísraelski stórmeistarinn Boris Avrukh (2605) tekur þátt en margir íslenskir skákmenn hafa keypt skákbækur eftir hann.

Íslensku stórmeistararnir Henrik Danielsen (2536), Hannes Hlífar Stefánsson (2534), fimmfaldur sigurvegari Reykjavíkurmótsins, Stefán Kristjánsson (2500) og Þröstur Þórhallsson (2400) eru einnig skráðir til leiks sem og landsliðsmaðurinn ungi Hjörvar Steinn Grétarsson (2470).

Alls eru 108 skákmenn nú þegar skráðir en gert er ráð fyrir að þátt taki á milli 150 og 200 keppendur.

Spil og leikir | Breytt s.d. kl. 19:58 | Slóð | Facebook | Athugasemdir (0)

6.1.2012 | 19:32

KORNAX mótið - Skákþing Reykjavíkur hefst á sunnudag - skráðir keppendur komnir yfir 50

KORNAX mótið 2012 - Skákþing Reykjavíkur hefst sunnudaginn 8. janúar kl. 14. Tefldar verða 9 umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14. Teflt er í húsnæði Taflfélags Reykjavíkur að Faxafeni 12.

Nú þegar eru 54 keppendur skráðir til leiks og þar á meðal 4 alþjóðlegir meistarar þeir: Bragi Þorfinnsson (2426), Jón Viktor Gunnarsson (2424), Björn Þorfinnsson (2406) og Guðmundur Kjartansson (2326) sem fór mikinn í Hastings og náði nærri áfanga að stórmeistaratitli. Skráning í mótið fer fram á heimasíðu TR og upplýsingar um skráða keppendur má finna hér.

Verðlaun:

1. sæti kr. 100.000
2. sæti kr. 50.000
3. sæti kr. 25.000
Besti árangur undir 2000 skákstigum kr. 10.000 (íslensk stig gilda)
Besti árangur undir 1800 skákstigum kr. 10.000 (íslensk stig gilda)
Besti árangur undir 1600 skákstigum - bókaverðlaun (íslensk stig gilda)
Besti árangur undir stigalausra - bókaverðlaun

Sigurvegarinn hlýtur auk þess nafnbótina Skákmeistari Reykjavíkur 2012 og farandbikar til varðveislu í eitt ár. Núverandi Skákmeistari Reykjavíkur er Björn Þorfinnsson.

Þátttökugjöld:

kr. 4.000 fyrir 16 ára og eldri
kr. 2.000 fyrir 15 ára og yngri

Dagskrá:

1. umferð sunnudag 8. janúar kl. 14
2. umferð miðvikudag 11. janúar kl. 19.30
3. umferð föstudag 13. janúar kl. 19.30
4. umferð sunnudag 15. janúar kl. 14
5. umferð miðvikudag 18. janúar kl. 19.30
6. umferð föstudag 20. janúar kl. 19.30
7. umferð sunnudag 22. janúar kl. 14
8. umferð miðvikudag 25. janúar kl. 19.30
9. umferð föstudag 27. janúar kl. 19.30

Skákþingið er reiknað til alþjóðlegra skákstiga.

Skráning fer fram á heimasíðu Taflfélags Reykjavíkur, http://www.taflfelag.is.

Athugið að skráningu lýkur 15 mínútum fyrir auglýst upphaf móts, þ.e. kl. 13.45.

Spil og leikir | Slóð | Facebook | Athugasemdir (0)

6.1.2012 | 19:26

Giri sigurvegari ofurmótsins í Reggio Emilia

Hinn ungi og efnilegi hollenski17 ára skákmaður Anish Giri (2714) sigraði á ofurmótinu í Reggio Emila sem lauk í dag. Giri, sem gerði jafntefli við annan ungan og efnilegan skákmann, Caruano (2727) í lokaumferðinni, hlut 16 stig. Caruana, Morozevich (2762) og Nakamura (2758) komu næstir með 15 stig. Mjög fjörlega var teflt á mótinu og allt annar yfirbragð en á mörgum ofurmótum.

Staðan:

1. Giri (2714) 16 stig
2.-4. Morozevich (2762), Nakamura ( 2758) og Caruana (2727) 15 stig.
5. Ivanchuk (2775) 12 stig
6. Vitjugov (2729) 8 stig

Heimasíða mótsins

Spil og leikir | Slóð | Facebook | Athugasemdir (0)

6.1.2012 | 18:03

Henrik með 3½ vinning eftir 5 umferðir í Chennai

Stórmeistarinn Henrik Danielsen (2536) hefur 3½ vinning eftir 5 umferðir á alþjóðlegu skákmóti sem fram fer í Chennai í Indlandi. Henrik vann sína skák í gær en gerði jafntefli í tveimur skákum í dag. Hann er í 36.-72. sæti.

Andstæðingur Henriks í gær hafði 2243 skákstig en andstæðingarnir í dag höfðu 2349 og 2215 skákstig.

Alls taka 297 skákmenn þátt í mótinu og þar af eru 16 stórmeistarar. Henrik er nr. 5 í stigaröð keppenda.

Hægt er að fylgjast með átta skákum beint í hverri umferð á Chessbomb. Umferðirnar hefjast hins vegar allar hér eftir kl. 4 að nóttu!

Spil og leikir | Breytt s.d. kl. 19:15 | Slóð | Facebook | Athugasemdir (0)

6.1.2012 | 16:34

Nýársmót Gallerý Skákar: Gunni Gunn fór með sigur af hólmi

Nýársmót Gallerý skákar var haldið í gærkvöldi í Listasmiðjunni, Bolholti og fór fram í góðu yfirlæti. Tuttugu keppendur tóku þátt og tefldu 11 umferðir með 10 mín. uht., eins og venjan er þar á bæ.

Hinn aldni skákmeistari Gunnar Kr. Gunnarsson (78) , fyrrv. Íslandsmeistari og forseti SÍ, sýndi styrk sinn og sannaði það að lengi lifir í gömlum glæðum með því að fara enn einu sinni með sigur af hólmi í kappmóti, enda þótt hraðskákmót væri.

Gunnar hlaut 9 vinninga og fór létt með þetta, en sérstaka athygli vakti að hinn ungi skákmaður Atli Jóhann Leósson náði sér vel á strik og varði í 2. sæti með 8 vinninga.

Kristinn Bjarnason varð þriðji með 7.5 v.

Hið unga og upprennandi skákséní Vignir Vatnar Stefánsson, aðeins 8 ára, gerði sér lítið fyrir og varð í deildu 4.-6. sæti ásamt Gísla Gunnlaugssyni og Stefáni Þormar Guðmundssyni, gamalreyndum refum, með 6 og hálfan. Þrátt fyrir góðan árangur var hinn ungi meistari sár við sjálfan sig fyrir að missa nokkrar skákir fyrir borð, en slíkt hendir einnig þá eldri, sem hafa ekki úr háum söðli að detta hvað það varðar. Annars var mótið frekar jafnt og enginn vinningur auðsóttur frekar en fyrri daginn. Sigurvegararnir voru leystir út með nammi.

Önnur úrslit skv. töflu og nánar um mótið á www.galleryskak.net.

Spil og leikir | Breytt s.d. kl. 16:36 | Slóð | Facebook | Athugasemdir (0)

6.1.2012 | 16:11

Skákdagurinn ræddur

Fundur allmargra forystumanna í skákhreyfingunni fór fram í húsnæði SÍ í gær. Stefán Bergsson ritaði fundgerð sem má hér finna í heild sinni.

Fundur forystumanna í skákhreyfingunni um Skákdaginn

Skáksambandi Íslands

5. janúar 2012

20:00 - 21:30

Fundargerð

Mættir: Halldór Grétar Einarsson Taflfélagi Bolungarvíkur, Helgi Árnason Fjölni, Vigfús Óðinn Vigfússon Helli, Tinna Kristín Finnbogadóttir og Erla UMSB, Finnur Kr. Finnsson fulltrúi heldri skákmanna á höfuðborgarsvæðinu, Pálmi Pétursson Mátum, Eiríkur Björnsson TR, Áróra Hrönn Skúladóttir kennari Salaskóla og skákforeldri, Gunnar Björnsson forseti SÍ og Stefán Bergsson framkvæmdastjóri Skákakademíu Reykjavíkur.

Í gegnum Skype tóku þátt Guðmundur Ingvi Jóhannsson og Jón Björnsson frá SAUST og Unnar Ingvarsson Skákfélagi Sauðarkróks.

1. Kynning frá SÍ og SR.

Stefán Bergsson fór yfir hugmyndina með Skákdeginum; að sem flestir skákviðburðir væru um allt Ísland á Skákdaginn, sem flestir tefldu á öllum aldri, Friðriki Ólafssyni til heiðurs. Þannig megi í senn sýna Friðriki Ólafssyni þakklæti fyrir sitt framlag og um leið sýna þjóðinni þá stórsókn sem íslensk skákhreyfing hefur blásið til síðustu misserin, nú síðast með samningi um Reykjavíkurskákmótið í Hörpu. Skákdagurinn verður árlegur viðburður.

2. Fulltrúar taflfélaganna fóru yfir hvað þeirra félag hyggst gera á Skákdaginn.

TR: TR-ingar horfa til viðburðar um kvöldið í félagsheimili sínu í Faxafeni. Hafa hug á að heiðra Friðrik enda hann félagsmaður í Taflfélaginu alla tíð.

Mátar: Mátar tefla reglulegar innanfélagsmentur á fimmtudögum. Mátar hyggjast virkja sem flesta nýja félagsmenn á Skákdaginn en margir Mátar gengu í Máta síðastliðið haust.

Hellir: Hellismenn líta jafnvel til göngugötunnar í Mjódd, en hafa ekki sal sinn til afnota á fimmtudögum.

Fjölnir: 19. Meistaramót Rimaskóla verður haldið á Skákdaginn.

UMSB: Borgfirðingar stefna á fjöltefli stórmeistara um miðjan daginn á Hyrnutorgi. Sundlaugin í Borgarnesi verður skákvædd með skáksetti frá Skákakademíu Reykjavíkur.

Skákhreyfing heldri borgara á höfuðborgarsvæðinu: Hið árlega TOYOYTA-mót verður hugsanlega haldið í höfuðstöðvum fyrirtækisins. Einnig er möguleiki á að heldri skákmenn tefli í Smáralindinni.

Bolvíkingar: Stefna á innanfélagsmót. Félagsmenn halda reglulegar æfingar heima hjá hverjum öðrum.

Skákfélag Sauðarkróks: Sauðkræklingar halda reglulegar skákæfingar og munu standa fyrir skákviðburði á Skákdaginn. Kennsla er hafinn í skólum.

SAUST: Austfirðingar leggja áherslu á skákviðburð innan skólanna en nokkur skákkennsla er á Austurlandi. Sverrir Gestsson skólastjóri og skákmaður stendur fyrir kennslunni.

Að auki barst fundinum erindi frá nokkrum félögum sem áttu ekki fulltrúa en munu standa fyrir skákviðburðum á Skákdaginn.

Skákfélag Akureyrar: - stefna að mótshaldi enda mikil skákhefð nyrðra á fimmtudögum.

VIN: - minningarmót um Björn Sigurjónsson.

Goðinn: - mikil áform, sýningar, taflmennska og opið hús.

Strandir: - Strandamenn standa fyrir skákviðburði.

3. Hugmyndir og frjálsar umræður

Miklar og góðar umræður áttu sér stað á fundinum með þátttöku allra fundarmanna. Bæði í tengslum við Skákdaginn og skákstarf almennt. Hér að neðan verða þær hugmyndir útlistaðar á snarpan máta:

a) Teflt úti á miðum á Skákdaginn gegnum netið.

b) Hjörvar Steinn teflir við þjóðina gegnum netið.

c) Teflt í sem flestum skólum landsins á sama tíma. Áróra kennari í Salaskóla nefndi sambærilegt dæmi um þegar margir nemendur landsins hlustuðu á sömu sögu á sama tíma.

d) Unnar Ingvarsson kom með hugmynd um að skákmeistarar rúntuðu hringinn um landið og tefldu fjöltefli. Borgfirðingar tóku undir þetta og nefndu vinsældir fjöltefla Helga Ólafs í Borgarnesi fyrir nokkrum árum. Unnar nefndi staði með fullt af skákmönnum sem fjöltefli myndu lífga við, eins og t.d. Blönduóss þar sem var mikið skáklíf fyrir 2-3 áratugum. Rætt um fjölda plássa um allt land sem hafa í gegnum tíðina haft einhverja skákvirkni.

e) Pálmi Pétursson talaði um vinnustaði þar sem skákmenn tefldu. Taldi það geta virkt slíka áhuga skákmenn enn frekar með heimsóknm skákmeistara.

f) Upp kom hugmynd um að hafa sem flest meistaramót grunnskóla á sama tíma.

g) Pálmi Pétursson stakk upp á að stefna stjórnarandstöðunni gegn ríkisstjórninni á skákborðinu.

h) Halda yfirlit yfir fjölda tefldra skák á Skákdaginn.

i) Hafa rafræna gestabók landsmanna sem tefla á Skákdaginn.

Fundinn ritaði Stefán Bergsson.

Spil og leikir | Slóð | Facebook | Athugasemdir (0)

6.1.2012 | 15:35

Veitingasala verður á Íslandsmóti barna í Rimaskóla

Á Íslandsmóti barna 2012, sem hefst kl. 11:00 á morgun laugardag, verður boðið upp á veitingasölu á mótstað í Rimaskóla.

Það er skákdeild Fjölnis sem sér um veitingasöluna að þessu sinni. Boðið verður upp á mat og drykki, hollustu og óhollustu í góðu úrvali.

Hægt verður að greiða með korti og peningum en ekki í boði að skrifa. Í Rimaskóla er gott rými og góð aðstaða til að njóta góðra veitinga á sanngjörnu verði.

Spil og leikir | Slóð | Facebook | Athugasemdir (0)

6.1.2012 | 01:46

Guðmundur tapaði í lokaumferðinni - fín frammistaða

Alþjóðlegi meistarinn Guðmundur Kjartansson (2326) tapaði fyrir franska stórmeistaranum Andrei Istatescu (2627) í hörkuskák í níundu og síðustu umferð Hastings-mótsins sem fram fór í dag. Guðmundur hlaut 6 vinninga og endaði í 8.-20. sæti. Fín frammistaða hjá Guðmundi sem var nærri stórmeistaraáfanga en hefði þurft sigur í lokumferðinni.

Frammistaða Guðmundar samsvaraði 2499 skákstigum. Guðmundur hækkar um heil 20 stig fyrir frammistöðuna.

Kínverski stórmeistarinn Wang Yue (2697) sigraði á mótinu en hann hlaut 7½ vinning. Istatescu varð í 2.-4. sæti með 7 vinninga ásamt indversku alþjóðlegu meisturunum Babu Lalith (2484) og Sundar Shyam (2462).

Skákir Guðmundar úr tveimur síðustu umferðunum fylgja með fréttinni.

116 skákmenn tóku þátt í Hastings. Þar á meðal voru 13 stórmeistarar. Guðmundur var nr. 30 í stigaröð keppenda.

Heimasíða mótsins
Beinar útsendingar (kl. 14:15)

Spil og leikir | Breytt s.d. kl. 01:54 | Slóð | Facebook | Athugasemdir (0)

6.1.2012 | 01:35

Riddarinn: Sigurður Herlufsen á mikilli sigurbraut

Nýársmót Riddarans fór fram í 4. janúar í Vonarhöfn, þar sem 23 aldnar skákkempur voru mættar til tafls og hófu nýtt skákár. Reyndar höfðu þó einhverjir í hópnum tekið forskot á sæluna í Ásgarði í gær enda virkir í báðum skákklúbbum eldri borgara.

Að venju voru tefldar 11 umferðir með 10 mín. uht. í striklotu enda sötra keppendur kirkjukaffi eða vígt vatn meðan á atganginum stendur, sem gefur mönnum byr í seglin, hressir og kætir.

Athygli vakti að sigursæli og trausti skákmaður Sigurður Herlufsen (75) fullkomnaði þrennuna með því að vinna þriðja mótið í Riddaranum í röð og nú með 10 vinningum af 11 mögulegum. Skemmst er að minnast að hann vann Jólakappmótið í síðustu viku einnig, hlaut þá 8.5v. og mótið fyrir Jólin með
9.5v, enda þótt við ramman reip hafi verið að draga og þrælsterkir fyrrv. meistaraflokksmenn meðal keppenda.

Reyndar er það svo að Sigurður hefur unnið 5 af síðustu 6 mótum, sem er einnig klúbbsmet og hefur hlotið í þeim hlotið 54.5 vinning af 66 mögulegum. Geri aðrir betur. Einstaklega glæsilegur og góður árangur sérstaklega í ljósi þess að hann teflir afar litlausan stöðubaráttustíl, svona í anda Botvinniks eða Petrosians fyrrv. heimsmeistara. Kannski veldur lognværan og látleysið því að mótherjum hans hættir til að sofna á verðinum, ef þeim verður á minnsta ónákvæmni er taflið tapað, nema tímahrak komi til.

Önnur úrslit skv. meðf. töflu:

Meira á www.riddarinn.net.

Spil og leikir | Breytt s.d. kl. 14:48 | Slóð | Facebook | Athugasemdir (0)

6.1.2012 | 01:29

Páll Leó ofurhraðskákmeistari SSON

Pall Leó Jónsson vinnur hraðskákmót af öryggi. Níu keppendur mættu til leiks í gærkvöldi á ofurhraðskákmóti SSON og tefldu tvöfalda umferð af 5 mínútna skákum alls 16 skákir hver. Páll Leó var með fullt hús vinninga að loknum fyrri hlutanum en slakaði eilítið á í þeim seinni, tapaði fyrir Ingvari Erni sem varð annar á mótinu og gerði jafntefli við formanninn og Ingimund.

Lokastaðan:

1. Páll Leó           14
2. Ingvar Örn      11
3. Ingimundur     9,5
4. Magnús           9
5. Erlingur J         9
6. Inga               8,5
7. Grantas          6,5
8. Magnús Garð 6
9. Arnar              0

Heimasíða SSON

Spil og leikir | Slóð | Facebook | Athugasemdir (0)

« Fyrri síða | Næsta síða »