Birkir Karl og Páll Snædal efstir á Skákþingi Goðans

Birkir Karl Sigurðsson (1753) og Páll Snædal Andrason (1752) eru efstir með 3,5 vinning að loknum fjórum atskákumferðum á Skákþingi Goðans sem fram fór í gær. Nú taka við kappskákirnar og eru tefldar tvær slíkar í dag og ein á morgun. 

Sigurður G. Daníelsson (2091), Guðmundur Kristinn Lee (1625), Stephen Jablon (1931) og Smári Sigurðsson (1685) eru í 3.-6. sæti með 3 vinninga.

Alls taka 20 skákmenn þátt í mótinu sem fram fer um helgina í Framsýnarsalnum á Húsavík.

• Heimasíða Goðans
• Chess-Results

Búdapest: Hannes með jafntefli í gær

Stórmeistarinn Hannes Hlífar Stefánsson (2496) gerði jafntefli við ungverska stórmeistarann Attila Czebe (2488) í sjöttu umferð First Saturday-mótsins sem fram fór í gær. Hannes hefur nú 3,5 vinning og er í 3.-4. sæti.

Í dag teflir hann við ungverska alþjóðlega meistarann Oliver Mihok (2442).

10 skákmenn og þar af 3 stórmeistarar taka þátt og tefla allir við alla. Meðalstigin eru 2443 skákstig. Hannes er næststigahæstur keppenda.

• Heimasíða mótsins
• Chess-Results

NM - 2. umferð

Þegar þetta er ritað situr Sóley Lind ein eftir Íslendinga að tafli í annarri umferð. Hún verst í endatafli, en hefur bætt stöðu sína mikið í síðustu leikjum.

 Má með sanni segja að nokkrar sveiflur hafi verið í þessari umferð því á tímabili leit út fyrir að uppskera kvöldsins yrði all rýr en varð í staðin með hinu ágætasta móti.

Vignir og Nansý sömdu snemma jafntefli í átján leikjum. Dawid tefldi skák sem varð nokkuð flókin um tíma og hafði hann fyrst unnið en lék því hugsanlega niður í jafntefli í endatafli, en náði þá góðu trikki og sigur í höfn. Hilmir Freyr tefldi við Dreisler hinn danska sem er stigahæsti maður flokksins og hélt jöfnu í hróksendatafli sem var tapað um tíma. Frábært að fá 1.5 vinning úr þessum skákum miðað við stöðuna um hríð.

Í c-flokknum tapaði Oliver Aron skiptamun snemma tafls og síðar skákinni en Jón Kristinn vann góðan sigur í vel tefldu endatafli.

Þeir félagar úr Fjölni Jón Trausti og Dagur Ragnars eru með fullt hús eftir þennan fyrsta dag. Í mikilli stöðubaráttu lék andstæðingur Dags af sér skákinni í einum leik. Jón Trausti var aftur nær búinn með tímann sinn eftir 20 leiki og var staðan þá í jafnvægi. Næstu leiki í miðtaflinu lék hann hins vegar af gríðarlegri nákvæmni og fékk smám saman betra tafl og svo unnið og kláraði dæmið með stæl; hreinlega mátaði andstæðing sinn.

Í a-flokki vann Mikael Jóhann skyldusigur gegn mun stigalægri andstæðingi en Nökkvi tapaði gegn andstæðingi sem hann ætti að sigra.

Allavega 6.5 vinningur úr þessari umferð sem er gott mál.

Öll úrslit og pörun koma á chess-results.com í kvöld en 3. umferð hefst 10:00 í fyrramálið.

Þá verða allavega Dagur, Jón Trausti og Vignir í beinni.

NM í skólaskák hafið

Norðurlandamótið í skólaskák hófst í dag að Bifröst í Borgarfirði. Ágætlega gekk hjá íslensku keppendum í fyrstu umferð þegar sex vinningar komu í hús. Vignir Vatnar sneri á andstæðing sinn eftir að hafa haft þrönga stöðu um hríð. Nansý og Hilmir Freyr unnu létta sigra gegn lakari andstæðingum. Dawid Kolka sem teflir í d-flokki eins og Hilmir tapaði fyrir stigahæsta manni flokksins eftir góða baráttu – ein lengsta skák umferðarinnar.

Oliver Aron vann öruggan sigur í c-flokki en Jón Kristinn tapaði gegn sterkum andstæðingi eftir erfiðleika í byrjuninni. Sóley Lind tapað snemma peði með hvítu og átti erfitt tafl eftir það og tapaði. Í b-flokknum unnu bæði Dagur Ragnars og Jón Trausti. Dagur var farsæll í sinni skák en hann hefði getað fengið tapað tafl en andstæðingur hans sá ekki rétta framhaldið.

Jón Trausti lagði sterkan og stigahærri Færeying að vell eftir gríðarlega spennandi skák þar sem báðir kláruðu tímann sinn fyrir 20. leik og léku á viðbótartíma út skákina. Flott skák hjá Jóni og sterkt að hafa taugar í svona skák en nokkrum sinnum fór klukka Jóns niður í eina sekúndu.

Mikael Jóhann og Nökkvi áttu slæmar skákir í a-flokki. Vissulega gegn 2300stiga mönnum en þeir geta teflt mun betur en í dag.

Önnur umferð er tefld nú í kvöld og þá mætast m.a. Vignir Vatnar og Nansý. Allar aðstæður á Bifröst eru með besta móti og langt yfir meðallagi hvað varðar keppnisaðstæður á Norðurlandamótum í sögulegu tilliti.

 Nokkrar myndir má sjá á Bifrastartenglinum að neðan og auk þess eru myndir á skak.is.

http://www.chess-results.com/tnr90104.aspx?lan=1 

http://bifrost.is/islenska/um-haskolann/frettir/nr/137020/

Skákþing Akureyrar: Hörð barátta um annað sætið!

Eins og áður hefur komið fram var baráttan um meistaratitilinn þegar útkljáð sl. sunnudag þegar sjöunda umferðin var tefld. Haraldur stafnbúi Haraldsson vann þá sína sjöttu skák og náði óbrúanlegu forskoti á keppinauta sína. Í næstsíðustu umferð í gærkveldi sigldi hann lognkyrran sjó og stefni fleyi sínu í jafnteflishöfn.

Andstæðingur hans, Andri  Freyr Björgvinsson, var reyndar með sótthita en tefldi samt, enda einn þeirra sem heyja baráttu um annan sætið á mótinu. Það gera líka Sigurður Arnarson sem Hreinlega lúpíndi andstæðing sinn til uppgjafar og Hjörleifur grásleppubóndi Halldórsson sem felldi sinn mann á Benkö-bragði  sem hann beitti nú í fyrsta sinn á sextíu ára skákferli. Þá má nefna að Símon Þórhallsson, „Simanovic" fór Karlmannlega fram gegn sínum andstæðingi og beitti hann leikþröng í hróksendatafli svo um munaði.  Allt voru þetta glæsilegar skákir og fóru svona:

• Rúnar-Jón Kristinn½
• Andri-Haraldur½
• Sigurður-Hreinn1-0
• Jakob-Hjörleifur0-1
• Símon-Karl1-0

Að einni umferð ólokinni er staðan sú í mótinu að Haraldur er enn langefstur með 7 vinninga, Hjörleifur hefur 5, Sigurður og Andri 4,5 og í hnapp koma svo þeir Rúnar, Jakob Sævar, Símon og Karl með 3,5.

Mótinu lýkur á sunnudag.

• Heimasíða SA 
• Chess-Results

Stefán með vinningsforskot fyrir lokaumferð Fastus-mótsins

Stórmeistarinn Stefán Kristjánsson (2486), sem vann Íslandsmeistarann Þröst Þórhallsson (2441) í sjöttu og næstsíðustu umferð Fastus-mótsins - Gestamóti Goðans, sem fram fór í gærkveldi, er efstur með 5,5 vinning. Þröstur og Karl Þorsteins (2464), sem lagði Andra Áss Grétarsson (2327) eru næstir með 4,5 vinning og þeir einu sem geta náð Stefáni að vinningum.  Stefán og Karl mætast í lokaumferðinni sem fram fór á mánudagskvöldið, 11. febrúar og hefst kl. 19:30.

Öll úrslit 6. umferðar má finna hér.

Staða efstu manna:

• 1. GM Stefán Kristjánsson (2486) 5,5 v.
• 2.-3. IM Karl Þorsteinsson (2464) og GM Þröstur Þórhallsson (2441) 4,5 v.
• 4.-7. FM Sigurbjörn Björnsson (2391), IM Jón Viktor Gunnarsson (2413), FM Þorsteinn Þorsteinsson (2251) og Þorvarður F. Ólafsson (2221)

Stöðu mótsins má finna hér.

Í lokaumferðinni mætast meðal annars:

• Stefán - Karl
• Jón Viktor - Þröstur
• Þorsteinn - Sigurbjörn
• Ingvar Þór - Þorvarður

Röðun í 7. umferð má finna hér.

Mótið fer fram í húsakynnum Skákskóla Íslands, Faxafeni 12.

• Heimasíða Goðans-Máta
• Chess-Results

NM í skólaskák hefst í dag á Bifröst

Norðurlandamótið í skólaskák fer fram á Bifröst helgina 8.-10. febrúar. Þar er teflt í 5 flokkum og eiga allar þjóðirnar 10 fulltrúa (2 í hvern flokk). Íslendingar fá reyndar aukafulltrúa í c-flokk vegna forfalla hjá Finnum. Fulltrúar Íslands eru:

A-flokkur (1993-95):

• Mikael Jóhann Karlsson (1990)
• Nökkvi Sverrisson (1990)

B-flokkur (1996-97):

• Dagur Ragnarsson (1961)
• Jón Trausti Harðarson (1853)

C-flokkur (1998-1999):

• Oliver Aron Jóhannesson (1988)
• Jón Kristinn Þorgeirsson (1766)
• Sóley Lind Pálsdóttir (1393)

D-flokkur (2000-01):

• Hilmir Freyr Heimisson (1693)
• Dawid Kolka (1646)

E-flokkur (2002-)

• Vignir Vatnar Stefánsson (1652)
• Nansý Davíðsdóttir (1479)

Skákstórar eru Páll Sigurðsson og Omar Salama. Mótsstjóri er Stefán Bergsson en þjálfari krakkanna er Helgi Ólafsson. 

Beinar útsendingar verða frá hverri umferð auk stöðugs fréttaflutnings á Skák.is yfir helgina. Fyrsta umferð hefst í dag kl. 13:45.

 

• Heimasíða mótsins
• Chess-Results

Skákþing Goðans hefst í kvöld

Skákþing Goðans Máta 2013 verður haldið í 10. sinn, helgina 8-10 febrúar nk. í sal Framsýnar-stéttarfélags að Garðarsbraut 26 á Húsavík. Mótið er öllum opið.

Tefldar verða 7 umferðir eftir swissneska-kerfinu,(swiss-manager) 4 atskákir og 3 kappskákir. Mótið verður reiknað til Íslenskra og fideskákstiga.  

Dagskrá:

Föstudagur   8. febrúar  kl 19:30  1-4 umferð.   (atskák 25 mín )
Laugardagur  9. febrúar  kl 11:00  5. umferð.     (90 mín +30 sek á leik)
Laugardagur  9. febrúar  kl 19:30  6. umferð.       -------------------
Sunnudagur  10. febrúar  kl 11:00  7. umferð.       -------------------

Verðlaun verða með hefðbundnu sniði. 3 efstu í fullorðins flokki og 3 efstu í 16 ára og yngri.Farandbikar fyrir sigurvegarann í báðum flokkum. Aðeins félagsmenn í Goðanum-Mátum geta unnið til verðlauna.  

Þátttökugjald er 2000 krónur fyrir fullorna og 1000 krónur fyrir 16 ára og yngri. 

Skráning í mótið fer fram hér alveg efst á síðunni á sérstöku skráningarformi

Skákmeistarar Goðans-Máta frá upphafi:

2004    Baldur Daníelsson.
2005    Ármann Olgeirsson
2006    Ármann Olgeirsson       
2007    Smári Sigurðsson         
2008    Smári Sigurðsson 
2009    Benedikt Þorri Sigurjónsson
2010    Rúnar Ísleifsson
2011    Jakob Sævar Sigurðsson
2012    Rúnar Ísleifsson
2013     ?   

ATH. Mögulegt verður að flýta einhverjum skákum í 6. umferð og eins verður mögulegt að flýta skákum í 7. umferð henti það einhverjum.

• Heimasíða Goðans
• Chess-Results

Hópferð til Lundúna - Áskorendamótið í skák

FERÐANEFND KR í samvinnu við  Gallerý Skák og Jóa Útherja hefur skipulagt áhugaverðan skottúr til Lundúna dagana 14. til 18. mars nk.  til að fylgjast með Áskorendamótinu í skák sem fe í IET Centre á Strand, þar sem 8 fremstu skákmeistarar heims keppa um áskorunarréttinn á heimsmeistarann. Einnig gefst kostur á að  sjá leik Chelsea FC og West Ham í knattspyrnu, laugardaginn 16. mars nk. 

Ennfremur er fyrirhugað að etja kappi í skák við Royal Automobile Club í skák , sem er einn virðulegasti karlaklúbbur þar í borg. Um er að ræða fimm daga/fjögurra nátta ferð.   Gist verður á Millenium Chelsea Hótelinu  í Knightbridge. http://www.millenniumhotels.co.uk/millenniumcopthornechelseafc/

Brottför er að morgni fimmtudagsins 14. mars með Icelandair til Gatwick og heimferð að kvöldi mánudagsins 18. mars frá  Heathrow.  Áætlað verð er  ca. kr. 147.500 sem innifelur flug og gistingu, akstur til og frá flugvelli,  miða á leikinn, skoðunarferð um leikvanginn og  veislukvöldverð á hótelinu á laugardagskvöldið.  Miðar á skákmótið eru keyptir á netinu eða við innganginn en nánar má lesa um það  hér:  http://www.worldchess.com/candidates/index.html

Keppendur eru eftirtaldir valinkunnir ofurstórmeistarar: Magnus Carlsen, Levon Aronian,  (N Boris Gelfand;  Alexander Grischuk;  Vassily Ivanchuk;  Vladimir Kramnik;Teimour Radjabov; og Peter Svidler).

Miðað er við að þátttakendur í ferðinni verði þetta  10-12 talsins

Áhugasamir hafi sambandi við Einar Ess sem allra fyrst í síma 690-2000 eða með tölvupósti á netfangið: ese @emax.is

FERÐANEFNDIN ESE/MVP/ÁÞÁ

KR-pistill: Gunnar Ingi gerir það ekki endasleppt

Það snjóaði í Vesturbænum þegar gengið var til tafls á mánudagskvöldið var. Það snjóaði líka inn nýjum skákhugmyndum í kollinn á hinum fjölmörgu þátttakendum í KR-KAPPmótinu, sem þangað voru komnir til að spreyta sig og leggja sóma sinn að veði.  Ekki gengu allar nýjungarnar upp og margir hausar fengu að fjúka fyrir lítið.  Svo voru aðrir sem náðu sér vel á strik, þar á meðal formaðurinn sjálfur sem virtist óstöðvandi á tímabili og er greinilega kominn í gírinn aftur

Að sögn viðstaddra leiddi Sigurður Áss Grétarsson mótið lengst af eða þangað til Guðfinnur náði að vinna hann og greiða þannig götu Gunnars Inga Birgissonar, sem notaði tækifæri og skaust naumlega fram úr honum á beygjunni, líkt og kappakstursmaður í Formúlu 1.  Er þetta annað mótið í röð þar sem hann er efstur en hann hefur líka gert það gott í Gallerý-deildinni á fimmtudögum. Hefur vissulega efni á að brosa aftur fyrir bæði en aðrir heldur styttra.

Annars var keppnin hörð, jöfn og skemmtileg eins og sést á meðf. mótstöflu.  

 

 

ESE-skákþankar 8/13   070213