Skákhátíð í Vogum á Vatnsleysuströnd föstudag -- nýr skákklúbbur stofnaður

Skákhátíð verður haldin í sveitarfélaginu Vogum á Vatnsleysuströnd föstudaginn 25. janúar, í tilefni af Skákdegi Íslands. Bæjarbúum á öllum aldri er boðið til skákveislu í grunnskólanum kl. 13 til 15. Við þetta tækifæri verður stofnaður skákklúbbur, sem mun taka að sér skipulagt skákstarf í sveitarfélaginu.

Skákmeistarinn Róbert Lagerman mun tefla fjöltefli við alla sem vilja spreyta sig og Hrafn Jökulsson mun sýna ljósmyndir úr skáklífinu á Íslandi og Grænlandi, auk þess að veita byrjendum á öllum aldri tilsögn í skákinni.

Á meðan á dagskrá stendur munu nemendur selja vöfflur, kakó og kaffi gegn vægu verði.  Í lokin verða tvö söngatriði, tveir nemendur skólans sem eru í söngnámi syngja  nokkur lög.

Nemendur, foreldrar, ömmur, afar, frænkur, frændur, allir aðrir íbúar í Sveitarfélaginu Vogum, velunnarar skáklistarinnar nær og fjær, eru hjartanlega velkomin til að eiga ánægjulega stund.

Guðmundur Jónas Haraldsson hefur veg og vanda af undirbúningi, í samvinnu við grunnskólann, sveitarfélagið og Skákakademíuna.

Skákdagur Íslands er haldinn í tilefni af afmæli Friðriks Ólafssonar, fyrsta stórmeistara Íslendinga, sem verður 78 ára á laugardaginn. Taflfélög, skólar, sveitarfélög og einstaklingar um allt land efna til viðburða, og heiðra þannig fremsta skákmann Íslandssögunnar.

Ingvar Örn sigurvegari Þorramóts SSON

Ingvar Örn Birgisson hafði góðan sigur á Þorramótinu sem kláraðist í gærkveldi.  Hann vann alla andstæðinga sína utan Grantas Grigorians.  Grantas sem lengi vel var í forystu tapaði fyrir Magnúsi Matthíassyni í næstsíðustu umferð og voru sigurvonir hans þar með úr leik.  Ingimundur Sigurmundsson og Ingvar Örn áttust síðan við í hreinni úrslitaskák í síðustu umferð. 

Þar var teflt í botn og réðust úrslitin í hróksendatafli þar sem Ingvar sýndi áræði og þor í bland við mikla útsjónarsemi og vann atskákmeistara félagsins og tryggði sér þar með sigur á mótinu en þeir Grantas og Ingimundur deildu öðru sætinu.

Rank	Name	Rtg	Pts	SB
1	Birgisson Ingvar Örn	1786	5	11.50
2	Grigorianas Grantas	1683	4½	11.25
3	Sigurmundsson Ingimundur	1818	4½	9.25
4	Matthíasson Magnús	1616	3	5.50
5	Sigurmundsson Úlfhéðinn	1779	3	4.00
6	Siggason Þorvaldur	1450	1	0.00
7	Erlingsson Arnar	0	0	0.00

Næstkomandi miðvikudag fer fram Janúarhraðatið þar sem tefldar verða 10 mínútna skákir.

Skák í Hringnum í skákvikunni.

Barnaspítali Hringsins fékk skákheimsókn í dag, að sjálfsögðu í tilefni skákdags Íslands nk. laugardag.
Grunnatriði skáklistarinnar kynnt fyrir öllum sem komu á leikstofu Hringsins.

Skákþraut dagsins fékk mikla athygli, þó nokkrir leystu hana, og enn aðrir tóku mynd af henni og ætla
gefa mömmu, pabba, afa og ömmu tækifæri á að leysa þessa skemmtilegu skákþraut á sjálfan skákdaginn 26. janúar.

Hér er þrautin, hvítur leikur og mátar í átta leikjum, verði ykkur að góðu.

 

Helgi tefldi við 27 Eyjamenn

Í dag á fjörutíu ára afmæli Heimaeyjargossins stór Taflfélag Vestmannaeyja, Grunnskólinn í Vestmannaeyjum og Vestmannaeyjabær fyrir fjöltefli í húsi Akóges í Vestmannaeyjum.

Helgi Ólafsson, stórmeistari og félagsmaður í Taflfélagi Vestmannaeyja tefldi við gesti, en þess má geta að Helgi var einn þeirra sem yfirgáfu Heimaey gosnóttina fyrir 40 árum. 

Alls mættu 27 í fjölteflið, en rúmlega helmingurinn voru grunnskólabörn.  Taflið hófst kl. 13 og var lokið rétt fyrir klukkan þrjú. Fór það svo að Helgi vann 25 skákir, en samdi jafntefli við Nökkva Sverrisson og Karl Gauta Hjaltason.

Þeir þátttakendur sem best stóðu sig fengu ýmsar gjafir frá Vestmannaeyjabæ og Helgi Ólafsson útnefndi skákina við Nökkva bestu skákina og hlaut Nökkvi ferð með Ernir/Flugleiðum innanlands að launum.

Íslandsmótið í ofurhraðskák

Lokaviðburður skákdagsins til heiðurs Friðriki Ólafssyni verður íslandsmótið í ofurhraðskák fer fram, laugardaginn 26. janúar á ICC og hefst kl. 21.00. Mótið er öllum opið og er teflt er einum flokki.  Skráning fer fram á Heimasíðu Hellis.

Allt skráningarferlið er sjálfkrafa og eina sem þátttakendur þurfa að hafa í huga er að vera mættir tímanlega á ICC eða eigi síðar en kl. 20:50.   Tímamörk eru 2 mínútur á skák og tefldar verða 15 umferðir.     

Þeir sem ekki eru skráðir á ICC geta skráð sig á vef ICC en ekki þarf að greiða fyrir fyrstu vikuna. Að því loknu er hægt að skrá sig á heimasíðu Hellis.  Þeir sem ekki hafa hugbúnað til að tefla geta halað niður þar til gerðu forriti (mælt er með Blitzin eða Dasher).   Einnig er hægt að tefla í gegnum java-forrit.  Þar sem allir keppendur þurfa að vera á svokallaðri Íslands-rás er æskilegt að menn slái inn "g-join Iceland" við næstu/fyrstu innskráningu á ICC.

Fyrirspurnir sendist til Omars Salama, umsjónarmanns mótsins í netfangið [e-mail].

Verðlaun:

1. kr. 5.000 
2. kr. 3.000 
3. kr. 2.000

Gallerý Skák: "Taflkóngur Friðriks II"

Kappteflið um FriðriksKónginn hefst í Listasmiðjunni Gallerý Skák í kvöld en um taflkónginn er keppt árlega. Keppnin er liður í skákmótahaldi sem til er hvatt af  SÍ og Skákakademíu Reykjavíkur í tilefni af „Degi Skákarinnar"  26. janúar, á afmælisdegi Friðriks Ólafssonar, stórmeistara, fremsta skákmanns Íslands fyrr og síðar.

Um er að ræða 4 kvölda Grand Prix mótaröð þar sem átta efstu sæti í hverju móti telja til stiga (10-8-6-5-4-3-2-1).   Keppt er um veglegan farandgrip,  myndarlegan taflkóng úr Hallormsstaðabirki, sem tileinkaður hefur verið og ábektur af meistaranum.  

Sigurvegari ár hvert fær nafn sitt skráð á styttuna gylltu letri og verðlaunagrip í hendur.  Taflkóngurinn vinnst aldrei til eignar og fer á Þjóðminjasafnið í fyllingu tímans.  Þrjú bestu mót hvers keppanda reiknast til vinningsstiga. Taka þarf  þátt í amk. 2 mótum til að  reiknast með. Meðlimir „óháða safnaðarins" eru því hjartanlega velkomnir til tafls þó þeir geti ekki verið með í öllum mótunum.  Aðalatriðið er að sýna þjóðhollustu í þágu skáklistarinnar.

Í fyrra tóku um 30 keppendur þátt,  þar af hlutu 18 stig.  Fyrsti sigurvegari FriðriksKóngsins var hinn valinkunni skákmaður og menntaskólakennari Gunnar Skarphéðinsson (Péturssonar Zóphóníassonar) sem hlaut 24 stig í 3 mótum af 30 mögulegum og var því vel að sigrinum kominn.   Nú er að sjá hver stendur uppi sem sigurvegari að þessu sinni.  Kannski frændi hans hinni ungi og upprennandi snillingur Vignir Vatnar eða aldursforsetinn GunniGunn eða ókunni skákmaðurinn.  Hver veit ??

Kappteflið á fimmtudagskvöldið hefst kl. 18 og verða tefldar 11 umferðir með 10 mínútna uht.  Lagt er í púkk fyrir kaffi og kruðeríi meðan á móti stendur og  matföngum í taflhléi kl. 8, mótinu lýkur um 10 leitið.  (Kr. 1.000).

Friðrik Ólafsson verður heiðursgestur við mótssetninguna og mun leika fyrsta leikinn (að eigin vali).  

ESE 23.01.13

Omar og Davíð í banastuði á KORNAX-mótinu

Omar Salama (2265) og Davíð Kjartansson (2323) eru efstir og jafnir með 7,5 vinning að lokinni áttundu og næstsíðustu umferð KORNAX-mótsins - Skákþings Reykjavíkur sem fram fór í kvöld. Báðir unnu þeir og hafa 1,5 vinnings forskot á Einar Hjalta Jensson (2301) sem er þriðji. Omar vann Halldór Pálsson (2074) en Davíð lagði Daða Ómarsson (2218). Lokaumferðin fer fram á föstudagskvöld.

Þá teflir Omar við Mikael Jóhann Karlsson (1960) sem vann Lenku Ptácníková (2281) í kvöld en Davíð mætir Þór Má Valtýssyni (2023). Munu Akureyringar setja strik í reikninginn?

Úrslit áttundu umferðar má finna hér. 

Stöðu mótsins má finna hér.

Pörun lokaumferðarinnar umferðar má finna hér.

• Heimasíða TR (beinar útsendingar)
• Myndaablúm (GB)
• Chess-Results

Hjörvar vann í dag

Alþjóðlegi meistarinn Hjörvar Steinn Grétarsson (2516) vann í dag hollensku skákkonuna Lisa Schut (2295) sem er alþjóðlegur meistari kvenna. Hjörvar hefur 5 vinninga og er í 6.-8. sæti.

Frídagur er á morgun. Í 11. umferð, sem fram fer á föstudag, teflir hann við ísraelska stórmeistarann Igor Bitensky (2400).

Ítalski stórmeistarinn Sabino Brunello (2572) er efstur með 8,5 vinning.

Myndir af vettvangi af Hjörvari eru frá Calle Erlandsson.

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Síðasta sýningarhelgi sýningarinnar Einvígi aldarinnar - Fischer og Spassky - 40 ár

Um helgina lýkur sýningunni  Einvígi aldarinnar. Fischer og Spassky-40 ár sem staðið hefur frá því

3. mars 2012 í Þjóðminjasafni Íslands. Skákeinvígið sem kallað hefur verið „einvígi aldarinnar" var háð í Reykjavík sumarið 1972. Þar tókust á fulltrúar risaveldanna á tímum „Kalda stríðsins", Bandaríkjamaðurinn Bobby Fischer og sovéski heimsmeistarinn Boris Spassky.

Sýningin var unnin í samvinnu við Skáksamband Íslands í tilefni af því að liðin voru 40 ár frá einvíginu. Á sýningunni eru munir og myndir sem tengjast skákeinvíginu 1972.

Fyrsta skák einvígisins var tefld í Laugardalshöll þann 11. júlí 1972,  en 1. september gaf Spassky 21. skák einvígisins og Fischer var nokkrum dögum síðar krýndur heimsmeistari. Lokatölur urðu 12½ vinningur á móti 8½ vinningi. Þar með lauk einvígi sem vakti meiri athygli en nokkur annar skákviðburður fyrr og síðar. Atburðarás einvígisins var fréttaefni sjónvarpsstöðva og dagblaða um allan heim.

Um einvígið hafa verið skrifaðar fleiri en 140 bækur og gerðir ótal sjónvarpsþættir.

Guðmundur tapaði fyrir Vachier-Lagrave í 2. umferð

Alþjóðlegi meistarinn, Guðmundur Kjartansson (2408) tapaði fyrir franska stórmeistaranum Maxime Vachier-Lagrave (2711) í 2. umferð alþjóðlega mótsins í Gíbraltar. Guðmundur hefur 1 vinning.

Í 3. umferð, sem fram fer á morgun, teflir Guðmundur við þýska skákmanninn Claus Seyfried (2077). 

246 skákmenn taka þátt í mótinu og þar af 48 stórmeistarar. Guðmundur er nr. 66 í stigaröð keppenda.

• Heimasíða mótsins
• Chess-Results