Dagur vann í fyrstu umferð í Búdapest

Alþjóðlegi meistarinn Dagur Arngrímsson (2381) hóf í dag í Búdapest taflmennsku á First Saturday-skákmóti. Í fyrstu umferð vann hann ungverska alþjóðlega meistarann Peter Lizak (2408).

• Heimasíða mótsins
• Chess-Results (ekki enn tilbúið)

 

Guðmundur í 2.-3. sæti í Sabadell

Alþjóðlegi meistarinn Guðmundur Kjartansson (2434) er í 2.-3. sæti á alþjóðlegu móti sem nú er í gangi í Sabadell á Spáni. Hann hefur 4,5 vinning eftir 6 umferðir. Hann er búinn að vinna tvo alþjóðlega meistara (2376-2408) í röð. 

Í sjöundu umferð á morgun mætir hann stigahæsta keppenda mótsins, armenska stórmeistaranum Karen Movsziszian (2503)

Alls taka 32 skákmenn frá 9 löndum þátt í þessu móti. Þar af eru 2 stórmeistarar og 9 alþjóðlegi meistarar. Guðmundur er nr. 6 í stigaröð keppenda.

• Heimasíða mótsins
• Chess-Results

Hvernig verða liðin á morgun?

Mikið hefur spáð og spekúlerað í úrslitaviðureign Hraðskákkeppni taflfélaga sem fram fer á morgun. En hvernig verða liðin á morgun?

Liðsstjórar hafa haldið liðunum þétt upp að sér. Samkvæmt heimildum ritstjóra er líklegt að eftirtaldir skipi liðin á morgun.

Goðinn-Mátar:

• GM Helgi Áss Grétarsson 2460
• GM Þröstur Þórhallsson 2449
• FM Sigurður Daði Sigfússon 2320
• FM Ásgeir P. Ásbjörnsson 2293
• FM Einar Hjalti Jensson 2290
• FM Þröstur Árnason 2265
• Hlíðar Þór Hreinsson 2238
• Magnús Teitsson 2220
• Kristján Eðvarðsson 2212
• Arnar Þorsteinsson 2205
• Pálmi Pétursson 2205
• Björn Þorsteinsson 2203
• Tómas Björnsson 2143

Lið Víkingaklúbbsins:

• GM Hannes Hlífar Stefánsson 2521
• GM Stefán Kristjánsson 2491
• FM Magnús Örn Úlfarsson 2389
• IM Björn Þorfinnsson 2385
• FM Davíð Kjartansson 2348
• Ólafur B. Þórsson 2210
• Stefán Þór Sigurjónsson 2104
• Gunnar Freyr Rúnarsson 2074
• Lárus Knútsson 2057 

Samkvæmt þessu teljast Víkingar vera stigahærri á borðum 1-5 en Goð-Mátar stigahærri á sjötta borði. Það segir þó ekki alla söguna því innan Goð/Máta eru margir annálaðir hraðskákmenn.

Við heyrum álit nokkurra skákspekinga á líklegum úrslitum í kvöld.

Úrslitaviðureign Hraðskákkeppni taflfélaga fer fram á morgun - hvað segja liðsstjórarnir?

Úrslitaviðureign Hraðskákkeppni taflfélaga fer fram á morgun og hefst kl. 14. Teflt er í húsnæði Skákskóla Íslands, Faxafeni 12. Það er endurtekið efni frá í fyrra en sömu tefla til úrslita og þá, þ.e. Goðinn-Mátar og Víkingaklúbburinn. Þá sigraði Víkingaklúbburinn eftir bráðabana í afar spennandi viðureign.

Helstu skákspekingar landsins spá langflestir afar spennandi viðureign en ritstjóri hefur leitað til margra þeirra og verður álit nokkra þeirra birt á Skák.is fyrir viðureignina.

Síðar í dag verður umfjöllun um líklega liðsskipan liðanna hér á Skák.is.

Ritstjóri tók viðtöl við liðsstjórana þá Jón Þorvaldsson (Goðinn-Mátar) og Gunnar Freyr Rúnarsson (Víkingaklúbburinn) í gær.

Hverjir eru helstu styrkleikar liðsins:

JÞ:

Góður liðsandi, leikgleði og mikil breidd.

GFR:

Við erum ótrúlega baráttuglaðir, erum m.a frægir klukkuberjarar formaðurinn (Gunnar, Stefán Thor) og fl. gamlir jaxlar, Við fengum svo nokkrar vélar í fyrra og m.a hefur Hannes Hlífar ekki tapað skák á þessu ári fyrir Víkingaklúbbinn. Svo höfum við Jónas Jónasson þegar allt er komið í háaloft. Jónas er einhver mesti keppnismaður norðan alpafjalla og allir andstæðingar okkar óttast berserkinn!

Hverjir eru helstu veikleikar liðsins:

JÞ:

Samúð með þeim sem minna mega sín. 

GFR:

Við erum helst veikir fyrir fögrum konum og góðum vínum, en Goðar eru það karlmannalegir að við kiknum ekki í hnjáliðunum fyrir Einari Hjalta og Jóni Þorvalds :)  En við munum samfagna GM ef þeir tefla eins og menn á sunnudaginn :)

Tilhögun æfinga fyrir lokaslaginn

 

JÞ

Skroppið í æfingabúðir að Laugarvatni í í dag.

Fjallganga undir stjórn Arnars Þorsteinssonar.

Liðkun og teygjur undir stjórn Arnars Grant.

Teflt hratt upp úr völdum skákbókum undir stjórn Einars Hjalta.

Hollustufæði undir stjórn Magnúsar Teitssonar: trjónukrabbi, hundasúra, hvönn, áfir og ólekja.

GFR:

Við erum búnir að taka nokkrar Víkingaskákir yfir góðum mjöð og hlustum á Metalicu og Rammstein á æfingum hjá Víkingaklúbbnum og Forgjafarklúbbum. Lagið sem formaðurinn spilar alltaf í bílnum á leiðina á skákstað er Master of Puppets  

Strategía í lokaviðureign

JÞ:

Tíðar innáskiptingar í krafti mikillar breiddar.

GFR:

Hluti af hópnum fer alltaf í golf daginn áður, eða jafnvel sama dag og við eigum viðureig í hraðkeppninni. Thessi hjátrú hefur reyndar ekki klikkað enn og við erum enn ósigraðir....

Spá liðsstjóra 

JÞ:

Jafntefli, 36-36, eins og í fyrra en að þessu sinni hefur GM betur í bráðabana.

GFR

Við endum aftur í bráðabana eins og í fyrra

Búningar leikmanna

JÞ 

Spidermangallinn víðfrægi.

GFR

Gömlu góðu Víkingahjálmarnir sem Magnús heitin Ólafsson gaf okkur hafa verið okkar einkennisbúningur

Víkingar lögðu Akureyringa - mæta Goðum/Mátum í úrslitum

Fyrirfram var búst við öruggum sigri Víkingaklúbbsins á Skákfélagi Akureyrar. Víkingar eru ríkjandi meistarar og hafa nokkra titilhafa innan sinna raða. Akureyringar eru þó þekktir hraðskákmenn og komust einu sinni í úrslit keppninnar þar sem munaði ekki nema vinning á að þeir yrðu meistarar. Hvorugt lið mætti með alla sína sterkustu menn til leiks en heldur meir vantaði í Víkinga sem m.a. þurftu að gefa tvær skákir í fyrstu umferðunum sökum manneklu. Jafnræði var því með sveitunum í fyrstu umferðunum en þegar leið á fyrri umferðina þéttust raðir Víkinga sem náðu góðu forskoti eftir 6-0 sigur í sjöttu umferð. Var því einungis formsatriði fyrir Víkinga að klára viðureignina eftir hlé og liðsstjóri þeirra hinn herskái ljúflingur Gunnar Freyr Rúnarsson gat andað léttar.

Viðureignin endaði svo 48.5 - 23.5 fyrir Víkinga.

Bestum árangri SA-manna náðu:

Jón Garðar Viðarsson 6/12

Stefán Bergsson 5.5/12

Halldór Brynjar Halldórsson 5.5/12

Aðrir sem tefldu: Mikael Jóhann Karlsson, Loftur Baldvinsson, Gylfi Þórhallsson, Björn Finnbogason og Óskar Long Einarsson.

Árangur Víkinga:

Hannes Hlífar 11 af 11

Björn Þorfinnsson

Davíð Kjartansson 10 af 12

Gunnar Freyr Rúnarsson 8 af 12

Lárus Knútsson 5 af 7 

Sigurður Ingason 1 af 7

Haraldur Baldursson 3 af 8

Jónas Jónasson 2 af 2 

Úrslitin fara fram kl. 14 á sunnudaginn í húsnæði Skákskóla Íslands.

Goðinn-Mátar sigraði Bolvíkinga - mæta Víkingaklúbbnum í úrslitum

Goðinn-Mátar vann nauman sigur á Taflfélagi Bolungarvíkur í undanúrslitum hraðskákkeppni taflfélaga í gærkvöld. Lokatölur urðu 37-35 Goðanum-Mátum í vil.

Eftir fyrri hlutann höfðu Goðmátar forystu, 20 vinninga gegn 16. Bolar unnu því seinni hlutann 19 - 17.

Keppnin fór fram í húsnæði SÍ við Faxafen og var æsispennandi eins og ráða má af tölunum. Fyrir síðustu umferð voru Goðmátar tveimur vinningum yfir og höfðu Bolar hvítt á öllum borðum í lokarimmunni.

Þrátt fyrir mikla baráttu á öllum borðum tókst Vestanmönnunum knáu ekki að saxa frekar á forskotið og niðurstaðan varð eins og áður segir.

Sveitirnar voru vel mannaðar. Bolvíkingar mættu með Jóhann Hjartarson, Braga Þorfinnsson, Jón Viktor Gunnarsson, Guðmund Gíslason, Halldór Grétar Einarsson og Guðna Stefán Pétursson.

Goðmátar mættu með Helga Áss Grétarsson, Þröst Þórhallsson, Einar Hjalta Jensson, Sigurð Daða Sigfússon, Ásgeir P. Ásbjörnsson, Arnar Þorsteinsson, Kristján Eðvarðsson, Þröst Árnason og Tómas Björnsson.

Sterkastir hjá Goðanum Mátum voru Þröstur Þórhalls með 8,5 af 12, Arnar Þorsteins með 6 af 9, Ásgeir P. með 6,5 af 12 og Helgi Áss, sem var nokkuð frá sínu besta að þessu sinni,  með 6 af 12.

Sterkastir Bolvíkinga voru Bragi Þorfinns og Guðmundur Gísla með 8,5 vinninga af 12, Jón Viktor með 8 af 12 og Jóhann Hjartarson sem aldrei þessu vant var ekki meðal allra efstu manna og hlaut 6 af 12.

Þar munaði því að Kristján Eðvarðs vann Jóhann tvisvar enda hefur Kristján lagt sig í framkróka eftir því að skilja og greina skákstíl þessa besta skákmanns okkar.

Hefur hann þar notið aðstoðar ofurtölvu einnar en annars hvílir mikil leynd yfir því hvernig hann afrekaði þetta.

Bolvíkingar sáu um bruðerí í hléi og hljóta þakkir fyrir og eins er meistara Rúnari Berg þökkuð óaðfinnanleg dómgæsla og stigavarsla sem var til fyrirmyndar í hvívetna.

Pálmi R. Pétursson

Vetrarstarf SSON byrjar með látum

Vetrarstarf SSON byrjaði með hörku æfingu 4. sept. Tíu manns mættu og þ.á.m. Gunnar Björnsson formaður SÍ. Fyrir utan það að heilsa upp á félagsmenn og tefla skoðaði Gunnar Fischersetrið. Heimamenn kappkostuðu við að vera gestrisnir við Gunnar eins og sjá má á úrslitum kvöldsins. Allir komust þó á blað en komu misjafnir undan sumri. Framundan er síðan meistaramót félagsins sem auglýst verður nánar
fljótlega.

Athygli vekur að Erlingur Atli og Maggi Matt. gerðu jafntefli við Gunnar en  Magnús hefur reyndar nokkuð gott tak á Gunnari að sögn Magnúsar. Aðspurður sagðist Björgvin vera að spara orkuna fyrir komandi meistaramót. Ingimundur, Úlfhéðinn og Erlingur Jensson alltaf þéttir og gaman að sjá gamla brýnið hann Magnús Gunnarsson tefla, svo og nýliðann Jón Snorra. Grantas kemur til með að verða sterkur í vetur og byrjaður að stúdera bók um Fischer á rússnesku. 

Úrslit: 
1. Gunnar Björnsson 8 v.
2. Ingimundur 7,5
3. Erlingur Jensson 6,5
4. Magnús Matt. 6 v. 
5. Úlfhéðinn 5 v. 
6.-7. Björgvin og Grantas 4 v. 
8.-9. Magnús Gunnars
     og Erlingur Atli 1,5 v. 
10. Jón Snorri  1 v.  

-/bsg

Heimasíða SSON

DV spáir Víkingum og Bolvíkingum í úrslit

Í kvöld fara fram undanúrslit Hraðskákkeppni taflfélaga. Spennan er farinn að magnast og heyrst hefur að vissir liðsstjórar hafi átt erfitt um svefn síðustu nætur. Skáklandið í DV fer yfir viðureignir kvöldsins og spáir Víkingaklúbbnum öruggum sigri á Skakfélagi Akureyrar 48-24 en spáir að Bolvíkingar vinni Goð/Máta 37½-34½ þar sem úrslitin muni ráðast í lokaumferðinni.

Grípum niður í pistilinn á Skáklandinu:

Bolvíkingar eru þéttari á efstu fjórum borðunum. Sérstaklega eru Jóhann, Bragi og Jón Viktor sterkir hraðskákmenn og eru allir líklegir til að fá um og yfir átta vinninga í kvöld. Goðmátar eru hins vegar með mun meiri breidd sem sýnir sig t.d. á því að þeir eiga tvær sveitir í 1. deild á Íslandmóti skákfélaga komandi vetur. Þeir ættu því að hafa vinninginn á neðri borðunum. En þó styrkir þátttaka Gumma Gísla Bolvíkinga mikið og eykur breidd þeirra.

Pistillinn í heild sinni

Viðureignirnar hefjast kl. 20, fara fram í húsnæði SÍ, Faxafeni 12. Gestir og gangandi eru velkomnir á mótsstað.

Ný alþjóðleg skákstig

Ný alþjóðleg skákstig komu út 1. september sl. Jóhann Hjartarson (2583) er sem fyrr stigahæstur íslenskra skákmanna. Helgi Ólafsson (2544) er næststigahæstur og Héðinn Steingrímsson (2543) númer þrjú í stigaröðinni. Hilmir Freyr Heimisson hækkaði langmest frá ágúst-listanum eða um 52 skákstig. Annars voru óverulegar breytingar á milli lista enda ekkert kappskákmótahald á Íslandi á þessum tíma.

Topp 20

 

No.	Name	Tit	sep.13	Gms	Diff
1	Hjartarson, Johann	GM	2583	0	0
2	Olafsson, Helgi	GM	2544	0	0
3	Steingrimsson, Hedinn	GM	2543	9	-6
4	Petursson, Margeir	GM	2532	0	0
5	Stefansson, Hannes	GM	2521	9	-5
6	Gretarsson, Hjorvar Steinn	IM	2505	0	0
7	Arnason, Jon L	GM	2502	0	0
8	Danielsen, Henrik	GM	2501	10	1
9	Kristjansson, Stefan	GM	2491	0	0
10	Thorfinnsson, Bragi	IM	2483	9	-10
11	Thorsteins, Karl	IM	2463	0	0
12	Gretarsson, Helgi Ass	GM	2460	0	0
13	Thorhallsson, Throstur	GM	2449	0	0
14	Gunnarsson, Arnar	IM	2441	0	0
15	Kjartansson, Gudmundur	IM	2434	18	0
16	Gunnarsson, Jon Viktor	IM	2409	0	0
17	Olafsson, Fridrik	GM	2407	0	0
18	Bjornsson, Sigurbjorn	FM	2395	0	0
19	Ulfarsson, Magnus Orn	FM	2389	0	0
20	Thorfinnsson, Bjorn	IM	2385	9	-18

Magnus Carlsen (2862) er langstigahæsti skákmaður heims. Upplýsingar um 100 stigahæstu skákmenn heims má nálgast hér.

Íslenska listann (virkir skákmenn) má nálgast í viðhengi (PDF).

Skrár tengdar þessari bloggfærslu:

• althjo_leg_skakstig_1_september_2013.pdf

Haustmót TR hefst 15. september

Haustmót Taflfélags Reykjavíkur 2013 hefst sunnudaginn 15. september kl.14. Mótið er eitt af aðalmótum vetrarins í reykvísku skáklífi og jafnframt meistaramót T.R. Það er áratuga gömul hefð fyrir hinu vinsæla Haustmóti og er það flokkaskipt.  Mótið er öllum opið. 

Mótið fer fram í félagsheimili Taflfélags Reykjavíkur, skákhöllinni að Faxafeni 12. Sú nýbreytni verður að teflt er tvisvar í viku.  Alls eru níu umferðir í hverjum flokki. Lokuðu flokkarnir eru skipaðir tíu keppendum hver þar sem allir tefla við alla, en í opna flokknum er teflt eftir svissnesku kerfi.

Skráning fer fram hér á Skák.is og á heimasíðu Taflfélags Reykjavíkur.

Hægt er að fylgjast með skráningu hér..

Skráningu í alla lokaða flokka lýkur laugardaginn 14. september kl. 18.

Lokaumferð fer fram föstudaginn 18. október en mótinu lýkur með verðlaunaafhendingu sunnudaginn 20. október ásamt Hraðskákmóti T.R.

Núverandi skákmeistari Taflfélags Reykjavíkur er Daði Ómarsson.

Dagskrá:

1. umferð: Sunnudag 15. september kl.14.00 
2. umferð: Miðvikudag 18. september kl.19.30

3. umferð: Sunnudag 22. september kl.14.00 
4. umferð: Miðvikudag 25. september kl.19.30

5. umferð: Sunnudag 29. september kl.14.00

6. umferð: Miðvikudag 2. október kl.19.30 
7. umferð: Sunnudag 6. október kl.14.00

---Hlé vegna Islandsmóts skákfélaga---
8. umferð: Miðvikudag 16. október kl. 19.30 
9. umferð: Föstudag 18. október. kl.19.30 

Verðlaun í A-flokki: 
1. sæti kr. 100.000 
2. sæti kr. 50.000 
3. sæti kr. 25.000 
4. og 5. sæti ókeypis í Skákþing Reykjavíkur 2014

Verðlaun í B-flokki: 
1. sæti kr. 20.000
2.-3. sæti ókeypis í Skákþing Reykjavíkur 2014

Verðlaun í C-flokki: 
1. sæti kr. 15.000 
2. og 3. sæti ókeypis í Skákþing Reykjavíkur 2014

Verðlaun í opnum flokki:

1. sæti kr. 10.000 
2. og 3. sæti ókeypis í Skákþing Reykjavíkur 2014

Ef fjöldi lokaðra flokka eykst, verða verðlaun í þeim þau sömu og í C-flokki.

Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu.

Verði keppendur jafnir í efstu sætum verður peningaverðlaunum skipt en stigaútreikningur látinn ráða lokaröð keppenda.

Tímamörk:

1 klst. og 30 mín. + 30 sek. á leik. 

Þátttökugjöld:

3.500 kr. fyrir félagsmenn T.R. 16 ára og eldri (5.000 kr. fyrir aðra). 
1.500 kr. fyrir félagsmenn T.R. 15 ára og yngri (2.500 kr. fyrir aðra).