Fimm skákmenn efstir og jafnir á Fastus-mótinu

Fimm skákmenn eru efstir og jafnir á Fastus-mótinu - Gestamóti Goðans með 2½ vinning að lokinni 3. umferð sem fram fór í gær. Það eru Karl Þorsteins (2464), Ingvar Þór Jóhannesson (2340), Sigurbjörn Björnsson (2391), Þröstur Þórhallsson (2441) og Sigurður Daði Sigfússon (2334). Fjórum skákum var frestað og því getur staðan breyst töluvert. Öll úrslit 3. umferðar má finna hér.

Stöðu mótsins má finna hér.

Búið er að raða í 4. umferð sem fram fer á fimmtudagskvöld nk. Þá mætast meðal annars: Karl-Sigurður Daði, Lenka-Þröstur og Ingvar Þór-Sigurbjörn.

Röðun í 4. umferð má finna hér.

Mótið fer fram í húsakynnum Skákskóla Íslands, Faxafeni 12.

• Heimasíða Goðans-Máta
• Chess-Results

Skákkeppni vinnustaða fer fram 1. febrúar

Taflfélag Reykjavíkur býður öllum vinnustöðum að taka þátt í Skákkeppni vinnustaða 2013 sem fram fer í félagsheimili T.R, Skákhöllinni Faxafeni 12, föstudaginn 1. febrúar 2013 og hefst kl. 19.30

Upplýsingar og keppnisfyrirkomulag:

Dagsetning: Föstudagur 1. febrúar kl. 19.30

Staður: Taflfélag Reykjavíkur, Faxafeni 12 (Skeifunni)

Sveitakeppni: Þetta er liðakeppni/sveitakeppni og tefla 3 í hverju liði. Vinnustaðirnir geta sent fleira ein eitt lið til keppni. Liðin verða þá auðkennd sem A-lið, B-lið o.s.frv. Hvert lið getur haft 1-2 varamenn.

Umferðir: Fjöldi umferða fer eftir þátttöku (7-11 umferðir). Umhugsunartími er 10 mínútur á mann.

Keppnisfyrirkomulag: svissneskt kerfi og flestir vinningar gilda.

Verðlaun:

1. verðlaun: Eignabikar fyrir vinnustaðinn og farandbikar til vörslu í 1 ár auk verðlaunapeninga (medalíur) fyrir keppendur

2. verðlaun: Eignabikar fyrir vinnustaðinn auk verðlaunapeninga (medalíur) fyrir keppendur

3. verðlaun: Eignabikar fyrir vinnustaðinn auk verðlaunapeninga (medalíur) fyrir keppendur

Þátttökugjald er kr. 15.000 á hverja sveit.

Upplýsingar veitir Ríkharður Sveinsson, stjórnarmaður í Taflfélagi Reykjavíkur. Netfang: [e-mail] gsm: 7722990.

Skráning og staðfesting þátttöku: skráning fer fram á heimasíðu Taflfélags Reykjavíkur, www.taflfelag.is  á sérstöku skráningarformi eða með því að senda skráningu á[e-mail]

Þátttökugjaldið greiðist inn á reikning Taflfélags Reykjavíkur. Reikningsnúmer: 0101-26-640269. Kennitala: 640269-7669. Vinsamlegast setjið í skýringu: VINNUST

Verið velkomin að taka þátt í Skákkeppni vinnustaða 2013 - hlökkum til að sjá ykkur!

Guðmundur tapaði í sjöundu umferð

Alþjóðlegi meistarinn Guðmundur Kjartansson (2408) tapaði í dag fyrir aserska stórmeistaranum Azer Mirzoev (2547) í sjöundu umferð alþjóðlegs mót í Sevilla. Guðmundur hefur 5 vinninga og er í 16.-36. sæti.

Enski stórmeistarinn Stewart Haslinger (2535) er efstur með fullt hús. Í áttundu og næstsíðustu umferð, sem fram fer á morgun, teflir Guðmundur við spænska skákmanninn Pablo Munoz Martin (2229).

223 skákmenn taka þátt í mótinu og þar af eru 11 stórmeistarar og 13 alþjóðlegir meistarar. Guðmundur er nr. 19 í stigaröð keppenda. Ekki er að sjá að beinar útsendingar séu frá mótinu. Mótið er 9 umferðir.

• Heimasíða mótsins
• Chess-Results

Carlsen, Anand og Karjakin efstir

Carlsen, Anand og Karjakin gerðu allir jafntefli í 5. umferð a-flokks Tata Steel-mótsins sem fram fór í dag. Carlsen og Anand í innbyrðis skák en Karjakin við Giri. Öðrum skákum lauk með hreinum úrslitum en mjög hraustlega er teflt í Wijk aan Zee venju samkvæmt.

Úrslit 5. umferðar:

Harikrishna, P. - van Wely, L.	1-0
Anand, V. - Carlsen, M.	½-½
Sokolov, I. - Aronian, L.	0-1
Leko, P. - Caruana, F.	1-0
Karjakin, S. - Giri, A.	½-½
Hou, Y. - Nakamura, H.	0-1
L'Ami, E. - Wang, H.	0-1

Staða efstu manna:

• 1.-3. Carlsen (2861), Anand (2772) og Karjakin (2780) 3½ v.
• 4.-7. Nakamura (2769), Leko (2735), Harikrishna (2698) og Wang Hao (2752) 3 v.
• 8. Aronian (2802) 2½ v.

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)C

Hjörvar tapaði í dag

Alþjóðlegi meistarinn Hjörvar Steinn Grétarsson (2516) tapaði í dag fyrir hollenska alþjóðlega meistaranum David Klein (2445) í 5. umferð c-flokks Tata Steel-mótsins í Wijk aan Zee. Hjörvar hefur 3 vinninga og er í 4.-7. sæti.

Argentínski stórmeistarinn Fernando Peralta (2617) er efstur með 4½ vinning.

Í sjöttu umferð, sem fram fer á morgun, teflir Hjörvar við úkraínska stórmeistarann Alexander Kovchan (2579), sem er í 2. sæti með 4 vinninga.

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Omar og Júlíus efstir á KORNAX-mótinu

Omar Salama (2265) og Júlíus Friðjónsson (2185) eru efstir og jafnir með 4,5 vinning að lokinni 5.umferð KORNAX-mótsins - Skákþings Reykjavíkur sem fram fór í kvöld. Omar vann Sævar Bjarnason en Júlíus hafði betur gegn Halldóri Pálssyni. Það flækir hins vegar toppstöðuna að skákinni á efsta borði á milli Einars Hjalta Jenssonar, sem var efstur með fullt hús fyrir umferðina, og Davíðs Kjartanssonar var frestað fram á laugardag.

Öll úrslit 5. umferðar má finna hér. 

Stöðu mótsins má finna hér.

Pörun 6. umferðar, sem fram fer á föstudagskvöld, má finna hér.

• Heimasíða TR (beinar útsendingar)
• Myndaablúm (GB)
• Chess-Results

 

Guðmundur vann í sjöttu umferð í Sevilla - er í 3.-10. sæti

Alþjóðlegi meistarinn Guðmundur Kjartansson (2408) vann í dag spænskan skákmann (2214) í sjöttu umferð alþjóðlegs móts í Sevilla á Spáni. Í gær tapaði hann hins vegar fyrir enska stórmeistarann Stewart Haslinger (2535). Guðmundur hefur 5 vinninga og er í 3.-10. sæti.

Á morgun teflir hann við stigahæsta keppenda mótsins, aserska stórmeistarann Azer Mirzoev (2547).

223 skákmenn taka þátt í mótinu og þar af eru 11 stórmeistarar og 13 alþjóðlegir meistarar. Guðmundur er nr. 19 í stigaröð keppenda. Ekki er að sjá að beinar útsendingar séu frá mótinu. Mótið er 9 umferðir.

• Heimasíða mótsins
• Chess-Results

KORNAX: Bein útsending frá fimmtu umferð

Fimmta umferð KORNAX-mótsins - Skákþings Reykjavíkur hefst í kvöld kl. 19:30. Venju samkvæmt eru 6 skákir sýndar beint frá umferðinni. Útsendingu frá umferðinni má nálgast hér.

Skákirnar sem sýndar eru beint eru:

• Einar Hjalti Jensson (4) - Davíð Kjartansson (3½)
• Omar Salama (3½) - Sævar Bjarnason (3½)
• Júlíus Friðjónsson (3½) - Halldór Pálsson (3½)
• Vigfús Ó. Vigfússon (3) - Lenka Ptácníková (3)
• Atli Antonsson (3) - Daði Ómarsson (3)
• Jóhann H. Ragnarsson (3) - Dagur Ragnarsson (3)

• Heimasíða TR (beinar útsendingar)
  
• Myndaablúm (GB)
• Chess-Results

Hannes endaði með 6 vinninga í Prag

Stórmeistarinn Hannes Hlífar Stefánsson (2512) átti ekki gott á Prag Open sem lauk í dag. Hann reyndar vann í lokaumferðinni. Hannes hlaut 6 vinninga og endaði í 12.-31. sæti.

Frammistaða Hannesar samsvaraði 2304 skákstigum og lækkar hann um 16 stig fyrir hana.

Alls tók 51 skákmaður þátt í mótinu og þar af voru 5 stórmeistarar. Hannes var nr. 3 í stigaröð keppenda.

• Heimasíða mótsins
• Chess-Results
• Beinar útsendingar (hefjast almennt kl. 15)

Unglingur stal senunni í Stangarhyl í dag

Það tefldu tuttugu og þrír heldri skákmenn hjá Ásum í dag í Stangarhyl og einn unglingur. Þegar upp var staðið eftir orrustur dagsins varð ljóst að unglingur þessi hafði stolið senunni og orðið efstur með sjö og hálfan vinning af tíu mögulegum.Þessi ungi maður heitir Friðgeir Hólm og hefur stundum teflt með okkur með góðum árangri. Hann fær að tefla með öldungunum vegna þess að það er stutt í það að hann verði löglegur eldri borgari.

Jafnir í öðru til þriðja sæti urðu svo Páll G Jónsson og Þór Valtýsson með sjö vinninga báðir, Páll aðeins hærri á stigum.

Nú fer að styttast í vinsælt skák mót hjá okkur heldri skákmönnum á stór Reykjavíkur svæðinu.

Það er svokallað Toyota skákmót  sem verður haldið 25. janúar (fyrsti dagur í Þorra)

Toyota á Íslandi býður okkur heim í höfuð stöðvar sínar  í Kauptúni í Garðabæ (stóra húsið við hliðina á IKEA). Toyota gefur  öll verðlaun sem eru vegleg eins og undanfarin ár. Þetta er fimmta Toyota mótið sem fer fram í höfuðstöðvum  þeirra.

Æsir sjá um framkvæmd mótsins. Allir skákmenn 60 ára og eldri velkomnir. Nauðsynlegt er að forskrá sig því að við ráðum ekki við nema ákveðinn fjölda. Tekið við skráningu hjá Þorsteini Guðlaugssyni í síma 557 2403 / 822 2403 og netfang [e-mail] eða Finnur Kr Finnsson síma 893 1238 netfang [e-mail]. Þetta verður auglýst aftur þegar nær dregur.

Úrslit dagsins, sjá meðf.töflu.