Carlsen, Anand og Karjakin efstir í Wijk aan Zee - Anand með glæsisigur á Aronian

Það er afar fjörlega teflt í a-flokki Wijk aan Zee en fimm skákum af sjö lauk með hreinum úrslitum í fjórðu umferð sem fram fór í dag. Van Wely, Wang Hao, Caruna, Carlsen og Anand unnu sínar skákir. Anand á glæsilegan hátt gegn Aronian. Carlsen og Anand eru efstir með 3 vinninga og hafa vinningsforskot á næstu menn.

Frídagur er á morgun en á fimmtudag mætast meðal annars Anand og Carlsen og Karjakin og Giri.

Úrslit 4. umferðar:

van Wely, L. - L'Ami, E.	1-0
Wang, H. - Hou, Y.	1-0
Nakamura, H. - Karjakin, S.	½-½
Giri, A. - Leko, P.	½-½
Caruana, F. - Sokolov, I.	1-0
Aronian, L. - Anand, V.	0-1
Carlsen, M. - Harikrishna, P.	1-0

 

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)C

Hjörvar með jafntefli í dag

Alþjóðlegi meistarinn Hjörvar Steinn Grétarsson (2516) gerði jafntefli við hollenska FIDE-meistarann Miguoel Admiraal (2321) í 4. umferð c-flokks Tata Steel-mótsins sem fram fór í Wijk aan Zee í dag. Hjörvar hefur nú 3 vinninga og er í 2.-3. sæti.

Argentínski stórmeistarinn Fernando Peralta (2617) er efstur með 3,5 vinning. Ítalski stórmeistarinn Sabino Brunello (2572) er jafn Hjörvar í öðru sæti.

Frídagur er á morgun en á fimmtudag teflir Hjörvar við hollenska alþjóðlega meistarann David Klein (2445).

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Teflt um Friðriksbikarinn í Vin á mánudaginn!

Skákfélag Vinjar, Hverfisgötu 47, efnir til stórmóts mánudaginn 21. janúar klukkan 13 í tilefni af Skákdegi Íslands.

Mótið markar upphaf að sannkallaðri skákviku sem nær hápunkti laugardaginn 26. janúar, en þá er sjálfur Skákdagur Íslands á afmælisdegi Friðriks.

Telfdar verða 6 umferðir í Vin með 7 mínútna umhugsunartíma og verður teflt um Friðriksbikarinn. Að vanda eru allir velkomnir í Vin, en þar er einstaklega blómlegt skáklíf.

Því er fagnað á þessu ári að 10 ár eru liðin síðan Hrókurinn hóf vikulegar skákæfingar í Vin, og í kjölfarið var Skákfélag Vinjar stofnað. Félagið teflir nú fram tveimur keppnissveitum á Íslandsmóti skákfélaga og hefur hátt í 100 liðsmenn innan sinna vébanda.

Æfingar eru alla mánudaga klukkan 13 og nýtur Skákfélag Vinjar liðstyrks Skákakademíunnar við umsjón með líflegu og kraftmiklu starfi. Róbert Lagerman, forseti Skákfélags Vinjar, annast skáklífið í Vin ásamt Hrafni Jökulssyni.

Nú þegar eru tugir viðburða komnir á dagskrá í kringum Skákdag Íslands 2013, og eru taflfélög, skólar og áhugasamir einstaklingar hvattir til að skipuleggja stóra sem smáa viðburði til heiðurs Friðriki Ólafssyni, fyrsta stórmeistara Íslendinga.

Myndin: Friðrik Ólafsson í Vin árið 2004 ásamt Jóni Kristjánssyni, þáverandi heilbrigðisráðherra.

 

Sevilla: Guðmundur með fullt hús eftir 4 umferðir

Alþjóðlegi meistarinn Guðmundur Kjartansson (2408) hefur byrjað sérdeilis vel á alþjóðlegu skákmóti í Sevilla á Spáni. Eftir fjórar umferðir hefur hann fullt hús og er efstur ásamt fjórum öðrum.

Hingað til hefur Guðmundur teflt við stiglægri andstæðinga en það breytist á morgun þegar hann teflir við enska stórmeistarann Stewart Haslinger (2535).

223 skákmenn taka þátt í mótinu og þar af eru 11 stórmeistarar og 13 alþjóðlegir meistarar. Guðmundur er nr. 19 í stigaröð keppenda. Ekki er að sjá að beinar útsendingar séu frá mótinu. Mótið er 9 umferðir.

• Heimasíða mótsins
• Chess-Results

Prag: Hannes með sigur í dag

Stórmeistarinn Hannes Hlífar Stefánsson (2512) vann í dag indversku skákkonuna Bhakti Kulkarni (2238), sem er stórmeistari kvenna á Prague Open. Hann hefur nú unnið tvær skákir í röð eftir slaka byrjun á mótinu.

Hannes hefur 5 vinninga og er í 10.-26. sæti.

Alls tekur 51 skákmaður þátt í mótinu og þar af eru 5 stórmeistarar. Hannes er nr. 3 í stigaröð keppenda.

• Heimasíða mótsins
• Chess-Results
• Beinar útsendingar (hefjast almennt kl. 15)

Wijk aan Zee: Karjakin, Anand og Carlsen unnu í dag - Karjakin efstur

Karjakin vann Wang Hao, Anand sigraðri Caruano og Carlsen lagði van Wely en 3. umferð ofurmótsins í Wijk aan Zee fór fram í dag. Öðrum skákum lauk með jafntefli. Karjakin er efstur með 2,5 vinning en Anand, Carlsen og Harikrishna koma næstir með 2 vinninga.

Í 4. umferð, sem fram fer á morgun, mætast meðal annars: Carlsen - Harikrishna og Aronian - Anand.

Úrslit 3. umferðar:

Carlsen, M. - van Wely, L.	1-0
Harikrishna, P. - Aronian, L.	½-½
Anand, V. - Caruana, F.	1-0
Sokolov, I. - Giri, A.	½-½
Leko, P. - Nakamura, H.	½-½
Karjakin, S. - Wang, H.	1-0
Hou, Y. - L'Ami, E.	½-½

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

Riddarinn - Guðfinnur gefur hvorki grið né frið

Riddarar reitaða borðsins háðu sínar vikulegu burtreiðar á hvítum reitum og svörtum í vikunni sem leið.  Góður hópur vaskra skákvíkinga var mættur til tafls af Stór-Hafnarfjarðarsvæðinu sem teygði sig alla leið austur á Stöðvarfjörð að þessu sinni.

Ekki verður annað sagt en menn leggi mikið á sig til að svala skákþorsta sínum og njóta góðrar afslöppunar og hvíldar frá daglegu amstri. Fátt er meira spennandi fyrir suma en að  reyna að brjóta  andstæðinga sína á bak aftur, ginna þá í mátnet og njóta síðan sigurvímunnar og augnabliksins um stund. Til þess er talsvert á sig leggjandi því það að tefla skák getur líka verið krefjandi kvalræði á stundum, hálfgerð píslarganga eins og dæmin sanna.  

Sá sem hvað harðast gengur fram í þessu er Ísfirðingurinn brottflutti, hinn glaðbeitti Guðfinnur R. Kjartansson, sem um er kveðið í nýlegri drápu „Gefur hvorki grið né frið en geysist fram og heggur lið". Og „Um varir leikur gráðugt  glott sem gefur ei til kynna gott"  og að endingu „Af ofsóknum (hans) mun loksins lát er lúinn kóngur verður mát".  

Segja má að þetta hafi verið dæmigert fyrir skákmót Riddarans í síðustu viku og frammistöðu GRK þar enda þótt við býsna harðsnúna mótherja væri að etja svona innanum og samanvið.  Guðfinnur gaf engin grið,  barðist grimmt og vann mótið með glæsibrag með 9 vinningum af 11 mögulegum. Með vinningi meira en Ingimar Halldórsson, sem jafnan selur sig dýrt og er  oftast í fyrsta sæti.  Sigurður E. Kristjánsson var býsna drjúgur eins og fyrri daginn og nældi sér í glás af vinningum með góðri hjálp andstæðinganna. Harðjaxlarnir Stefán Þormar og Össur Kristinsson máttu hafa sig alla við til að halda sjó og verða á meðal 5 efstu eins og oftast.

Sjá má nánari úrslit á meðf. mótstöflu.

 

 

Guðfinnur Err sem stundum er nefndur „Viðeyjarundrið", eftir að hann kom sjálfum sér og öðrum mjög á óvart með því að verða fyrir ofan tvo fyrrverandi Íslandsmeistara í Viðeyjarmótinu 2010, var vel að sigrinum kominn.  Hann stýrir mótum Riddarans og Gallerýsins jafnan með annarri hendi eða „einari" eins og hann  orðar það um leið og hann teflir, sem virðist ekki há honum. Hann fer oftast létt með að landa sigri eða halda jöfnu -  án þess að blása úr nös. 

Næst verður att kappi í Riddaranum á miðvikudaginn kemur kl. 13 -17  (11 umf.x10m)

ESE- Skákþankar 14.01.13

Wijk aan Zee: Hjörvar vann Romanishin

Alþjóðlegi meistarinn Hjörvar Steinn Grétarsson (2516) vann úkraínska stórmeistarann Oleg Romanishin (2521) í 3. umferð c-flokks Wijk aan Zee sem fram fór í dag. Hjörvar er nú efstur ásamt stórmeisturunum Fernando Peralto (2617), Argentínu, Sabino Brunello (2572), Ítalíu, og Krikor Mekhitarian (2543), Brasilíu, með 2½ vinning.

Í 4. umferð, sem fram fer á morgun, teflir Hjörvar við hollenska FIDE-meistarann Miguoel Admiraal (2321).

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Metin falla í Hörpu í febrúar: Fjöldi meistara skráður til leiks á N1 Reykjavíkurskákmótið

 

N1 Reykjavíkurskákmótið fer fram 19.-27. febrúar í Hörpu sem þykir einn glæsilegasti skákstaður heims. Reykjavíkurmótið var fyrst haldið 1964 og er eitt elsta og virtasta skákmót veraldar. Keppendur á síðasta ári voru um 200, sem var met en flest bendir til að þeir verði enn fleiri núna. Útlit er fyrir að fleiri met falli í Hörpu í febrúar: Nú eru skráðir til leiks skákmenn frá 42 löndum og af 180 keppendum sem þegar eru skráðir er 31 stórmeistari.

 

 

N1 Reykjavíkurskákmótið fer fram 19.-27. febrúar í Hörpu sem þykir einn glæsilegasti skákstaður heims. Reykjavíkurmótið var fyrst haldið 1964 og er eitt elsta og virtasta skákmót veraldar. Keppendur á síðasta ári voru um 200, sem var met en flest bendir til að þeir verði enn fleiri núna. Útlit er fyrir að fleiri met falli í Hörpu í febrúar: Nú eru skráðir til leiks skákmenn frá 42 löndum og af 180 keppendum sem þegar eru skráðir er 31 stórmeistari.

Í aðdraganda N1 Reykjavíkurskákmótsins fer fram landskeppni við firnasterkt landslið Kína og munu kínversku meistararnir síðan tefla í Hörpu. Alls eru 11 Kínverjar skráðir til leiks með ofurstórmeistarann Ding Liren í broddi fylkingar. Hann er aðeins tvítugur en hefur þrisvar orðið Kínameistari í skák. Af öðrum kínverskum keppendum má nefna undrabörnin Wei Yi, 13 ára, sem er stigahæsti skákmaður heims undir 14 ára, og hina 17 ára gömlu Guo Qi, heimsmeistara stúlkna 20 ára og yngri.

 
Fleiri heimsmeistarar munu leika listir sínar á N1 Reykjavíkurskákmótinu: Tyrkinn Alexander Ipatov er heimsmeistari 20 ára og yngri og Dinara Saduakassova frá Kasakstan er heimsmeistari stúlkna 16 ára og yngri.

 
Þá er sérstakt fagnaðarefni að enski snillingurinn Nigel Short, sem teflt hefur um heimsmeistaratitilinn, hefur boðað komu sína á N1 Reykjavíkurskákmótið, sem og Ivan Sokolov, en hann er sigursælasti meistari sem teflt hefur á Íslandi.

 

 

Margar snjallar skákkonur munu setja svip á mótið, m.a. Tania Sachdev frá Indlandi og frá Sopiko Guramishvili frá Georgíu.

 

 

 

Keppendur koma einnig frá Tógó, Sri Lanka, Namibíu og Íran svo nokkur dæmi séu nefnd.

 

 

Í heimavarnarliðinu verða margir af sterkustu skákmönnum okkar, m.a. Hannes H. Stefánsson sem sigrað hefur oftar á Reykjavíkurskákmótinu en nokkur annar, stórmeistararnir Henrik Danielsen, Stefán Kristjánsson og Íslandsmeistarinn Þröstur Þórhallsson, auk efnilegasta skákmanns Íslands, Hjörvars Steins Grétarssonar. Mikill fjöldi áhugamanna á öllum aldri og af báðum kynjum tekur líka þátt í mótinu, yngstur allra er Vignir Vatnar Stefánsson, nýbakaður Íslandsmeistari barna.

 

 

Samhliða N1 Reykjavíkurskákmótinu verður efnt til fjölda skákviðburða, m.a. hraðskákmóts, spurningakeppni, málþings og meira að segja ,,landsleiks" í knattspyrnu milli íslensku og erlendu keppendanna.
 
 Það verður gaman í Hörpu 19.-27. febrúar!

• Heimasíða mótsins 
• Chess-Results

Hraðkvöld hjá Helli í kvöld

Taflfélagið Hellir heldur hraðkvöld mánudaginn 14. janúar nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).