Meistaramót Hugins: Hjörvar Steinn í forystu

Sjötta og næstsíðasta umferð Meistaramót Hugins fór fram í gærkvöldi. Á efsta borði mættust Vignir Vatnar Stefánsson og Björn Þorfinnsson. Upp kom ítalskur leikur og voru báðir keppendur á því að Björn væri langt kominn með að valta yfir unga manninn. Það var þó bara byggt á tilfinningum beggja og samkvæmt tölvuforritum gat Vignir haldið sjó. Björn rataði ekki á rétta framhaldið og með nokkrum góðum varnarleikjum bægði Vignir allri hættu frá og gott betur en það. Að endingu bauð sá ungi jafntefli í tvísýnni stöðu og Björn greip það fegins hendi.

Á öðru borði vann Hjörvar Steinn sigur gegn Snorra Þór Sigurðssyni og Loftur Baldvinsson vann Óskar Víking á snaggaralegan hátt. Þá hafði Björgvin Víglundsson sigur gegn Elvari Erni Hjaltasyni og Ólafur Guðmarsson, sem einnig stóð sig vel á nýafstöðnu Haustmóti TR, lagði Hjört Yngva Jóhannsson að velli.

Hjörvar Steinn er því einn í forystu fyrir síðustu umferð mótsins með 5 vinninga af 6. Í öðru sæti eru Björn og Vignir með 4,5 vinninga en síðan eru fjórir skákmenn með 4 vinninga. Það eru þeir Sigurður Daði Sigfússon, Björgvin Víglundsson, Loftur Baldvinsson og Ólafur Guðmarsson.

Pörun síðustu umferðar liggur ekki enn fyrir en ljóst er að Hjörvar Steinn og Vignir Vatnar mætast í hreinni úrslitskák.

Staðan á Chess-Results

Mön: Frábær dagur hjá íslenska hópnum

Íslensku skákmeistararnir sem taka þátt í hinu ægisterka alþjóðlega móti á Mön stóðu sig vel í 3.umferð. Guðmundur Kjartansson hefndi fyrir Gauta Pál og vann sigur gegn þýska FIDE-meistaranum Johannes Paul (2335).  Helgi Ólafsson varð að sætta sig við jafntefli gegn Jan Woellermann (2384) en Dagur Ragnarsson komst loks í gang með sigri gegn Baard Dahl (194). Þá vann Bárður Örn Birkisson sigur gegn Vilmos Balint (2281) og Gauti Páll Jónsson lagði Filiz Osmanodja (2245). Þá gerði Aron Þór Mai jafntefli við Jena Kumar Rakesh (2418). Hilmir Freyr Heimisson og Björn Hólm máttu hinsvegar sætta sig við tap gegn sterkum andstæðingum.

Fjórir keppendur hafa enn fullt hús í mótinu, Magnus Carlsen, Rustam Kasimdzhanov, Aleksandr Lenderman og Pavel Eljanov.

Mesta athygli vakti sigur James Tarjan, sem tefldi á Reykjavíkurmótinu á þessu ári, gegn Vladimir Kramnik. Tarjan er fæddur árið 1952 og var ólseigur stórmeistari á árum áður. Hann tók sér hinsvegar frí frá skák í þrjá áratugi (!) og sneri aftur til leiks árið 2014, þá einmitt á Mön. Þetta var án ef hans stærsti sigur og hann átti erfitt með að hemja tilfinningar sínar við blaðamenn eftir skákina.

 

Þá heldur harmsaga Hou Yifan áfram. Hún tapaði í gær gegn georgísku skákkonu Nino Batsiashvili. Eins og skákáhugamenn vita hefur hún átt í stríði við enska mótshaldara útaf þeirri staðreynd að hún teflir, að hennar mati, of oft við konur í opnum mótum. Í Gíbraltar-mótinu um árið tefldi hún við sjö skákkonur í tíu skákum og á Mön hefur hún teflt við þrjár í fyrstu þremur umferðunum. Hún mætir ísraelsku skákkonunni Yuliya Shvayger í 4.umferð og er eflaust hoppandi kát með það.

Í fjórðu umferð mætir Guðmundur Jeffrey Xiong sem er eflaust vígamóður eftir tap sitt gegn Carlsen í síðustu umferð. Má búast við að skákin verði í beinni útsendingu á helstu skákmiðlum.

Aðrar viðureignir Íslendinga eru eftirfarandi:

Eugene Perelshteyn (2542) – Dagur Ragnars

Peter T. Roberson (2403) – Helgi Ólafs

Bárður Örn – Shinya Kojima (2403)

Aron Þór – Konstantin Kavutskiy (2390)

Ketevan Arakhamia-Grant (2369) – Gauti Páll

Hilmir Freyr – Stephen Mannion (2320)

Björn Hólm – Janik Kruse (2096)

Heimasíða mótsins

Úrslit

Beinar útsendingar 

Heimsbikarmótið: Enn jafnt í Tíblísi

Þriðja skák Levon Aronian og Ding Liren í Tíblísi var frekar tíðindalítil. Armeninn stýrði hvítu mönnunum og tefldi enska leikinn. Ding var nú sem endra nær við öllu búinn og lenti ekki í neinum vandræðum með að jafna taflið. Að lokum sömdu kapparnir eftir 31.leik. 

 

Staðan í einvíginu er því 1,5 - 1,5 og er síðasta skák stórmeistaranna á dagskrá í dag. Ef enn verður jafnt fer fram bráðabani á morgun, fimmtudaginn 27.september.

Heimasíða mótsins

Beinar útsendingar

Haustmót SA: Jón Kristinn öruggur sigurvegari

Jón Kristinn Þorgeirsson vann öruggan sigur á Haustmóti SA sem lauk í dag. Teflt var með atskákstímamörkum, sjö umferðir, en fyrri hluti mótsins fór fram síðasta sunnudag.

Jón Kristinn var efstur í hálfleik, með 3,5 vinninga af fjórum mögulegum. Hann mætti í vígahug í dag og lagði alla þrjá andstæðinga sína af velli. Hann hlaut því 6,5 vinninga í 7 skákum og var 1,5 vinningi á undan næsta manni.

Í öðru sæti var Sigurður Arnarson með 5 vinninga. Hann hafði tryggt sér annað sætið fyrir síðustu umferð en þá ákvað hann að komast í snertingu við sína innri sauðkind og laut í gras gegn Áskeli Erni Kárasyni.

Áskell Örn átti afleitan fyrri dag en hann bætti ráð sitt í dag og vann allar þrjár skákirnar og stökk þar með upp í þriðja sæti.

Alls tóku ellefu skákmenn þátt í mótinu.

Úrslit mótsins á Chess-Results

Haustmót Vinaskáksfélagsins fer fram 2.október

Haustmót Vinaskákfélagsins verður haldið mánudaginn 2. október. Mótið fer fram í Vin, að Hverfisgötu 47, og hefst kl.13.00.

Tefldar verða sex umferðir með 7 mínútna umhugsunartíma á hverja skák. Mótið verður reiknað til hraðskáksstiga. Skákstjóri mótsins verður Hörður Jónasson og verða góð verðlaun í boð.

Hægt er að skrá sig hér fyrir ofan á Skak.is (gulur kassi) en einnig verður tekið við skráningum á staðnum.

Eins og venjan er í Vin verður boðið uppá frábærar veitingar í hléi.

Allir velkomnir!!

 

Haustmót TR: Hjörvar Steinn stóð uppi sem sigurvegari

Hjörvar Steinn Grétarsson bar sigur úr býtum á Haustmóti TR sem lauk í dag. Í síðustu umferð mótsins lagði stórmeistarinn Loft Baldvinsson að velli og hlaut þar með 8 vinninga í 9 skákum.

Magnús Pálmi Örnólfsson kórónaði frábært mót sitt með því að leggja Björgvin Víglundsson að velli. Magnús Pálmi varð einn í öðru sæti með 7 vinninga úr 9 skákum og mokaði inn rúmlega 20 FIDE-stigum!

Baráttan um þriðja sætið varð því miður endasleppt því á þriðja borði fékk Einar Hjalti Jensson ókeypis vinning gegn Oliver Aron. Ungi maðurinn var því miður með flensu og gat ekki mætt til leiks. Þar með hlaut Einar Hjalti bronsverðlaunin, sem hann er fullsæmdur af, en eflaust hefur alþjóðlegi meistarinn viljað hreppa þau með góðri sigurskák í síðustu umferð.

Í 4-5.sæti urðu Björgvin Víglundsson og Þorvarður Fannar Ólafsson með sex vinninga. Björgvin varð efstur TR-inga í mótinu og er því Skákmeistari TR 2017!

Mótið á Chess-results

Heimasíða TR

 

 

Mön 2.umferð: Gott jafntefli Guðmundar og Arons

Önnur umferð alþjóðlega mótsins á Mön fór fram í dag. Athygli allra íslenskra skákáhugamanna beindist að viðureign Hikaru Nakamura, sem er tíundi stigahæsti skákmaður heims, og Helga Ólafssonar. Erlendir skákáhugamenn fylgdust einnig vel með og voru greinilega með allt á hreinu. Einn þeirra fræddi aðra um að faðir Helga hefði unnið sigur á Bobby Fischer um árið. Þar var snillingurinn auðvitað að vísa til Friðriks Ólafssonar og augljóslega var eftirnafnið að rugla hann í ríminu. 

 

Helgi átti allskostar við Nakamura í sjálfri skákinni, jafnaði taflið auðveldlega og virtist ætla að sigla jafnteflinu í höfn. Þá fór hinsvegar klukkan að segja til sín og með lítinn tíma á klukkunni valdi Helgi vitlaust plan, hann óð fram með f-peðið sitt sem kom honum í örlítið óþægilega stöðu sem síðan versnaði jafnt og þétt þar til yfir lauk. Líklega er smá ryð í okkar manni.

Tíðindi umferðarinnar voru þó tvö frábær jafntefli Guðmundar og Arons Þórs. Guðmundur var með svart gegn Richard Rapport, sem nýlega gerði mikinn usla á Heimsbikarmótinu í Tíblísi þar sem hann komst í 8-manna úrslit. Því miður var skákin ekki í beinni útsendingu en jafntefli með svörtu gegn svo öflugum stórmeistara eru frábær úrslit.

Aron Þór gerði síðan jafntefli gegn indverska alþjóðlega meistaranum Sharma Hemant (2342). Frábær úrslit hjá þessum efnilega skákmanni.

Dagur Ragnarsson gerði jafntefli við þýsku skákkonuna Alina Zahn en Bárður, Björn Hólm, Gauti Páll og Hilmir Freyr töpuðu sínum skákum gegn sterkum andstæðingum.

Erlendir skákmiðlar fjalla nokkuð um paranir sterkustu skákkonu heims, Hou Yifan. Eins og frægt er orðið tók Yifan þátt í opna Gíbraltarmótinu fyrr á árinu. Í síðustu umferð mótsins tapaði hún viljandi gegn indverska stórmeistaranum Babu Lalith. Tilgangurinn var sá að mótmæla því að hún hefði teflt við sjö skákkonur í umferðunum tíu og vildi Yifan meina að pöruninni hefði verið hagrætt. Þeirri kenningu var alfarið vísað á bug af mótshöldurum sem sögðu að tölvuforrit paraði sjálfvirkt.

Þetta er rifjað upp vegna þess að í fyrstu tveimur umferðunum á Mön hefur Yifan aðeins teflt við skákkonur! Fyrst við Alexöndru Kostenuik og síðan Elizabeth Phaetz. Verður spennandi að sjá hvort að hún tefli við þriðju skákkonuna í næstu umferð og allt verði vitlaust!

Pörun þriðju umferðar liggur ekki enn fyrir.

Mótið á Chess-results

 

 

 

 

 

Heimsbikarmótið: Ding hélt jöfnu

Önnur skák einvígis Ding Liren og Levon Aronian endaði með jafntefli eftir harða baráttu. Liren stýrði hvítu mönnunum og beitti Catalan-byrjun. Aronian jafnaði taflið auðveldlega og allt virtist stefna í friðsamt jafntefli. Eftir mikil uppskipti endaði Aronian hinsvegar með óþægilegt frípeð á a-línunni. 

Á tímabili stóð Armeninn líklega til vinnings en að lokum tókst Ding Liren að halda jafntefli með herkjum. 

Staðan í einvíginu er því jöfn, 1-1 og fer þriðja skákin fram á morgun, mánudag. Hefst taflmennskan kl.11.00 á íslenskum tíma.

Beinar útsendingar

Heimasíða Heimsbikarmótsins

 

 

NM á Laugum: Hörðuvallaskóli með vinnings forskot fyrir síðustu umferð

Mikil spenna ríkir fyrir síðustu umferð í eldri flokki á NM grunn- og barnaskólasveita. Hörðuvallaskóli tapaði 1-3 fyrir norska skólanum Langnes. Með þeim sigri hleyptu Norðmennirnir mikilli spennu í mótið og er Hörðuvallaskóli nú með vinnings forskot á bæði norsku og dönsku sveitina. Hörðuvallaskóli mætir dönsku sveitinni í síðustu umferð sem hefst klukkan 16:00. Rimaskóli teflir við norsku sveitina og ná vonandi að krafsa einhverja vinning af þeim til að hjálpa strákunum í Hörðuvallaskóla.

Í yngri flokki er Ölduselsskóli í þriðja sæti en eiga erfiða viðureign fyrir höndum í síðustu umferðinni. Þá mæta þeir Norðmönnum sem er efstir.

Fylgjast má með beinum útsendingum á http://skaksamband.is/

Stöður í flokkunum, skákir og öll einstaklingsúrslit má sjá hér: http://chess-results.com/tnr299668.aspx?lan=1

Mön 1.umferð: Heimsmeistarinn lagði Bárð

Íslendingar voru fyrirferðamiklir í umræðunni um fyrstu umferð alþjóðlega mótsins á Mön sem hófst í gær. Alls taka átta íslenskir skákmenn þátt í mótinu og var ferðin skipulögð af Skákskóla Íslands. Í farabroddi breiðfylkingarinnar er skólastjórinn Helgi Ólafsson sem aldrei þessu vant mun tefla sjálfur í mótinu. Helgi vann sína skák gegn Íslandsvininum Alan Byron og mætir einum besta skákmanni heims, Hikaru Nakamura, í annarri umferð mótsins sem er að hefjast.

Mesta athygli fyrstu umferðar vakti viðureign heimsmeistarans Carlsen við Bárð Örn Birkisson. Líklega þarf að fara um þrjá áratugi aftur í tímann til þess að finna viðureign Íslendingsins og ríkjandi heimsmeistara. Bárður tefldi byrjunina vel og var með fína stöðu. Hann lék síðan nokkrum örlítið ónákvæmum leikjum og að sjálfsögðu refsaði Magnús  fyrir það og hafði betur að lokum. Hann er nú eftir allt saman heimsmeistarinn. Fjörlegar umræður voru í spjallglugga beinu útsendingarinnar á Chessbomb.com. Þar voru menn mikið að velta fyrir sér nafni Bárðs og voru einhverjir á því að þetta væri gott nafn á dverg úr Hringadróttinssögu (Bardur, son of Birkir).

Þá kveiktu einhverjir á því að Bárður væri líklega bróðir Björns sem tefldi nokkrum borðum neðar við goðsögnina Alexei Shirov. Ártölunum var flett upp og Sherlockarnir á spjallsvæðinu komust að því að líklega væru Birkissynir tvíburar. Þá hófust fjörlegar umræður um hverjir væru sterkustu skáktvíburar heims og niðurstaðan var sú að líklega væru það Pert-bræður hinir ensku (Nick Pert er GM en amlóðinn Richard er bara IM). Loks kíkti einhver á skák Björns gegn Shirov og þá var skrifað í hástöfum: "HVAÐA BRJÁLÆÐINGUR TEFLIR DREKANN GEGN SHIROV?".

Drekinn var djarft val hjá Birni en svo fór að Shirov fékk upp ógnvekjandi kóngsókn og þá þurfti ekki að spyrja að leikslokum.

Fljótlega eftir að umferðin hófst bárust þær fréttir að fyrstu skák mótsins væri lokið. Þar var Íslendingur í eldlínunni en því miður ekki á réttum forsendum. Dagur Ragnarsson ruglaðist á leikjaröð gegn indverska stórmeistaranum S. Narayanan og varð að henda inn hvíta handklæðinu eftir 13.leiki. Hundfúlt en Dagur mun eflaust bíta í skjaldarrendur.

Guðmundur Kjartansson gerði traust jafntefli við indverska stórmeistarann Vishnu Prasanna og Hilmir Freyr Heimisson gerði jafntefli við þýska FIDE-meistarann Gerald Loew.

Gauti Páll Jónsson tapaði gegn bandaríska stórmeistaranum Eugene Perelshteyn og Aron Þór Mai tapaði gegn Fischer. Reyndar Daniel Fischer.

 

Bein útsending(Simon Williams skýrir)

Heimasíða mótsins

Úrslit á Chess-results