Mikael Jóhann efstur fyrir lokaumferð Meistaramóts Skákskólans

Mikael Jóhann Karlsson (1926) er efstur með 5,5 vinning að lokinni sjöttu og næstsíðustu umferð Meistaramóts Skákskólans sem er að klárast.  Í 2.-3. sæti með 4,5 vinning eru Rimskælingarnir Jón Trausti Harðarson (1762) og Oliver Aron Jóhannesson (2050).   Enn er reyndar einni skák ólokið í sjöttu umferð en hún hefur ekki áhrif á allra efstu menn. Lokaumferðin hefst kl. 15.

Úrslit 6. umferðar má finna hér.

Stöðuna má finna í heild sína hér.  

Pörun 7. og síðustu umferðar má finna hér (þegar hún verður aðgengileg)

Chess-Results

Brønshøj: Henrik vann í 4. umferð

Stórmeistarinn Henrik Danielsen (2498) vann danska FIDE-meistarann Jakob Aabling-Thomsen (2331) í 4. umferð alþjóðlega mótsins í Brønshøj í Danmörku sem fram fór í morgun.  Henrik hefur nú 2,5 vinning og er í 2.-4. sæti.

Í 5. umferð, sem hefst nú kl. 13, teflir Henrik við danska alþjóðlega meistarann Mads Andersen (2432).  Danski alþjóðlegi meistarinn Nikolaj Mikkelsen (2399) er efstur með 3,5 vinning.

Meðalstigin á mótinu eru 2441 skákstig.   Í flokknum taka 10 skákmenn þátt og þar af 3 stórmeistarar.  Henrik er nr. 3 í stigaröð keppenda.  Eins og svo oft á dönskum mótum er tefldar 2 umferðir á dag.   Umferðirnar hefjast kl. 8 og 13.  

• Heimasíða mótsins 
• Beinar útsendingar

Dagur náði sér ekki á strik í Albena

Alþjóðlegi meistarinn Dagur Arngrímsson (2381) náði sér aldrei á strik á alþjóðlega mótinu í Albena í Búlgaríu sem fram fór 26. maí - 3. júní.

Dagur hlaut 4,5 vinning í 9 umferðum og endaði í 53.-67. sæti.  Frammistaða Dags samsvaraði 2171 skákstigi og lækkar hann um 22 skákstig fyrir hana.

Fimm skákmenn urðu efstir og jafnir með 7 vinninga.  Það voru Armenarnir Vladimir Akopian (2697), Tigran Petrosian (2657) og Karen Grigoryan (2517), Búlgarinn Ivan Cheparinov (2673) og Ísraelinn Tamir Nabaty (2553).

Alls tóku 123 skákmenn frá 23 löndum þátt í mótinu.  Þar af voru 20 stórmeistarar og 20 alþjóðlegir meistarar.  Dagur var nr. 37 í stigaröð keppenda.

• Heimasíða mótsins
• Chess-Results

Hjörvar og Þorsteinn unnu í fyrstu umferð í Val Gardena

Í dag hófst alþjóðlegt mót í Val Gardena í Ítalíu.  Þátt taka alþjóðlegi meistarinn Hjörvar Steinn Grétarsson (2477) og FIDE-meistarinn Þorsteinn Þorsteinsson (2248).   Í fyrstu umferð unnu þeir báðir umtalsvert stigalægri andstæðinga. 

Í 2. umferð, sem fram fer á morgun, teflir Þorsteinn við úkraínska stórmeistarann Oleg Romanishin (2511) en Hjörvar við ítalska FIDE-meistarann Fabrizio Molina (2269).

56 skákmenn frá 19 löndum taka þátt í þessu móti og þar af eru 14 stórmeistarar og 9 alþjóðlegir meistarar.   Hjörvar er nr. 13 í stigaröð keppenda en Þorsteinn er nr. 28.  

Allar skákir mótsins eru sýndar beint og hefjast umferðir kl. 13.  

• Heimasíða mótsins
• Úrslitaþjónusta
• Beinar útendingar (hefjast kl. 13 nema síðasta umferðin kl. 7)

 

Mikael Jóhann efstur fyrir lokadag Meistaramót Skákskólans

Mikael Jóhann Karlsson (1926) er efstur með 4,5 vinning að loknum 5 umferðum af 7 á Meistaramóti Skákskólans sem fram fer um helgina.  Í 2.-4. sæti með 4 vinninga eru Jón Trausti Harðarson (1762), Oliver Aron Jóhannesson (2050) og Hilmir Freyr Heimisson (1752). Sjötta og næstsíðasta umferð hefst kl. 10 í fyrramálið.

Úrslit 5. umferðar má finna hér.

Stöðuna má finna í heild sína hér.  

Pörun 6. umferðar má finna hér.

Chess-Results

Brønshøj: Henrik tapaði í 3. umferð

Stórmeistarinn Henrik Danielsen (2498) tapaði fyrir danska FIDE-meistarann Jacob Carstensen (2305) í 3. umferð stórmeistaraflokks í Brønshøj í Danmörku sem fram fór í dag.  Henrik hefur 1,5 vinning og er í 4.-7. sæti.  

Í 4. umferð, sem fram fer í fyrramálið og hefst kl. 8, teflir Henrik við danska FIDE-meistarann Jakob Aabling-Thomsen (2331).   Sænski stórmeistarinn Jonny Hector (2560) og danski alþjóðlegi meistarinn Nikolaj Mikkelsen (2399) eru efstir með 2,5 vinning.

Meðalstigin á mótinu eru 2441 skákstig.   Í flokknum taka 10 skákmenn þátt og þar af 3 stórmeistarar.  Henrik er nr. 3 í stigaröð keppenda.  Eins og svo oft á dönskum mótum er tefldar 2 umferðir á dag.   Umferðirnar hefjast kl. 8 og 13.  

• Heimasíða mótsins 
• Beinar útsendingar

Sumarnámskeið Skákakademíu Reykjavíkur hefjast 18. júní

Sumarnámskeið Skákakademíu Reykjavíkur fyrir börn og unglinga á grunnskólaaldri  hefjast 18. júní og standa í 9 vikur eða til 16. ágúst. Námskeiðin eru jafnt fyrir byrjendur og lengra komna.
 
Kennarar Skákakademíunnar hafa mikla reynslu og hafa átt þátt í að uppgötva og þjálfa mörg efnilegustu börn landsins. Mikið er lagt upp úr virkni og leikgleði á námskeiðunum, og þegar sólin skín verður teflt á útitaflinu við Lækjargötu, sem og á Austurvelli og víðar í borginni. Kennt verður í húsnæði Kvennaskólans að Þingholtsstræti 37 - oft kallað gamli Versló, beint á móti breska og þýska sendiráðinu í fögru umhverfi Þingholtanna.
 
Kennsla er á mánudögum, þriðjudögum, miðvikudögum og fimmtudögum. Hægt er að velja um kennslu fyrir eða eftir hádegi, annarsvegar kl. 10-11.30 og hinsvegar kl. 13.30-15.
 
Milli 15 og 16.30 er svo opið hús hjá Skákakademíunni þar sem skákáhugamenn á öllum aldri eru velkomnir.
 
Kennarar: Björn Ívar Karlsson, Björn Þorfinnsson, Hjörvar Steinn Grétarsson, Róbert Lagerman, Stefán Bergsson, Hrafn Jökulsson og Inga Birgisdóttir. Þá munu gestakennarar líta við og stórmeistarar koma í heimsókn.
 
Verð:
Ein vika: 4000 kr.
Fjórar vikur: 10.000 kr.
Níu vikur: 22.000 kr. Skráning á www.skak.is
Fram þarf að koma;
a) Nafn og fæðingarár þátttakanda.
b) Netfang foreldra. Allar nánari upplýsingar í gsm: 863-7562 og netfang [e-mail]

Mikael Jóhann efstur á Meistaramóti Skákskólans

Mikael Jóhann Karlsson (1926) er efstur með fullt hús að lokinni 4. umferð Meistaramót Skákskóla Íslands sem fram fór í morgun.  Mikael vann Jón Trausta Harðarson (1762).  Í 2.-3. sæti með 3,5 vinning eru Hrund Hauksdóttir (1676) og Oliver Aron Jóhannesson (2050).  Fimmta umferð hefst kl. 15.

Úrslit 4. umferðar má finna hér.

Stöðuna má finna í heild sína hér.  

Pörun 5. umferðar má finna hér.

Chess-Results

Henrik með jafntefli við Shadade í 2. umferð

Stórmeistarinn Henrik Danielsen (2498) gerði jafntefli við bandaríska alþjóðlega meistaranum Greg Shadade (2471) í 2. umferð stórmeistaraflokks í Brønshøj í Danmörku sem fram fór í morgun.  Henrik hefur 1,5 vinning og er í 2.-4. sæti. 

Í 3. umferð, sem hófst nú kl. 13, teflir Henrik við danska FIDE-meistarann Jacob Carstensen (2305).  Sænski stórmeistarinn Jonny Hector (2560) er sá eini sem hefur fullt hús. 

Meðalstigin á mótinu eru 2441 skákstig.   Í flokknum taka 10 skákmenn þátt og þar af 3 stórmeistarar.  Henrik er nr. 3 í stigaröð keppenda.  Eins og svo oft á dönskum mótum er tefldar 2 umferðir á dag.   Umferðirnar hefjast kl. 8 og 13.  

• Heimasíða mótsins 
• Beinar útsendingar

Mjóddarmót Hellis fer fram 9. júní

Mjóddarmót Hellis fer fram laugardaginn 9. júní í göngugötunni í Mjódd.  Mótið hefst kl. 14 og er mótið öllum opið. Góð verðlaun í boði.  Á síðasta ári sigraði Brúðarkjólaleiga Katrínar en fyrir þá tefldi Daði Ómarsson.  Tefldar verða sjö umferðir með sjö mínútna umhugsunartíma.  Skráning fer fram í síma 866-0116 og á heimasíðu Hellis: http://hellir.blog.is.  Þátttaka er ókeypis!

Verðlaun eru sem hér segir:

• 1. 10.000
• 2.   6.000
• 3.   4.000

Skráning:

• Heimasíða Hellis: http://hellir.blog.is
• Sími: 866 0116