Stelpumót í Laugardalslaug

Á laugardagskvöldið fer fram Stelpumót Skákakademíunnar í Laugardalslaug. Mótið hefst 20:30 en keppendur mæta í steinapottinn um 20:00. Opið verður til miðnættis.Þegar eru nokkrar af sterkustu skákkonum landsins skráðar til leiks en enn eru nokkur pláss laus. Tilkynna má þátttöku á [e-mail].

Allir keppendur fá sundkort í laugar Reykjavíkur og sigurvegarinn fær út að borða fyrir tvo. Stelpumótið er hluti af sundlaugarnótt sem fram fer í laugunum í Reykjavík og er samstarfsverkefni laugarinnar og Skákakademíunnar, en sundlaugarskákin byrjaði einmitt í Laugardalslaug sumarið 2011 og hafa síðan hátt í tuttugu sundlaugar um allt land fylgt í kjölfarið.

Gallerý Skák: Gunnar Birgisson á sigurbraut

Kappteflið um Taflkóng Friðriks hélt áfram í Gallerý Skák í vikunni sem leið. Var þetta annað mótið af fjórum í mótaröðinni.  Fjölmargir skákáráttuhaldnir og áhættusæknir einstaklingar á öllum aldri tóku þátt.

Segja má að um sé að ræða eins konar "persónulegaraunhæfnistöðumatsskákgetuprófraun" sem sýnir  að mótinu loknu hver er einna bestur og snjallastur að meðaltali  "taflsístöðumflóknum". Jafnframt er almenn skákgeta allra þátttakenda sett undir mæliker og reiknuð til Grand Prix stiga.   Hér nægir því ekki að vera í einstöku banastuði eða eitt gott dagsform, heldur verða menn að sýna samfellda öfluga, haldgóða og innihaldsríka skákgetu, til að sigra eða komast á pall.  Góð skákleikni og keppnisreynsla spila hér að sjálfsögðu stóra rullu fyrir utan snilligáfuna, sjálfan X-faktorinn. 

Að þessu sinni var það  verkfræðingurinn  Gunnar I. Birgisson, hinn brosmildi eitilharði baráttumaður, sem með skipulagsgáfu sinni á taflborðinu bar sigur úr bítum með 8.5 vinningi að 11 mögulegum og uppskar 10 GP-stig til viðbótar sínum 4 í fyrsta mótinu sem Harvey Georgsson vann, en hann var ekki með að þessu sinni.  Guðfinnur Kjartansson varð í öðru sæti eftir að hafa leitt mótið fram að síðustu umferð, þegar hann beið lægri hlut fyrir Jon Olav, Norðmanninum slynga sem orðinn er hálfur Íslendingur.  

Fyrir lokaumferðina stóðu leikar svo að Guðfinni nægði jafntefli til sigurs í mótinu, en það fór á annan veg, því Gunnar Ingi vann Stefán Þormar, Hellisheiðarséniið sjálft,  í hnífjöfnu endatafli á þrautseigunni einni saman í skák sem flestir töldu að væri dautt jafntefli.   Í umferðunum á undan hafði Guðfinnur afrekað það sem seint verður eftir leikið  að vinna þrjá "Gunnarra" í röð, þá Gunna Gunn, Gunnar Birgis og Gunnar Skarpa, sem allir urðu að lúta í gras fyrir honum að þessu sinni og báru vart sitt bar eftir það. 

Gerð verður kvikmynd um mótaröðina, hrakfarir sumra og sigurgöngu annarra,  á vegum GussFilms Inc. sem frumsýnd verður í Bíó-Paradís með vorinu eða á YouTube. Stórslysamynd sem enginn má missa af.  

Að öðru leyti vísast til meðf.  vettvangsmyndir og mótstöflu yfir leikslokin sem segir reyndar fátt af vopnaviðskiptunum, þar sem stórsóknir sumra runnu út í sandinn eða óvænt  mannstöp settu strik í reikninginn. Eins má segja að  skyndileg glámskyggni hafi valdið þar nokkru um, illskeyttur kvilli, sem ekki er hægt að láta bólusetja sig við.  Hvort það dugi að fara í augasteinaskipti hjá Sjónlagi í Glæsibæ sem sumir höfðu á orði  skal ósagt látið.    Nokkrir kóngar urðu einnig bráðkvaddir í hita leiksins.         

Mótaröðin heldur áfram þegar degi hallar fimmtudaginn 7. febrúar. Allir velkomnir til tafls óháð þátttöku í kappteflinu, heldur einungis til að spreyta sig og sjá aðra. 

 

 

ESE- Skákþankar 7/13 - 060213

Atmót Víkingaklúbbsins fer fram í kvöld

Atmót Víkings verður haldið í Víkinni miðvikudaginn 6. febrúar og hefst æfingin kl. 20.00.  Tefldar verða 5. umferðir með 15 mínútna umhugsunartíma.  Mótið er ágætis æfing fyrir Reykjavíkurskákmótið og Íslandsmót skákfélaga, en Reykjavík Open hefst 19. febrúar og Íslandsmót skákfélaga verður helgina 1. og 2 mars.  Margir skákmenn Víkingaklúbbsins er skráðir til leiks á Reykjavík Open.Dagskrá fram á vor:

6. febrúar. Atskák (15. min).  Víkin kl 20.00
(Reykjavíkurskákmótið 19-27. febrúar)
20. febrúar. hraðskákmótskák (Víkin) kl 20.00
(Íslandsmót skákfélaga 1-2 mars)
6. mars. Víkingaskák  Víkin kl 20.00
20. mars. Skákæfing.  Víkin kl 20.00
3. april. Vikingaskák.  Víkin kl 20.00
17. april Hraðskákmót Víkings.  Víkin kl 20.00
1. mai. frí (heimamót í Víkingaskák)
15. mai. Ìslandsmeistaramótið í Víkingaskák (liðakeppni).  Víkin kl 20.00

Minningarmót um Jón Ingimarsson

Í dag, 6. febrúar, eru 100 ár liðin frá fæðingu Jón Ingimarssonar skákmeistara og verkalýðsfrömuðar. Jón gekk í Skákfélag Akureyrar árið 1931 og var fyrst kjörinn í stjórn þess árið 1936.  Hann var um árabil ein helsta driffjöðrin í  starfi félagsins og lengi formaður þess. Árið 1973 gerði félagið hann að heiðursfélaga. Í nokkur ár sat Jón í stjórn Skáksambands Íslands. Hann tefldi á skákmótum í hálfa öld,  allt frá því á árinu 1931 og þar til stuttu áður en hann lést árið 1981.  M.a. tefldi hann í landsliðflokki á Skákþingi Íslands og á Norðurlandamóti. Hann varð skákmeistari Norðlendinga  árið 1961.

Jón lagði gjörva hönd á margt fleira á sínum ferli. Hann var einn af stofnendum Iðju, félags verksmiðjufólks á Akureyri og var formaður félagsins frá 1946 til dauðadags, alls í 35 ár. Þá sat hann í bæjarstjórn Akureyrar í 8 ár og starfaði lengi með Leikfélagi Akureyrar, svo nokkuð sé nefnt.

Í aldarminningu Jóns mun Skákfélag Akureyrar og verkalýðsfélagið Eining-Iðja í samvinnu við Ingimar Jónsson halda veglegt skákmót dagana 26-28. apríl nk.

Á mótinu verða tefldar 10 mínútna skákir, alls 17-21 umferð, eftir fjölda þátttakenda. Veitt verða peningaverðlaun fyrir efstu sætin á mótinu, heildarverðlaun sem næst 120 þúsund kr. Teflt verður í Alþýðuhúsinu við Skipagötu.

Dagskrá mótsins verður sem hér segir (með fyrirvara um minniháttar breytingar, s.s. fjölda umferða):

• Föstudagur 26. apríl  kl. 19.30, Mótsetning, ávarp og stutt erindi um skákferil Jóns.  1-4. umferð.
• Laugardagur 27. apríl kl. 11.00 5.-14.umferð.
• Sunnudagur 28. apríl kl. 11.00 15.-21.umferð.

Öllum er heimil þátttaka í mótinu og vonast mótshaldarar til þess að hún verði sem best. Þeir skákmenn sem voru samtímis Jóni og öttu kappi við hann við skákborðið eru sérstaklega boðnir velkomnir.

Hægt er að skrá þátttöku hjá formanni Skákfélagsins á netfangið [e-mail].

Undanrásir Reykjavík Barnablitz

Undanrásir Reykjavík Barnablitz fara senn fram á skákæfingum taflfélaganna í Reykjavík. Tvö sæti eru í boði á hverri æfingu. Ef aðili sem hefur unnið sér inn keppnisrétt tekur þátt í æfingu og lendir í efsta eða næst efsta sæti gildir þriðja sætið sem þátttökusæti, sem og fjórða sætið ef tveir efstu hafa þegar unnið sér inn þátttökurétt. Taflfélögin annast framkvæmd undanrásanna og ákvarða um fyrirkomulag þeirra.

• Skákdeild KR: Miðvikudagurinn 13. febrúar 17:30 í Frostaskjóli.
• Skákdeild Fjölnis: Laugardagur 16. febrúar 11:00 í Rimaskóla.
• Taflfélag Reykjavíkur: Laugardagur 16. febrúar 14:00 í Faxafeni 12.
• Taflfélagið Hellir: Mánudagurinn 18. febrúar 17:15 í Helli, Álfabakka 14a.

Þeir sem komast áfram tefla til úrslita í Hörpu laugardagsmorguninn 23. febrúar. Teflt verður með útsláttarfyrirkomulagi og hvert einvígi upp í tvö.

Keppnin miðast við skákmenn fædda 2000 og síðar.

Riddarar efstir í Ásgarði

Riddarar voru sigursælir í Ásgarði í dag eins og oft áður. Tuttugu og átta heldri skákmenn mættu til leiks og tefldu tíu umferðir.Stefán Þormar náði efsta sætinu eftir  langan og öruggan endasprett.

Hann fór rólega af stað var með 1½ vinning eftir þrjár umferðir, þá setti hann í háagírinn og vann síðustu sjö andstæðinga og endaði með 8½ vinning. Guðfinnur R Kjartansson varð í öðru sæti með 8 vinninga.Páll G Jónsson varð svo í þriðja sæti með 7½ vinning.

Nánari úrslit dagsins:

1          Stefán Þormar                                     8.5

2          Guðfinnur R Kjartansson                    8

3          Páll G Jónsson                                     7.5

4          Valdimar Ásmundsson                       7

5-7       Haraldur Axel                                     6

            Ari Stefánsson                                                6

            Birgir Sigurðsson                                6

8-12     Jónas Ástráðsson                                 5.5

            Finnur Kr Finnsson                             5.5

            Ágúst Ingimundarson                         5.5

            Bragi G Bjarnarson                             5.5

13-15   Þorsteinn Guðlaugsson                       5

            Gísli Sigurhansson                              5

            Jón Víglundsson                                 5

16-21   Óli Árni Vilhjálmsson                         4.5

            Magnús V Pétursson                           4.5

            Hálfdán Hermannsson                                    4.5

            Jón Steinþórsson                                 4.5

            Garðar Guðmundsson                         4.5

            Gísli Árnason                                      4.5

Næstu sjö skákmenn fengu aðeins færri vinninga í þetta sinn.

Nýtt fréttabréf SÍ

Nýtt fréttabréf Skáksambands Íslands út kom út í dag en bréfið kemur út tvisvar á mánuði yfir vetrarmánuðina og er sent í tölvupósti til viðtakenda. Hægt er að skrá sig fyrir fréttabréfinu á Skák.is (ofarlega til vinstri).

Meðal efnis er:

• NM í skólaskák fer fram næstu helgi á Bifröst
• Landskeppni við Kína
• Sérviðburðartal N1 Reykjavíkurskákmótsins
• Veronika og Nansý skólaskákmeistarar stúlkna
• Rimaskóli Íslandsmeistari stúlknasveita
• Davíð Kjartansson skákmeistari Reykjavíkur
• Guðmundur með góðan árangur í Gíbraltar
• Magnus öruggur sigurvegari í Wijk aan Zee
• Skákakademían skákmeistari vinnustaða
• Nýjustu skráningar í N1 Reykjavíkurskákmótið
• Mót á döfinni

Fréttabréfið má nálgast hér.

Hægt er að nálgast eldri fréttabréf hér.

Örn vann ungmennaæfingu Breiðabliks

Örn Leó Jóhannsson vann fimmtu Ungmennaæfingu Skákdeildar Breiðabliks sem fór fram í Stúkunni við Kópavogsvöll. Að launum fékk hann pizzuúttekt á Italiano Pizzeria. Þar sem þetta var þriðji BM áfangi hans þá er hann orðinn "Breiðabliksmeistari"

1. Örl Leó Jóhannsson 10,5 af 12
2. Páll Andrason 9,5
3. Hrund Hauksdóttir 2,5

Nánar á:  http://chess.is/breidablik/brei05.htm

Ungmennaæfingar Breiðabliks eru haldnar í Stúkunni við Kópavogsvöll á hverjum mánudegi kl 17 og eru fyrir ungmenni á aldrinum 16-25 ára.

Heimasíða Skákdeildar Breiðabliks: http://breidablik.is/skak

Búdapest: Hannes vann í 3. umferð

Stórmeistarinn Hannes Hlífar Stefánsson (2496) vann víetnamska alþjóðlega meistaranum Huy Nguyen (2439) í 3. umferð First Saturday-mótsins sem fram fór í dag. Hannes hefur 2,5 vinning og er í 2. sæti.

Á morgun teflir hann við serbneska alþjóðlega meistarann Sinisa Saric (2418).

10 skákmenn og þar af 3 stórmeistarar taka þátt og tefla allir við alla. Meðalstigin eru 2443 skákstig. Hannes er næststigahæstur keppenda.

• Heimasíða mótsins
• Chess-Results

Rimaskóli Íslandsmeistari stúlknasveita

Íslandsmót grunnskólasveita í stúlknaflokki fór fram á laugardaginn. Um 40 stelpur í níu sveitum voru mættar til leiks. Meðal keppenda voru hvoru tveggja stelpur sem tefla fyrir Íslands hönd og stelpur sem voru að taka þátt í sínu fyrsta skákmóti eftir að hafa verið í skákkennslu í skólanum sínum. Allar sveitirnar tefldu innbyrðis og varð nokkuð snemma ljóst í hvað stefndi. A-sveit Rimaskóla hafði algera yfirburð i og lent ekki í taphættu í neinni skák; stelpurnar unnu allar sínar skákir.

Glæsilegur árangur og enn ein staðfesting á því mikla skákstarfi sem unnið er í skólanum fyrir bæði stráka og stelpur. Sveitina skipa Nansý Davíðsdóttir, Svandís Rós Ríkharðsdóttir, Ásdís Birna Þórarinsdóttir og Tinna Sif Aðalsteinsdóttir. Er þetta í þriðja sinn í röð sem a-sveit Rimaskóla verður Íslandsmeistari.

Í öðru sæti varð sveit Salaskóla. Í henni voru Hildur Berglind Jóhannsdóttir, Una Sól Jónmundsdóttir, Móey María Sigþórsdóttir og Tinna Þrastardóttir. Bronzið tók svo b-sveit Rimaskóla og í henni voru Heiðrún Hauksdóttur, Alexandra Kærnested, Guðrún Margrét Guðbrandsdóttir og Tinna Björk Rögnvaldsdóttir.

Keppendur og foreldrar voru sjálfum sér til mikils sóma og gekk mótið vel í alla staði. Rimaskóli er afar góður mótsstaður fyrir skákmót í yngri flokkum; allt til alls og frábært tjald og skjávarpi á mótsstað. Í verðlaunaafhendingunni fengu allir keppedur boðskort á Stelpunámskeið Skákakademíunnar sem haldið verður í Hörpu dagana 23. og 24. febrúar samhliða Reykjavíkurskákmótinu.