Carlsen efstur í Wijk aan Zee

Carlsen (2861) heldur áfram ótrúlegu gengi sínu í Wijk aan Zee. Í áttundu umferð sem fram fór í dag lagði hann Karjakin (2780) í maraþonskák. Þar með náði hann hálfs vinnings forskoti þar sem Anand (2772) gerði jafntefli við Sokolov (2667). Aronian (2802) sem vann Hou Yifan (2603) og Nakamura (2769) eru í 3.-4. sæti.

Úrslit 8. umferðar:

van Wely, L. - Nakamura, H.	½-½
Giri, A. - Wang, H.	½-½
Caruana, F. - L'Ami, E.	1-0
Aronian, L. - Hou, Y.	1-0
Carlsen, M. - Karjakin, S.	1-0
Harikrishna, P. - Leko, P.	½-½
Anand, V. - Sokolov, I.	½-½

Staða efstu manna:

• 1. Carlsen (2861) 6 v.
• 2. Anand (2772) 5½ v.
• 3.-4. Aronian (2802) og Nakamura (2769) 5 v.
• 5.-6. Harikrishna (2698) og Karjakin (2780) 4½ v.
• 7.-8. Leko (2735) og Caruana 3½ v.

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

Fjöltefli á miðvikudag kl. 13:00 í Eyjum

Í tilefni af 40 ára afmæli gossins á Heimaey, stendur Taflfélag Vestmanneyja ásamt, grunnskólanum og Vestmannaeyjabæ fyrir fjöltefli í Akóges n.k. miðvikudag 23 janúar og hefst fjölteflið kl. 13:00.

Sá sem mun etja þar kappi við gesti og gangandi er stórmeistarinn og fyrrum Eyjamaðurinn Helgi Ólafsson.

Allir eru velkomnir á fjölteflið meðan húsrúm leyfir og munu félagar í Taflfélaginu sjá um framkvæmd fjölteflisins, en Helgi hefur um langt árabil verið félagsmaður í Taflfélagi Vestmannaeyja.

Haraldur efstur á Skákþingi Akureyrar

Þriðja umferð Skákþings Akureyrar var tefld í dag, alls fjórar skákir, en einni var frestað. Haraldur hélt áfram sigurgöngu sinni og lagði Jón Kristin að velli í magnaðri skák. Rúnar tapaði fyrir Sigurði og Símon fyrir Jakobi. Þá knúði altmeister Hjörleifur fram sigur í skák sinni við Hrein.

Haraldur er því einn efstur með þrjá vinninga og á hæla honum kemur Ziggi A með tvo og hálfan. Rúnar hefur tvo. Andri Freyr og Karl Egill tefla svo sína skák á þriðjudag og geta þá blandað sér í toppbaráttuna.

• Heimasíða SA
• Chess-Results

Ingimundur og Grantas efstir á Þorramóti SSON

Ingimundur Sigurmundsson og Grantas Grigorianas eru efstir á Þorramóti SSON sem hófst sl. miðvikudag.  Vegna forfalla var ákveðið að breyta Þorramótinu í tveggja kvölda atskákmót með 25 mínútna umhugsunartíma. Þeir félagarnir hafa 2,5 vinning en Úlfhéðinn Sigurmundsson er þriðji með 2 vinninga.

Heimasíða SSON (úrslit og mótstafla)

Skákþáttur Morgunblaðsins: Besti "skákmaðurinn" er Houdini 3

Hjörvar Steinn Grétarsson vann lokaskák sína á Hastings-mótinu sem lauk um síðustu helgi, hlaut 7 vinninga af 10 mögulegum og varð í 2. - 9. sæti. Sigurvegari varð enski stórmeistarinn og liðsmaður Goðans, Gawain Jones með 7 vinninga. Guðmundur Kjartansson átti góða möguleika á því að ná áfanga að stórmeistaratitli en hann missti niður gjörunnið tafl gegn Norðmanninum Johannes Kvisla í 7. umferð. Hann fékk 6 vinninga af 10 mögulegum og hækkar um 14 elo-stig. Báðir voru með árangur uppá ca. 2500 elo.

Nú er nýhafið Skákþing Reykjavíkur eða KORNAX-mótið eftir aðal-styrktaraðila þess. Það er vel skipað en stigahæstur er sigurvegarinn frá 2009, Davíð Kjartansson. Almennt er búist við því að Einar Hjalti Jensson, Daði Ómarsson, Sævar Bjarnason og hjónin Omar Salama og Lenka Ptacnikova muni veita honum harða keppni um 1. verðlaun.

Annað mót, ekki síður sterkt, hófst um svipað leyti í húsakynnum Skákskóla Íslands fimmtudaginn 3. janúar. Þar eru tefldar sjö umferðir og aðeins ein skák í viku. Meðal keppenda eru Þröstur Þórhallsson, Stefán Kristjánsson, kvennalandsliðið og Karl Þorsteins sem, að Íslandsmóti skákfélaga slepptu, hefur ekki teflt í langan tíma. Ýmsum finnst athugavert að mótin fari fram á sama tíma en dagskráin skarast þó ekki og Goðanum hefur undanfarið tekist vel í því að laða fram á sjónarsviðið ýmsa kunna meistara sem teflt hafa lítið hin síðari ár.

Houdini 3 er með 3335 elo stig

Nýbirt elo-stig Magnúsar Carlsen uppá 2861 elo-stig hafa vakið mikla athygli. Kollegi Magnúsar, norski stórmeistarinn Leif Erlend Johannessen, heldur því blákalt fram í grein í norsku blaði að sterkasti „skákmaður" heims sé tölvuforritið Houdini 3 og stig þess séu uppá 3335 elo. Það ætti að vera kappsmál fyrir skákmenn að ná sér í þetta forrit og fara yfir tefldar skákir með því, heldur Leif Erlend áfram. Greinarhöfundur tók Leif á orðinu og stillti upp stöðu úr skák sem fékk fegurðarverðlaun á Reykjavíkurmótinu 1990:

Helgi Ólafsson - Jonathan Levitt

Enskur leikur

1. c4 Rf6 2. Rc3 e6 3. Rf3 c5 4. g3 b6 5. Bg2 Bb7 6. O-O Be7 7. d4 Re4 8. Rxe4 Bxe4 9. Bf4 O-O 10. dxc5 bxc5 11. Dd2 Db6 12. Hfd1 Hd8 13. De3 Db7 14. Bd6 Bxd6 15. Hxd6 Dxb2 16. Had1 Db7

17. Hxe6

Eftir skákina spurði þekktur meistari undirritaðan hvaða læti þetta væru og hvort 17. Dxc5 hefði ekki verið fullgott. Svörin sem hann fékk voru eitthvað á þá leið, að fyrir þá sem vildu lambasteikina sína á sunnudögum með Ora grænum baunum og engar refjar, væri sá leikur örugglega ágætur. Ískalt mat Houdini 3 gerir ekki mikinn greinarmun á þessum tveimur leikjum en rekur skákina út í fjarlægt drottningarendatafl með e-peð eða betra hróksendatafl. Báðar stöðurnar óræðar en hvítur á samt góða vinningsmöguleika.

17. ... fxe6 18. Rg5! h6!

Best, 18. ... Bxg2 strandar á 19. Dxe6+! og mátar.

19. Rxe4 Rc6 20. Rxc5 Dc7?

Eftir þetta verður skákinni ekki bjargað. Eini leikurinn er 20. .. Db6 og eftir 21. Rxd7 Dxe3 22. fxe3 Hac8 23. bxc6 Hxc6 24. Rf6+ Kf7 25. Hxd8 Kxf6 25. Hd4 og Houdini 3 heldur áfram upp í 70 leik!

21. Rxd7! Hac8 22. Dxe6+ Kh8 23. Be4 Re7 24. Hd6 Dxc4 25. Dxe7 Dc1+ 26. Kg2 He8 27. Df7 Hxe4 28. Hg6

- og svartur gafst upp.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 20 janúar 2013.

Skákþættir Morgunblaðsins

[Event "Reykjavik op"] [Site "Reykjavik"] [Date "1990.??.??"] [EventDate "?"] [Round "2"] [Result "1-0"] [White "Helgi Olafsson"] [Black "Jonathan Levitt"] [ECO "A30"] [WhiteElo "?"] [BlackElo "?"] [PlyCount "55"] 1.c4 Nf6 2.Nc3 e6 3.Nf3 c5 4.g3 b6 5.Bg2 Bb7 6.O-O Be7 7.d4 Ne4 8.Nxe4 Bxe4 9.Bf4 O-O 10.dxc5 bxc5 11.Qd2 Qb6 12.Rfd1 Rd8 13.Qe3 Qb7 14.Bd6 Bxd6 15.Rxd6 Qxb2 16.Rad1 Qb7 17.Rxe6 fxe6 18.Ng5 h6 19.Nxe4 Nc6 20.Nxc5 Qc7 21.Nxd7 Rac8 22.Qxe6+ Kh8 23.Be4 Ne7 24.Rd6 Qxc4 25.Qxe7 Qc1+ 26.Kg2 Re8 27.Qf7 Rxe4 28.Rg6 1-0

Friðrik Ólafsson og Helgi Ólafsson með á stórmótinu í Vin á mánudag

Stórmeistararnir Friðrik Ólafsson og Helgi Ólafsson eru skráðir til leiks á opnu skákmóti í Vin, Hverfisdötu 47, sem hefst klukkan 13 mánudaginn 21. janúar. Mótið er haldið til heiðurs Friðriki Ólafssyni, fyrsta stórmeistara Íslendinga og fv. forseta FIDE.

Mótið markar upphaf að mikilli skákviku, sem nær hápunkti laugardaginn 26. janúar, þegar Skákdagur Íslands verður haldinn á afmælisdegi Friðriks. Tugir viðburða er á dagskránni hjá skákfélögum og grunnskólum um land allt.

Á mótinu í Vin verða tefldar 6 umferðir með sjö mínútna umhugsunartíma. Skákfélag Vinjar býður til mótsins, í samvinnu við Skákakademíuna.

Af öðrum góðum gestum sem tefla á Friðriksmótinu í Vin má nefna Vigni Vatnar Stefánsson, nýbakaðan Íslandsmeistara barna, Gunnar Björnsson forseta Skáksambandsins og Róbert Lagerman, sem heldur utan um hið blómlega skáklíf í Vin.

Í leikhléi verður boðið upp á veitingar. Keppendur eru hvattir til að mæta tímanlega. Þátttaka er ókeypis og allir eru hjartanlega velkomnir.

Toyotaskákmót eldri borgara.

Nú er hafin íslenska skákvikan, sem er til heiðurs okkar fyrsta stórmeistara í skák Friðriki Ólafssyni og ætla heldri borgarar að tefla honum til heiðurs alla vikuna.

Toyota á Íslandi býður eldri skákmönnum til skákmóts á næsta föstudag 25. janúar (fyrsta dag Þorra) í höfuðstöðvum sínum í Kauptúni í Garðabæ. Þetta er sjötta Toyotaskákmótið sem haldið er. Æsir skákfélag FEB í Reykjavík sjá um framkvæmd mótsins. Allir skákmenn sem verða sextugir á árinu velkomnir meðan pláss leyfir. Það eru margir búnir að skrá sig í þetta mót, stefnir í metþátttöku.

Skákin byrjar á mínútunni kl. 13.00 þannig að menn þurfa að mæta vel tímanlega á staðinn til að staðfesta þátttöku sína. Gunnar K Gunnarsson vann þetta mót 2012 hann stefnir að því að mæta aftur núna.

Forskráning er hjá Þorsteini Guðlaugssyni í síma 822 2403 og netfangi [e-mail] og hjá Finni Kr Finnssyni í síma 893 1238 og í netfangi [e-mail].

Skákmenn munið að að mæta tímanlega, í síðasta lagi korter fyrir eitt.

Hjörvar með jafntefli í dag

Alþjóðlegi meistarinn Hjörvar Steinn Grétarsson (2516) gerði jafntefli við hollenska stórmeistarann Robin Swinkels (2508) í áttundu umferð c-flokks Tata Steel-mótsins sem fram fór í dag. Hjörvar hefur 4 vinninga.

Frídagur er á morgun en í níundu umferð, sem fram fer á þriðjudag teflir Hjörvar við ítalska stórmeistarann Sabino Brunello (2572), sem er í öðru sæti í flokknum.

Myndir af frá Calle Erlandsson.

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

KORNAX-mótið: Bein útsending frá sjöundu umferð

Sjöunda umferð KORNAX-mótsins - Skákþings Reykjavíkur hefst í dag kl. 14. Venju samkvæmt eru 6 skákir sýndar beint frá umferðinni. Útsendingu frá umferðinni má nálgast hér.

Skákirnar sem sýndar eru beint eru:

• Lenka Ptácníková (5) - Davíð Kjartansson (5,5)
• Þór Valtýsson (4,5) - Omar Salama (5,5)
• Júlíus Friðjónsson (4,5) - Daði Ómarsson (4,5)
• Dagur Ragnarsson (4,5) - Halldór Pálsson (4,5)
• Einar Hjalti Jensson (4) - Örn Leó Jóhannsson (4)
• Jóhann H. Ragnarsson (4) - Jón Trausti Harðarson (4)

 

• Heimasíða TR (beinar útsendingar)
• Myndaablúm (GB)
• Chess-Results

Anand og Carlsen efstir í Wijk aan Zee

Anand (2772), sem vann van Wely (2679) er efstur ásamt Carlsen (2861) sem varð að sætta sig við jafntefli gegn Leko (2735). Nakamura (2769), sem vann Wang Hao (2752), og Karjakin (2780), sem gerði jafntefli við Aronian (2802) eru í 3.-4. sæti. Áttunda umferð hefst kl. 12:30 og þá mætast meðal annars: Carlsen-Karjakin og Anand-Sokolov

Úrslit 7. umferðar:

 

Anand, V. - van Wely, L.	1-0
Sokolov, I. - Harikrishna, P.	½-½
Leko, P. - Carlsen, M.	½-½
Karjakin, S. - Aronian, L.	½-½
Hou, Y. - Caruana, F.	½-½
L'Ami, E. - Giri, A.	½-½
Wang, H. - Nakamura, H.	0-1

 

Staða efstu manna:

• 1.-2. Anand (2772) og Carlsen (2861) 5 v.
• 3.-4. Nakamura (2769) og Karjakin (2780) 4½ v.
• 5.-6. Harikrishna (2698) og Aronian (2802) 4 v.
• 7. Leko (2735) 3½ v.

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)