Munir tengdir einvíginu sýndir um helgina

Í frétt mbl.is í gær er fjallað stærsta einkasafn muna úr einvígi aldarinnar.  Sýning á vegum Landssambands íslenskra frímerkjasafnara verður um helgina en munirnir eru söfnum Sigurður R. Péturssonar og Ríkharðs Sveinssonar.

Frétt mbl.is í heild sinni:

Stærsta einkasafn landsins af munum tengdum einvígi aldarinnar, einvígi Bobby Fischer og Boris Spassky í Reykjavík 1972, verður sýnt um helgina á sýningu Landssambands íslenskra frímerkjasafnara.

Munirnir koma úr söfnum Sigurðar R. Péturssonar og Ríkharðs Sveinssonar, auk þess sem sýnt verður safn í eigu bandarísks aðila. Að auki hefur Skáksamband Íslands lánað ýmsa muni á sýninguna.

„Um er að ræða safn afar skemmtilegra muna og óhætt að fullyrða að sjaldan eða aldrei hafi munum tengdum einvíginu verið gerð viðlíka skil. Meðal annars má nefna allar medalíur og silfurskeiðar sem gerðar voru í tengslum við einvígið, veggspjöld, og myndir áritaðar af Spassky og Fischer og ýmsum fleirum mektarmönnum sem að einvíginu komu," segir í tilkynningu.

Þá er að finna aðgöngumiða á allar skákirnar, seðlaveski sem útbúið var í aðeins fimmtíu eintökum, matseðillinn á lokahófið stóra í Laugardalshöll áritaður af Ficher og Spassky og happdrættismiði þar sem aðalvinningurinn var eitt af hinum frægu skákborðum sem mikið hafa verið í umræðunni upp á síðkastið eftir að þau voru sett á uppboð erlendis. 

Þá eru óvenjulegir og forvitnilegir hlutir á borð við plastdiska og glös sem notuð voru við borðhaldið í lokahófinu, en það sótti um þúsund manns á sínum tíma. Gefið var út skákblað hvern dag sem einvígið stóð og verður sérútgáfan sýnd og jafnframt stærsta úrklippusafn sem hægt er að finna um einvígið og atburði því tengdu.

Sýning Landsambands íslenskra frímerkjasafnara, FRÍMERKI 2012, var opnuð í dag í sal KFUM og K á Holtavegi, og stendur til 3. júní.

Magnús Valgeirsson skákmeistari Fljótdalshéraðs

Magnús Valgeirsson varð skákmeistari Fljótdalshéraðs eftir úrslitaeinvígi við Guðmund Ingva Jóhannsson og rétt eins og á Íslandsmótinu í skák þurfti að framlengja einvígið. 

Skákþing Fljótdalshéraðs fór fram 12. apríl - 9. maí.  Þar urðu úrslit sem hér segir:

• 1.-2. Magnús Valgeirsson (1650) og Guðmundur Ingvi Jóhannsson (1606) 3 v. af 4
• 3.-4. Magnús Ingólfsson (1570) og Jón Björnsson (1558) 2 v.
• 5. Einar Ólafsson (1465) 0 v.

Magnús og Guðmundur tefldu tveggja skáka einvígi, því lauk með jafntefli.  Þá var teflt tveggja skáka atskákeinvíg, því lauk einnig með jafntefli.  Að lokum tefldu þeir tveggja skáka einvígi með 15 mínútna umhugsunartíma.  Þá hafði Magnús loks betur, 2-0.

Heimasíða SSAUST

Landsmót UMFÍ fyrir 50+ fer fram 9. júní

Landsmót UMFÍ fyrir 50+ fer fram um helgina 8.-10. júní í Mosfellsbæ.  Skákkeppnin fer fram laugardaginn 9. júní og fer fram á milli 12 og 17.  Keppt verður í einum flokki eftir Monrad-kerfi.  Veitt verða verðlaun fyrir bestan árangur karla og kvenna.

Landsmót UMFÍ 50+

Jón Trausti, Mikael Jóhann og Hrund efst á Meistaramóti SSÍ

Jón Trausti Harðarson (1762), Mikael Jóhann Karlsson (1926) og Hrund Hauksdóttir (1676) eru efst og jöfn með fullt hús að loknum þremur umferðum á Meistaramóti Skákskóla Íslands.   Stöðuna má finna í heild sína hér.  

Tvær umferðir eru tefldar á morgun og hefjast þær kl. 10 og 14.    Pörun 4. umferðar má finna hér.

Chess-Results

Henrik vann Georgiev í 1. umferð

Stórmeistarinn Henrik Danielsen (2498) vann makedóníska stórmeistarann Vladimir Georgiev (2555) í 1. umferð alþjóðlega mótsins í Brønshøj í Danmörku.  Henrik mætir bandaríska alþjóðlega meistaranum Greg Shadade (2471) í 2. umferð sem fram fer í fyrramálið.

Meðalstigin á mótinu eru 2441 skákstig.   Í flokknum taka 10 skákmenn þátt og þar af 3 stórmeistarar.  Henrik er nr. 3 í stigaröð keppenda.  Eins og svo oft á dönskum mótum er tefldar 2 umferðir á dag.   Umferðirnar hefjast kl. 8 og 13.  

• Heimasíða mótsins 
• Beinar útsendingar

Guðmundur Kjartansson með skákkennslu

Alþjóðlegi meistarinn Guðmundur Kjartansson (2367) er að hefja skákkennslu á Netinu.  Auglýst tímagjald eru 30 dollarar fyrir 2 tíma. 

Áhugasamir geta haft samband við [e-mail].

Henrik í beinni frá Brønshøj

Stórmeistarinn Henrik Danielsen (2498) teflir í lokuðum flokki í Brønshøj í Danaveldi sem fram fer 1.-5. júní.   Í fyrstu umferð, sem nú er í gangi, teflir Henrik við makedóníska stórmeistarann Vladimir Georgiev (2555).   Skákin er sýnd beint.

Meðalstigin á mótinu eru 2441 skákstig.   Í flokknum taka 10 skákmenn þátt og þar af 3 stórmeistarar.  Henrik er nr. 3 í stigaröð keppenda.  Eins og svo oft á dönskum mótum er tefldar 2 umferðir á dag.   Umferðirnar hefjast kl. 8 og 13.  

• Heimasíða mótsins 
• Beinar útsendingar

 

 

 

Meistaramót Skákskóla Íslands hefst í kvöld

Meistaramót Skákskóla Íslands fyrir starfsárið 2011/2012 hefst föstudaginn 1. júní. Tefldar verða sjö umferðir eftir svissneska kerfinu. Þátttökurétt hafa nemendur skólans og allir þeir sem tekið hafa þátt í námskeiðum á vegum  skólans eða hlotið þjálfun á vegum skólans.  

Núverandi meistari Skákskóla íslands er Hjörvar Steinn Grétarsson.   

Þátttökuréttur:

Allir nemendur skólans og þeir sem tekið hafa þátt í námskeiðum á vegum skólans.

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku.

Dagskrá mótsins verður með eftirfarandi hætti:

Umferðafjöldi: Sjö umferðir. Í þrem fyrstu umferðunum verða tefldar atskákir en fjórar lokaumferðirnar eru kappskákir.

Tímamörk: Atskákir 25 10  þ.e 25 mínútur að viðbættum sekúndum fyrir hvern leik. 

Kappskákir:  90 30 þ.e. 90 mínútur á alla skákina og 30 sekúndur bætast við eftir hvern leik.

Fyrirkomulag: Svissneska kerfið - Swiss Perfect

Skákstig: Mótið verður reiknað til skákstiga, en þrjár fyrstu umferðirnar til at-skákstiga.

Verðlaun:

A:

1. verðlaun:

Meistaratitill Skákskóla Íslands 2011/2012 og farandbikar. Einnig  flugfar m/Flugleiðum á Evrópuleið* og uppihalds kostnaði kr. 30 þús.

2. verðlaun: Flugfarmiði á leiðum Flugfélags Íslands innanlands.  

3. - 5. verðlaun: Vandaðar skákbækur.

Sérstök stúlknaverðlaun:

Farmiði á leiðum Flugfélags Íslands innanlands.

Aldursflokkaverðlaun. 

1. Tvenn verðlaun fyrir þá keppendur sem ná bestum árangri í hópi 14 ára og yngri

2. Tvenn verðlaun fyrir þær stúlkur sem bestum árangri ná í mótinu.

Verðlaun fyrir keppendur 12 ára og yngri.

1. - 3. verðlaun: Vandaðar skákbækur.

* ^{Mótshaldarinn áskilur sér rétt til að finna hagstæðasta fargjald sem hægt er að fá enda verði tilkynnt um ferðir með góðum fyrirvara.} 

Verðlaunahafi verður að nýta sér farmiða innan 12 mánuða frá lokum mótsins.

B:

Dagskrá:

• 1. umferð: Föstudagurinn 1. júní kl. 18  
• 2. umferð: Föstudagurinn 1. júní kl. 19
• 3. umferð. Föstudagurinn 1. júní kl. 20.
• 4. umferð: Laugardagurinn 2. júní kl. 10-14  
• 5. umferð: Laugardagurinn 2. júní 15 - 19
• 6. umferð: Sunnudagurinn 3. júní kl. 10.-14.
• 7. umferð: Sunnudagurinn 3. júní kl. 15-19.

 ^{* Hljóti einhver stúlka 1. eða 2. verðlaun mun 2. sæti meðal stúlkna gilda til sérstakra stúlknaverðlauna.}

 Verðlaunaafhending fer fram strax að móti loknu.

Þátttöku skal tilkynna í síma SÍ 5689141 á netfangið [e-mail] eða [e-mail] .

Mótsnefnd áskilur rétt til að gera breytingar á fyrirfram boðaðri dagskrá.

Skemmtileg glíma við Austurvöll: Krakkarnir skelltu skáksveit Alþingis

Úrvalslið Skákakademíu Reykjavíkur lagði harðsnúna sveit Alþingis í einvígi í dag. Fimm skipuðu hvort lið og fyrir Alþingi tefldu Guðfríður Lilja Grétarsdóttir, Guðlaugur Þór Þórðarson, Vigdís Hauksdóttir, Helgi Hjörvar og Halldór Blöndal. Halldór, sem er fv. forseti Alþingis, er formaður í skákfélagi núverandi og fyrrverandi þingmanna.

Tefldar voru tvær umferðir. Úrvalslið krakkanna sigraði í fyrri umferð með 3 vinningum gegn tveimur. Guðlaugur Þór sigraði í viðureign sinni við Doniku Kolica, Hilmir Freyr Heimisson og Halldór Blöndal gerðu jafntefli í hörkuskák, sömuleiðis Nansý Davíðsdóttir og Guðfríður Lilja.

Í seinni umferðinni settu krakkarnir í fluggír, og sigruðu með 4,5 vinningi gegn hálfum. Halldór bjargaði eina jafntefli sveitarinnar, gegn Hilmi Frey, en Nansý, Óliver Aron Jóhannesson, Vignir Vatnar Stefánsson og Felix Steinþórsson sigruðu. Lokaúrslit urðu því öruggur sigur krakkanna, sem fengu 7,5 vinning gegn 2,5 vinningi þingmanna.

Við upphaf þessa skemmtilega viðburðar færði Skákakademían forseta Alþingis, Ástu Ragnheiði Jóhannesdóttur, taflsett til afnota fyrir þingmenn.

Stefán Bergsson framkvæmdastjóri SR sagði af því tilefni að rík skákhefð væri á Alþingi og þakkaði velvilja í garð skákíþróttarinnar að fornu og nýju.

Donika Kolica afhenti Ástu Ragnheiði gjöfina, og kvaðst forseti Alþingis vona að taflsettið yrði notað sem mest, og að þingmenn hefðu margt af skákkrökkunum að læra.

Myndaalbúm (HJ)

Krakkarnir sigruðu Kálhausana í spennandi viðureign

Skákklúbbur sem ber nafnið Kálhausarnir virðist auðveld bráð, en því var ekki að heilsa þegar Úrvalslið SR kom í heimsókn í höfuðstöðvar Sölufélags garðyrkjumanna. Kálhausarnir hafa innan sinna raða grjótharða skákáhugamenn, sem jafnvel hafa teflt á alþjóðlegum mótum í útlöndum.

Guðlaugur Gauti Þorgilsson rekstrarstjóri Bónus fór fyrir sveitinni, og hann hlaut 2,5 vinning af 3 í viðureignum sínum. Aðrir liðsmenn Kálhausanna að þessu sinni voru Örvar Karlsson sölu- og markaðsstjóri hjá Banönum, feðgarnir Gunnlaugur Karlsson og Mikael Luis Gunnlaugsson, og loks Hrafn Jökulsson sem tefldi sem gestakálhaus.

Gunnlaugur, sem er framkvæmdastjóri Sölufélags garðyrkjumanna, tók höfðinglega á móti krökkunum og bauð uppá gómsætt grænmeti og ljúffenga osta og brauð sem krakkarnir kunnu vel að meta.

Úrvalssveitin vann stórsigur í 1. umferð, 4-1, en í annarri umferð bitu Kálhausar í skjaldarrendur og unnu 3-2. Lokaumferðin var æsispennandi og lauk með jafntefli, 2,5-2,5.

Lokatölur voru því 8,5 vinningur Úrvalsliðsins gegn 6,5 vinningi Kálhausanna

Úrvalssveitina skipuðu að þessu sinni Dagur Kjartansson, Donika Kolica, Hilmir Freyr Heimisson, Vignir Vatnar Stefánsson, Nansý Davíðsdóttir, Dagur Ragnarsson og Oliver Aron Jóhannesson.

Kálhausarnir voru glaðbeittir í lokin og tilkynntu að þeir ætli innan tíðar að skora á Úrvalsliðið í aðra viðureign.