Helgi Ólafsson sigraði á Friðriksmótinu í Vin

Helgi Ólafsson stórmeistari sigraði á Friðriksmótinu í Vin, sem fram fór á mánudaginn og heppnaðist í alla staði frábærlega. Mótið markaði upphaf mikillar skákviku, og var haldið til heiðurs Friðriki Ólafssyni, fyrsta stórmeistara Íslands og fv. forseta FIDE. Friðrik var sjálfur meðal keppenda og sýndi leiftrandi takta. Róbert Lagerman forseti Skákfélags Vinjar náði silfrinu af miklu öryggi.

Tuttugu og fjórir skákmenn settust að tafli í Vin og komu sumir um langan veg. Helgi vann skák eftir skák og sigraði m.a. í uppgjöri stórmeistarana í 4. umferð. Aðeins Róbert Lagerman náði jafntefli við Helga, sem tefldi af fyrirhafnarlausri snilld.

Friðrik tefldi vel, en tapaði slysalega á móti Helga og gerði jafntefli við Hauk Halldórsson. Haukur var tvímælalaust stjarna mótsins, tapaði aðeins einni skák og var meðal efstu manna. Haukur er mjög virkur í Skákfélagi Vinjar, æfir oft í viku og teflir með félaginu á Íslandsmóti skákfélaga.

Gestir á skákmótinu glöddust líka yfir tilþrifum Vignis Vatnars Stefánssonar, sem á dögunum varð Íslandsmeistari barna. Vignir varð í 5.-7. sæti ásamt Hauki og Inga Tandra Traustasyni, hinum dygga liðsmanni Skákfélags Vinjar. Ólafur B. Þórsson varð í 3.-4. sæti ásamt Friðriki, en lægri á stigum.

Leikgleðin var í fyrirrúmi, einsog jafnan í Vin. Í hálfleik var boðið upp á kaffi og kræsingar að hitta Vinjar.

Skákæfingar eru alla mánudaga klukkan 13 í Vin. Þangað eru allir hjartanlega velkomnir.

 Myndaalbúm frá Friðriksmótinu í Vin (HJ)

LOKASTAÐAN Á FRIÐRIKSMÓTINU Í VIN, 21. JANÚAR 2013

1   Helgi Ólafsson                         5.5      16.0  24.0   20.0
  2   Róbert Lagerman                        5        14.5  21.0   18.0
3-4  Friðrik Ólafsson                       4.5      13.5  21.5   16.0
      Ólafur B. Þórsson                      4.5      13.5  20.5   18.0
5-7  Haukur Halldórsson                     4        13.0  19.5   14.5
      Vignir Vatnar Stefánsson               4        12.0  19.5   15.0
      Ingi Tandri Traustason                 4        12.0  18.0   11.0
8-10  Gunnar Björnsson                       3.5      14.5  21.5   12.0
      Hrannar Jónsson                        3.5      13.5  19.0   14.5
      Oliver Aron Jóhannesson                3.5      12.5  20.5   11.0
11-13 Jon Olav Fivelstad                     3        13.0  20.5    8.0
      Friðgeir Hólm                          3        12.0  16.0    9.0
      Hjálmar Sigurvaldason                  3         9.0  14.0    6.0
14-18 Birgir Berndsen                        2.5      14.5  21.5   11.5
      Gunnar Nikulásson                      2.5      12.5  19.0   11.5
      Stefán Pétursson                       2.5      11.5  17.0   12.0
      Einar S. Einarsson                     2.5      10.5  16.0    8.0
      Finnur Kr. Finnsson                    2.5      10.5  16.0    6.0
19-21 Ásgeir Mogensen                        2        12.0  17.5    9.0
      Hörður Jónasson                        2        10.5  15.0    8.0
      Jón Gauti Magnússon                    2         9.0  12.0    5.0
22   Albert Geirsson                        1.5      10.0  14.5    5.0
23   Björn Agnarsson                        1        10.0  15.0    3.0
24   Hylur Hörður Þórusuon                  0         8.5  13.0    0.0

Carlsen kominn með vinningsforskot í Wijk aan Zee

Magnus Carlsen (2861) er í miklu stuði á Tata Steel-mótinu í Wijk aan Zee. Í dag vann hann kínversku skákdrottninguna Hou Yifan (2603) og er nú kominn með vinningsforskot á heimsmeistarann Anand (2772) sem er annar. Öðrum skákum lauk með jafntefli að því undanskyldu að van Wely (2679) vann Sokolov (2667).

Úrslit 9. umferðar:

Sokolov, I. - van Wely, L.	0-1
Leko, P. - Anand, V.	½-½
Karjakin, S. - Harikrishna, P.	½-½
Hou, Y. - Carlsen, M.	0-1
L'Ami, E. - Aronian, L.	½-½
Wang, H. - Caruana, F.	½-½
Nakamura, H. - Giri, A.	½-½

 

Staða efstu manna:

• 1. Carlsen (2861) 7 v.
• 2. Anand (2772) 6 v.
• 3.-4. Aronian (2802) og Nakamura (2769) 5½ v.
• 5.-6. Harikrishna (2698) og Karjakin (2780) 5 v.
• 7.-9. Leko (2735), van Wely (2679) og Caruana 4½ v.

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

Hjörvar tapaði í dag

Alþjóðlegi meistarinn Hjörvar Steinn Grétarsson (2516) tapaði í dag fyrir  ítalska stórmeistarann Sabino Brunello (2572) í níundu umferð c-flokks Tata Steel-mótsins. Hjörvar hefur 4 vinninga og er í 7.-10. sæti.

Í 10. umferð, sem fram fer á morgun, teflir Hjörvar við hollensku skákkonuna Lisa Schut (2295) er alþjóðlegur meistari kvenna.

Brunello er efstur með 7,5 vinning.

Myndir af vettvangi af Hjörvari eru frá Calle Erlandsson.

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Fjöltefli í Selásskóla

Segja má að það hafi verið mikill skákblær yfir Selásskóla í tilefni af Skákdeginum, sem fram fer n.k. laugardag 26. janúar, en í gærmorgun fór fram fjöltefli Doniku Kolica. Donika, sem er 15 ára nemandi Hólabrekkuskóla, tefldi gegn hópi nemenda í 3.-7. bekk. Skákkennsla hefur verið innan skólans undanfarin ár á vegum Skákakademíunnar og hafa fjölmargir nemendur sýnt skákinni mikinn áhuga. Donika lauk alls 73 skákum á 4 klukkustundum og leyfði einungis eitt jafntefli en það var Karvel Geirsson, í 3. bekk, sem náði því. Karvel byrjaði í skák í haust ásamt samnemendum sínum og hefur sýnt miklar framfarir. Sigfús Grétarsson skólastjóri og Þorkell Daníel Jónsson aðstoðarskólastjóri höfðu umsjón með fjölteflinu ásamt Birni Ívar Karlssyni frá Skákakademíunni. Nemendur og starfsmenn skólans lýstu yfir ánægju sinni með Doniku og hrósuðu henni mikið fyrir örugga og skemmtilega taflmennsku."

Á annarri myndinni er Karvel til vinstri (í græna bolnum) ásamt félaga sínum Árna Magnúsi.

Skákkeppni vinnustaða fer fram 1. febrúar

Taflfélag Reykjavíkur býður öllum vinnustöðum að taka þátt í Skákkeppni vinnustaða 2013 sem fram fer í félagsheimili T.R, Skákhöllinni Faxafeni 12, föstudaginn 1. febrúar 2013 og hefst kl. 19.30

Upplýsingar og keppnisfyrirkomulag:

Dagsetning: Föstudagur 1. febrúar kl. 19.30

Staður: Taflfélag Reykjavíkur, Faxafeni 12 (Skeifunni)

Sveitakeppni: Þetta er liðakeppni/sveitakeppni og tefla 3 í hverju liði. Vinnustaðirnir geta sent fleira ein eitt lið til keppni. Liðin verða þá auðkennd sem A-lið, B-lið o.s.frv. Hvert lið getur haft 1-2 varamenn.

Umferðir: Fjöldi umferða fer eftir þátttöku (7-11 umferðir). Umhugsunartími er 10 mínútur á mann.

Keppnisfyrirkomulag: svissneskt kerfi og flestir vinningar gilda.

Verðlaun:

1. verðlaun: Eignabikar fyrir vinnustaðinn og farandbikar til vörslu í 1 ár auk verðlaunapeninga (medalíur) fyrir keppendur

2. verðlaun: Eignabikar fyrir vinnustaðinn auk verðlaunapeninga (medalíur) fyrir keppendur

3. verðlaun: Eignabikar fyrir vinnustaðinn auk verðlaunapeninga (medalíur) fyrir keppendur

Þátttökugjald er kr. 15.000 á hverja sveit.

Upplýsingar veitir Ríkharður Sveinsson, stjórnarmaður í Taflfélagi Reykjavíkur. Netfang: [e-mail] gsm: 7722990.

Skráning og staðfesting þátttöku: skráning fer fram á heimasíðu Taflfélags Reykjavíkur, www.taflfelag.is  á sérstöku skráningarformi eða með því að senda skráningu á[e-mail]

Þátttökugjaldið greiðist inn á reikning Taflfélags Reykjavíkur. Reikningsnúmer: 0101-26-640269. Kennitala: 640269-7669. Vinsamlegast setjið í skýringu: VINNUST

Verið velkomin að taka þátt í Skákkeppni vinnustaða 2013 - hlökkum til að sjá ykkur!

Skákin í öndvegi í Hlíðarskóla

Eftirfarandi texti barst forseta SÍ nýlega í kringum Skákdaginn. Rétt að leyfa að öðrum að njóta!

Hlíðarskóli er sérskóli á Akureyri fyrir börn sem hafa ekki þrifist í venjulegum grunnskóla og eiga ekki möguleika þar, öll með hegðunarvanda og nánast allar hamlanir s.s. lesblindu, ADHD og annað í þeim dúr. Þetta eru 20 krakkar og sum eru hér árum saman. Við byrjuðum í fyrra að vera með skák sem valgrein 2-3 sinnum í viku og er skemmst frá að segja að skákin svínvirkar á þau, þau ná ró og þjálfa athygli og átta sig á að skákin þarf að vinnast í ró og friði.

Þetta eru ekki börn sem nokkur hefði trúað að gætu setið kyrr í hálfan eða einn tíma og hugsað sig um yfir skákborði og það er alltaf fullt af nemendum sem velja skákina og sum hafa gefið þá skýringu að það er svo friðsælt þar og maður verður svo öruggur með sig, þannig að hér er teflt flesta daga en auðvitað eru hæfileikarnir mismiklir og fara eftir þroskastigi þeirra en fyrst og fremst veitir þetta þeim vellíðan sem skiptir mestu. Fannst tilvalið að senda þér þessa línu eftir að bréfið um skákdaginn kom.

Kveðja,
Reynir Hjartarson,
kennari Hlíðarskóla

Nýtt fréttabréf SÍ

Nýtt fréttabréf Skáksambands Íslands út kom út í dag en bréfið kemur út tvisvar á mánuði yfir vetrarmánuðina og er sent í tölvupósti til viðtakenda. Hægt er að skrá sig fyrir fréttabréfinu á Skák.is (ofarlega til vinstri).

Meðal efnis er:

• Skákdagur - skákvika framundan
• Vignir Vatnar Íslandsmeistari barna
• Starfshópur um skákkennslu í grunnskólum skipaður
• Metin falla í Hörpu í febrúar: Fjöldi meistara skráður til leiks á N1 Reykjavíkurskákmótið
• Árgangameistarar á Íslandsmóti barna
• Reykjavik Open og Wijk aan Zee
• Hjörvar og Guðmundur á faraldsfæti
• Evrópukeppni einstaklinga í Póllandi í maí
• Nýjustu skráningar í N1 Reykjavíkurskákmótið
• Mót á döfinni

Fréttabréfið má nálgast hér.

Hægt er að nálgast eldri fréttabréf hér.

Friðrik Ólafsson og Helgi Ólafsson tefla í Vin í dag kl. 13

Stórmeistararnir Friðrik Ólafsson og Helgi Ólafsson eru skráðir til leiks á opnu skákmóti í Vin, Hverfisdötu 47, sem hefst klukkan 13 mánudaginn 21. janúar. Mótið er haldið til heiðurs Friðriki Ólafssyni, fyrsta stórmeistara Íslendinga og fv. forseta FIDE.

Mótið markar upphaf að mikilli skákviku, sem nær hápunkti laugardaginn 26. janúar, þegar Skákdagur Íslands verður haldinn á afmælisdegi Friðriks. Tugir viðburða er á dagskránni hjá skákfélögum og grunnskólum um land allt.

Á mótinu í Vin verða tefldar 6 umferðir með sjö mínútna umhugsunartíma. Skákfélag Vinjar býður til mótsins, í samvinnu við Skákakademíuna.

Af öðrum góðum gestum sem tefla á Friðriksmótinu í Vin má nefna Vigni Vatnar Stefánsson, nýbakaðan Íslandsmeistara barna, Gunnar Björnsson forseta Skáksambandsins og Róbert Lagerman, sem heldur utan um hið blómlega skáklíf í Vin.

Í leikhléi verður boðið upp á veitingar. Keppendur eru hvattir til að mæta tímanlega. Þátttaka er ókeypis og allir eru hjartanlega velkomnir.

Riddarinn: Kappteflið um Skákhörpuna framundan - Ingimar vann síðasta mót

Í vikunni sem leið gengu menn til tafls í Riddaranum að venju og reyndu með sér eina ferðina enn. Nú var að Ingimar sem bar sigur úr bítum, hlaut 10 vinninga af 11 mögulegum og sýndi þar styrk sinn.  Segja má að þeir Guðfinnur og hann hafi haft sætaskipti frá vikunni á undan, nú var hann í þriðja sæti en varð efstur þá.  Að öðru leyti var röð fjögurra efstu manna óbreytt. Sigurður E.  var þrautgóður að vanda í öðru sæti og Stefán Þormar aldrei langt undan í því fjórða, eins og sjá má á meðf. mótstöflu.

 

 

Ákveðið hefur verið að tengja KAPPTEFLIÐ UM SKÁKHÖRPUNA íslenska skákdeginum eða vikunni framvegis og því verður fyrsta mótið af fjórum teflt á miðvikudaginn kemur.  Um er að ræða árlega  GrandPrix mótaröð um fagra styttu og  heiðursgrip tileinkaðan Fjölni Stefánssyni, tónskáldi, skólastjóra og skákmanni, sem tefldi í hópi Riddaranna meðan hann hafði þrek og heilsu til,  en  hann lést fyrir tveimur árum.  Fyrri sigurvegarar þessa farandgrips eru þeir Ingimar Halldórsson; Guðfinnur R. Kjartansson, Jóhann Örn Sigurjónsson og Sigurður Herlufsen.   Skoruð GP-stig í þremur mótum af fjórum telja til sigurs.

 Allir skákærir og skákkærir öldungar 60 ára og eldri velkomnir til tafls. /ESE

Davíð og Omar efstir á KORNAX-mótinu

Davíð Kjartansson (2323) og Omar Salama (2265) eru efstir með 6,5 vinning að lokinni sjöundu umferð KORNAX-mótsins - Skákþings Reykjavíkur sem fram fór í dag. Davíð vann Lenku Ptácníková (2281) en Omar vann Þór Má Valtýsson (2023). Halldór Pálsson (2074) og Daði Ómarsson (2218) eru í 3.-4. sæti einum vinningi á eftir.

Eins og oft áður var nokkuð um óvænt úrslit. Má þar nefna að hinn ungi og efnilegi Dawid Kolka (1635) gerði jafntefli við Oliver Aron Jóhannesson (1998).  

Vigfús Ó. Vigfússon (1993), formaður Hellis, vann svo formannaslaginn við formann TR, Sigurlaugu R. Friðþjófsdóttur (1714). 

Úrslit sjöundu umferðar má finna hér. 

Stöðu mótsins má finna hér.

Áttunda og næstsíðasta umferð fer fram á miðvikudagskvöld og hefst kl. 19:30. Þá mætast meðal annars: Davíð-Daði og Halldór-Omar. 

Pörun áttundu umferðar má finna hér.

• Heimasíða TR (beinar útsendingar)
• Myndaablúm (GB)
• Chess-Results