Barna- og unglingaæfingar Hellis hefjast aftur eftir jólafrí í dag

Barna- og unglingaæfingar Hellis hefjast aftur eftir jólafrí mánudaginn 9. janúar 2011. Taflið byrjar kl. 17:15 og fyrirkomulagið verður það sama og fyrir áramót.  Æfingarnar eru opnar öllum 15 ára og yngri. Engin þátttökugjöld.

Æfingarnar verða haldnar í félagsheimili Hellis í Álfabakka 14a, Mjódd. Inngangur er við hliðina á Subway en salur félagsins er á þriðju hæð hússins. Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til. Umsjón með æfingunum hefur Vigfús Ó. Vigfússon.

Atkvöld hjá Helli í kvöld

Fyrsti viðburður Taflfélagsins Hellis á nýju ári verður atkvöld mánudaginn 9. janúar nk. og hefst taflið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Æfingunni ætti að vera lokið um kl. 22. Teflt er í félagsheimili Hellis í Álfabakka 14a í Mjóddinni. 

Sigurvegarinn fær í verðlaun pizzu frá Dominos Pizzum. Þá verður einnig dreginn út af handahófi annar keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri)

KORNAX mótið - Skákþing Reykjavíkur hófst í dag - mjög góð þátttaka!

Fyrsta umferð KORNAX mótsins - Skákþings Reykjavíkur fór fram í dag.  Mjög góð þátttaka er á mótinu eða 73 skákmenn sem er jafnmargir og tóku þátt árið 1999!  Leita þarf mjög langt aftur til að finna meiri þátttöku.  Ekkert var um óvænt úrslit í fyrstu umferð og unnu hinir stigahærri þá stigalægri.   Mótið er sterkt en fimm alþjóðlegir meistarar eru meðal þátttakenda. 

Úrslit 1. umferðar má finna hér og röðun 2. umferðar, sem fram fer á miðvikudagskvöld, má finna hér.

• Heimasíða mótsins
• Chess-Results
• Myndaalbúm (SRF og JHR)

Beinar útsendingar frá KORNAX mótinu

Fimm skákir hverrar umferðar frá KORNAX mótinu eru sýndar beint.  Meðal keppenda á mótinu eru landsliðsmennirnir Hjörvar Steinn Grétarsson og Bragi Þorfinnsson.  Hægt er að nálgast beinar útsendingar fyrstu umferðar hér.

• Heimasíða mótsins
• Chess-Results

Myndir frá Íslandsmóti barna

Hrafn Jökulsson fór mikinn með myndavélina í gær á Íslandsmóti barna og tók fjölda skemmtilegra mynda.   Hér má sjá nokkur sýnishorn en myndaalbúmið má finna í heild sinni hér.

 

 Íslandsmeistarinn Nansý Davíðsdóttir

 

 

  Forsetinn fékk gefins tafl - á því að tefla fyrstu skákina í Norðurheimskauptsmótinu

 

 Fyrrum Íslandsmeistarar barna - Víðir Smári og Dawid Kolka tefldu sýningareinvígi

 Hilmir Hrafn og Vignir Vatnar urðu í 2.-3. sæti

Donika Kolica hjálpaði til við mótshaldið ásamt Andreu sem kynnti Skákfélag fjölskyldunnar

 Hart barist!

KORNAX mótið - Skákþing Reykjavíkur hefst kl. 14 - stefnir í afar sterkt og fjölmennt mót

Enn opið fyrir skraningu!

KORNAX mótið 2012 - Skákþing Reykjavíkur hefst sunnudaginn 8. janúar kl. 14. Tefldar verða 9 umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14.  Teflt er í húsnæði Taflfélags Reykjavíkur að Faxafeni 12.

Nú eru 74 keppendur skráðir til leiks og þar á meðal 5 alþjóðlegir meistarar þeir: Hjörvar Steinn Grétarsson (2470), Bragi Þorfinnsson (2426), Björn Þorfinnsson (2406) og Guðmundur Kjartansson (2326) og Sævar Bjarnason (2118). 

Skráning í mótið fer fram á heimasíðu TR og hér á Skák.is og upplýsingar um skráða keppendur má finna hér.  

Verðlaun:

• 1. sæti kr. 100.000
• 2. sæti kr. 50.000
• 3. sæti kr. 25.000
• Besti árangur undir 2000 skákstigum kr. 10.000 (íslensk stig gilda)
• Besti árangur undir 1800 skákstigum kr. 10.000 (íslensk stig gilda)
• Besti árangur undir 1600 skákstigum - bókaverðlaun (íslensk stig gilda)
• Besti árangur undir stigalausra - bókaverðlaun

Sigurvegarinn hlýtur auk þess nafnbótina Skákmeistari Reykjavíkur 2012 og farandbikar til varðveislu í eitt ár.  Núverandi Skákmeistari Reykjavíkur er Björn Þorfinnsson.

Þátttökugjöld:

• kr. 4.000 fyrir 16 ára og eldri
• kr. 2.000 fyrir 15 ára og yngri

Dagskrá:

• 1. umferð sunnudag   8. janúar  kl. 14
• 2. umferð miðvikudag 11. janúar  kl. 19.30
• 3. umferð föstudag     13. janúar  kl. 19.30
• 4. umferð sunnudag   15. janúar  kl. 14
• 5. umferð miðvikudag 18. janúar  kl. 19.30
• 6. umferð föstudag      20. janúar  kl. 19.30
• 7. umferð sunnudag    22. janúar  kl. 14
• 8. umferð miðvikudag 25. janúar  kl. 19.30
• 9. umferð föstudag      27. janúar  kl. 19.30

Skákþingið er reiknað til alþjóðlegra skákstiga.

Skráning fer fram á heimasíðu Taflfélags Reykjavíkur, http://www.taflfelag.is.

Athugið að skráningu lýkur 15 mínútum fyrir auglýst upphaf móts, þ.e. kl. 13.45.

Henrik með jafntefli í sjöundu umferð

Stórmeistarinn Henrik Danielsen (2536) gerði jafntefli við Indverjann Mishra Swayams (2386) í sjöundu umferð alþjóðlega mótsins í Chennai í Indlandi.  Henrik hefur 5 vinninga og er í 20.-45. sæti.

Næstu nótt teflir hann við sjötta Indverjann í jafn mörgum skákum að þessu sinn við R. Aswath (2249).

Alls taka 297 skákmenn þátt í mótinu og þar af eru 16 stórmeistarar.   Henrik er nr. 5 í stigaröð keppenda.  

Hægt er að fylgjast með nokkrum skákum beint í hverri umferð á Chessbomb og virðast skákir Henriks yfirleitt vera sýndar.  Umferðirnar hefjast hins vegar allar hér eftir kl. 4 að nóttu!

• Heimasíða mótsins 
• Chessbomb

 

 

Sögulegur sigur: Nansý Davíðsdóttir Íslandsmeistari barna 2012!

Nansý Davíðsdóttir er Íslandsmeistari barna í skák 2012 eftir glæsilegan sigur á æsispennandi Íslandsmóti barna í Rimaskóla. Nansý er fyrsta stúlkan sem sigrar á Íslandsmóti barna, en fyrst var keppt um titilinn árið 1994.

 Nansý sýndi mikið öryggi og tapaði ekki skák á mótinu. Hún gerði aðeins eitt jafntefli og hlaut 8,5 vinning í 9 umferðum. Með sigrinum tefldi Nansý sig inn í ungmennalandslið Íslands, sem keppir á Norðurlandamótinu í skólaskák í Finnlandi í febrúar.

Nansý hlaut glæsilegan bikar til eignar, auk þess að fá farandbikar til varðveislu næsta árið og þriðja bikarinn fyrir sigur í sínum aldursflokki. Þá hlaut Íslandsmeistarinn 25 þúsund króna inneign hjá Bónus.

Hilmir Freyr Heimisson varð í 2. sæti á mótinu með 8 vinninga. Hilmir tapaði ekki skák, en gerði 2 jafntefli. Í 3. sæti varð Vignir Vatnar Stefánsson með 7,5 vinning, sem er frábær frammistaða þar sem Vignir er aðeins í þriðja bekk. Hilmir Freyr og Vignir Vatnar sigruðu í sínum árgöngum, sem og Þorsteinn Emil Jónsson, Krummi Arnar Margeirsson og Óskar Víkingur Davíðsson.

Keppendur á Íslandsmótinu voru alls 88 og verða heildarúrslit birt á skak.is innan tíðar, ásamt fjölda mynda og frekari fréttum af mótinu.

Ólafur Ragnar Grímsson forseti Íslands var heiðursgestur á Íslandsmótinu og flutti setningarræðu. Þar boðaði forsetinn að haldið yrði Norðurskautsmót fyrir börn, með aðild þeirra 8 landa sem eiga aðild að Norðurskautsráðinu.

Henrik vann í sjöttu umferð

Stórmeistarinn Henrik Danielsen (2536) vann Indverjann M Kunal (2288) í sjöttu umferð alþjóðlega mótsins í Chennai í Indlandi sem fram fór í nótt/morgun.  Henrik hefur nú 4,5 vinning og er í 16.-40. sæti.

Næstu nótt teflir hann við Indverjann Mishra Swayams (2386).

Alls taka 297 skákmenn þátt í mótinu og þar af eru 16 stórmeistarar.   Henrik er nr. 5 í stigaröð keppenda.  

Hægt er að fylgjast með nokkrum skákum beint í hverri umferð á Chessbomb og virðast skákir Henriks yfirleitt vera sýndar.  Umferðirnar hefjast hins vegar allar hér eftir kl. 4 að nóttu!

• Heimasíða mótsins 
• Chessbomb

 

 

Íslandsmót barna hefst kl. 11 í Rimaskóla - Forseti Íslands setur mótið

Íslandsmót barna í skák fer fram í Rimaskóla laugardaginn 7. janúar og hefst klukkan 11. Þátttökurétt hafa börn í 1. til 5. bekk (fædd 2001 og síðar) og sigurvegarinn fær sæmdarheitið Íslandsmeistari barna 2012 og ferð á Norðurlandamótið í skólaskák í Finnlandi í febrúar.  Þátttaka er ókeypis.

Ólafur Ragnar Grímsson forseti Íslands verður heiðursgestur við setningu mótsins. Forsetinn mun hitta keppendur, foreldra, áhugamenn og forystumenn í íslensku skáklífi og leika fyrsta leikinn á mótinu.

Alls verða tefldar 9 umferðir með 10 mínútnaumhugsunartíma. Eftir 5 umferðir munu 15 efstu keppendur halda áfram í lokakeppni um Íslandsmeistaratitilinn og þeir sem verða jafnir að vinningum þeim í 15. sæti, en öðrum börnum býðst að tefla í fjöltefli við Helga Ólafsson stórmeistara og skólastjóra Skákskóla Íslands. Jafnframt verða námskeið Skákskólans á vorönn kynnt.

Glæsileg verðlaun eru í boði á mótinu. Sigurvegarinn vinnur sér inn ferð á Norðurlandamótið í skólaskák í Finnlandi, sem fram fer í febrúar. 

Bónus gefur þremur efstu keppendum á Íslandsmótinu inneignarkort, samtals að andvirði 50 þúsund krónur, og fjöldi skemmtilegra vinninga verður í happdrætti Íslandsmótsins, svo allir eiga möguleika á glaðningi.

Verðlaunin frá Bónus skiptast þannig að 1. sæti gefur 25 þúsund króna inneign, 2. sætið 15 þúsund og 3. sætið 10 þúsund. Ef verðlaunahafar eru jafnir að vinningum munu verðlaunin skiptast jafnt á milli þeirra.

Í happdrætti mótsins verða margir vinningar, bækur, geisladiskar, leikhúsmiðar, borðspil, sundkort og fjölskylduferð í Húsdýragarðinn, svo nokkuð sé nefnt. Eftirtalin fyrirtæki gefa vinninga: Sena, Nexus, Húsdýragarðurinn, ÍTR, Borgarleikhúsið og Sögur útgáfa.

Síðast en ekki síst verður keppt um skínandi verðlaunapeninga og bikara á Íslandsmótinu í Rimaskóla og eru veitt verðlaun fyrir bestan árangur í hverjum árgangi.

Á mótinu verður boðið upp á veitingasölu á mótstað í Rimaskóla.  Það er skákdeild Fjölnis sem sér um veitingasöluna að þessu sinni. Boðið verður upp á  mat og drykki, hollustu og óhollustu í góðu úrvali. Hægt verður að greiða með korti og peningum en ekki í boði að skrifa. Í Rimaskóla er gott rými og góð aðstaða til að njóta góðra veitinga á sanngjörnu verði.

Þetta er í 19. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. 

 
Skákakademía Reykjavíkur annast framkvæmd mótsins í samvinnu við Skáksamband Íslands. Keppendur eru hvattir til að skrá sig sem fyrst á Skák.is. 

Hægt er að fylgjast með skráningu hér.
 
Sigurvegarar á Íslandsmóti barna frá upphafi:
 
1994 Sigurður Páll Steindórsson
1995 Hlynur Hafliðason
1996 Guðjón H. Valgarðsson
1997 Dagur Arngrímsson
1998 Guðmundur Kjartansson
1999 Víðir Smári Petersen
2000 Viðar Berndsen
2001 Jón Heiðar Sigurðsson
2002 Sverrir Þorgeirsson
2003 Hjörvar Steinn Grétarsson
2004 Svanberg Már Pálsson
2005 Nökkvi Sverrisson
2006 Dagur Andri Friðgeirsson
2007 Kristófer Gautason
2008 Kristófer Gautason
2009 Jón Kristinn Þorgeirsson
2010 Jón Kristinn Þorgeirsson
2011 Dawid Kolka