Reykjavík Barna Blitz: Ungstirnin áfram

Átta manna úrslit í Reykjavik Barna Blitz fóru fram í dag. Spennan var mikil enda nokkur áfangi að komast í gegnum undanrásir taflfélaganna. Hilmir Freyr og Vignir Vatnar komust nokkuð örugglega áfram. Hilmir lagði nafna sinn Hrafnson að velli og Vignir sigraði félaga sinn úr TR Gauta Pál Jónsson. Baldur Teodor Petersson komst áfram eftir bráðabana þar sem Kristófer Jóel lék af sér kóngnum í unninni stöðu. Loks lagði Nansý Davíðsdóttir Dawid Kolka að velli í sviptingamiklu einvígi.

Undanúrslitin fara fram á morgun klukkan 14:00 í Hörpu.

Þá mætast:

Hilmir Freyr - Vignir Vatnar

Baldur Teodor - Nansý Davíðsdóttir

Vignir og Nansý komust einnig í undanúrslit í fyrra og lenti Nansý þá í öðru sæti en Vignir í þriðja.

Myndaalbúm (Hrafn Jökulsson)

Henrik og Stefán með fullt hús á N1 Reykjavíkurskákmótinu

Stórmeistararnir Henrik Danielsen og Stefán Kristjánsson eru meðal efstu manna með fullt hús að lokinni 3. umferð N1 Reykjavíkurmótsins sem fram fór í kvöld.  Henrik vann Dag Ragnarsson, sem hefur verið sá skákmaður sem mest hefur komið á óvart. 

Stefán Kristjánsson vann litháískan FIDE-meistara.   Heimsmeistarinn Hou Yifan mátti sætta við jafntefli við þýska alþjóðlegan meistara í hörkuskák.

Meðal óvæntra úrslita má nefna að Einar Hjalti Jensson gerði sitt annað jafntefli við stórmeistara að þessu sinni við franska stórmeistarann Fabian Libiszewski.  Björn Freyr Björnsson gerði jafntefli við bandaríska stórmeistarann Yuri Shulman.   

Einnig náðu Dagur Kjartansson, Halldór Pálsson, Hrannar Jónsson, Nökkvi Sverrisson og Svandís Rós Ríkharðsdóttir eftirtektarverðum úrslitum.   

Öll úrslit 3. umferðar má finna hér.    

Stöðu mótsins má finna hér.

Fjórða umferð fer fram á morgun og hefst kl. 15.  Þá hefjast skákskýringar í umsjón Jóhanns Hjartarsonar kl. 17:30.  Röðun 4. umferðar má finnast hér.

Í 4. umferð mætast m.a.:     

• Fabiano Caruana - Erwin L´ami
• Ivan Sokolov - Simon Williams
• Robert Hess - Henrik Danielsen
• Stefán Kristjánsson - Gawain Jones
• Adam Hunt - Hou Yifan
• Thomas Trella - Héðinn Steingrímsson
• Hannes Hlífar Stefánsson - Joachim Thomassen

Heimasíður

• Heimasíða mótsins
• Beinar útsendingar
• Pallborðið og vefútsending
• Chess-Results

Bein útsending úr Hörpunni

reykjavikopen on livestream.com. Broadcast Live Free

Vel heppnaður fyrirlestur Avrukhs í morgun

Margt skemmtilegt er á dagskránni meðfram Reykjavíkurskákmótinu. Í morgun hélt Boris Avrukh fyrirlestur um fyrirbyggjandi aðgerðir og byrjanaundirbúning. Var fyrirlesturinn vel sóttur en um 40 manns hlýddu á stórmeistarann. Avrukh er einn þekktasti byrjanasérfræðingur heims og var meðal annars spurður hvernig honum fyndist að andstæðingar hans hefðu aðgang að bókunum.Sagði hann þá leitast við að breyta útaf í skákum sínum á einhverjum tímapunkti miðað við teoríuna í bókum sínum. 

Fjölbreytni einkenndi áhorfandahópinn en þar voru bæði stórmeistarar og byrjendur, og útlendingar og Íslendingar skiptust hér um bil til jafns. 

Var fyrirlesturinn mjög fróðlegur, vel heppnaður og slíkar uppákomur án efa eftir að einkenna Reykjavíkurskákmót næstu ára. 

Á morgun klukkan 21:00 fer fram Chess Puib Quiz (Skákspurningakeppni) í Hörpunni. Tveir keppendur í hverju liði. 

Á laugardaginn er svo skákmót í Viðey um morguninn og klukkan 13:00 Málþing um skákkennslu í Hörpu.

Íslendingar í eldlínunni: Hjörvar gegn Navara!

Fjölmargir Íslendingar verða í eldlínunni á efstu borðum í þriðju umferð N1 Reykjavíkurskákmótsins í Hörpu. Ellefu íslenskir skákmenn hafa unnið fyrstu tvær skákirnar og aðeins tveir mætast innbyrðis: Hinn ungi Dagur Ragnarsson mætir stórmeistaranum Henrik Danielsen.

Þúsundir skákáhugamanna um allan heim munu fylgjast með viðureign tékkneska snillings David Navara og Hjörvars Steins Grétarssonar, efnilegasta skákmanns Íslands.

Sverrir Örn Björnsson, sem í gær skellti alþjóðlega meistaranum Birni Þorfinnssyni, fær nú að glíma við enska stórmeistarann Simon Williams.

Af öðrum skákum heimavarnarliðsins í dag má nefna að  Jón Viktor Gunnarsson mætir Bandaríkjamanninum Robert Hess, meðan Bragi Þorfinnsson stígur dans með Kuzubov.

Á allra efstu borðum eru mjög áhugaverðar viðureignir. Bandaríska skákkonan Irina Krush teflir við Caruana og heimsmeistarinn Hue Yifan mætir Þjóðverjanum Thomas Trella.

Umferðin hefst klukkan 16.30 í Hörpu og eru skákáhugamenn hvattir til að mæta og sjá dýrðina með eigin augum.

Málþing um skákkennslu fer fram á laugardag í Hörpu

Málþing um skákkennslu verður haldið í Hörpu laugardaginn 10. mars klukkan 13:00 - 14:15. Þar munu skákfrömuðir, skólafólk og stórmeistarar ræða um gildi skákkennslu fyrir börn og tengsl skákkunnáttu og námsárangurs.

Málþingið er haldið í tengslum við N1 Reykjavíkurskákmótið, sem haldið er í Hörpu, en þar tefla margir af sterkustu skákmönnum heims af báðum kynjum. Reykjavíkurskákmótið er mesta skákhátíð ársins á Íslandi. Meðal keppenda eru börn og ungmenni, í bland við eldri og reyndari meistara.

Á málþinginu í Hörpu mun Stefán Bergsson framkvæmdastjóri Skákakademíu Reykjavíkur flytja fyrirlestur um skákkennslu á Íslandi, en skák er nú kennd í fjölmörgum grunnskólum vítt og breitt um landið.

Helgi Árnason skólastjóri Rimaskóla fjallar um ævintýralegan árangur skólans á liðnum árum, en Rimaskóli er margfaldur Íslands- og Norðurlandameistari, og krakkarnir úr Grafarvogi hafa sópað til sín verðlaunum.

Ingibjörg Rósa Ívarsdóttir kennari við Lágafellsskóla flytur erindi og fjallar um ávinning barna af skákiðkun.

Helgi Ólafsson stórmeistari og skólastjóri Skákskóla Íslands ræðir um skákrannsóknir og skákforrit. Helgi er lærimeistari heillar kynslóðar efnilegustu ungmenna landsins og hefur af miklu að miðla.

Síðast en ekki síst mun bandaríski stórmeistarinn Maurice Ashley segja frá starfi sínu meðal æskufólks í Bandaríkjunum. Ashley hefur gríðarmikla reynslu sem kennari og þjálfari, og er mikill ávinningur að því að fá hann til þátttöku á málþinginu í Hörpu. Yfirskriftin að erindi stórmeistarans er „Skák er skemmtileg" - sem er sannarlega viðeigandi, einsog skákveislan mikla í Hörpu er til marks um.

Allir eru velkomnir og aðgangur er ókeypis.

 

Dagskrá á málþingi um skákkennslu í Hörpu:

Stefán Bergsson framkvæmdastjóri Skákakademíu Reykjavíkur

Yfirlit yfir skákkennslu á Íslandi.

Helgi Árnason skólastjóri Rimaskóla

Skákskólinn Rimaskóli

Ingibjörg Rósa Ívarsdóttir kennari Lágafellsskóla

Ávinningur af skákiðkun

Helgi Ólafsson

Skákrannsóknir og skákforrit

Maurice Ashley stórmeistari og skákfrömuður í Bandaríkjunum

Skák er skemmtileg

 

Leiðréttingar frá Magnúsi Sólmundarsyni

Skáksagan greinir frá því 16.1 2012 að Baldur Möller hafi þrívegis orðið skákmeistari Íslands, þetta er nú langt frá því rétta, sjö sinnum vann hann þennan eftirsótta titil, það munar um minna! 

Sjálfsagt hefur höf. fengið rangar uppl. einhversstaðar, prentvilla eða eitthvað annað allavega hef ég ekki séð neina leiðréttingu. 

Það er sitthvað annað að athuga við þessa Skáksögu og sýnir að menn þurfa að vanda sig þegar þeir skrifa um Skáksögu Íslands sem er okkur öllum svo kær, annars breytist þetta í sögufölsun með hugsanlega slæmum afleiðingum seinna meir.

Þá er það skákþáttur Helga Ólafssonar nú nýlega, þar er Gunnar Gunnarsson sagður eini Íslandsm. í skák á tuttugustu öld sem hafi einnig orðið Íslandsm. í annarri grein (Knattspyrna). Ekki er hann alveg sá eini og kemur nú Baldur Möller aftur við sögu, en Baldur var sem ég held að fáir viti var einn af fótfráustu mönnun Íslands um og fyrir 1940.

Meistaramót Íslands. 1935. 400.hundruð m. hlaup.Ísl.m. Baldur Möller

                   "                1941 200. hundruð m.hlaup          sami

 Þá var Baldur í sigursveit Ármanns í 4x100 m. boðhl. á Meistaram. 1941.

Magnús Sólmundarson 

Alþjóðlega Viðeyjarmótið fer fram á laugardag

Alþjóðleglega Viðeyjarmótið (Viðey International) fer fram laugardagsmorgun.  Teflt verður hraðskákmót, 7 umferðir.  Tekin verður ferja frá Hörpu kl. 9:30 og til baka um kl. 13.   Þátttökugjöld eru 2.000 kr.   Aðeins 35 sæti laus.

Skráning fer fram í netfangið [e-mail].

Auglýsing á ensku:

Viðey International

Saturday morning

Take a trip to the historical island near Reykjavik on Saturday morning.

-        Blitz tournament with seven rounds.

-        The ferry will leave Harpa at 9:30 and return by 13:00 (15 minute trip only - you can see the island from the playing hall!).

-        Entrance fee only 2000 kr., payable in cash on the ferry.

-        Only 35 seats available!

 

Registration on [e-mail].

Fyrirlestrar Avrukh í Hörpu í dag

Boris Avrukh sá mikli skákfræðimaður mun halda tvo fyrirlestra í Hörpu í fyrramálið, fimmtudaginn 8. mars, en Avrukh er höfundur hinna vinsælu bóka um d4 og nú síðast skrifaði hann tvær bækur um Grünfeld sem hefur verið mikið teflt á meðal sterkustu skákmanna heims. Avrukh er eftirsóttur fyrirlesari og hefur unnið bæði með Caruana og Kramnik og einnig hefur hann verið landsliðsþjálfari Ísreal svo það er mikill fengur að fá Avrukh sem fyrirlesara.  Avrukh varð á sínum heimsmeistari 12 ára og yngri og er tvöfaldur landsmeistari Ísrael. 

Fyrri fyrirlesturinn ber heitið " Prophylactical Thinking" sem snýst um að lesa í framtíðarplön og leika undirbúningsleiki, bæði til að koma veg fyrir plön andstæðingsins og undirbúa sín eigin plön.

Síðari fyrirlesturinn ber heitið "Opening preparation on high level" þar sem Avrukh stiklar á stóru að fenginni reynslu hvað þarf að hafa í huga þegar er verið að undirbúa sig  fyrir byrjanir.

Fyrirlestrarnir fara fram í skákskýringarherberginu.

10:30-11:15 Prophylactical thinking

11:15-11:30 Hlé

11:30-12:15 Opening preparation on high level

Aðgangur er ókeypis og engin skráning.

Fimmtudagsmót hjá TR í kvöld

Fimmtudagsmót hjá TR 2012 verður í kvöld og hefst að venju kl. 19:30 en húsið opnar kl. 19:10.

Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12. Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.