Skákþáttur Morgunblaðsins: Að tefla með mönnunum

Hinn 10 ára gamli Vignir Vatnar Stefánsson gerði góða ferð á heimsmeistaramót áhugamanna sem fram fór í borginni Ilasi í Rúmeníu undir lok aprílmánaðar. Af 204 keppendum, sem samkvæmt reglum voru undir 2000 elo-stigum, var hann fyrirfram skráður í 132. sæti. Hann hlaut 6 vinninga af níu mögulegum, og hækkaði um 61 stig fyrir frammistöðuna. Afreksmenn í skákinni eru alltaf að yngjast og ekki verður betur séð en að Íslendingar standi vel að vígi hvað varðar efnivið meðal pilta og stúlkna. Varðandi skákstyrk sýnist mér Vignir Vatnar vera á svipuðu róli nú og Hjörvar Steinn Grétarsson var fyrir 10 árum, leiktæknin er góð, hæfileikarnir til staðar og spennandi tímar framundan, seinna á árinu fara fram Evrópu- og heimsmeistaramót ungmenna. Hættur „skákþorpsins" eru hinsvegar þær að hlaða of miklum væntingum á ungar sálir. Stig Vignis eftir mótið í Rúmeníu eru upp á 1739 elo, en þau segja samt ekki neitt og marktækara tel ég að miða við þann árangur sem hann náði og var reiknaður upp á 2032 elo-stig. Þarna er kannski kominn vandi elo-stiganna í hnotskurn, þau eru ekki alltaf nægilega marktæk hvað varðar unga og upprennandi skákmenn. Sennilega er stutt í að Vignir Vatnar nái að sigra mun stigahærri skákmenn en þá sem tóku þátt í mótinu í Rúmeníu.

Þegar júgóslavneski stórmeistarinn Lubomir Ljubojevic var upp á sitt besta á árunum í kringum 1975, og menn göptu hreinlega yfir tilþrifum hans í skák sem hann tefldi við Svíann Ulf Andersson á stórmótinu í Wijk aan Zee, komst einn ágætur maður svo að orði að Ljubo „tefldi með mönnunum". Lítið um allskyns pot, „raðtækni" eða geirneglingar sem einkenndu hinn nýbakaða heimsmeistara, Anatolí Karpov. Ungir skákmenn á uppleið tefla oft „með mönnunum", sbr. eftirfarandi sigurskák Vignis Vatnars sem tefld var í 8. umferð. Andstæðingurinn var nálega 300 stigum hærri en okkar maður:

HM áhugamanna 2013:

Mihail-Codmin Neahu (Rúmeníu) - Vignir Vatnar Stefánsson

Drottningarindversk vörn

1. c4 Rf6 2. g3 e6 3. Bg2 d5 4. Rf3 Bd6 5. b3 Rbd7 6. Bb2 O-O 7. O-O b6 8. cxd5 exd5 9. Rh4 c6 10. d3 He8 11. e4?

Að opna taflið án þess að hafa lokið liðsskipan kann ekki góðri lukku að stýra, 11. Rd2 var betra.

11. ... Ba6!

Vignir ræðst strax að helsta veikleikanum í stöðu hvíts, d3-reitnum.

12. He1 Bb4 13. He3

Hvítur á úr vöndu að ráða en hér var betra að leika 13. Bc3 t.d. 13. ... Bxc3 14. Rxc3 Rc5 15. exd5 og hvítur getur barist fyrir tafljöfnun.

13. ... dxe4 14. dxe4 Re5 15. Rc3 Rfg4!

Vignir gefur engin grið. Skyndilega morar allt í veikleikum í stöðu hvíts.

16. He1 Dxd1

Gott var einnig 16. ... Bc5 og hvítur fær ekki varið f2-peðið með góðu móti.

17. Hexd1 Rd3 18. Bf1 Rxb2 19. Bxa6 Rxd1

19. ... Bxc3 var nákvæmara en þetta dugar líka.

20. Rxd1 Had8 21. f3 Re5 22. Be2 Hd2 23. Kf1 Hed8 24. Rf5 g6 25. Rfe3 Kg7

Hann þarf ekkert að flýta sér. Úrvinnslan í þessu endatafli er ágæt.

26. f4 Red7 27. Rc4 Hd4 28. Rf2 b5 29. Re3 Bc3 30. Hb1 b4 31. Red1 Rf6 32. Rxc3 bxc3 33. Hc1 Rxe4 34. Rxe4 Hxe4 35. Hxc3 Hd2 36. Bf3 He6 37. a4 Hb2 38. h4 h5 39. f5 Hf6 40. fxg6 fxg6 41. Ke1 c5 42. Kd1 Hf5 43. He3 Kf6 44. Be2 Hd5+ 45. Ke1 He5 46. Hf3+ Ke6 47. Hf2 Hxb3

- og hvítur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 5. maí 2013.

Skákþættir Morgunblaðsins

[Event "WORLD AMATEUR CHESS CHAMPIONSHIP 2013"] [Site "Iasi"] [Date "2013.04.29"] [Round "8"] [White "Neagu, Mihai-Cosmin"] [Black "Stefansson, Vignir Vatnar"] [Result "0-1"] [WhiteElo "1976"] [BlackElo "1678"] [ECO "A13"] [PlyCount "94"] [EventDate "2013.04.22"] 1. c4 Nf6 2. g3 e6 3. Bg2 d5 4. Nf3 Bd6 5. b3 Nbd7 6. Bb2 O-O 7. O-O b6 8. cxd5 exd5 9. Nh4 c6 10. d3 Re8 11. e4 Ba6 12. Re1 Bb4 13. Re3 dxe4 14. dxe4 Ne5 15. Nc3 Nfg4 16. Re1 Qxd1 17. Rexd1 Nd3 18. Bf1 Nxb2 19. Bxa6 Nxd1 20. Nxd1 Rad8 21. f3 Ne5 22. Be2 Rd2 23. Kf1 Red8 24. Nf5 g6 25. Nfe3 Kg7 26. f4 Nd7 27. Nc4 Rd4 28. Nf2 b5 29. Ne3 Bc3 30. Rb1 b4 31. Ned1 Nf6 32. Nxc3 bxc3 33. Rc1 Nxe4 34. Nxe4 Rxe4 35. Rxc3 Rd2 36. Bf3 Re6 37. a4 Rb2 38. h4 h5 39. f5 Rf6 40. fxg6 fxg6 41. Ke1 c5 42. Kd1 Rf5 43. Re3 Kf6 44. Be2 Rd5+ 45. Ke1 Re5 46. Rf3+ Ke6 47. Rf2 Rxb3 0-1

Henrik endaði í 5.-11. sæti

Stórmeistarinn Henrik Danielsen (2500) endaði í 5.-11. sæti (5. sæti á stigum) á H.C. Andersen mótinu sem lauk í Óðinsvéum í dag. Henrik hlaut 6 vinninga og var taplaus á mótinu.

Í lokaumferðunum tveimur, sem fram fóru í dag, gerði hann jafntefli við stórmeistarana Eduardas Rozentalis (2611), Litháen, Momchil Nikolov (2532), Búlgaríu. Litháinn sigraði á mótinu, hlaut 7 vinninga.

Frammistaða Henriks samsvaraði 2507 skákstigum og hækkar hann um 5 stig fyrir hana. 

55 skákmenn tóku þátt og þar af fimm stórmeistarar. Henrik var nr. 5 í stigaröð keppenda.

• Heimasíða mótsins
• Beinar útsendingar

Opið meistaramót í Vin, mánudaginn 13. maí kl. 13!

Skákfélag Vinjar býður til meistaramóts í hraðskák, mánudaginn 13. maí klukkan 13. Tefldar verða 6 umferðir með 7 mínútna umhugsunartíma. Mótið er öllum opið en efsti liðsmaður Skákfélags Vinjar fær sæmdartitilinn Hraðskákmeistari Vinjar 2013. Mótið er haldið í Vin, Hverfisgötu 47.

Mikill kraftur er í Skákfélagi Vinjar og njóta mánudagsæfinar félagsins mikilla vinsælda. Síðastliðinn þriðjudag hófst meistaramót félagsins í atskák, og hafa verið tefldar 3 umferðir af 9.

Meistaramótið í hraðskák 2013 markar jafnframt upphafið að sumarstarfi skákfélagsins, en í júní eru 10 ár liðin síðan skipulagt skákstarf hófst í athvarfinu. Skákfélag Vinjar tefldi í vetur fram tveimur sveitum á Íslandsmóti skákfélaga og vann A-sveitin sér keppnisrétt í 2. deild næsta vetur.

Allir eru velkomnir á meistaramótið á mánudag, og að vanda verður boðið upp á gómsætar veitingar í leikhléi. 

Gunnar endurkjörinn forseti - Birgir nýr heiðursfélagi - landsliðseinvaldur samþykktur

Gunnar Björnsson var endurkjörinn forseti Skáksambands Íslands á aðalfundi sambandsins í gær. Birgir Sigurðsson var kjörinn nýr heiðursfélagsins sambandsins. Fjöldi lagabreytingartillagna voru samþykktar og má þar nefna tillögu um landsliðseinvald og að liðum í fyrstu deild verður fjölgað í 10 strax í haust.

Lítið breytt stjórn

Ný stjórn SÍ var kjörin í gær. Gunnar Björnsson var endurkjörinn sem forseti. Inn í aðalstjórn komu nýir Pálmi Pétursson, úr varastjórn, og Ríkharður Sveinsson, sem kemur aftur í stjórn eftir langt hlé. Úr aðalstjórn gengu Eiríkur Björnsson og Andrea Margrét Gunnarsdóttir. Andrea kom hins vegar inn í varastjórn fyrir Pálma.

Stjórn SÍ 2013-14 skipa því: Gunnar Björnsson, Helgi Árnason, Ingibjörg Edda Birgisdóttir, Pálmi Pétursson, Ríkharður Sveinsson, Róbert Lagerman og Stefán Bergsson.Varastjórn skipa: Steinþór Baldursson, Óskar Long Einarsson, Þorsteinn Stefánsson og Andrea Margrét Gunnarsdóttir.

Aðrar breytingar á embættaskipan SÍ voru þær að að Friðjón Örn Friðjónsson og Jón Rögnvaldsson óskuðu ekki eftir endurkjöri í Dómstól SÍ. Sæti þeirra taka Halldór Brynjar Halldórsson, sem verður formaður, og Bragi Halldórsson. Voru Eiríki, Friðjóni og Jóni sérstaklega þakkað fyrir góð störf.

Birgir nýr heiðursfélagi SÍ

Birgir Sigurðsson var í gær samþykktur nýr heiðursfélagi með dúndrandi lófaklappi. Í ræðu forseta kom fram mikið þakklæti til Birgis en hann hóf útgáfu á Tímaritinu Skák út á eigin reikning og vann svo við blaðið í tugi ára. Fram kom einnig í ræðu Gunnars að Birgir hafi verið brauðryðjandi í skákstarfi eldri borgara og eigi mikinn þátt í því hversu sterkt það sé í dag.

Breytingar á Íslandsmóti skákfélaga

Þrettán lagabreytingatillögur lágu fyrir fundinum og þar af voru fjórar frá stjórn SÍ. Allar tillögur stjórnarinnar voru samþykktar. Töluverðar breytingar verða á Íslandsmóti skákfélaga og það strax í haust.

Samþykkt var fjölga liðum í efstu deild í tíu og var breytingartillaga Björns Þorfinnssonar um að hún tæki strax í gildi í haust samþykkt. Það þýðir að Skákfélag Akureyrar og Skákdeild Fjölnis fá sæti í efstu deild keppnistímabilið 2013-14.

Einnig var tillaga TR og TV samþykkt með þorra atkvæða að fækka erlendum skákmönnum í hverju liði niður í tvo úr fjórum og tekur það einnig gildi strax í haust. Það er því ljóst að mun fleiri íslenskir skákmenn tefla í efstu deild en áður og að mótið verður áfangahæft fyrir íslenska titilveiðara.

Tillaga TG um lengri kærufrest var sömuleiðis samþykkt með öllum greiddum atkvæðum. Tillaga TR um fækkun í hverju liði niður í sex var hins vegar felld.

Landsliðseinvaldur

Umtalsverðar umræður urðu um tillögu stjórnar um landsliðseinvald sem og tillögur Halldórs Grétars Einarssonar og Héðins Steingrímssonar sem gengu í aðra átt, þ.e. um aukið vægi skákstiga við val á landsliði.

Tillaga stjórnar um landsliðsvalds var samþykkt með 24 atkvæðum gegn 2. Landsliðseinvaldur hefur þar með fullt umboð til að velja landslið Íslands að öðru leyti en því að Íslandsmeistari bæði karla og kvenna eigi alltaf beinan rétt í landsliðið.

Ágúst Sindri Karlsson og Áskell Örn Kárason voru fundarstjórar í gær og hafði Áskell á því orð að fundurinn hefði verið ákaflega málefnalegur.

Fundargerð fundarsins verður birt þegar hún verður tilbúin sem verður vonandi fljólega.

Hilmir Freyr Heimisson sigraði á Vormóti Skákskóla Íslands og Skákakademíu Kópavogs

Hilmir Freyr Heimisson sigraði á Vormóti Skákskóla Íslands og Skákakademíu Kópavogs  sem fram fór í Stúkunni á föstudaginn en 28 piltar og stúlkur sem sótt hafa kennslu og þjálfun í Stúkuna í vetur og haust sem leið tefldu sjö umferðir eftir svissneska kerfinu með tímafyrirkomulaginu 5 3 Bronstein.

Hilmir Freyr, sem hefur verið meðlimur i hinni öflugu sveit Salaskóla undanfarin misseri, hefur búið á Patreksfirði síðan eftir áramót og sigraði í yngra aldursflokknum á Íslandsmótinu í skólaskák sem fram fór á Patreksfirði á dögunum.  Hilmir Freyr vann einnig jólamót Skákskóla Íslands og Skákakademíu Kópavogs.

Fyrirfram var búist við harðri keppni milli Hilmis, Vignis Vatnars Stefánssonar og þeirra sem skipa sveit meðlima Íslandsmeistara Álfhólsskóla, Dawid Kolka, Felix Steinþórssonar og Guðmundar Agnars Bragasonar. Úrslitin virtust ætla að ráðast um miðvik mótsins þegar Hilmir vann skák sína við Vigni Vatnar eftir mikla baráttu og lagði síðan Dawid Kolka að velli. En í sjöttu og næst síðustu umferð var hann hætt kominn og var sennilega með tapað tafl þegar Jón Otti Sigurjónsson gleymdi sér eitt augnablik, hugsaði sig of lengi um og féll á tíma. Vignir Vatnar varð í 2. sæti með 5½ v. af sjö mögulegum og Dawid Kolka varð í 3. sæti með 5 vinninga ásamt fleirum en var hæstur á stigum. Þessir þrír hlutu verðlaun fyrir bestan árangur keppenda með skákstig. 

Sigurvegari í flokki keppenda án skákstiga varð Elvar Ingi Guðmundsson sem hlaut 5 vinninga, Orri Fannar Björnsson varð í 2. sæti með 4 vinninga og í 3. sæti varð Kjartan Gauti Gíslason einnig með 4 vinninga. 

Veitt voru sérstök verðlaun fyrir bestan árangur með stúlkna og komu þau í hlut Tinnu Þrastardóttur sem hlaut 3 vinninga af 7 mögulegum, fékk jafn marga vinninga og Móey María Sigþórsdóttir en var hærri á stigum. Með þessu móti lauk vorönn Skákskóla Íslands og Skákakademíu Kópavogs í Stúkunni á Kópavogsvelli. 

Mótsstjórar voru Helgi Ólafsson og Björn Ívar Karlsson.

Lokastaðan:

Vormót Skákskóla Íslands og Skákakademíu Kópavogs

   1    2 Heimisson Hilmir Freyr     1677 ISL 6½  29½

   2    1 Stefánsson Vignir Vatnar   1678 ISL 5½  31½

   3    3 Kolka Dawid                1646 ISL  5  31 

   4    6 Vigfússon Róbert Örn       1098 ISL  5  30½

   5   11 Bragason Guðmundur Agnar   1400 ISL  5  29½

   6    4 Steinþórsson Felix         1463 ISL  5  28½

   7   13 Guðmundsson Elvar Ingi        0 ISL  5  28 

   8    5 Ragnarsson Heimir Páll     1233 ISL  4  32 

   9    7 Sigurjónsson Jón Otti      1000 ISL  4  27 

  10   10 Björnsson Orri Fannar         0 ISL  4  26½

  11   14 Gíslason Kjartan Gauti        0 ISL  4  26 

  12    9 Björnsson Benedikt Árni       0 ISL  4  25 

  13   27 Árnason Jóhannes Þór          0 ISL  4  21 

  14   23 Sigurjónsson Axel Óli         0 ISL 3½  23½

  15   19 Kristinsson Ágúst Unnar       0 ISL 3½  21½

  16    8 Woodard Aron Ingi          1000 ISL  3  28½

  17   15 Helgason Hafþór               0 ISL  3  26 

  18   26 Tómasson Andri Már            0 ISL  3  23 

  19   20 Kristófersson Sindri Snær     0 ISL  3  22½

  20   28 Þrastardóttir Tinna           0 ISL  3  22½

  21   25 Sigþórsson Samúel Týr         0 ISL  3  20 

  22   24 Sigþórsdóttir Móey María      0 ISL  3  15 

  23   17 Ingvarsson Hrafn Goði         0 ISL  2  23½

  24   22 Matthíasdóttir Guðrún Vala    0 ISL  2  20½

  25   21 Luu Róbert                    0 ISL  2  18½

  26   18 Karlsson Ísak Orri            0 ISL  2  18½

  27   16 Hlynsson Ísak Aron            0 ISL  1  20½

  28   12 Erlingsson Ingibert Snær      0 ISL  0  16 

 Myndaalbúm

EM: Guðmundur vann en Dagur tapaði

Guðmundur Kjartansson (2446) vann Pólverjann Piotr Sabuk (2206) í sjöundu umferð EM einstaklinga sem fram fór í Legnica í Póllandi í gær. Dagur Arngrímsson (2390) tapaði hins vegar fyrir rússneska stórmeistaranum Anton Shomoev (2561).  Guðmundur hefur 3,5 vinning en Dagur hefur 2,5 vinning.

Í dag er frídagur. Á morgun teflir Guðmundur við ísraelska stórmeistarann Michael Roiz (2617) en Dagur við Tyrkjann Aydin Duman (2265). 

286 skákmenn taka þátt í mótinu og þar af eru 143 stórmeistarar og þar af eru 12 með 2700 skákstig eða meira. Guðmundur er nr. 170 í stigaröð keppenda og Dagur er nr. 200.

• Heimasíða mótsins
• Chess-Results
• Beinar útsendingar (hefjast kl. 13)

Henrik með tvö jafntefl í gær

Stórmeistarinn Henrik Danielsen (2500) gerði jafntefli í báðum skákum gærdagsins á H.C. Andersen mótinu í Óðinsvéum. Henrik hefur 5 vinninga eftir 7 umferðir og er í 4.-11. sæti.

Andstæðingar gærdagsins voru alþjóðlegu meistararnir Torsten Bae (2442) og Thorsten Michael Haub (2462). Í áttundu og næstsíðustu umferð sem nú er í gangi mætir hann litháíska stórmeistaranum Eduardas Rozentalis (2611).

Tefldar eru tvær umferðir á dag og hefjast þær kl. 7 og 13. 55 skákmenn taka þátt og þar af fimm stórmeistarar. Henrik er nr. 5 í stigaröð keppenda.

• Heimasíða mótsins
• Beinar útsendingar

Aðalfundur SÍ hefst kl. 10

Aðalfundur Skáksambands Íslands fer laugardaginn 11. maí og verður haldinn í húsnæði Taflfélags Reykjavíkur í Faxafeni 12.

Allir stjórnarmenn stjórnar SÍ að Eiríki Björnssyni undanskyldum, sem er að fara í námsfrí erlendis gefa kost á sér til endurkjörs.

Smávægilegur hagnaður var á síðsata starfsári eða um 300.000 kr. Ársreikninga sambandsins má nálgast hér (excel)

Mikið tillöguflóð liggur fyrir fundum eða alls 13 lagabreytingartillögur! Fjórar þeirra eru frá stjórn SÍ. Tillögurnar snúa meðal annars að vali á landsliði og breyttu fyrirkomulagi á Íslandsmóti skákfélaga.

Allar tillögurnar má nálgast hér (zip).

Fundurinn er opinn öllum en aðeins þingfulltrúar (fulltrúar félaganna) hafa atkvæðisrétt.

Karjakin efstur í Noregi

Sergey Karjakin heldur áfram sigurgöngu sinni í Sandnes í Noregi. Í dag vann hann Jon Ludvig Hammer og er efstur með fullt hús eftir 3 umferðir og hefur vinnings forskot á næstu menn sem eru Aronian og Anand. Carlsen gerði sitt þriðja jafntefli í röð nú gegn Nakamura.

Úrslit 3. umferðar:

ANAND Viswanathan	1-0	TOPALOV Veselin
NAKAMURA Hikaru	½ -½	CARLSEN Magnus
SVIDLER Peter	½ -½	ARONIAN Levon
RADJABOV Teimour	1-0	HAMMER Jon Ludvig
KARJAKIN Sergey	1-0	WANG Hao

Röð efstu manna:

• 1. Karjakin 3 v.
• 2.-3. Aronian og Anand 2 v.
• 4.-7. Carlsen, Nakamura, Svidler og Radjabov 1,5 v.
• 8.-9. Wang Hao og Topalov 1 v.
• 10. Hammer 0 v.

Frídagur er á morgun, 11. maí, vegna aðalfundar SÍ.

• Heimasíða mótsins
• Beinar útsendingar (hefjast kl. 13)

EM: Dagur með jafntefli - Guðmundur tapaði

Dagur Arngrímsson (2390) gerði jafntefli við Rúmenann Bogdal-Daniel Deac (2183) í sjöttu umferð EM einstaklinga sem fram fór í Legnica í Póllandi í dag. Guðmundur Kjartansson (2446) tapaði hins vegar fyrir ítalska stórmeistarann Sabino Brunello (2580). Báðir hafa þeir 2,5 vinning.

Í sjöundu umferð, sem fram fer á morgun, teflir Dagur við rússneska stórmeistarann Anton Shomoev (2561) en Guðmundur við Pólverjann Piotr Sabuk (2206). Hvorugur verður í beinni útsendingu á morgun.

286 skákmenn taka þátt í mótinu og þar af eru 143 stórmeistarar og þar af eru 12 með 2700 skákstig eða meira. Guðmundur er nr. 170 í stigaröð keppenda og Dagur er nr. 200.

• Heimasíða mótsins
• Chess-Results
• Beinar útsendingar (hefjast kl. 13)