Skákþing Akureyrar hefst í dag

Skákþing Akureyrar hefst sunnudaginn 13. janúar kl. 13.00. Teflt verður í Skákheimilinu í Íþróttahöllinni við Skólastíg.

Teflt verður í einum flokki og er öllum heimil þátttaka. Aðeins þeir skákmenn sem eiga lögheimili eða eru fullgildir félagsmenn í Skákfélagi Akureyrar geta unnið titilinn sem teflt er um: „SKÁKMEISTARI AKUREYRAR 2013."

Á mótinu eru áformað að tefla 8-10 umferðir á eftirtöldum dögum

• Sunnudaginn 13. janúar kl. 13.00         1. umferð
• Fimmtudaginn 17. janúar kl. 18.00       2. umferð
• Sunnudaginn 20. janúar kl. 13.00         3. umferð
• Fimmtudaginn 24. janúar kl. 18.00       4. umferð
• Sunnudaginn 27. janúar kl. 15.00         5. umferð
• Þriðjudaginn 29. febrúar kl. 18.00        6. umferð
• Sunnudaginn 3. febrúar kl. 13.00         7. umferð
• Fimmtudaginn 7. febrúar kl. 18.00       8. umferð
• Sunnudaginn 10. febrúar kl. 13.00       9. umferð
• Sunnudaginn 17. febrúar kl. 13.00       10. umferð

Mótsstjórn ákveða endanlegan fjölda umferða og tafldaga þegar fjöldi þátttakenda liggur fyrir. Ákvörðun um þetta mun liggja fyrir við upphaf 1. umferðar. 

Umhugsunartími verður 90 mínútur á skákina, auk þess sem 30 sekúndur bætast við tímann fyrir hvern leik (90+30).

Þátttökugjald er kr. 3.000 fyrir skuldlausa félagsmenn, kr. 4.000 fyrir aðra. Þátttaka er ókeypis fyrir þá unglinga sem greitt hafa æfingagjald. 

Þátttaka tilkynnist formanni félagsins með tölvupósti í [e-mail], eða á skákstað eigi síðar en 10 mínútum fyrir auglýst upphaf 1. umferðar.

Wijk aan Zee: Harikrishna og Karjakin unnu í fyrstu umferð

Pentala Harikrishna (2698) og Sergey Karjakin (2780) unnu sínar skákir í 1. umferð a-flokks Tata Steel-mótsins sem fram fór í dag. Harikrishna vann Anish Giri (2720) en Karjakin vann Hou Yifan (2603). Magnus Carlsen (2861) og Fabiano Caruana (2781) gerðu jafntefli. Í 2. umferð, sem fram fer á morgun, mætast m.a. Aronian (2802) og Carlsen.

Úrslit 1. umferðar:

Aronian, L. - van Wely, L.	½-½
Carlsen, M. - Caruana, F.	½-½
Harikrishna, P. - Giri, A.	1-0
Anand, V. - Nakamura, H.	½-½
Sokolov, I. - Wang, H.	½-½
Leko, P. - L'Ami, E.	½-½
Karjakin, S. - Hou, Y.	1-0

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

Hjörvar með jafntefli í fyrstu umferð

Alþjóðlegi meistarinn Hjörvar Steinn Grétarsson (2516) gerði jafntefli við hollenska alþjóðlega meistarann Mark van der Werf (2450) í fyrstu umferð c-flokks Tata Steel-mótsins sem fram fór í Wijk aan Zee í dag.

Í 2. umferð, sem fram fer á morgun, teflir Hjörvar við hollenska alþjóðlega meistarann Twan Burg (2492) - ekki Romaninshin eins og ranglega kom hér fram áður - hann mætir honum í 3. umferð.

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Skákkeppni vinnustaða fer fram 1. febrúar í TR

Taflfélag Reykjavíkur býður öllum vinnustöðum að taka þátt í Skákkeppni vinnustaða 2013 sem fram fer í félagsheimili T.R, Skákhöllinni Faxafeni 12, föstudaginn 1. febrúar 2013 og hefst kl. 19.30

Upplýsingar og keppnisfyrirkomulag:

Dagsetning: Föstudagur 1. febrúar kl. 19.30

Staður: Taflfélag Reykjavíkur, Faxafeni 12 (Skeifunni)

Sveitakeppni: Þetta er liðakeppni/sveitakeppni og tefla 3 í hverju liði. Vinnustaðirnir geta sent fleira ein eitt lið til keppni. Liðin verða þá auðkennd sem A-lið, B-lið o.s.frv. Hvert lið getur haft 1-2 varamenn.

Umferðir: Fjöldi umferða fer eftir þátttöku (7-11 umferðir). Umhugsunartími er 10 mínútur á mann.

Keppnisfyrirkomulag: svissneskt kerfi og flestir vinningar gilda.

Verðlaun:

1. verðlaun: Eignabikar fyrir vinnustaðinn og farandbikar til vörslu í 1 ár auk verðlaunapeninga (medalíur) fyrir keppendur

2. verðlaun: Eignabikar fyrir vinnustaðinn auk verðlaunapeninga (medalíur) fyrir keppendur

3. verðlaun: Eignabikar fyrir vinnustaðinn auk verðlaunapeninga (medalíur) fyrir keppendur

Þátttökugjald er kr. 15.000 á hverja sveit.

Upplýsingar veitir Ríkharður Sveinsson, stjórnarmaður í Taflfélagi Reykjavíkur. Netfang: [e-mail] gsm: 7722990.

Skráning og staðfesting þátttöku: skráning fer fram á heimasíðu Taflfélags Reykjavíkur, www.taflfelag.is  á sérstöku skráningarformi eða með því að senda skráningu á[e-mail]

Þátttökugjaldið greiðist inn á reikning Taflfélags Reykjavíkur. Reikningsnúmer: 0101-26-640269. Kennitala: 640269-7669. Vinsamlegast setjið í skýringu: VINNUST

Verið velkomin að taka þátt í Skákkeppni vinnustaða 2013 - hlökkum til að sjá ykkur!

Hvörvar í beinni frá Wijk aan Zee

Alþjóðlegi meistarinn Hjörvar Steinn Grétarsson (2516) situr nú að tafli á Tata Steel-mótinu í Wijk aan Zee (Sjávarvík) sem hófst í dag. Um er að ræða eitt allra sterkasta skákmót hvers árs en Hjörvar teflir þar í c-flokki. Í fyrstu umferð teflir Hjörvar við hollenska alþjóðlega meistarann Mark van der Werf (2450).

Í efsta flokki eru Magnus Carlsen (2861), Levon Aronian (2802), Fabiano Caruana (2781), Vishy Anand (2772), Anish Giri (2720) og Ivan Sokolov (2663) og Hou Yifan (2603) meðal keppenda. Þar eru meðalstigin 2732 skákstig en 14 skákmenn eru í hverjum flokki.

Í c-flokki eru meðalstigin 2476 skákstig. Hjörvar er nr. 6 í stigaröð keppenda.

Umferðir hefjast kl. 12:30. Nema að lokaumferðin hefst kl. 11.

Skák.is mun bæði fylgjast með a-flokknum sem og gengi Hjörvars í c-flokki.

• Heimasíða mótsins
• Beinar útsendingar (hefjast almennt kl. 12:30)

Davíð, Einar Hjalti, Lenka og Omar efst á KORNAX-mótinu

Sem fyrr fer flest eftir bókinni á KORNAX-mótinu - Skákþingi Reykjavíkur. Þegar þremur umferðum er lokið eru 4 stigahæstu keppendurnir efstir og jafnir með fullt hús. Það eru þau Davíð Kjartansson (2323), Einar Hjalti Jensson (2301), Lenka Ptácníková (2281) og Omar Salama (2265).

Eitthvað var þá um að hinir stigalægri gerði jafntefli við hina stigahærri og má þar nefna: Örn Leó Jóhannsson (1956) - Daði Ómarsson (2218) og Atli Jóhann Leósson (1766) - Felix Steinþórsson (1434).

Öll úrslit 3. umferðar má finna hér.

Stöðu mótsins má finna hér.

Í 4. umferð sem fram fer á sunnudag mætast meðal annars: Davíð-Omar og Lenka-Einar Hjalti. Pörun 4. umferðar í heild sinni má finna hér.

• Heimasíða TR (beinar útsendingar)
  
• Myndaablúm (GB)
• Chess-Results

Hannes með 2,5 vinning eftir 3 vinninga í Prag

Stórmeistarinn Hannes Hlífar Stefánsson (2512) hefur 2,5 vinning eftir 3 umferðir á Prague Open. Í 2. umferð gerði hann jafntefli við pólska aljóðlegan meistara kvenna (2209) en í 3. umferð vann hann stigalágan andstæðing (1937). Hannes hefur 2,5 vinning og er í 13.-29. sæti.

Í dag eru tefldar tvær umferðir og er hægt að fylgjast með Hannesi í beinni en fyrri skákin hófst kl. 8. Hannes teflir þar við þýska alþjóðlega meistarann Sebastian Plischiki (2367). Síðari umferð dagsins hefst svo kl. 15.

Alls tekur 51 skákmaður þátt í mótinu og þar af eru 5 stórmeistarar. Hannes er nr. 3 í stigaröð keppenda.

• Heimasíða mótsins
• Chess-Results
• Beinar útsendingar (hefjast almennt kl. 15)

Guðmundur Kjartansson hóf þátttöku í Sevilla í gær

Alþjóðlegi meistarinn Guðmundur Kjartansson (2408) hóf þátttöku í alþjóðlegu móti í Sevilla á Spáni í gær. Hann vann í gær og í dag fer fram 2. umferð. Í báðum umferðunum teflir hann við stigalága keppendur (1809) og 2005).

223 skákmenn taka þátt í mótinu og þar af eru 11 stórmeistarar og 13 alþjóðlegir meistarar. Guðmundur er nr. 19 í stigaröð keppenda. Ekki er að sjá að beinar útsendingar séu frá mótinu. Mótið er 9 umferðir.

• Heimasíða mótsins
• Chess-Results

Íslandsmót barna hefst í dag

Íslandsmót barna í skák fer fram í Rimaskóla laugardaginn 12. janúar og hefst klukkan 12. Þátttökurétt hafa börn í 1. til 5. bekk (fædd 2002 og síðar) og sigurvegarinn fær sæmdarheitið Íslandsmeistari barna 2013 og keppnisrétt á Norðurlandamótið í skólaskák sem haldið er að Bifröst í febrúar 2013.
 
Alls verða tefldar 9 umferðir með 10 mínútna umhugsunartíma. Eftir 5 umferðir verður keppendum fækkað þannig að þeir sem hafa 3 vinninga eða fleiri halda áfram keppninni um Íslandsmeistaratitilinn en þeir sem hafa færri en 3 vinninga hafa lokið þátttöku.

Skákdeild Fjölnis verður með veitingasölu á meðan mótinu stendur.

Þetta er í 20. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. Núverandi Íslandsmeistari barna er Nansý Davíðsdóttir. Hún er eina stúlkan sem hefur hampað titlinum.
 
Skáksamband Íslands og Skákakademían annast framkvæmd mótsins. Keppendur eru hvattir til að skrá sig sem fyrst á Skák.is (skráning opnar hér í dag). Þátttökugjald er 1.000 kr (1.500 að hámarki á systkini) og greiðist á mótsstað fyrir upphaf umferðar. Hægt er að fylgjast með skráningu hér.

Veitt eru sérstök verðlaun fyrir bestan árangur í hverjum árgangi.

Nýtt fréttablað TR

Veglegt fréttablað Taflfélags Reykjavíkur fyrir árið 2012 er nú komið út, bæði á prentuðu formi og rafrænu formi (pdf).  Á meðal efnis í blaðinu er umfjöllun um heimsókn fyrrverandi heimsmeistarans Anatoly Karpov á 111 ára afmæli félagsins, Íslandsmót skákfélaga og þátttöku Vignis Vatnars Stefánssonar á Heimsmeistaramóti ungmenna í Slóveníu.

Blaðið á pdf formi má nálgast hér.