EM: Pörun fjórðu umferðar

Þá liggur fyrir pörun fjórðu umferðar á Evrópumótinu í Legnica. Okkar menn fá loksins stund milli stríða því að báðir andstæðingarnir eru undir 2600 skákstigum í þetta skiptið!

Guðmundur Kjartansson er með svart gegn georgíska stórmeistaranum Merab Gagunashvili (2592). Tímabundinn fréttaritari skak.is tefldi eitt sinn gegn manngarminum, átti í fullu tré við hann og gafst svo samviskusamlega upp eftir fingurbrjót. Það er einlæg von og trú skak.is að Guðmundur tapi þessari skák aldrei.

Dagur Arngrímsson stýrir einnig svörtu mönnunum gegn ítalska alþjóðlega meistaranum Danyyil Dvirnyy (2541). Það þarf vart meðalgreindan mann til að greina að sá ágæti drengur kemur frá einhverju austantjaldslandinu en ítölsku vegabréfi skartar hann og hefur átt fast sæti í ítalska landsliðinu undanfarin ár. Tímabundinn fréttaritari skak.is hefur oft teflt á sömu mótum og þetta ágæta eintak og aldrei fundist neitt til taflmennskunnar hans koma. Það er því í raun og veru sönnuð tilgáta að Dagur tapar þessari skák aldrei.

Guðmundur verður í brakandi beinni útsendingu á morgun en Dagur tekur sér frí í eina umferð frá sviðsljósinu.

 Fræðast má um stöðu mótsins hér.

 

 * Myndin er af nýlegu lasagne sem Guðmundur og Dagur elduðu sér og er tekin í algjöru heimildarleysi af Facebooksíðu Dags. Það má fastlega reikna með að Danyyil Dvirnyy verði bakaður eins og ítalski þjóðarrétturinn á morgun.

EM: Guðmundur lagði Nyzhnyk í 3.umferð

Guðmundur Kjartansson var rétt í þessu að leggja stórmeistarann Illya Nyzhnyk að velli í afar vel tefldri skák í 3.umferð Evrópumótsins í Legnica. Dagur Arngrímsson varð að lúta í gras gegn hvítrússneska stórmeistaranum Andrey Zhigalko.

 Báðir mega þó vel við una. Guðmundur er með 2 vinninga eftir fyrstu þrjár umferðirnar og Dagur með 1,5 vinning. Andstæðingar beggja hafa allir verið stórmeistar með yfir 2600 stig svo mótspyrnan hefur verið talsverð.

Enn er ekki ljóst hverjir andstæðingar morgundagsins verða en ljóst er að a.m.k. Guðmundur verður í beinni útsendingu og vonandi Dagur einnig.

 

Hraðskákmót öðlinga fer fram á morgun

Hraðskákmót öðlinga fer fram á morgun 8. maí kl. 19.30 í félagsheimili T.R. að Faxafeni 12. Mótið er opið fyrir alla 40 ára og eldri (f. 1972 og síðar).Tefldar verða 7 umferðir með 7 mínútna umhugsunartíma.

Í lok mótsins fer fram verðlaunaafhending fyrir Hraðskákmótið sem og Skákmót öðlinga sem lauk s.l. miðvikudagskvöld. Þátttökugjald er kr. 500 og er í því innifalið kaffi og góðgæti. Skákmenn 40+ eru hvattir til að fjölmenna!

Vormót Skákakademíu Kópavogs og Skákskóla Íslands í Stúkunni á föstudag

Vormót Skákakademíu Kópavogs og Skákskóla Íslands fer fram næsta föstudag í Stúkunni á Kópavogsvelli og hefst kl 14.30. Tefldar verða sjö umferðir og er tímafyrirkomulagið 5 3 Bronstein. Með mótinu lýkur vorönn en undanfarin misseri hefur Helgi Ólafsson skólastjóri Skákskólans annast æfingar í Stúkunni fyrir unga skákmenn í Kópavogi.

Mótið fer fram allt í einum flokki en veitt verða glæsileg verðlaun fyrir efstu sætin meðal þeirra sem eru skákstig og fyrir þá sem stigalaus eru. Mótið er opið öllum þeim sem sótt hafa æfingar í Stúkunni eða hafa teflt fyrir grunnskóla Kópavogs í hinum ýmsu flokkakeppnum á þessu ári. 

EM: Bein útsending frá 3.umferð

Þá eru skákir þriðju umferðar á EM farnar af stað. Vopnabræðurnir Dagur og Guðmundur glíma við afar sterka stórmeistara í dag og því er rétt að íslenskir skákáhugamenn sendi þeim félögum góða strauma.

Hægt er að fylgjast með skákunum í beinni hér.

Félagarnir eru á borðum 37-72.

Fréttaritari skak.is getur ekki betur séð en að báðir drengirnir séu með ágætar stöður þegar rúmlega 2 klst. eru liðnar af baráttunni.

Ofurmótið í Noregi hefst í dag

Sterkasta skákmót í sögu Noregs (og mögulega Norðurlandanna) hefst í Stavangri í dag.

Þátttakendur eru 10 talsins:

- Magnus Carlsen (2868)

- Levon Aronian (2813)

- Veselin Topalov (2793)

- Vishy Anand (2783)

-  Hikaru Nakamura (2775)

- Peter Svidler (2769)

- Sergey Karjakin (2767)

- Teimour Radjabov (2745)

- Wang Hao (2743)

- Jon Ludvig Hammer (2608)

 Keppnisfyrirkomulagið er þannig að fyrst fer fram hraðskáksmót (4 min + 2 sek), allir við alla, og mun sigurvegarinn fá að velja sér stað í töfluröðinni og síðan koll af kolli.  Sjálft aðalskáksmótið hefst síðan á morgun, 8.maí.

Það er margt spennandi við þetta mót. Í fyrsta lagi að sjá hvernig Magnus Carlsen stendur sig á heimavelli og ekki síður að sjá áskorandann og heimsmeistarann takast á í mótinu. Í Noregi er mikil óánægja með að heimsmeistaraeinvígið fari fram í Chennai á Indlandi og því má búast við að andrúmsloftið verði lævi blandið.

Búlgarinn Veselin Topalov snýr nú aftur í alvöru elítumót en hann vann eftirtektarverðan sigur á Grand Prix móti í Zug á dögunum þar sem hann malaði B-elítu skákheimsins. Topalov á marga aðdáaendur og þeir munu eflaust fylgjast spenntir með framgangi hans. 

Vladimir Kramnik átti að vera meðal þátttakenda en hann dró sig út úr mótinu á dögunum og í hans stað kom Peter Svidler. Sá hefur afar gott skor á heimamanninn Carlsen og spennandi verður að sjá hvort að hann heldur uppteknum hætti. 

Uppfært: Beina útsendingu frá hraðskáksmótinu má nálgast hér.  Carlsen og Anand mættust í fyrstu umferð hraðskáksmótins og gerðu jafntefli í hundleiðinlegri skák!

Magnús er brjálaður!

Sú ákvörðun FIDE, alþjóða skáksambandsins, að skrifa undir samning við indverska framtaksmenn um skipulagningu heimsmeistaraeinvígisins milli Carlsens og Anand í Chennai í Indlandi, hefur vakið hörð viðbrögð víða. Forseti norska skáksambandins hefur fordæmt ákvörðunina í opnu bréfi til FIDE og nú stígur áskorandinn sjálfur fram og lýsir yfir miklum vonbrigðum sínum í fréttatilkynningu.

Sjá nánar hér.

Carlsen segist ekki skilja þessa einhliða ákvörðun FIDE enda hafi verið mikill áhugi fyrir því að bjóða í einvígishaldið víða um heim. Aðilar í Frakklandi hafi viljað bjóða 3,5 milljónir evra og óstaðfestar fregnir herma að önnur tilboð hafi verið í bígerð. 

Þrátt fyrir óánægjuna þá ætlar Carlsen ekki að "púlla Bobbý" á þetta heldur að bíta í skjaldarrendur og glíma við heimsmeistarann á heimavelli.

Sálfræðistríðið fyrir heimsmeistaraeinvígið er hafið!

 

Skákhátíð á Ströndum 21.-23. júní: Þrír stórmeistarar skráðir til leiks á Afmælismót Jóhanns Hjartarsonar

Skákhátíð á Ströndum verður haldin dagana 21. til 23. júní og sem fyrr verður boðið upp á fjölda skemmtilegra viðburða fyrir áhugamenn úr öllum áttum. Þetta er sjötta skákhátíðin á Ströndum, sem hefur unnið sér sess sem fastur liður í skákdagatalinu.

 Að þessu sinni verða skákviðburðir á fjórum stöðum: Hólmavík, Djúpavík, Trékyllisvík og í Norðurfirði.

 Föstudaginn 21. júní klukkan 16 verður fjöltefli í Hólmavík og um kvöldið verður hið vinsæla tvískákarmót haldið í síldarverksmiðjunn í Djúpavík. Staðarhaldarar í Djúpavík bjóða gestum hátíðarinnar upp á sérstakt tilboð á gistingu og eru áhugasamir hvattir til að hafa samband sem fyrst. 

Laugardaginn 22. júní verður svo efnt til Afmælismóts Jóhanns Hjartarsonar stórmeistara, sem varð fimmtugur fyrr á árinu, í samkomuhúsinu í Trékyllisvík. Meðal keppenda verða Jóhann, Helgi Ólafsson og Jón L. Árnason, auk þess sem von er á fleiri sterkum skákmönnum. Heildarverðlaun á mótinu verða 100 þúsund krónur, auk fjölda veglegra aukavinninga.

Um kvöldið verður svo efnt til  hins árlega ,,landsleiks" heimamanna og aðkomumanna og að leik loknum verður hátíðarkvöldverður í samkomuhúsinu.

Sunnudaginn 23. júní lýkur hátíðinni í Norðurfirði með Afmælismóti Böðvars Böðvarssonar, hinnar gamalreyndu skákkempu, sem verður 77 ára þennan dag. Böðvar þarf vart að kynna fyrir skákáhugamönnum, en vegleg peningaverðlaun verða á mótinu.

Gisting er í boði á Hótel Djúpavík, auk þess sem mótshaldarar hafa yfir að ráða fyrsta flokks svefnpokagistingu í Norðurfirði. Þá eru góð tjaldstæði í Árneshreppi svo allir ættu að finna eitthvað við sitt hæfi.

Áhugasamir eru hvattir til að hafa samband sem fyrst við Hrafn Jökulsson í [e-mail] eða Róbert Lagerman í [e-mail]. 

Árneshreppur á Ströndum er afskektasta en að margra mati landsins fegursta sveit. Skákfélagið Hrókurinn stendur að hátíðinni, og mótshaldarar hlakka til að hitta gamla vini og nýja á skemmtilegri hátíð! 

EM: Pörun 3.umferðar

Þá liggur pörun þriðju umferðar fyrir á Evrópumótinu. Dagur Arngrímsson, sem byrjað hefur mótið afar vel, stýrir svörtu mönnunum gegn hvítrússneska stórmeistaranum Andrey Zhigalko (2603). Bróðir hans er ofurstórmeistarinn Sergey Zhigalko (2660) og því má segja að Zhigalko-fjölskyldan beri höfuð og herðar yfir aðrar hvítrússneskar skákfjölskyldur, ekki ósvipað og Þorfinnsson-fjölskyldan dómínerar íslenskt skáklíf svo að landar vorir geti sett hlutina í samhengi. Yfirburðirnir eru slíkir að næstu bræður sem eitthvað geta í Hvíta-Rússlandi eru Elkin-bræðurnir, Leonid (2181) og Maxim (2201), eru þeir bræður því einskonar Ássar Hvíta-Rússlands!

Guðmundur Kjartansson, sem fyrirfram hefði eflaust sætti sig við 1 vinning af 2 gegn tveimur 2600+ stórmeisturum, stýrir hvítu mönnunum gegn Íslandsvininum Illya Nyzhnyk (2635). Sá kom fyrst til landsins árið 2008, þá sem efnilegasta krútt í heimi og heillaði landsmenn alla. Núna er pilturinn ekkert krútt lengur heldur einfaldlega þaulreyndur atvinnumaður sem eirir aungvu, nema e.t.v. enska stórmeistaranum Stephen Gordon sem gerði sér lítið fyrir og lagði maskínuna í 2.umferð. Sá úkraínski hefur eflaust orðið fyrir miklum vonbrigðum með þá niðurstöðu og því treystum við því að Guðmundur stígi fast til jarðar á morgun.

Fréttaritari Skák.is óskar Degi og Guðmundi alls hins besta á morgun og hvetur íslenska skákáhugamenn til að nýta tækifærið og fylgjast með þeim í beinni útsendingu.

 *Myndin sem fylgir fréttinni er af tveimur krúttböngsum á Reykjavíkurmótinu 2008.

 

 

 

EM: 2.umferð í gangi

Önnur umferð Evrópumóts einstaklinga í Legnica í Póllandi fer fram í dag. Þegar þessi orð eru skrifuð hefur alþjóðlegi meistarinn Guðmundur Kjartansson (2446) mátt lúta í gras gegn sterkum rússneskum stórmeistara A.Rakhmanov (2616). Guðmundur lenti í talsverðri beyglu eftir byrjunina og náði ekki að rétta úr kútnum þrátt fyrir hetjulega baráttu sem ætíð einkennir okkar mann. Þrátt fyrir að fréttaritari skak.is hafi skákþekkingu á borð við orangútan þá virkaði 9. - dxc4 sem einkennileg ákvörðun og ekki síður Rf6-e8-d6 manúveringin sem var fylgt eftir með þrekskiptu peðaþrammi e7-e6-e5 og allt í steik í kjölfarið.

Ef að einhver hefur manndóm í sér til að rífa sig upp eftir slæma flengingu á hinum sextíu og fjórum reitum þá er það Guðmundur okkar Kjartansson og því bið ég lesendur um að örvænta eigi.

 Talandi um manndóm þá situr Dagur Arngrímsson (2390) enn að tafli gegn verðandi ofurstórmeistara Robert Hovhannisyan (fullt rassgat af stigum, nenni ekki að fletta því upp).  Dagur tefldi afar agressíft, fórnaði tveimur peðum fyrir virka stöðu og undirritaður var orðinn bjartsýnn. Síðan fór hinsvegar allt í steik, jafnt og þétt, og þegar Hovi var kominn með valdað frípeð á d3 þá töldu eflaust flestir daga Dags talda.

 Með djöfulegri baráttu náði hinsvegar okkar maður að einfalda taflið jafnt og þétt og rétt áður en ég ýti á "vista og birta" þá virðist allt stefna í skiptan hlut sem að væri mikið afrek.

 Uppfært: Dagur landaði jafnteflinu! Glæsilega gert.