Sumarskákmót Fjölnis hefst kl. 17.00 á miðvikudaginn

Skákdeild Fjölnis lýkur starfsárinu með árlegu sumarskákmóti sem öllum áhugasömum skákkrökkum á grunnskólaaldri er heimilt að taka þátt í.

Teflt verður í hátíðarsal Rimaskóla. Rótarýklúbbur Grafarvogs gefur þrjá eignarbikara fyrir sigur í þremur flokkum, eldri, yngri og stúlknaflokki.

Þátttaka er ókeypis. Pítsa og gos kostar 300 kr í skákhléi. Vegleg verðlaun, mörg verðlaun og boðið upp á skemmtilegt skákmót sem lokið er á tveimur tímum.

Foreldrum velkomið að fylgjast með og þiggja kaffisopa. Endum skákárið með skemmtilegu skákmóti og mætum tímanlega. Skráning á staðnum.

Tefldar sex umferðir. Umhugsunartími er sjö mínútur. Skákstjórar verða þeir Helgi Árnason og Stefán Bergsson.

 

Gallerý Skák - lokamótið: Friðgeir Hólm fór með sigur af hólmi

Það var vel mætt og góðmennt í Gallerý Skák - hugverkasmiðju - sl. fimmtudag þegar þar var att kappi í þrítugasta og síðasta sinn á þessari skáktíð og keppendur iðkuðu eins konar  „hugræna atferlismeðferð" með það að markmiði að máta hvern annan í sem fæstum leikjum.  Ekki gekk þó hugverkasmíðin ævinlega upp sem skyldi -  glæstar og álitlegar vinningsstöður gengu mönnum úr greipum, snerust upp í andhverfur sínar svo menn máttu þola óvænt og „óverðskulduð" mát  eða töp á tíma.  Oftar en ekki réði einn skakkur leikur eða snilldarleikur úrslitum, meira þarf að jafnaði ekki til í þessum hópi og skilur á milli feigs og ófeigs.  

Segja má að friðsöm átakataflmennska í góðum anda  hafi ráðið ríkjum á keppnisstað og óvenju létt yfir mönnum enda umgjörð mótsins með hátíðarsniði. Boðið var upp á ljúffengan veislukost í leikhléi, myndskreytta marsipantertu, þar sem kostur gafst á að hakka sigursælustu keppendur vetrarins í sig, t.d. þá Gunna Gunn og Gunna Birgis. Var þetta þáttur í „áfallastreytugeðröskunarhjálparferli", fyrir þá sem voru enn með böggum hildar, höfðu einhverja sárra harma að hefna eða óuppgerðar sakir við suma,  til að losa þá þannig við innibyrgða „sálrænapersónuleikahugröskunarhefndarþörf".  

Úrslit mótsins komu svolítið á óvart og þó ekki. Það var enginn annar en hinn harðsnúni skákbolti Friðgeir K. Hólm, sem fór að lokum með sigur af hólmi, þó með 2½ niður, með 8½ vinning af 11 mögulegum.  Friðgeir er afar slunginn skákmaður, teflir mikið örskákir á Netinu og hefur verið á mikilli sigurbraut undanfarið. Afrekað það ma. að verða efstur á mótum bæði í KR, Riddaranum og eins í Ásum á stuttum tíma.   Jon Olav Fivelstad, hinn norskættaði frá Fífilbrekku gróinni grund sem á það til að tefla í anda Tals og Stefán Þormar Guðmundsson, hið eitilharða Hellisheiðarséni, urðu síðan jafnir í 2.-3. sæti með 7½, Guðfinnur staðarhaldari varð fjórði með 7 vinninga. Var konu hans sérstaklega þakkað í mótslok með orkideuvendi fyrir ítarleg afnot annarra af honum í þágu skáklistarinnar.  

Mikið var um óvænt úrslit og máttu margir þekktir meistarar reitaða borðsins muna sinn fífill fegri  og sætta sig sárgramir við að komast ekki ofar á mótstöfluna að þessu sinni eins og sjá má á meðf. úrslitatöflu.  

 

 

XXX

Miðsumarmót Gallerý Skákar verður haldið í Skákseli við Selvatn þegar sól skín hvað hæst í heiði í júlí. Um er að ræða boðsmót með allt að 40 þátttakendum með veislu- og viðhafnarsniði. Áhugasamir listhafendur geta þó sótt að vera boðin þátttaka á netfanginu: [e-mail]

ESE-skákþankar 06.05.13

11.tölublað af Fréttabréfi Skáksambandsins komið út

Nýtt fréttabréf Skáksambands kom út í dag en bréfið kemur út tvisvar í mánuði yfir vetrarmánuðina og er senti tölvupósti til viðtakenda. Áskrifendur eru í dag um 600 talsins. Hægt er að skrá sig í áskrift hér á Skák.is (ofarlega til vinstri).

Meðal efnis er:

- Bragi Þorfinnsson nær sínum fyrsta stórmeistaraáfanga

- Landsmót í skólaskák á Patreksfirði

- Aðalfundur Skáksambandsins

- Góð byrjun á EM einstaklinga í Póllandi

 Hægt er að nálgast fréttablaðið hér.

Hægt er að nálgast eldri tölublöð hér.

 

 

Breska deildakeppnin: Bragi í beinni í áfangaskák - dugar jafntefli

Bragi Þorfinnsson (2478) verður í beinni útsendingu frá bresku deildakeppninni í dag en umferðin hefst kl. 10. Bragi, sem teflir fyrir klúbbinn Jutes of Kent, þarf að gera jafntefli til að krækja sér í sinn fyrsta áfanga að stórmeistaratitli. Bragi mætir Englendingum Adam Eckersley-Waites (2266).

Ingvar þór Jóhannesson (2357) hvílir í dag.

• Heimasíða bresku deildakeppninnar
• Beinar útsendingar

Hraðkvöld hjá Helli í kvöld

Taflfélagið Hellir heldur hraðkvöld mánudaginn 6. maí nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

EM einstaklinga: Frábær byrjun hjá Degi og Guðmundi

Alþjóðlegu meistararnir Guðmundur Kjartansson (2446) og Dagur Arngrímsson (2390) byrja sérdeilis vel á EM einstaklinga sem hófst í Legnica í Póllandi í dag. Guðmundur vann úkraínska stórmeistarann Sergey Fedorchuk (2660) en Dagur lagði króatíska stórmeistarann Zdenko Kozul (2624). Skákir Guðmundar og Dags fylgja með fréttinni!

Önnur umferð fer fram á morgun. Þá teflir Guðmundur við rússneska stórmeistarann Aleksandr Rakhmanov (2616) en Dagur við armenska stórmeistarann Robert Hovhannisyan (2607).

286 skákmenn taka þátt í mótinu og þar af eru 143 stórmeistarar og þar af eru 12 með 2700 skákstig eða meira. Guðmundur er nr. 170 í stigaröð keppenda og Dagur er nr. 200.

• Heimasíða mótsins
• Chess-Results
• Beinar útsendingar (hefjast kl. 13)

[Event "14th Euro Indiv 2013"] [Site "Legnica POL"] [Date "2013.05.05"] [Round "1.27"] [White "Kjartansson, Gudmundur"] [Black "Fedorchuk, Sergey A."] [Result "1-0"] [WhiteElo "2446"] [BlackElo "2660"] [WhiteTitle "IM"] [BlackTitle "GM"] [ECO "A37"] [Opening "English"] [Variation "symmetrical variation"] [WhiteFideId "2301318"] [BlackFideId "14102536"] [EventDate "2013.05.05"] 1. g3 c5 2. c4 Nc6 3. Bg2 g6 4. Nf3 Bg7 5. Nc3 Nh6 6. d4 cxd4 7. Nxd4 Nxd4 8. Bxh6 Bxh6 9. Qxd4 O-O 10. h4 Bg7 11. Qd2 d6 12. h5 Be6 13. hxg6 hxg6 14. b3 Rb8 15. Rc1 a6 16. Ne4 Bd7 17. Ng5 Bc6 18. Kf1 e6 19. Qf4 Qe7 20. Rd1 Rfd8 21. Bxc6 bxc6 22. Rd3 d5 23. Rf3 f5 24. Qh4 Kf8 25. g4 dxc4 26. gxf5 gxf5 27. e4 Rd1+ 28. Kg2 Rxh1 29. Kxh1 cxb3 30. axb3 Rb5 31. Qh5 Qe8 32. Qh7 Qe7 33. Qg6 Kg8 34. Rh3 fxe4 35. Rh8+ 1-0

[Event "14th Euro Indiv 2013"] [Site "Legnica POL"] [Date "2013.05.05"] [Round "1.57"] [White "Arngrimsson, Dagur"] [Black "Kozul, Zdenko"] [Result "1-0"] [WhiteElo "2390"] [BlackElo "2624"] [WhiteTitle "IM"] [BlackTitle "GM"] [ECO "E83"] [Opening "King's Indian"] [Variation "Saemisch, Panno formation"] [WhiteFideId "2301288"] [BlackFideId "14502879"] [EventDate "2013.05.05"] 1. d4 Nf6 2. c4 g6 3. Nc3 Bg7 4. e4 d6 5. f3 a6 6. Be3 O-O 7. Nge2 Nc6 8. Qd2 Na5 9. Nf4 Nd7 10. Rd1 e5 11. dxe5 dxe5 12. Nfd5 Nc6 13. h4 Nd4 14. h5 c6 15. hxg6 cxd5 16. gxh7+ Kh8 17. Nxd5 Nc5 18. Bh6 Bxh6 19. Qxh6 a5 20. Nc7 Rb8 21. Rh5 f6 22. Rxd4 exd4 23. Rxc5 Rf7 24. Qg6 Qf8 25. Qg8+ Qxg8 26. hxg8=Q+ Kxg8 27. Nb5 b6 28. Rd5 Bd7 29. Nxd4 Kf8 30. Kf2 Ke7 31. e5 Rc8 32. Rxd7+ Kxd7 33. e6+ Ke7 34. exf7 Kxf7 35. Bd3 Ke7 36. a3 Kd6 37. b4 axb4 38. axb4 Ra8 39. Ke3 Ra2 40. g4 Rg2 41. Nb5+ Kd7 42. Nc3 1-0

Bragi og Ingvar með jafntefli

Bragi Þorfinnsson (2478) og Ingvar Þór Jóhannesson (2357) gerðu báðir jafntefli í tíundu og næstsíðustu umferð bresku deildakeppninnar sem fram fór í dag. Bragi við enska stórmeistarann Matthew Turner (2511) en Ingvar við enska alþjóðlega meistarann Mark Ferguson (2406). Lokaumferðin fer fram á morgun og þá þarf Bragi að öllum líkindum jafntefli til að tryggja sér sinn fyrsta stórmeistaraáfanga.

Umferðin á morgun hefst kl. 10 en óljóst er hvort skákir Braga og Ingvars verði sýndar beint.

• Heimasíða bresku deildakeppninnar

Oliver Aron og Hilmir Freyr Íslandsmeistarar í skólaskák

 

Landsmótinu í skólaskák sem fram fór um helgina á Patreksfirði er nú nýlokið. Oliver Aron Jóhannsson, Rimaskóla, var Íslandsmeistari í skólaskák í eldri flokki en Hilmir Freyr Heimisson, Grunnskóla Vesturbyggðar, í þeim yngri.

 

Akureyringarnir Jón Kristinn Þorgeirsson og Símon Þórhallsson urðu í 2. og 3. sæti í eldri flokki.  Lokastöðuna í eldri flokki má nálgast á Chess-Results.

Kópavogsbúarnir Bárður Örn Birkisson og Dawid Kolka tóku sömu sæti í yngri flokki. Lokastöðuna í yngri flokki má nálgastá Chess-Results.

Ákaflega var vel staðið að mótinu. Áróra Hrönn Skúladóttir, stóð sig mjög vel í allri skipulagningu heima fyrir. Ingibjörg Edda Birgisdóttir landsmótsstjóri hélt svo ákaflega vel utan um allra aðra skipulagningu ásamt Ásdísi Bragadóttur, framkvæmdastjóra Skáksambands Íslands. Páll Sigurðsson sá um skákstjórn á skákstað.

Sveitarfélagið Vesturbyggð fær miklar þakkir fyrir veittan stuðning við mótshaldið. Flugfélagið Ernir fær einnig þakkir fyrir að stuðning við heimsókn forseta SÍ á skákstað sem ræddi við forystumenn bæjarfélaga og skólastjórnendur upp á mögulegt áframhaldandi útbreiðslustarf á suðurfjörðum Vestfjarða.

• Myndaalbúm (GB-PS-ÁHS)
• Chess-Results (eldri flokkur)
• Chess-Results (yngri flokkur)

EM einstaklinga: Guðmundur og Dagur í beinni

EM einstaklinga hófst í dag í Legnica í Póllandi. Alþjóðlegu meistararnir Guðmundur Kjartansson (2446) og Dagur Arngrímsson (2390) eru meðal keppenda.

Í fyrstu umferð, sem nú er í gangi, teflir Guðmundur við úkraínska stórmeistarann Sergey Fedorchuk (2660) en Dagur við króatíska stórmeistarann Zdenko Kozul (2624).

Skákir beggja eiga vera sýndar beint (reyndar með 10 mínútna seinkun) en svo virðist sem útsending á skák Dags sé í einhverjum ólestri.

Stórmeistarinn Þröstur Þórhallsson sem ávann sér keppnisrétt á mótinu með sigri sínum á Íslandsmótinu þurfti að draga sig úr mótinu af persónulegum ástæðum.

286 skákmenn taka þátt í mótinu og þar af eru 143 stórmeistarar og þar af eru 12 með 2700 skákstig eða meira. Guðmundur er nr. 170 í stigaröð keppenda og Dagur er nr. 200.

• Heimasíða mótsins
• Chess-Results
• Beinar útsendingar (hefjast kl. 13)

Breska deildakeppnin: Ingvar vann - Bragi tapaði

Síðasti hluti Bresku deildakeppninnar hófst í gær. Tveir íslenskir skákmenn tefla þar fyrir klúbbinn Jutes of Kent. Ingvar Þór Jóhannesson (2357) vann þýsku skákkonuna og alþjóðlega meistarann Elisabeth Paehtz (2479).  Bragi Þorfinnsson (2478) sem tefldi á fyrsta borði í gær tapaði fyrir enska alþjóðlega meistaranum Jonathan Hawkins (2503).

Mótinu er framhaldið í dag en því miður verða þeir félagarnir ekki í beinni útsendingu. Bragi teflir við enska stórmeistarann Matthew Turner (2511) en Ingvar mætir alþjóðlega meistaranum Mark Ferguson (2406).

Heimasíða bresku deildakeppninnar