Hraðkvöld hjá Helli í kvöld

Taflfélagið Hellir heldur hraðkvöld mánudaginn 11. febrúar nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Íslensk börn og ungmenni sigursæl á Norðurlandamótinu í skólaskák

• Vignir Vatnar Norðurlanda-meistari.
• Íslendingar unnu flest verðlaun.
• Íslensku krakkarnir með flesta vinninga allra Norðurlandaþjóða.

Íslensk börn og ungmenni stóðu sig best allra á Norðurlandamótinu í skólaskák, sem fram fór á Bifröst um helgina. Keppt var í fimm aldursflokkum, sem skipaðir voru tveimur fulltrúum frá Íslandi, Danmörku, Svíþjóð, Noregi, Finnlandi og Færeyjum. Íslensku krakkarnir unnu flest verðlaun á mótinu, fimm talsins.

Vignir Vatnar Stefánsson varð Norðurlandameistari í flokki 11 ára og yngri, eftir harða keppni við Nansý Davíðsdóttur.

Keppnin í öllum aldursflokkum var jöfn og tvísýn. Í efsta flokki börðust FIDE-meistararnir Westerberg frá Danmörku og Ebeling frá Finnlandi um efsta sætið, en Mikael Jóhann Karlsson tryggði gott brons fyrir Ísland. Oliver Aron Jóhannesson landaði öðru bronsi í flokki 14-15 ára og sama gerði hinn eitilharði Dawid Kolka í flokki 12-13 ára.

Íslensku krakkarnir fengu flesta vinninga samtals á Norðurlandamótinu, 36,5, eftir hörkuspennandi keppni við Dani, sem fengu vinningi minna. Það voru hinir ungu og bráðefnilegu Hilmir Freyr Heimisson og Nökkvi Sverrisson sem tryggðu íslenskan sigur í blálokin. Mikið er jafnan lagt upp úr sigri í ,,Landakeppninni" en Norðurlandamótið í skólaskák var fyrst haldið 1980, og á því langa og merka sögu.

Árangur íslensku krakkanna á Norðurlandamótinu verður að teljast sérlega góður. Frammistaða allra var til sóma, og tvöfaldur sigur í yngsta flokki er glæsilegur vitnisburður um grósku í skáklífinu og skákáhuga barna. Þjálfari íslensku skákkrakkanna er Helgi Ólafsson stórmeistari og skólastjóri Skákskóla Íslands.

Helstu úrslit á Norðurlandamótinu í skólaskák:

A-flokkur (18-20 ára)

1. Jonathan Westerberg, Svíþjóð, 5 vinningar

2. Daniel Ebeling, Finnlandi, 4,5

3. Mikael Jóhann Karlsson, 3,5

10. Nökkvi Sverrisson, 2,5

B-flokkur (16-17 ára)

1. Joar Olund, Svíþjóð, 4,5

2. Jens Albert Ramsdal, Danmörku, 4,5

3. Hogni Egilstoft Nielsen, Færeyjum, 4

4. Jón Trausti Harðarson, 3,5

5. Dagur Ragnarsson, 3,5

C-flokkur (14-15 ára)

1. Jesper Sondergaard Thybo, Danmörku, 5

2. Lars Oskar Hauge, Noregi, 5

3. Oliver Aron Jóhannesson , 3,5

9. Jón Kristinn Þorgeirsson, 2,5

10. Sóley Lind Pálsdóttir, 2

D-flokkur (12-13 ára)

1. Tobias Dreisler, Danmörku, 5

2. Valo Hallman, Finnlandi, 4,5

3. Dawid Kolka, 4

4. Hilmir Freyr Heimisson, 3,5

E-flokkur (11 ára og yngri)

1. Vignir Vatnar Stefánsson, 5,5

2. Nansý Davíðsdóttir, 4,5

3. Filip Boe Olsen, Danmörku, 3,5

Myndaalbúm frá Norðurlandamótinu í skólaskák

Heildarúrslit: http://www.chess-results.com/tnr90104.aspx?art=0&lan=1&flag=30&wi=821

Skákþáttur Morgunblaðsins: Magnús Carlsen vann með yfirburðum í Wijk aan Zee

Sigur Magnúsar Carlsen í A-flokki Tata Steel-mótsins í Wijk aan Zee þokar honum nær 2900 stiga markinu en „lifandi" stig hans eru nú 2874 elo. Lokaniðurstaðan varð þessi: 1. Magnús Carlsen 10 v. (af 13) 2. Aronjan 8½ v. 3.-4. Anand og Karjakin 8 v. 5. Leko 7 ½ v. 6. Nakamura 7 v. 7. Harikrisna 6 ½ v. 8. 10. Giri, Wang Hao og Van Wely 6v. 11. Hou Yifan 5 ½ v. 12. Caruana v. 13. L ´Ami 4 v. 14. Sokolov 3 v.

Hjörvar Steinn Grétarsson tefldi í C-flokki og fékk 6 ½ v. af 13 og varð í 7.-8. sæti. Frammistaða hans var að mörgu leyti góð, hann tefldi af öryggi með svörtu en virðist þó mega „brjóta upp" byrjanir sínar - á slæmum kafla tapaði hann þrem skákum í röð með hvítu.

Vinningshlutfall Magnúsar á þessu móti er það sama og Kasparov fékk árið 2000. Einungis heimsmeistaratitilinn stendur út af á afrekaskrá hans. Nái hann því marki má hiklaust skipa honum á bekk með fimm fremstu skákmönnum sögunnar. Hvað stílbrögð varðar þá flokkar Kasparov hann með heimsmeisturum á borð við Capablanca, Smyslov og Karpov. Eitt það athyglisverðasta við taflmennsku Magnúsar undanfarin misseri er fjölbreytt byrjanaval og það eru góð tíðindi að tölvuvæddur undirbúningur má sín lítils gegn honum.

Atlaga hans að heimsmeistaratitlinum hefst í London 15. mars nk. Þá hefst áskorendakeppnin en sigurvegarinn öðlast rétt til að skora á Anand heimsmeistara. Auk Magnúsar tefla Gelfand, Kramnik, Aronjan, Svidler, Ivantsjúk, Radjabov og Grischuk.

Í Wijk aan Zee var Magnús búinn að tryggja sér sigur fyrir síðustu umferð en í 12. umferð lagði hann Nakamura að velli:

Magnús Carlsen Hikaru Nakamura

Sikileyjarvörn

1. e4 c5 2. Rf3 Rc6 3. d4 cxd4 4. Rxd4 e5 5. Rb5 d6 6. g3 h5

7. R1c3 a6 8. Ra3 b5 9. Rd5 Rge7 10. Bg2 Bg4 11. f3 Be6 12. c3 h4 13. Rc2 Bxd5 14. exd5 Ra5 15. f4!

„Sóknin" eftir h-línunni hefur engu skilað og svartur situr eftir með alls kyns veikleika, t.d. á c6-reitnum.

15. ... Rf5 16. g4 h3 17. Be4 Rh4?

Kasparov, sem mun hafa tekið þátt í umræðu um þessa skák á einhverri spjallrásinni, kvað þetta alveg vonlaust og að svartur yrði að reyna 17. ... Dh4+18. Kf1 Re7.

18. O-O g6 19. Kh1 Bg7

19. .. f5 gaf meiri von en eftir 20. Bd3 e4 21. Be2 er riddari á leið til d4 og e6.

20. f5 gxf5 21. gxf5 Rg2 22. f6!

Náðarstuðið, 22. ... Bxf6 má ekki vegna 23. Df3 o.s.frv.

22. ... Bf8 23. Df3 Dc7 24. Rb4 Rb7 25. Rc6 Rc5 26. Bf5 Rd7 27. Bg5 Hg8 28. Dh5 Rb6

29. Be6!

Hótar 30. Re7. Svartur er bjargarlaus.

29. ... Hxg5 30. Dxg5 fxe6 31. dxe6

- og Nakamura gafst upp. Hann á enga vörn við hótuninni 32. f7+.

Davíð Kjartansson skákmeistari Reykjavíkur í annað sinn

Úrslit Skákþings Reykjavíkur, Kornax-mótsins, réðust eftir magnaða lokaumferð þegar Akureyringarnir Þór Valtýsson og Mikael Jóhann Karlsson blönduðu sér í baráttu efstu manna. Mikael Jóhann gerði sér lítið fyrir og vann Omar Salama og Þór gerði jafntefli við Davíð Kjartansson í hörkuskák. Það dugði þó Davíð sem er skákmeistari Reykjavíkur 2013 og er þetta í annað sinn sem hann vinnur titilinn. Lokaniðurstaðan hvað varðar efstu menn: 1. Davíð Kjartansson 8 v. (af 9) 2. Omar Salama 7 ½ v. 3. Mikael Jóhann Karlsson 7 v. 4.-5. Einar Hjalti Jensson og Halldór Pálsson 6 ½ v.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 3. febrúar 2013.

Skákþættir Morgunblaðsins

[Event "Tata Steel"] [Site "0:40:33-0:02:33"] [Date "2013.01.26"] [EventDate "2013.01.11"] [Round "10"] [Result "1-0"] [White "Magnus Carlsen"] [Black "Hikaru Nakamura"] [ECO "B32"] [WhiteElo "?"] [BlackElo "?"] [PlyCount "61"] 1.e4 c5 2.Nf3 Nc6 3.d4 cxd4 4.Nxd4 e5 5.Nb5 d6 6.g3 h5 7.N1c3 a6 8.Na3 b5 9.Nd5 Nge7 10.Bg2 Bg4 11.f3 Be6 12.c3 h4 13.Nc2 Bxd5 14.exd5 Na5 15.f4 Nf5 16.g4 h3 17.Be4 Nh4 18.O-O g6 19.Kh1 Bg7 20.f5 gxf5 21.gxf5 Ng2 22.f6 Bf8 23.Qf3 Qc7 24.Nb4 Nb7 25.Nc6 Nc5 26.Bf5 Nd7 27.Bg5 Rg8 28.Qh5 Nb6 29.Be6 Rxg5 30.Qxg5 fxe6 31.dxe6 1-0

Skákþing Akureyrar: Haraldur verðskuldaður Akureyrarmeistari

Skákþingi Akureyrar lauk í dag, á 94. afmælisdegi Skákfélagsins. Ýmis atvik höguðu því þannig að sumar skákir síðustu umferðar voru þegar tefldar; m.a. var félagi Jón Kristinn horfinn til Bifrastar og Haraldur stýrimaður á erlendar slóðir.

Umferðin var engu að síður spennandi, eins og mótið allt. Þannig varð bráðajafntefli hjá Hjörleifi og Sigurði ( og hefur sá fyrrnefndi nú aðeins tapað eini skák af 20) og einnig í stuttri skák milli Jakobs og Jóns Kristins. Haraldur neytti aflsmunar gegn Símoni með laglegri peðsfórn og svo kljáðust þeir í miklu tímahraki Karl von Vramsokn og Rúnar skógfræðingur. Þar var sá síðarnefndi með lukkulegri stöðu um tíma, en seigla Kalla á endasprettinum reyndist honum heilladrjúg nú sem stundum áður og hafði hann sigur eftir mikið tímahrak Rúnars, sem féll í vandtefldri stöðu. Þar með var allt klárt og verður nú nýtt nafn skráð á bikarinn góða; Haraldur Haraldsson, sem titlaður er stýrimaður í símaskrá.

Röð keppenda var þessi:

• Haraldur Haraldsson 8 v.
• Hjörleifur Halldórsson 5½
• Andri Freyr Björgvinsson og Sigurður Arnarson 5
• Karl Egill Steingrímsson 4½
• Jakob Sævar Sigurðsson 4
• Rúnar Ísleifsson, Símon Þórhallsson og Jón Kristinn Þorgeirsson 3½
• Hreinn Hrafnsson 2½

Við óskum Haraldi hjartalega til hamingju með sinn fyrsta Akureyrarmeistaratitil.  Hann sýndi yfirburði á mótinu og er vel að meistaratitlinum kominn.   

• Heimasíða SA 
• Chess-Results

Birkir Karl vann Skákþing Goðans-Máta - Smári skákmeistari Goðans-Máta

Birkir Karl Sigurðsson vann sigur á Skákþing Goðans-Máta sem lauk í dag. Birkir vann Árna Garðar Helgason í lokaumferðinni og endaði mótið með 6 vinninga og tapaði ekki skák. Páll Andrason, sem vann Stephen Jablon og Guðmundur Kristinn Lee, sem gerði jafntefli við Smára Sigurðsson í lokaumferðinni, urðu í 2-3. sæti á mótinu með 5,5 vinninga.

 

Smári Sigurðsson tekur við bikarnum úr hendi Hermanns Aðalsteinssonar formanns Goðans-Máta. 

Smári Sigurðsson varð í 4. sæti með 5 vinninga og er því skákmeistari Goðans-Máta 2013, þar sem Birkir, Páll og Guðmundur kepptu sem gestir á mótinu. Ármann Olgeirsson varð í 2. sæti (5. sæti alls) með 4,5 vinninga og aðeins stigahærri en Stephen Jablon sem varð í 3. sæti (6. sæti alls)

 

Verðlaunahafar. Hlynur, Stephen, Ármann, Bjarni, Smári og Jón Aðalsteinn. 

Hlynur Snær Viðarsson vann sigur í flokki 16 ára og yngri með 3,5 vinninga. Jón Aðalsteinn Hermannsson varð í öð4u sæti með 3 vinninga og Bjarni Jón Kristjánsson varð í 3. sæti með 2. vinninga. Jón og Bjarni voru að taka þátt í sínu fyrsta kappskákmóti og stóðu sig með mikilli prýði. Sömu sög er að segja af þeim Helga James og Jakub, þeir stóðu sig einnig vel á sínu fyrsta kappskákmóti.

Alls tóku 20 skákmenn þátt í mótinu sem fram fer um helgina í Framsýnarsalnum á Húsavík.

• Heimasíða Goðans
• Chess-Results

NM - 5. umferð

Þá er fimmtu og næst síðustu umferð á NM í skólaskák lokið. Íslendingum gekk vel í umferðinni og enn einu sinni kom 6.5 vinningur í hús.

Í e-flokki tefldi Vignir Vatnar afar hratt og uppskar tapað tafl eftir misheppnaða sókn sem leit þó vel út um tíma. Hann barðist hins vegar áfram og náði að koma sér inn í skákina og að lokum lék andstæðingurinn sig í mát. Nansý tefldi frábærlega og vann afar öruggan sigur. Gull og silfur er tryggt í þessum flokki! Spurningin er bara hvort það verður Nansý eða Vignir sem verður Norðurlandameistari.

Í d-flokki tapaði Hilmir Freyr eftir að hafa lagt of mikið á stöðuna í góðri sóknarstöðu en Dawid vann nokkuð fljótt og teflir á fyrsta borði í síðustu umferðinni og tryggir sér verðlaun með sigri.

Í c-flokki tapaði Jón Kristinn eftir að hafa fengið upp erfitt endatafl. Sóley Lind gerði jafntefli eftir að hafa haft vænlegar vinningsleiðir. Oliver Aron vann svo góðar sigur á Percivaldi frá Danmörku. Vel tefld skák hjá honum og flott taktík í lokin. Oliver á góðan möguleika á verðlaunum.

Í b-flokki gerði Dagur jafntefli við Högna frá Færeyjum í jafnri skák og Jón Trausti vann frábæran sigur á Dananum Ramdsal í spennandi drekaskák. Í lokaumferðinni tefla þeir báðir við Svía og eiga verðlaun vís með sigri.

Í a-flokki gerðu Mikael og Nökkvi innbyrðis jafntefli en alls hafa fimm innbyrðis viðureignir verið milli Íslendinga sem telst í hærra lagi.

Lokaumferðin hefst 16:00 og verða nokkrar skákir Íslendinga í beinni útsendingu.

Úrslit má finna á www.chess-results.com

Birkir Karl og Guðmundur Kristinn efstir lokaumferð Skákþings Goðans

Birkir Karl Sigurðson (1753) og Guðmundur Kristinn Lee (1625) eru efstir með 5 vinninga á Skákþingi Goðans-Máta eftir 6 umferðir. Birkir og Smári Sigurðsson gerðu jafntefli og Guðmundur Lee vann Jakob Sævar Sigurðsson. Páll Andrason og Smári eru með 4,5 vinninga í 3-.4. sæti.

Það er mikil barátta um hver verður skákmeistari Goðans-Máta. Þar er Smári efstur en Stephen Jablon (1931) og Árni Garðar Helgason (1150) eru skammt undan með 4 vinninga.

Hægt er að sjá pörun í lokaumferðina sem hófst í dag kl. hér en þar mætast ma. Smári og Guðmundur, Birkir og Árni, Stephen Jablon og Páll, Ármann og Hlynur og Jakob og Sigurður Daníelsson.

Hlynur snær Viðarsson hefur þegar tryggt sér sigur í yngri flokki.

Alls taka 20 skákmenn þátt í mótinu sem fram fer um helgina í Framsýnarsalnum á Húsavík.

• Heimasíða Goðans
• Chess-Results

Hannes með jafntefli í sjöundu umferð

Stórmeistarinn Hannes Hlífar Stefánsson (2496) gerði jafntefli við ungverska alþjóðlega meistarann Oliver Mihok (2442) í sjöundu umferð First Saturday-mótsins sem fram fór í gær. Hannes hefur 4 vinninga og er  í 4. sæti.

Í dag í næstsíðustu umferð mótsins teflir hann við ungverska alþjóðlega meistarann Peter Lizak (2428).

10 skákmenn og þar af 3 stórmeistarar taka þátt og tefla allir við alla. Meðalstigin eru 2443 skákstig. Hannes er næststigahæstur keppenda.

• Heimasíða mótsins
• Chess-Results

NM - 4. umferð

Íslendingum gekk ágætlega í fjórðu umferð á NM. Vignir Vatnar og Nansý unnu sína andstæðinga fljótt og örugglega og eru nú efst í flokknum.

Hilmir og Dawid gerðu báðir jafntefli í d-flokki í köflóttum skákum. Hilmir hafði um tíma tapað en barðist vel og náði jafntefli en Dawid hefði getað unnið sína skák. Engu að síður ágætis úrslit og hafa þeir aðeins tapað einni skák samanlagt í flokknum og hafa báðir tvo og hálfan vinning.

Í c-flokki lagði Oliver Sóley Lind örugglega og Jón Kristinn vann góðan baráttusigur þar sem um tíma leit ekki út fyrir annað en að hann væri að berjast fyrir jafntefli.

Umferðin var erfið fyrir Dag og Jón Trausta í b-flokki þar sem þeir töpuðu báðir eftir að hafa haft ágætis stöður.

Einn og hálfur vinningur kom svo í hús í a-flokki hjá Mikael og Nökkva. Mikael tefldi skákina vel og átti unnið tafl en féll í taktíska gildru og skákin fór jafntefli. Nökkvi hafði betra í mjög flókinni stöðu sem endaði með því að andstæðingurinn þoldi ekki flækjurnar og tímahrakið og lék af sér sem Nökkvi sá um leið.

Allt í allt 6.5 vinningur í hús í 4. umferð. Fimmta umferð hefst 10:00 í fyrramálið.

Öll úrslit og pörun 5. umferðar má sjá á www.chess-results.com

NM - 3. umferð

Íslendingum gekk ágætlega í þriðju umferð á NM. Vignir Vatnar tefldi maraþon skák vel yfir 100 leiki og sveið andstæðing sinn í margslungnu endatafli. Nansý vann einnig sína skák en hún trikkaði andstæðing sinn manni undir. Þau eru með efstu mönnum og verða bæði í beinni útsendingu í 4. umferð.

Dawid vann góðan sigur í d-flokki. Tefldi vel og örugglega og kláraði andstæðing sinn í mátsókn. Hilmir Freyr stóð til vinnings á tímabili en vandaði sig ekki nóg við úrvinnsluna og skákin fór jafntefli.

Í c-flokki gerðu Oliver og Jón Kristinn innbyrðis jafntefli og Sóley vann góðan sigur.

Af b-flokki er lítið að segja, sömdu þeir félagar úr Fjölni og Rimaskóla stutt jafntefli á fyrsta borði. Dagur og Jón Trausti tefla nú mikilvægar skákir í fjórðu umferð og verða báðir í beinni.

Í a-flokki gerðu Mikael og Nökkvi báðir jafntefli. Með smá lánsemi hefðu þeir getað unnið sínar skákir.

Alls 6.5 vinningur í hús sem er gott mál.