Barna-og unglingameistaramót Reykjavíkur/Stúlknameistaramót Rvk

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 17. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir Monrad-kerfi með umhugsunartímanum 15 mín. á skák. Teflt verður í einum flokki.

Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2013, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2013, sé hún búsett í Reykjavík eða félagi í reykvísku taflfélag.

Til viðbótar verða veitt verðlaun fyrir þrjú efstu sætin í aldursflokknum 12 ára og yngri (fædd 2000 og síðar).

Mótið er opið öllum krökkum 15 ára og yngri (fædd 1997 og síðar).

Skráning fer fram á [e-mail] (vinsamlegast gefið upp nafn, fæðingarár, símanúmer, skóla og taflfélag (ef við á)) og einnig er hægt að skrá sig á mótsstað sunnudaginn 17.  febrúar frá kl. 13.30- 13.45. Skákmótið hefst kl. 14.

Aðgangur á mótið er ókeypis.

Landskeppni Íslands og Kína í Arion banka um helgina: Stórviðburður í íslensku skáklífi

Landskeppni í skák milli Íslands og Kína verður haldin í höfuðstöðvum Arion banka við Borgartún helgina 16. til 17. febrúar. Kínverska liðið er eitt hið sterkasta sem sótt hefur Ísland heim, en framfarir Kínverja á skáksviðinu undanfarin ár hafa verið með ólíkindum. Lið þeirra er skipað ofurmeisturum, skákdrottningum og undrabörnum.

Íslenska liðið verður skipað stórmeisturum, alþjóðlegum meisturum og sumum efnilegustu ungmennum landsins. Aldursforsetinn í íslenska liðinu verður Friðrik Ólafsson fyrsti stórmeistari Íslendinga og fv. forseti FIDE.
 
Skáksamband Íslands (SÍ) og Kínversk íslenska menningarfélagið (KÍM) standa að landskeppninni í samvinnu við Skáksamband Kína, og með stuðningi Arion banka, CCP, Promens, Icelandic og Elkem Ísland.
 
Tefldar verða atskákir í landskeppninni með 20 mínútna umhugsunartíma og verður hvort lið skipað sex skákmönnum. Allir tefla við alla og því eru alls 72 vinningar í pottinum. Búast má við gríðarlega skemmtilegri taflmennsku, enda eru Kínverjar ein fremsta skákþjóð heims og hvert undrabarnið á fætur öðru hefur komið fram á síðustu árum. Yngsti liðsmaður Kínverja í glímunni við Íslendinga er hinn 13 ára gamli Wei Yi, sem er stigahæstur allra í heiminum 14 ára og yngri.

Davíð Ólafsson verður landsliðseinvaldur í keppninni og meðal þeirra sem munu keppa fyrir Íslands hönd eru, auk Friðriks, stórmeistararnir Helgi Ólafsson, Stefán Kristjánsson og Þröstur Þórhallsson, alþjóðlegu meistararnir Hjörvar Steinn Grétarsson, Guðmundur Kjartansson og Jón Viktor Gunnarsson, og Lenka Ptacnikova stórmeistari kvenna. Þá fá nokkur efnilegustu ungmenni okkar tækifæri til að spreyta sig gegn kínversku snillingunum.

Höskuldur Ólafsson bankastjóri Arion banka mun setja landskeppnina og Össur Skarphéðinsson utanríkisráðherra leika fyrsta leikinn fyrir Íslands hönd.

Áhorfendur eru hjartanlega velkomnir í Arion banka um helgina, til að fylgjast með viðureign Íslands og Kína. Keppni hefst báða daga klukkan 13 og stendur til 17.

Kínversku meistararnir:

Bu Xiangzhi, fæddur 1985 (2675). Varð stórmeistari aðeins 13 ára, einn af allra bestu skákmönnum heims.

Yu Yangyi, fæddur 1994 (2688). Varð stórmeistari 15 ára, er nú 3. sterkasti skákmaður Kínverja og næst stigahæsti skákmaður heims 20 ára og yngri.

Wei Yi, fæddur 1999 (2501). Aðeins 13 ára, efstur allra í heiminum 14 ára og yngri. Hann er yngsti alþjóðameistari í heimi og hefur þegar náð tveimur stórmeistaraáföngum.

Huang Qian, fædd 1986 (2478). Stórmeistari kvenna. Varð heimsmeistari með kínverska liðinu árið 2007.

Tan Zhongyi, fædd 1991. (2466) Stórmeistari kvenna. Varð í tvígang heimsmeistari stúlkna 10 ára og yngri, 2000 og 2001. Heimsmeistari 12 ára og yngri árið 2002.

WaWang Yiye, fæddur 1998. (2226) Einn efnilegasti skákmaður Kína.

N1 og SÍ taka höndum saman: Glæsilegt N1 Reykjavíkurskákmót í Hörpu 19. til 27. febrúar

• N1 bakhjarl Reykjavíkurmótsins næstu tvö árin.
• Anish Giri og Wesley So verða með í Hörpu.
• Kínverskir skáksnillingar fjölmenna.
• Stefnir í metþátttöku.
• Aldrei fleiri stórmeistarar.

N1 og Skáksamband Íslands gengu í morgun frá samkomulagi, sem felur í sér að N1 verður aðalbakhjarl Reykjavíkurmótsins í skák næstu tvö árin. N1 Reykjavíkurmótið verður firnavel skipað og hið fjölmennasta frá upphafi, eins og fram kom í kynningu SÍ og N1 í Hörpu í morgun. Við sama tækifæri voru íslensku landsliðsbörnin í skák heiðruð, en þau stóðu sig frábærlega á Norðurlandamótinu í skólaskák um síðustu helgi.

N1 Reykjavíkurskákmótið 2013 fer fram í Hörpu, 19. til 27. febrúar.

Gunnar Björnsson forseti Skáksambandsins og Eggert Benedikt Guðmundsson forstjóri N1 skrifuðu undir samninginn í morgun, og sagði forseti SÍ að samningurinn markaði tímamót við uppbyggingu hins gamalgróna og vinsæla Reykjavíkurmótsins. Á næsta ári verður hálf öld liðin frá fyrsta mótinu, sem fram fór 1964.

Eggert Benedikt sagði mjög ánægjulegt að starfa með SÍ að uppbyggingu N1 Reykjavíkurmótsins, og sagði sérstakt fagnaðarefni að íslensk börn og ungmenni fengju tækifæri til að tefla á alþjóðlegu stórmóti með sumum bestu skákmönnum heims.

„Sem riddarar götunnar lítum við á það sem eitt af okkar hlutverkum að efla skáklist á Íslandi og erum full tilhlökkunar til samstarfsins við SÍ, og erum ekki síður stolt að koma að einu vinsælasta skákmóti heims.“ 

Mikill fjöldi stigahárra stórmeistara er skráður til leiks á N1 Reykjavíkurskákmótinu, en mótið er öllum opið og er búist við allt að 250 keppendum, sem er metþátttaka í næstum hálfrar aldar sögu mótsins.

Kínverskir skáksnillingar munu setja mikinn svip á keppnina. Í þeim hópi eru ofurmeistararnir Ding Liren, sem er tvítugur, og Bu Xiangzhi sem varð stórmeistari 13 ára gamall, og hin 17 ára gamla Guo Qi sem varð heimsmeistari stúlkna á síðasta ári. Ekki verður síður forvitnilegt að fylgjast með hinum 13 ára gamla Wei Yi, sem er stigahæstur allra í heiminum, 14 ára og yngri.
 
Fleiri ungir snillingar verða áberandi í Hörpu, því þrír stigahæstu skákmenn heims 20 ára og yngri verða með á N1 Reykjavíkurskákmótinu. Þetta eru Anish Giri frá Hollandi, 18 ára, Yu Yangyi frá Kína, 19 ára, og Wesley So frá Filippseyjum, 19 ára. Allir urðu þeir stórmeistarar 14 til 15 ára og munu berjast um æðstu metorð í skákheiminum á næstu árum.
 
Skákmeistarar frá um 40 löndum tefla á N1 Reykjavíkurskákmótinu. Í þeim hópi eru gamlir vinir Íslendinga á borð við Ivan Sokolov, sem í tvígang hefur sigrað á Reykjavíkurmótinu áður, og ensku goðsögnina Nigel Short, sem teflt hefur um heimsmeistaratitilinn.

Meðal íslenskra keppenda verða Hannes Hlífar Stefánsson, sem fimm sinnum hefur sigrað á Reykjavíkurmótinu, Hjörvar Steinn Grétarssonefnilegasti skákmaður Íslands, og stórmeistararnir Stefán Kristjánsson, Henrik Danielsenog Þröstur ÞórhallssonÍslandsmeistari. Íslensku landsliðskonurnar okkar taka líka allar þátt í mótinu. Stigahæst þeirra erLenka Ptacnikova, ríkjandi Íslandsmeistari.

Samhliða N1 Reykjavíkurskákmótinu verður efnt til fjölda sérviðburða, og almenningi gefst kostur á að komast í tæri við meistarana. Meðal annars er efnt til spurningakeppni um skák, ,,landsleiks" í fótbolta og hraðskákmóts.

Áhorfendur verða hjartanlega velkomnir á N1 Reykjavíkurskákmótið í Hörpu og er aðgangur ókeypis. Hægt verður að fylgjast með viðureignum meistaranna, auk þess sem boðið er upp á skákskýringar í hliðarsal.

Skáksveit Rimaskóla Reykjavíkurmeistarar grunnskólasveita

Reykjavíkurmót grunnskólasveita fór fram á mánudag í húsnæði TR og var fjölmennt að vanda. A-sveit Rimaskóli sem skipuð var þeim Degi Ragnarssyni, Oliver Aroni Jóhannessyni, Jóni Trausta Harðarsyni og Kriistófer Jóel Jóhannessyni, sigraði með yfirburðum; hlaut 27 vinninga af 28 mögulegum en mun meiri spenna var um 2. og 3. sætið.

Þar urðu hlutskarpastar A-sveit Ölduselsskóla sem hlaut silfuverðlaun með 19 ½ vinning (skipuð þeim Mikael Kravchuk, Alec Sigurðssyni, Óskari Víkingi Davíðssyni og Brynjari Haraldssyni) en bronsverðlaun hlaut sveit Laugalækjarskóla með 19 vinninga (skipuð þeim Rafnari Friðrikssyni, Garðari Sigurðssyni, Arnari Inga Njarðarsyni og Johan Markus Chun).  Skammt var síðan í sveitirnar í 4. og 5. sæti; B-sveit Rimaskóla (18 vinningar) og A-svein Kelduskóla (17 vinningar).

Reykjavíkurmeistarar stúlkna varð sveit Rimaskóla með 15 ½ vinning en hún var skipuð þeim Nansý Davíðsdóttur, Ásdísi Birnu Þórarinsdóttur, Tinnu Sif Aðalsteinsdóttur, Heiðrúnu Hauksdóttur og Signý Helgu Guðbjartsdóttur. Silfurverðlaunin í kom í hlut stúlknasveitar Melaskóla (skipuð þeim Svövu Þorsteinsdóttur, Katrínu Kristjánsdóttur, Helgu Lan Haraldsdóttur, Vigdísi Sverrisdóttur og Kristínu Ingibjörgu Magnúsdóttur) en bronsverðlaun hlaut sveit Fossvogsskóla (skipuð þeim Dögg Magnúsdóttur, Elísu Gígju Ómarsdóttur, Lísu Ólafsdóttur, Helenu Sól Elíasdóttur og Ólöfu Helgu Þórmundsdóttur).

Úrslit urðu annars sem hér segir:

• 1.    Rimaskóli A                  27 vinningar
• 2.    Ölduselsskóli A             19½
• 3.    Laugalækjarskóli                        19
• 4.    Rimaskóli B                   18
• 5.    Kelduskóli A                  17
• 6.    Árbæjarskóli A              16
• 7.    Melaskóli A                   16
• 8.    Hagaskóli                                  15½
• 9.    Háaleitisskóli                 15½ 
• 10.  Rimaskóli (stúlkur)         15½
• 11.  Langholtsskóli               15
• 12.  Norðlingaskóli A                        14
• 13.  Klébergsskóli                14
• 14.  Rimaskóli C                   14
• 15.  Árbæjarskóli B              13½
• 16.  Grandaskóli A               13½
• 17.  Ölduselsskóli B             13½
• 18.  Kelduskóli B                  13
• 19.  Norðlingaskóli B                        12 ½
• 20.  Melaskóli (stúlkur)          12
• 21.  Vættaskóli                                12
• 22.  Fossvogsskóli A                       11½
• 23.  Fossvogsskóli (stúlkur) 10½
• 24.  Árbæjarskóli C              10½
• 25.  Norðlingaskóli C                        10½
• 26.  Vesturbæjarskóli           10
• 27.  Grandaskóli B               8½
• 28.  Norðlingaskóli D                        4½

Mótshaldarar voru Skóla- og fræðasvið Reykjavíkurborgar og Taflfélag Reykjavíkur, mótsjóri Soffía Pálsdóttir frá SFS en skákstjórn önnuðust Eiríkur K. Björnsson og Ólafur H. Ólafsson. Rétt er að þakka fjölmörgum liðstjórum sem aðstoðuðu skákstjóra við mótshaldið.

• Heimasíða TR
• Myndaalbúm (HÁ)

Skák í Vesturbænum: Gunni Gunn náði vopnum sínum og sigraði

KR-ingar og gestir þeirra öttu kappi að venju sl. mánudagskvöld og þreyttu með sér 13 skákir með 7 mínútna umhugsunartíma.  Hver og einn reyndi að gera sig öðrum gildari annað hvort stöðulega séð eða á tíma. Því má segja að gætt hafi nokkurrar undirliggjandi togstreitu meðal keppenda.

Gegnheil kerfisbundin hugsun varð stundum aðeins undan að láta vegna síbreytileika stöðunnar á skákborðinu svo keppendur urðu að grípa til örþrifaráða til að reyna að landa jafntefli eða bjarga sér fyrir horn á tíma.  Eins konar skákræn tilvistarkreppa gerði einnig vart við sig sem vakti sumum ógnvekjandi ugg svo við lá að þeir fengju „skákkvíðahliðrunarstreyturöskunareinkenni" og yrðu að fá áfallahjálp á staðnum samkvæmt við viðbragðsáætlun Neyðarlínunnar.  En betur fór en áhorfðist að sögn viðstaddra því svona uppákomur ganga oftast fljótt yfir og hafa engin alvarleg eftirköst ef menn vinna næstu skák.  

 Það bar hins vegar til meiriháttar tíðinda og gladdi marga að hinn aldni meistari,  Gunnar Kr. Gunnarsson, náði á ný vopnum sínum eftir nokkuð hlé og slappleika undanfarið og vann mótið með glæsibrag. Sýndi yfirvegaða taflmennsku og haldgóða gamla takta  og sigraði létt með 10.5 vinningi.  Sagðist aðspurður enn beita gamaldags skotgrafahernaði og taflaðferðafræði síðustu aldar hvað sem allri nútíma tölvuskákforritum líður, sem hefði gefist honum vel gegn um tíðina.  

Gunni Gunn var með einum og hálfum vinningi meira en fimm næstu keppendur þegar yfir lauk og upp var staðið.  Í þeim hópi með 9 vinninga bar hæst nafn nafna hans Birgissonar, sem hefur verið næstum óstöðvandi um nokkurt skeið en varð nú að láta undan síga með 4 vinninga niður. Hinir eru allt velþekktir „skottubanar" en geta líka verið hverjum sem er skeinuhættir á góðum degi eins og dæmin sanna.

Mótið var óvenju jafnt að þessu sinni, einkum um miðjuna, eins og sjá má á meðf. mótstöflu.

 

 

ESE- skákþankar 11/13 -  12.2.13

 

Eðalskákmót í Ásgarði í dag

Í dag var svo kallað Eðalskákmót haldið í Ásgarði. Þá fá þeir einir verðlaun sem orðnir eru 75 ára eða verða það á árinu. Magnús V Pétursson á hugmyndina að þessu móti og gefur öll verðlaun. Fyrsta Eðalskákmótið var haldið fyrir ári, það mót vann Þorsteinn K Guðlaugsson og hann endurtók það síðan í dag.

Þorsteinn fékk sex vinninga af  níu. Jafn honum að vinningum var svo Valdimar Ásmundsson en aðeins lægri á stigum, þannig að Þorsteinn hampaði bikarnum í annað sinn. Í þriðja sæti af öldungunum varð svo Haraldur Axel með fimm og hálfan vinning.

Magnús afhenti verðlaunin, hann var svo með smá aukaverðlaun í pokahorninu til unglinganna líka eins og hann orðaði það.

Guðfinnur R Kjartansson fékk flesta vinninga í dag eða átta af níu, hann gerði aðeins tvö jafntefli, við þá Harald Axel og Magnús Pétursson en þeir eru báðir komnir yfir áttrætt.

Össur Kristinsson  og Ari Stefánsson urðu svo í öðru og þriðja sæti af unglingunum.

Þessir þrír eru allir innan við sjötugt.

Magnús útnefndi síðan Friðrik Sófusson sem sérstakan Eðalskákmann eldri borgara.

Friðrik sem verður 86 ára í vor hefur verið sérstaklega duglegur að mæta á nánast alla skákviðburði hjá Ásum og Riddurunum síðast liðin tíu ár.

Meðfylgjandi tafla útskýrir þetta svo betur.

Myndaalbúm (ESE)

 

 

Undanrásir Reykjavík Barna Blitz hefjast á morgun

Undanrásir Reykjavík Barnablitz fara senn fram á skákæfingum taflfélaganna í Reykjavík. Tvö sæti eru í boði á hverri æfingu. Ef aðili sem hefur unnið sér inn keppnisrétt tekur þátt í æfingu og lendir í efsta eða næst efsta sæti gildir þriðja sætið sem þátttökusæti, sem og fjórða sætið ef tveir efstu hafa þegar unnið sér inn þátttökurétt. Taflfélögin annast framkvæmd undanrásanna og ákvarða um fyrirkomulag þeirra.

• Skákdeild KR: Miðvikudagurinn 13. febrúar 17:30 í Frostaskjóli.
• Skákdeild Fjölnis: Laugardagur 16. febrúar 11:00 í Rimaskóla.
• Taflfélag Reykjavíkur: Laugardagur 16. febrúar 14:00 í Faxafeni 12.
• Taflfélagið Hellir: Mánudagurinn 18. febrúar 17:15 í Helli, Álfabakka 14a.

Þeir sem komast áfram tefla til úrslita í Hörpu laugardagsmorguninn 23. febrúar. Teflt verður með útsláttarfyrirkomulagi og hvert einvígi upp í tvö.

Keppnin miðast við skákmenn fædda 2000 og síðar.

Barna-og unglingameistaramót Reykajvíkur/Stúlknameistaramót Rvk

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 17. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir Monrad-kerfi með umhugsunartímanum 15 mín. á skák. Teflt verður í einum flokki.

Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2013, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2013, sé hún búsett í Reykjavík eða félagi í reykvísku taflfélag.

Til viðbótar verða veitt verðlaun fyrir þrjú efstu sætin í aldursflokknum 12 ára og yngri (fædd 2000 og síðar).

Mótið er opið öllum krökkum 15 ára og yngri (fædd 1997 og síðar).

Skráning fer fram á [e-mail] (vinsamlegast gefið upp nafn, fæðingarár, símanúmer, skóla og taflfélag (ef við á)) og einnig er hægt að skrá sig á mótsstað sunnudaginn 17.  febrúar frá kl. 13.30- 13.45. Skákmótið hefst kl. 14.

Aðgangur á mótið er ókeypis.

Hannes endaði á jafnteflum

Stórmeistarinn Hannes Hlífar Stefánsson (2496) gerði jafntefli í tveimur síðustu umferðum First Saturday-mótinu sem lauk í dag. Hannes gerði reyndar jafntefli í fimm síðustu umferðunum. Hannes hlaut 5 vinninga og endaði í 4. sæti.

Frammistaða hans samsvaraði 2480 skákstigum og lækkar hann um 2 stig fyrir hana.

10 skákmenn og þar af 3 stórmeistarar tóku þátt og tefldu allir við alla. Meðalstigin voru 2443 skákstig. Hannes var næststigahæstur keppenda.

• Heimasíða mótsins
• Chess-Results

Ungmennaæfing Skákdeildar Breiðabliks í dag kl. 17

Skákæfingar fyrir ungmenni 16-25 ára eru haldnar í Stúkunni á 3ju hæð við Kópavogsvöll alla mánudaga kl 17-19.

Æfingarnar eru opnar öllum á þessum aldri óháð taflfélagi.

Gengið er inn bakatil á kjallarahæð.
Sigurvegari æfingarinnar hlýtur að launum gjafabréf á  pizzu hjá Italiano Pizzeria Hlíðasmára.
Stjórnandi æfinganna er Páll Andrason

Heimasíða Skákdeildar Breiðabliks: http://www.breidablik.is/skak